Wan sani foe no frigiti moro, di pasa na Fransikondre
„WI NO WANI WAN JEHOVAH FOTO DJASO!” ben skrifi na tapoe bigi pamflet di ben de foe si na ini a heri foto. „Meki wi alamala span anoe makandra teige a Jehovah projekt”, na so wan tra groepoe ben bari di ben gens a projekt. Troetroe hondrohondro artikel na ini koranti nanga tijdschrift ben meki na afersi disi bekènti gi a poebliki. Sma ben poti den nen na ondro brifi di den skrifi foe aksi lanti foe doe wan sani, èn wan kefalek bigi nomroe foe moro leki wan afoe miljoen pamflet di ben taki foe a projekt ben doro na ini den brifi boksoe foe den sma ini a foto drape. San ben de a projekt disi di ben broeja a foto Louviers, na a noord-westsei foe Fransikondre, di moro foeroe de wan tiri foto? A meki di plan ben meki foe bow wan njoen bijkantoro nanga tanpresi foe Jehovah Kotoigi.
Jehovah e meki en gro
A wroko foe Jehovah Kotoigi na Fransikondre ben bigin na a kaba foe a di foe 19 jarihondro. A fosi presi pe bijbel poeblikâsi ben poti foe teki, ben opo na ini 1905 na Beauvène, na a zuidsei foe Fransikondre, èn sensi 1919 wan pikin kantoro ben tiri a wroko na Parijs. Wan bijkantoro ben opo troetroe na Parijs na ini 1930, èn a jari na baka den sma di ben wroko drape ben go tan na wan Bethel-oso na Enghien-les-Bains, na a noordsei foe Parijs. Baka a di foe Toe Grontapoefeti, a Bethelfamiri ben froisi go baka na Parijs, èn na ini 1959 a bijkantoro ben froisi go na wan gebow di ben abi feifi verdieping èn di ben de na Boulogne-Billancourt, na a westsei lanki foe na edefoto Parijs.
Foe di a Kownoekondre preikiwroko ben gro, dati meki na ini 1973 a drukkerij nanga verzendafdeling ben froisi go na Louviers, 100 kilometer westsei foe Parijs, ala di den kantoro ben tan na Boulogne-Billancourt. Ma a gro di a nomroe foe preikiman ben gro na Fransikondre, ben meki taki den gebow na Louviers no ben nofo, ala di den ben meki den kon moro bigi na ini 1978 nanga 1985. So boen, a bosroiti ben teki foe meki a presi moro bigi èn tjari a heri Bethelfamiri kon makandra na wán presi. A no ala sma na Louvier ben lobi a projekt disi, soleki fa wi ben taki dati kaba na a bigin. Ala di a gens disi ben de, tokoe wan presi ben feni so wan wán nanga afoe kilometer foe a drukkerij. Siksi jari foe tranga wroko ben doe, èn te foe kaba, baka 23 jari foe pratifasi, a heri Bethelfamiri ben kon tan na wan presi na Louviers na ini augustus 1996.
Na so a ben pasa taki nanga bigi prisiri wan bigi kolokoe ipi foe 1187 sma, so srefi den 300 memre foe a Bethelfamiri foe Fransikondre, nanga 329 tra sma foe 42 tra bijkantoro, ben kon makandra tapoe satra 15 november 1997 foe arki na inwijding lezing di brada Lloyd Barry, wan memre foe a Tiri Skin, ben hori. Ma foe di na inwijding disi ben feni presi ala di koranti, tijdschrift, radio nanga telefisi ben sori feantifasi èn ben taki ogri-ati lei di ben go nanga langa teige Jehovah Kotoigi na heri Fransikondre, meki a firi ben de taki ala Kotoigi foe Fransikondre ben moesoe man abi wan prati na a fesa disi foe a wini di den ben wini. Leki wan bakapisi foe dati, tapoe sonde 16 november wan spesroetoe konmakandra ben orga nanga a nen „Tan na ini a lobi foe Krestes” èn dati ben hori na a poebliki presi foe Villepinte, leti na a noordsei foe Parijs. Ala Jehovah Kotoigi foe Fransikondre makandra nanga kotoigi di e taki a Fransitongo foe Belgia nanga Switserland, ben kisi wan kari èn so srefi gemeente na Ingrisikondre, Doisrikondre, Luxemburg, nanga Bakrakondre ben kisi wan kari toe.
Wan konmakandra di ben kenki sani
Den brada ben bigi sreka sani gi a konmakandra disi so wan siksi moen na fesi. Baka dati, soso toe wiki bifo na inwijding, den man foe Fransikondre di ben rèi truck ben tapoe nanga wroko, èn den ben tapoe ala den bigi pasi èn ben meki taki sma no man kisi na oli di de fanowdoe gi den wagi. A ben sa kan taki den stoeroe nanga den tra sani di de fanowdoe ben sa man doro biten? A ben sa kan taki a tapoe di den ben tapoe den pasi, ben sa man tapoe den brada foe kon na a konmakandra? Ala sma ben firi froelekti di fosi wán wiki pasa, den wan di ben tapoe nanga wroko ben bigin wroko baka èn ala den pasi ben opo baka. Tapoe freida neti, bifo a kaba foe a wiki foe na inwijding, 38 truck ben tjari 84.000 stoeroe na den toe bigi hal di den brada ben joeroe gi na okasi disi. Moro leki 800 brada nanga sisa ben wroko heri neti teleki arfoe tin satra mamanten foe poti stoeroe, sreka a podium, geluid, nanga neigi bigi video scherm.
Tapoe sonde mamanten 6.00 joeroe, den doro ben opo, èn den ipi-ipi sma ben bigin kon na inisei. Spesroetoe gi na okasi disi 17 loko ben tjari moro leki 13.000 Kotoigi kon na a mamafoto. Moro leki toe hondro brada nanga sisa foe drape ben de na a station pe loko e stòp foe gi den sma di ben kon wan switikon èn foe tjari den na ini groepoe go na a konmakandra presi. Wan sisa ben taki dati a seti disi di seti na wan lobi fasi, ben gi den „wan firi foe seikerfasi èn ben meki den firi boen”.
Trawan ben kon na Parijs nanga opolangi noso nanga wagi. Ma moro foeroe foe den sma ben kon nanga 953 bus, ala di den kotoigi ini a birti foe Parijs ben gebroiki poebliki transport foe kan go na a poebliki presi. Foeroe foe den ben rèis a heri neti noso den ben gowe libi na oso foe den froekoefroekoe mamanten, ma a breiti di den ben breiti foe fisiti a konmakandra disi ben de foe si. Mati di no ben si makandra foeroe jari langa, ben bari foe prisiri èn ben gi makandra wan waran brasa di den ben miti makandra baka. Den foeroe kloroe foe den krosi foe den sma foe difrenti kondre ben gi den ipi-ipi sma di ben prisiri srefisrefi, wan internationaal karaktri. Sondro tweifri, wan froewondroe sani ben de na pasi e kon.
Di a programa ben bigin 10.00 joeroe mamanten, sidonpresi no ben de moro, tokoe hondrohondro sma ben kon ete ibri miniti. Awansi pe wan sma ben o loekoe toe, a ben si boen foeroe fesi di e lafoe. Doesoendoesoen sma ben tan tanapoe noso ben sidon tapoe a ston gron. Akroederi a nen foe a konmakandra, dan na wan lobi fasi foeroe jongoewan ben opo tanapoe foe meki den moro owroesma ben kan sidon. „Wi ben firi kolokoe srefisrefi foe gi wi sidonpresi na brada nanga sisa di wi no ben sabi, ma di wi lobi sote!” na so wan trowpaar ben skrifi. Foeroe foe den ben sori wan moi fasi foe òfer densrefi: „A heri programa wi ben tanapoe sei den stoeroe di wi ben jepi foe seti a heri freida neti. Ma a de di wi ben de drape nomo, ben meki wi foeroe nanga tangi gi Jehovah.”
Ala di den sma ben weri noso no ben abi wan boen sidon presi, tokoe den ben poti jesi e arki na den verslag foe tra kondre èn den lezing di Lloyd Barry nanga Daniel Sydlik, di so srefi de wan memre foe a Tiri Skin, ben hori. Brada Lloyd Barry ben taki foe a tori „Jehovah e gi krakti pasa marki”, èn na wan srapoe fasi a ben sori fa Jehovah ben blesi en pipel nanga gro ala di difrenti sortoe tesi e miti den. A lezing foe brada Sydlik ben abi leki nen „Kolokoe a pipel de di abi Jehovah leki Gado!” Ala toe lezing ben kon na a reti ten efoe wi e loekoe a gens di sma e gens Jehovah Kotoigi na Fransikondre nownowde. Brada Sydlik ben sori taki troe kolokoe no e anga foe sani foe dorosei, ma a e anga foe wi matifasi nanga Jehovah èn a fasi fa wi e si a libi. Di a ben aksi den arkiman: „Joe de kolokoe?” den arkiman ben klapoe nanga den anoe boen tranga.
Wan sisa di ben „lasi en prisiri” ben skrifi baka ten: „Wantronso mi ben kon si taki kolokoe no de fara foe mi. Den moeiti di mi ben doe, mi ben doe na wan fowtoe fasi, èn nanga jepi foe a lezing disi, Jehovah ben sori mi fa mi ben moesoe kenki.” Wan tra brada ben taki: „Now mi wani feti foe meki Jehovah ati prisiri. Mi no wani no wan sani poeroe a prisiri di mi bigin firi dipi na inisei.”
Di a konmakandra ben doro en kaba, nanga bigi prisiri a fesiman ben kari a nomroe foe fisitiman: 95.888 — a moro bigi konmakandra foe Jehovah Kotoigi na Fransikondre!
Baka a lasti singi di foeroe sma ben singi nanga watra-ai foe prisiri, èn baka a lasti begi, den brada ben go na oso baka nanga moksi firi. A waran, switi fasi foe a konmakandra no ben pasa sondro sma si dati. Den sma di ben rèi den bus ben gi foeroe positief komentaar foe a fasi fa den fisitiman ben tjari densrefi. Wan tra sani di ben naki ati foe den, na a fasi fa sani ben orga di ben sorgoe taki ala den 953 bus ben kan gowe foe a poebliki presi na ini toe joeroe èn na wan orde fasi, sondro foe kisi problema nanga tra verkeer? So srefi den man di ben wroko na a loko nanga tra poebliki transport ben warderi a fasi fa den fisitiman ben tjari densrefi. Foeroe moi takimakandra ben kon baka dati, èn wan boen kotoigi ben gi.
„Wan watrapresi na ini a woestijn”
Na apostel Paulus ben tranga den kompe kresten foe en: „Meki wi poti ai na makandra, foe gi makandra deki-ati foe sori lobi èn doe boen wroko, . . . foe gi makandra deki-ati, èn dati moro foeroe, foe di oenoe e si a dei e kon krosibei.” (Hebrewsma 10:24, 25) Foe troe, a spesroetoe konmakandra disi ben de wan fonten foe kisi foeroe deki-ati gi ala sma, „wan watrapresi na ini a woestijn” soleki fa wan sisa ben taki en. „Di wi ben gowe wi ben kisi krakti, deki-ati, tranga, èn moro leki oiti wi ben bosroiti foe prisiri na ini a diniwroko foe Jehovah”, na so den brada foe a Togo bijkantoro ben skrifi. „Den wan di ben lasi-ati, ben go na oso kolokoe,” wan kringopziener ben taki. „Den brada ben kisi faja nanga tranga,” na so wan trawan ben taki. „Noiti ete wi ben firi so krosibei na Jehovah en organisâsi”, wan trowpaar ben kisi a firi foe skrifi.
„Mi eigi foetoe seiker sa tanapoe na tapoe wan plata presi; na mindri den ipi sma di kon makandra, mi sa blesi Jehovah”, a psalm singiman ben taki (Psalm 26:12). Den sortoe kresten konmakandra disi, e gi ala sma na okasi foe kisi wan steifi fondamenti baka na jejefasi di de wan jepi, te den sa kisi foe doe nanga problema. „Awansi sortoe tesi e kon”, na so wan sisa ben taki toe, „den sortoe momenti disi di warti, e poti go dipi na ini wi ati èn ala ten sa de drape foe gi wi trowstoe”. Na a srefi fasi, wan opziener di e rèis ben skrifi: „Te moeilek ten e opo ede kon, dan a memre di wi e memre a sani disi foe tesi fa Paradijs sa de, sa jepi wi foe man pasa den moeilek ten dati.”
„Gi Jehovah, o oen famiri foe den pipel, gi Jehovah glori nanga krakti”, na so Psalm 96:7 e froemane wi. Sondro tweifri, na inwijding foe a njoen bijkantoro na Fransikondre na wan tranga wini gi Jehovah. Na En wawan ben man meki so wan projekt waka boen ala di sma ben abi a fasti bosroiti foe gens en na ala sei. Moro leki oiti na fesi Jehovah Kotoigi na Fransikondre abi a fasti bosroiti foe ’tan na ini a lobi foe Krestes’ èn foe ’meki a leti foe den skèin’ (Johanes 15:9; Mateus 5:16). Ala sma di ben kon na a inwijding programa sondro foe sjen e firi fa a psalm singiman ben firi: „Na Jehovah srefi meki a sani disi pasa; a de wan wondroe sani na wi ai.” — Psalm 118:23.
[Prenki na tapoe bladzijde 26]
Lloyd Barry
[Prenki na tapoe bladzijde 26]
Daniel Sydlik
[Prenki na tapoe bladzijde 26]
95.888 sma ben fisiti a spesroetoe programa na a poebliki presi na Villepinte
[Prenki na tapoe bladzijde 28]
Doesoendoesoen fisitiman ben tanapoe noso den ben sidon na gron foe arki