Kownoekondre preikiman e froeteri
Gi ala san joe abi foe preiki a boen njoensoe
DI SMA foe Europa di ben feni njoen kondre ben fisiti a Golf foe Venezuela nanga a bigi watra foe Maracaibo, dan a seisei ben lai nanga pikinpikin kampoe di ben meki foe wiwiri èn di ben bow tapoe tikitiki tapoe watra di no dipi. A sani di ben de foe si ben memre den na Veneisia, Italia, pe sma e bow den oso foe den langalanga tapoe a lanki foe a watra. Dati meki den Spanjoroman di ben feni njoen kondre ben kari a kontren Venezuela, san wani taki „Pikin Veneisia”.
Na ini a ten disi a moi kondre disi e gi na okasi taki wan tra sortoe programa foe bow-wroko e feni presi, wan wroko na jejefasi. Drape Jehovah Kotoigi e wroko fajafaja foe sai Kownoekondre siri na ibri okasi di fiti. A kotiwroko na jejefasi di de a bakapisi foe dati e tjari foeroe prèise kon gi „a Masra foe a kotiwroko”, Jehovah Gado. — Mateus 9:37, 38.
Di wan opziener di e rèis ben fisiti wan gemeente ini a distrikt Zulia na a noord-westsei foe Venezuela, a gemeente foe drape ben seti sani gi en nanga a wefi foe en foe den go fisiti wan èilanti di de krosibei èn di sma e kari Toas. Ala di den ben e wakti na ini lin foe teki wan froekoe mamanten veerboto foe go na a èilanti, a wefi foe na opziener di e rèis, Meri, ben aksi a kompe wrokoman foe en, wan foeroeten pionier sisa, foe den taki nanga wan toe foe den wrokoman foe a boto. A pionier sisa ben agri.
Di Meri ben waka go miti wan monteur di e wroko tapoe a boto, a ben pristeri a boekoe Sabi di e tjari joe go na têgo libi. A ben sori a man a kapitel „Bow wan osofamiri di e gi Gado grani”, di leki fa a sori a ben warderi. Ne Meri ben froeteri en taki nanga jepi foe a poeblikâsi disi, a ben kan kisi wan bijbelstudie na ini en eigi oso. A ben teki a boekoe èn sani ben seti taki wan sma ben sa kon na en na en oso.
Wan sjatoe ten na baka dati, wan spesroetoe dei-konmakandra ben de na ini a kontren. Fa a ben de wan bigi froewondroe gi Meri foe si a monteur, Meneer Nava drape, makandra nanga a wefi foe en nanga toe jongoe oemapikin! Meri ben aksi na oema san a ben e prakseri foe a famiri bijbelstudie foe den. A piki ben meki a froewondroe moro srefisrefi.
„Mi e gi Jehovah tangi taki wi leri sabi a waarheid”, na oema ben taki. Baka dati a ben froeklari: „Di joe ben taki nanga mi masra, na kaba a ben kaba libi mi foe teki wan tra oema. A ben e dringi hebi toe. Son tron te a ben kon droengoe, a ben grofoe, wan sani di a pikin libimakandra tapoe na èilanti no ben lobi. A ben e doe afkodrei toe. Ma a sabi foe bijbel di a ben kisi nanga jepi foe a studie, jepi en foe a ben kan tjari bigi kenki kon na ini en libi. A libi ala den gwenti foe en di no ben krin. Den kenki di a tjari kon ben naki na ati foe en papa nanga mama, di de katoliksma, srefisrefi. Den prisiri taki now a de wan masra nanga papa di sabi en frantiwortoe.”
Meneer Nava ben dopoe na ini 1996 èn nownow a e wroko leki wan foeroeten bedinari. A wefi foe en, Jenny, ben dopoe na ini 1997. Den kenki na ini a monteur disi, di e wroko tapoe a veerboto, ben naki na ati foe a borgoepapa foe a foto, so taki ensrefi ben aksi foe wan bijbelstudie. Den sisa breiti sote taki den ben gi ala san den ben abi foe meki a boen njoensoe bekènti ala di den ben e wakti na ini lin foe teki a veerboto a mamanten dati!
[Prenki na tapoe bladzijde 7]
Prati a boen njoensoe nanga wan monteur di e wroko tapoe wan veerboto, ben tjari prisiri bakapisi kon