Te ati di tranga leki ston e tron ati di e piki boen
NA INI 1989, JEHOVAH KOTOIGI NA POLEN ben kisi primisi foe lanti foe kari densrefi wan relisi organisâsi. Kotoigi di ben de na doengroe-oso foe a kresten neutraalfasi foe den, ben kon fri safrisafri, èn den ben libi foeroe sma na ini doengroe-oso na baka di ben sa wani srefisrefi taki den Kotoigi leri den moro foe bijbel. Djaso na wan tori foe fa na so wan sortoe doengroe-oso, Jehovah Kotoigi ben meki moeiti foe jepi den sma di ati ben tranga fosi, foe meki na ati foe den tron ati di e piki boen tapoe a krakti foe Gado Wortoe.
NA WOŁÓW, wan foto foe 12.000 sma na zuidwestsei foe Polen, wan doengroe-oso di drape 200 jari kaba, abi wan toe foe den moro takroe ogriman foe Polen. Sensi Jehovah Kotoigi kisi primisi foe lanti foe doe a wroko foe den, den Kotoigi meki moeiti foe tjari a Kownoekondre boen njoensoe na den strafoeman drape, èn den e doe dati fajafaja srefisrefi.
Wan brifi di a Ministeria foe Justitie ben skrifi go na ala edeman foe den driktoro foe den doengroe-oso na Polen na ini februari 1990, ben meki taki a sani dati ben moro makriki foe doe. A brifi ben gi leki rai taki den „no moesoe gi” den strafoeman „problema” te den ben sa wani kisi Waktitoren poeblikâsi noso te den ben sa wani miti nanga Jehovah Kotoigi. Den Kotoigi di son wan foe den ben tan foeroe jari langa na ini a doengroe-oso na Wołów, ben sabi den foeroe tranga-ati strafoeman drape. Ma den ben poti den froetrow na tapoe Jehovah foe blesi den moeiti di den ben sa doe foe meki bijbel waarheid safoe den tranga ati foe tra strafoeman.
Meki a wroko bigin
„A ben moeilek foe meki a wroko bigin’ ”, brada Czesław foe a foto Wrocław, so wan 40 kilometer moro fara, ben taki; a brada disi ben kisi primisi foe fisiti a doengroe-oso na Wołów. „Foeroe langa takimakandra nanga hei lantiman foe a doengroe-oso ben de fanowdoe foe overtoigi den taki den ’relisi diniwroko’ foe wi e tjari winimarki gi den strafoeman.”
Foe meki sani moro moeilek, na so Paweł, a kompe foe Czesław, e memre, dan „wan heihei edeman ben feni nomonomo taki den strafoeman ben gebroiki den relisi diniwroko soso leki wan sani foe kisi wini na materia sei”. Ma di dri sma di ben ogri srefisrefi fosi, ben pristeri densrefi foe teki dopoe na ini 1991, dan den hei lantiman foe a doengroe-oso ben kenki a denki foe den, èn a wrokomakandra nanga den ben go moro boen.
„Wi ben bigin gi kotoigi na den strafoeman, na den famiriman foe den di ben kon fisiti den na doengroe-oso, èn so srefi na den wrokoman foe a doengroe-oso”, na so Czesław e tjari kon na krin. „Baka dati wi ben kisi primisi foe preiki a boen njoensoe foe doengroe-oso kamra go na doengroe-oso kamra, wan sani di no e pasa foeroe. Te foe kaba, di wi ben miti den fosi sma di ben abi belangstelling, dan wi ben kisi primisi foe go na wan pikin zaal pe wi ben kan hori bijbelstudie èn hori kresten konmakandra.” Ija, Jehovah ben opo a pasi foe doro den tranga ati foe strafoeman.
Leri programa di abi boen bakapisi
Heri esi a ben kon de krin taki a pikin zaal dati ben smara toemoesi. Foe di den strafoeman di ben teki dopoe nanga den brada di ben kon foe dorosei ben abi wan prati na a preikiwroko, meki so wan 50 strafoeman ben bigin fisiti den konmakandra. „Moro leki dri jari, wi ben hori ala den konmakandra drape, èn den strafoeman ben fisiti den alawiki konmakandra ala ten baka”, na so wan foe den owroeman foe drape e tjari kon na krin. So boen na ini mei 1995 den brada ben kisi wan moro bigi zaal foe gebroiki.
Fa den brada di abi a frantiwortoe kan kon sabi soema na den sma di ben kan kon na den konmakandra di ben e hori na ini doengroe-oso? „Na tapoe papira wi abi den nen foe strafoeman di ben sori opregti belangstelling gi waarheid”, na so brada Czesław nanga brada Zdzisław e tjari kon na krin. „Efoe wan strafoeman no e go na fesi noso e misi foe kon na den konmakandra sondro foe taki boen foe san ede a no kon, èn na so fasi e sori taki a no abi nofo warderi gi den sani disi, dan wi e poeroe en nen foe a papira èn wi e taki foe dati nanga a driktoro foe a doengroe-oso.”
Te den brada e hori bijbelstudie nanga den strafoeman, dan den brada e leri den strafoeman fa foe sreka densrefi boen gi den konmakandra èn fa foe meki boen gebroiki foe den boekoe foe wi. So boen, te den strafoeman e kon na den konmakandra, dan den sreka densrefi boen èn den e teki prati na wan fri fasi. Den e gi komentaar di e bow trawan, e gebroiki den bijbel na wan bekwaam fasi èn den e fiti den rai boen na tapoe densrefi, èn foeroetron te den e gi komentaar, dan den e taki toe: ’Mi e si taki mi moesoe doe disi noso taki mi moesoe doe dati.’
„Ala nanga ala, 20 bijbelstudie e hori na ini a doengroe-oso foe Wołów. Dri preikiman foe a doengroe-oso e hori aiti foe den bijbelstudie disi nanga sma di ben de preikiman kaba”, na so a sekretarsi foe a gemeente e taki. Den aiti preikiman disi foe a doengroe-oso ben abi boen bakapisi toe na ini a preiki di den e preiki foe doengroe-oso kamra go na doengroe-oso kamra èn te den e waka ini den gebow foe a doengroe-oso. Foe eksempre, na ini tin moen, foe september 1993 te go miti juni 1994, den ben prati 235 boekoe, so wan 300 brochure, nanga 1700 tijdschrift. No so langa pasi, toe foe den hei lantiman foe a doengroe-oso ben aksi foe kisi bijbelstudie.
Spesroetoe konmakandra e tjari prisiri kon
Baka wan pisi ten, wan tra elementi ben poti na a leri programa na ini a doengroe-oso dati, namkoe, spesroetoe konmakandra. Opziener di e rèis nanga tra bekwaam brada ben sa pristeri den moro prenspari pisi foe kring-konmakandra nanga spesroetoe dei-konmakandra na ini a sporthal foe a doengroe-oso. A fosi spesroetoe konmakandra ben hori na ini oktober 1993. Feifitenti strafoeman ben fisiti a konmakandra, èn „heri osofamiri, so srefi oemasma nanga pikin-nengre, kon foe Wrocław”, a koranti Słowo Polskie ben froeteri, èn dati ben meki taki ala nanga ala, 139 sma ben fisiti a konmakandra. A pauze na a konmakandra ben gi na okasi foe wan njanjan di den sisa ben sreka, èn so srefi na okasi foe abi switi kresten demakandra.
Sensi a ten dati, seibi spesroetoe konmakandra ben hori, èn den winimarki no ben de wawan gi den wan na ini doengroe-oso, ma so srefi gi den wan dorosei foe a doengroe-oso. Di wan Kotoigi sisa ben taki nanga wan man di e libi now na a foto èn di ben de wan strafoeman fosi na ini a doengroe-oso na Wołów, dan a man no ben wani arki biginbigin. Ma di a ben kisi foe jere taki wan seiker strafoeman ben tron wan Kotoigi, dan a no ben wani bribi a tori dati srefisrefi, èn a ben taki: „A kiriman dati na wan Kotoigi now?” Dati meki a man disi ben agri foe studeri bijbel.
Kefalek moi kenki e feni presi
A bigi leri programa disi ben safoe den tranga ati foe strafoeman troetroe? Meki den froeteri san ben pasa nanga den.
„Noiti mi ben sabi mi papa nanga mama bika den ben gowe libi mi di mi ben de wan pikin boi ete, èn a ben kon hati mi srefisrefi foe abi a firi taki sma no ben lobi mi”, Zdzisław e taki, wan man di e denki foeroe foe sani na ini a libi. „Froekoe kaba na ini mi libi, mi ben kisi foe doe nanga ogri, te foe kaba mi ben kiri wan sma. A firi di mi ben abi taki mi fowtoe srefisrefi, ben meki taki mi ben wani kiri misrefi, èn leki wan broeja man di no sabi moro san foe doe, mi ben soekoe wan troetroe howpoe. Na so, na ini 1987, mi ben kon toeka nanga wan Waktitoren tijdschrift. Na ini a tijdschrift dati mi ben leri foe a howpoe foe na opobaka èn foe têgo libi. Di mi ben kon froestan taki howpoe ben de ete, dan mi ben poeroe a denki foe kiri misrefi èn mi ben bigin studeri bijbel. Now mi leri san lobi foe Jehovah nanga foe den brada, wani taki.” Sensi 1993 a man disi, di ben de wan kiriman fosi, de wan dinari ini a diniwroko èn wan jepi-pionier, èn a jari di pasa a tron wan gewoon pionier.
Na a tra sei, Tomasz ben wani teki wan bijbelstudie srefisrefi. „Ma dati no ben de wan opregti sani foe doe”, a e taki. „Mi ben e studeri, soso foe di mi ben lobi meki bigi te mi ben froeklari trawan den sani di Jehovah Kotoigi ben bribi. Ma mi no ben e doe foeroe ini a tori foe bijbel waarheid. Wán dei, mi teki wan bosroiti èn mi ben go na wan kresten konmakandra. Den strafoeman di ben teki dopoe kaba, ben gi mi wan switikon na wan waran fasi. Mi ben kon froestan taki na presi foe mi meki bigi na trawan nanga a sabi foe mi, mi ben moesoe safoe a tranga ati foe mi èn kenki mi denki.” Tomasz ben bigin weri a njoen sma di a ben moesoe de (Efeisesma 4:22-24). Now, Tomasz na wan Kotoigi de gi ensrefi abra èn di teki dopoe, èn a e prisiri foe preiki foe doengroe-oso kamra go na doengroe-oso kamra.
Kwinsi foe den wan di ben de mati fosi
Den wan di leri bijbel waarheid na ini doengroe-oso ben kisi hebi kwinsi foe mati di den ben abi fosi drape èn foe den hei lantiman foe a doengroe-oso. Wán foe den e memre: „Doronomo den ben spotoe nanga mi èn ben lafoe mi. Ma mi ben tan hori den wortoe di e gi deki-ati na prakseri di den brada ben gi mi. ’Tan begi Jehovah’, den ben taigi mi. ’Leisi a bijbel foe joe èn joe sa firi vrede na inisei.’ Dati ben jepi mi troetroe.”
„Den kompe strafoeman foe mi na ini doengroe-oso no ben sari mi srefisrefi nanga den hati sani di den ben taigi mi”, na so Ryszard, wan bigiskin brada di teki dopoe, e taki. „’Joe kan go na den konmakandra foe joe, ma no proeberi foe de prenspari èn doe leki joe moro boen, joe froestan?’ den ben sa warskow mi. Te mi ben tjari kenki kon foe di mi ben fiti bijbel gronprakseri na ini mi libi, dan mi ben moesoe pina foe dati. Den ben drai mi bedi, trowe den bijbel poeblikâsi foe mi lontoe na ala sei, èn ben meki wan doti ipi foe a pisi pe mi ben de na ini a doengroe-oso kamra. Mi ben begi Jehovah foe gi mi krakti foe man hori misrefi èn baka dati mi ben bigin krin mi presi èn ben tan safri. Baka wan pisi ten, den ben tapoe foe doe den sani dati nanga mi.”
„Te kompe strafoeman si taki wi teki wan fasti bosroiti foe dini Jehovah,” na so wan toe tra strafoeman di teki dopoe e froeteri, „dan a kwinsi e kon na wan tra fasi. Den lobi foe taki: ’Memre taki joe no mag dringi sopi, joe no mag smoko, noso lei moro.’ Den sortoe kwinsi dati e jepi wan sma foe dwengi ensrefi, foe tapoe gawgaw nanga iniwan sortoe takroe gwenti noso sani di meki a tron wan srafoe foe a sani dati. A e jepi wan sma toe foe kweki den froktoe foe a jeje.” — Galasiasma 5:22, 23.
Tron foetoeboi foe Gado di gi densrefi abra
Nanga primisi foe den hei lantiman foe a doengroe-oso, a fosi sma ben teki dopoe na ini a sporthal na ini a lente foe 1991. Zdzisław ben de a kolokoe sma di ben o teki dopoe. Twarfoe strafoeman ben de drape, èn 21 brada nanga sisa foe den gemeente na dorosei ben kon gi na okasi disi. A konmakandra ben gi den strafoeman deki-ati. Wan lo foe den ben go so boen na fesi, taki toe tra strafoeman ben dipi go na ondro watra a srefi jari dati. Toe jari na baka, ini 1993, okasi ben de toe tron foe teki dopoe, èn seibi strafoeman moro ben simboliseer a gi di den ben gi densrefi abra na Jehovah!
A Wieczór Wrocławia, a koranti foe drape di e kon na doro ala dei, ben taki foe a dopoe di ben hori na ini december 1993: „Sma e tan kon na a sporthal, e gi ala sma odi èn e seki anoe nanga den. No wan sma na wan freimde sma djaso. Den de wan bigi famiri, di de wán na ini denki, na ini a fasi fa den e libi, èn na ini a dini di den e dini wán Gado, Jehovah.” Na a ten dati, a „wán bigi famiri” dati ben abi 135 sma, so srefi 50 strafoeman. Meki wi miti nanga wan toe foe den.
Jerzy, di ben teki dopoe na ini juni 1993, e froeteri: „Ala di mi ben abi pikinso kontakti nanga bijbel waarheid foeroe jari pasa, tokoe a sani di ben de na ini mi ben de troetroe wan ati di ben tranga leki ston. Bedrigifasi, brokotrow nanga a fosi wefi foe mi, a de di mi ben de nanga wan oema di nen Krystyna na wan fasi di no fiti na wet, èn so wi ben abi wan pikin makandra, èn ala ten baka mi ben kon agen na ini doengroe-oso — na so mi libi ben de.” Di Jerzy ben si fa tra takroe ogriman ben tron Kotoigi di den ben de na ini doengroe-oso, dan a ben bigin aksi ensrefi: ’Misrefi no ben sa man tron wan moro boen man toe?’ A ben aksi foe wan bijbelstudie èn ben bigin kon na den konmakandra. Ma a sani di troetroe ben drai en libi na di a ben kon sabi foe na afkati foe lanti taki Krystyna ben tron wan Jehovah Kotoigi dri jari bifo dati. „Mi no ben froewakti dati srefisrefi!”, Jerzy e taki. „Mi ben denki: ’Fa a de nanga mi? San mi e doe?’ Mi ben kon froestan taki efoe mi wani feni boen na Jehovah, dan mi ben abi foe seti mi libi boen.” Leki wan bakapisi foe dati, wan kolokoe kon na makandra baka ben feni presi ini a doengroe-oso — nanga Krystyna èn nanga Marzena, na oemapikin foe den foe 11 jari. A no teki langa foe den ben poti den nen na lanti leki sma di trow. Ala di Jerzy de na doengroe-oso ete èn abi ten pe sani e go boen èn tra ten pe sani no e go boen, tokoe no so langa pasa a leri ensrefi gebaartongo èn na so a man jepi den strafoeman di dofoe.”
Mirosław ben doe ogri kaba di a ben de na lagi skoro. A ben feni den sani di den mati foe en ben doe toemoesi froewondroe sani, èn heri esi a ben bigin doe den srefi sani. Mirosław ben foefoeroe foeroe sma èn a ben naki foeroe sma. Na so a ben doro na doengroe-oso. „Di mi ben si taki mi de na ini doengroe-oso, mi ben go na a priester foe kisi jepi”, Mirosław e taki. „Ma dati ben meki mi lasi-ati srefisrefi. So boen mi ben teki a bosroiti taki mi ben sa kiri misrefi foe di mi ben o teki vergif.” A srefi dei di a ben poti foe kiri ensrefi, den ben poeroe en poti go na ini wan tra doengroe-oso kamra. Drape a ben feni wan eksemplaar foe A Waktitoren di ben taki foe a marki foe a libi. „A makriki nanga krin bodoi ben de a joisti sani di mi ben abi fanowdoe”, a e taki moro fara. „Now mi ben wani libi! So boen mi ben begi Jehovah èn mi ben aksi den Kotoigi foe studeri bijbel.” Mirosław ben go na fesi esi-esi nanga a studeri di a ben studeri bijbel èn a ben teki dopoe na ini 1991. Now a e dini leki wan jepipionier na ini doengroe-oso, èn a abi a grani foe preiki foe doengroe-oso kamra go na doengroe-oso kamra.
Ala nanga ala, dan 15 strafoeman ben teki dopoe te leki now. Efoe joe teri ala a strafoe foe den kon na wan, dan den abi foe koti strafoe so wan 260 jari. Wan toe foe den ben kon fri fosi den koti ala a strafoe di den ben kisi. Wán foe den strafoeman ben kon si taki a 25 jari strafoe di a ben moesoe koti, ben saka kon tron 15 jari foe strafoe. Èn difrenti foe den di ben sori belangstelling di den ben de na doengroe-oso, ben tron Kotoigi di teki dopoe, baka di den ben kon fri foe doengroe-oso. Moro fara, fo strafoeman de na ini a doengroe-oso, di e sreka densrefi foe teki dopoe.
Tiriman foe doengroe-oso e taki dati a troe
„A kenki di den strafoeman ben kenki a fasi fa den ben de, ben de wan sani di ben de krin foe si”, na so wan raport foe a doengroe-oso e taki. „Foeroe foe den strafoeman ben tapoe nanga smoko, èn den e hori a doengroe-oso kamra foe den krin. Den sortoe kenki disi na ini a fasi fa den strafoeman e tjari densrefi, de foe si krinkrin na foeroe foe den.”
A koranti Życie Warszawy e taki dati den basi foe a doengroe-oso na Wołów e taki dati „den strafoeman kisi tranga leri; den no e gi den waktiman foe a doengroe-oso problema”. Na artikel e taki moro fara, dati den wan di komoto na doengroe-oso bifo den koti ala strafoe di den ben moesoe koti, e tron wan boen pisi foe Jehovah Kotoigi èn den no e drai go baka na a pasi foe doe ogri.
Èn fa a driktoro foe a doengroe-oso e denki foe a tori? „A wroko foe Jehovah Kotoigi na ini a doengroe-oso disi na wan sani di wi wani srefisrefi èn a de wan jepi”, a e taki. A driktoro foe a doengroe-oso e si taki „te den strafoeman e teki bijbelstudie [foe den Kotoigi], dan den sani di den e si leki troetroe warti sani nanga den markitiki foe den, e kenki, èn dati e gi den wan njoen krakti foe tjari den na ini den libi. Den e tjari densrefi nanga takt èn den abi maniri. Den de fajafaja wrokoman, èn pikinmoro den no e gi no wan problema”. A no de foe taki, dati den sortoe moi komentaar disi foe den tiriman drape, e plisi den Kotoigi di e wroko nanga den strafoeman ini a doengroe-oso foe Wołów.
Den Kotoigi di e fisiti drape e froestan den wortoe foe Jesus krinkrin: „Mi sabi den skapoe foe mi èn den skapoe foe mi sabi mi. . . . Den sa arki mi sten, èn den sa tron wán ipi, wán skapoeman” (Johanes 10:14, 16). Srefi den skotoe foe doengroe-oso no man tapoe a Boen Skapoeman, Jesus Krestes, foe tjari den sma di gersi skapoe kon na makandra. Den Kotoigi na Wołów de nanga tangi na ati taki den abi a grani foe abi wan prati na ini a prisiri diniwroko disi. Èn den e lokoe go na Jehovah foe a tan blesi a wroko foe jepi foeroe tra ati di tranga leki ston, foe den piki boen tapoe a Kownoekondre boen njoensoe bifo a kaba kon. — Mateus 24:14.
[Faki na tapoe bladzijde 27]
A problema foe „wan bigisma di e doe leki wan pikin-nengre”
„Baka te wan strafoeman de na doengroe-oso wan pisi ten kaba, dan a e lasi a firi foe san a wani taki foe libi fri, noso foe libi tapoe ensrefi”, na so den Kotoigi di e wroko na a doengroe-oso na Wołów kon si. „A problema di wi abi na, te joe loekoe en boen, wan problema foe ’wan bigisma di e doe leki wan pikin-nengre’, wan sma di, baka te a komoto foe doengroe-oso, no sabi fa foe sorgoe ensrefi. Dati meki a ròl foe a gemeente de moro leki foe leri wan sma bijbel waarheid nomo. Wi moesoe sreka a sma foe tron wan pisi foe a libimakandra, wi moesoe warskow en gi den njoen kefar di a kan miti èn gi den tesi di a kan kisi. Ala di wi moesoe loekoe boen taki wi no e kibri en toemoesi foeroe, tokoe wi moesoe jepi en foe a bigin a libi njoen baka.”