„Oenoe na sma di de soleki fa Gado e froewakti foe wi”
TE WI e wroko makandra nanga den grontapoe tirimakti, „foe Masra ede”, dan kresten kan froewakti foe kisi „prèise [leki] sma di e doe boen” (1 Petrus 2:13-15). Jehovah Kotoigi na ini Zuid-Afrika ben ondrofeni disi wan pisi ten pasa na wan distriktkongres di ben hori na ini wan hal foe wan hei skoro.
Na tapoe a fosi dei foe a kongres, den veiligheid skowtoe foe a hei skoro ben seti densrefi gi den groepoe sma di ben o kon èn di nofotron e atibron èn no wani wroko makandra nanga den, soleki fa den ben ondrofeni dati na tra sortoe kongres. Ma foe di noiti den ben abi foe doe nanga Jehovah Kotoigi, meki wan switi èn froewondroe sani ben e wakti den!
Leki wan sani di den gwenti foe doe so taki no wan sma e kisi mankeri na den portoe, den skowtoe ben ondrosoekoe ibri wagi di ben e kon na ini a djari èn di ben e gowe. Den ben froewondroe di den ben miti switifasi, pasensi, nanga lespeki, srefi ala di den sma di ben ondrosoekoe den wagi ben meki den fisitiman kon lati. No wan gens ben de di den ben gwenti foe miti, soleki haritaki, nanga doti taki. „Tra fasi leki den tra fisitiman”, wan foe den waktiman ben taki, „oenoe e sori wan jeje foe sakafasi èn tiri lespekifasi di wi alamala kan si krinkrin.”
Di na edeman foe a veiligheid ben si taki den Kotoigi foe Jehovah ben wroko makandra nanga den, dan a ben bosroiti taki a no ben de fanowdoe moro foe ondrosoekoe den wagi, „bika”, a ben taki, „oenoe na sma di abi boen maniri”. Foe dati ede, den wagi di ben abi parkeer sticker na tapoe di skrifi „JW”, ben man kon na inisei sondro taki den ben ondrosoekoe den wagi.
Na a kaba foe a kongres, na edeman foe a veiligheid ben taki dati a e howpoe foe si den Kotoigi heri esi baka. „Noiti wi si sma di ben tjari densrefi na so wan boen fasi”, a ben taki. Oenoe na sma di de soleki fa Gado e froewakti foe wi.” So wan prèise de ete wan reide gi troe kresten foe ’tjari densrefi na wan boen fasi’ so taki sma ’kan gi glori na Gado leki wan bakapisi foe a boen wroko foe oenoe di den e si nanga den eigi ai’. — 1 Petrus 2:12.