Wan farawe èn pikin èilanti

DEN wortoe di sma e gebroiki moro foeroe foe taki foe Sint Helena na „farawe” èn „pikin”. Dati e fiti bika na èilanti disi, di langa 17 kilometer èn di brada 10 kilometer, de 1950 kilometer fara foe a moro krosibei kondre, a zuidwest sjoro foe Afrika. Djaso den ben seni Napoléon Bonaparte go na ini 1815, foe libi den lasti jari foe en libi leki wan katiboman di ben lasi a feti.

Komoto na a se, na èilanti gersi wan kefalek bigi fortresi. Ma a de troetroe wan dede vulkaan di hei srefisrefi komoto foe na Atlantis Se nanga boen hei leti-opo klipston di hei 500 te go miti 700 meter. Na en mindri, na Actaeon Bergi di hei 818 meter, de a moro hei sani na tapoe a heri èilanti. Bika foe a doronomo winti di e wai komoto foe na Atlantis Se èn bika foe a stroom foe a se, meki na èilanti abi wan safoe èn switi weer. Ma na a sjoro di e didon lagi te go na a inisei foe a bergibergi èilanti, foeroe difrenti weer situwâsi de èn foeroe difrenti sortoe sani e gro.

Foe sensi a kaba foe a di foe 17 jarihondro, Sint Helena ben de na ondro a tiri foe Ingrisikondre. Den weiniki sma, so wan 5000 di e libi drape, na wan moksi foe Europasma, Asiasma, nanga sma di komoto na Afrika. Sma e taki Ingrisitongo na tapoe na heri èilanti, ma nanga wan aparti accent. Opolanigron no de drape; a wan-enkri fasi foe miti tra presi de nanga jepi foe sipi, di e go doronomo na Zuid-Afrika nanga Ingrisikondre. A de troetroe so, taki doroseikondre telefisi ben kon pikinmoro na ini 1995, nanga jepi foe wan konèksi nanga wan satelliet.

Na ini a pisi ten foe 1930 te go miti 1935, a boen njoensoe foe Gado Kownoekondre ben miti den sjoro disi a fosi leisi (Matthew 24:14). Na ini den foeroe jari den èilanti sma ben tan hori a goedoe disi di e meki materia goedoe kon de leki noti (Matthew 6:19, 20). Na ini a ten disi Sint Helena de aparti foe di a abi gemiddeld 1 Kotoigi na mindri ibri 31 sma, a moro boen gemiddelde na heri grontapoe!

[Karta na tapoe bladzijde 24]

(Efu yu wani si pe den sani disi skrifi, luku a tijdschrift)

Sint Helena

JAMESTOWN

Levelwood

AFRIKA

ATLANTIS SE

Sint Helena