Tjari srakti-ofrandi di Jehovah feni boen
WAN leisi na ini a ten di pasa, wan kefalek sani ben kan si na a dromofo na a owstoe sei foe a djari foe Eden.a Drape, makti cherub ben tanapoe e hori wakti, èn a kefalek fasi fa den ben gersi, e sori krinkrin taki no wan sma moesoe prefoeroe foe pasa. A faja platasei foe wan feti-owroe di ben e drai lontoe ben tapoe a pasi toe, èn seiker wan brenki leti foe en ben skèin na den bon na wan fasi di e gi frede teneti (Genesis 3:24). Ala di a sani disi ben hari a prakseri foe sma, tokoe den sma di ben e loekoe seiker ben tanapoe fara foe en.
Kain nanga Abel kande ben fisiti a kontren foeroe leisi. Foe di Adam nanga Eva ben meki den pikin disi dorosei foe a djari, meki den pikin ben kan denki nomo fa a ben sa de foe libi na ini a Paradijs, soleki fa a papa nanga mama foe den ben libi drape wan leisi, nanga den fatoe bon èn foeroe froktoe nanga groentoe di ben kisi boen watra. Now a pikinso nomo di den ben kan si foe Eden seiker no ben sa kisi sorgoe èn ben gro kon tron boesiboesi.
Adam nanga Eva seiker ben froeteri den pikin foe den foe san ede a djari no ben kisi sorgoe èn foe san ede Gado ben poeroe den komoto na a djari (Genesis 2:17; 3:6, 23). A ben moesoe sari Kain nanga Abel srefisrefi! Den ben kan si a djari, ma den no ben man go na ini en. Den ben de so krosibei foe a Paradijs èn tokoe den ben de fara foe en. Onvolmaaktifasi ben flaka den, èn Kain nanga Abel no ben man doe foeroe na dati.
A matifasi foe na papa nanga mama foe den seiker no ben man meki a situwâsi kon moro boen. Di Gado ben kroetoe Eva, Gado ben taki: „Joe sa abi tranga lostoe gi joe masra, èn en sa basi joe” (Genesis 3:16). Akroederi a profeititori dati, Adam ben moesoe sori now taki a ben basi en wefi, èn kande a no ben handri en moro leki en kompe èn en jepi. Èn a gersi taki Eva ben abi a man disi toemoesi tranga fanowdoe. Wan komentaar e taki srefi foe a „tranga lostoe” foe en leki „wan lostoe di de pikinmoro leki wan siki”.
Bijbel no e taki fa a situwâsi na ini a trowlibi foe a papa nanga mama ben abi krakti na tapoe a lespeki di den boi ben moesoe abi gi den. Ma a de krin, taki Adam nanga Eva ben gi den pikin foe den wan eksempre di no ben boen gi den.
Waka difrenti pasi
Baka ten, Abel ben tron wan skapoeman èn Kain ben doe gronwroko (Genesis 4:2). Ala di Abel ben e loekoe den ipi foe en, dan seiker a ben moesoe abi foeroe ten foe prakseri dipi foe na aparti profeititori di Gado ben taigi en papa nanga mama bifo A ben poeroe den na Eden: „Mi sa poti feantifasi na mindri joe nanga na oema èn na mindri joe siri nanga en siri. A sa masi joe na a ede èn joe sa masi en na a bakafoetoe” (Genesis 3:15). Abel ben moesoe aksi ensrefi: ’Fa a pramisi foe Gado di abi foe doe nanga wan siri di sa masi a sneki sa kon troe, èn fa a siri disi sa masi na en bakafoetoe?’
Baka wan pisi ten, di den ben de bigisma kaba, dan Kain èn so srefi Abel ben tjari wan ofrandi gi Jehovah. Foe di Abel ben de wan skapoeman, wi kan froewakti taki a ben gi „wan toe foe den fosiwan foe en ipi, ija, den fatoe pisi foe den”. Na a tra sei, Kain ben òfer „wan toe froktoe foe gron”. Jehovah ben teki a srakti-ofrandi foe Abel, ma „a no ben loekoe nanga no wan boen-ati na Kain èn na den ofrandi foe en” (Genesis 4:3-5). Foe san ede a no ben doe dati?
Son sma e sori taki a srakti-ofrandi foe Abel ben de den „fosiwan foe en ipi”, ala di na ofrandi foe Kain ben de soso „wan toe froktoe foe gron”. Ma a problema no ben de a sortoe froktoe di Kain ben òfer, bika na verslag e taki dati Jehovah ben loekoe nanga boen-ati „na Abel èn na ofrandi foe en”, èn no nanga boen-ati „na Kain èn na den ofrandi foe en”. So boen, Jehovah ben loekoe na ati foe na anbegiman moro foeroe. Di a ben doe dati, dan san a ben si? Hebrewsma 11:4 e taki dati a ben de „nanga bribi” taki Abel ben tjari en srakti-ofrandi. So boen, soleki fa a sori dan Kain ben mankeri a bribi di ben meki a srakti-ofrandi foe Abel ben boen na Gado ai.
Ini a tori disi, a de prenspari foe taki dati na ofrandi foe Abel ben abi foe doe nanga broedoe di ben trowe. Kande a ben prakseri nanga reti toe, taki a pramisi foe Gado di abi foe doe nanga wan siri di ben sa masi na a bakafoetoe, ben sa abi foe doe nanga a srakti-ofrandi foe wan libi. Foe dati ede, na ofrandi foe Abel ben de wan tranga begi foe verzoening, èn a ben sori bribi taki Gado ben sa gi wan zoen-ofrandi gi sondoe na en reti ten.
Kontrari foe dati, Kain, soleki fa a sori, no ben prakseri foeroe foe na ofrandi di a ben tjari. „En ofrandi ben de soso foe erken taki Gado na wan sma di e gi sma presenti”, na so wan man di e gi komentaar foe bijbel, foe a di foe 19 jarihondro, ben taki. „A ben sori krinkrin taki a no ben erken taki wan troetroe prati ben de na mindri en nanga en Kriaman, èn a no ben de fanowdoe foe bekènti en sondoe èn a no ben abi wan zoen-ofrandi fanowdoe.”
Boiti dati, leki fosi geborewan, Kain ben sa kan prefoeroe taki en ben de a pramisi siri di ben sa pori a Sneki, Satan. Kande Eva toe ben froewakti so wan hei posisi gi en fosi gebore manpikin (Genesis 4:1). A no de foe taki, dati efoe disi ben de san Kain nanga Eva ben froewakti, dan den ben meki wan misteik srefisrefi.
Bijbel no e taki fa Jehovah ben sori taki a ben feni a srakti-ofrandi foe Abel boen. Son sma e taki dati wan faja foe hemel ben bron a srakti-ofrandi. Awansi fa a ben de, di Kain ben froestan taki Jehovah no ben teki en ofrandi dan „Kain bigin kisi bigi atibron, èn a fesi foe en ben kon swa” (Genesis 4:5). Kain ben e go miti rampoe.
A rai foe Jehovah, èn a fasi fa Kain ben handri
Jehovah ben redeneri nanga Kain. „Foe san ede joe kisi bigi atibron èn foe san ede joe fesi kon swa?”, a ben aksi. Disi ben gi Kain nofo okasi foe ondrosoekoe den firi nanga den prakseri foe en. „Efoe joe go doe baka san boen,” Jehovah e taki moro fara, „bigi prisiri no sa de dan? Ma efoe joe no go doe baka san boen, dan sondoe e wakti joe na a dromofo èn en tranga lostoe e soekoe joe; èn joe, foe joe sei, sa man basi en?” — Genesis 4:6, 7. (Loekoe a boksoe tapoe bladzijde 23.)
Kain no ben arki. Na presi foe dati, a ben tjari Abel go na gron èn ben kiri en. Baka ten di Jehovah ben aksi en pe Abel ben de, dan Kain ben meki en sondoe kon moro hebi nanga wan lei. „Mi no sabi”, a ben piki. „Na mi moesoe loekoe mi brada?” — Genesis 4:8, 9.
Bifo èn na baka di Kain ben kiri Abel, a ben weigri foe „go doe baka san boen”. A ben meki sondoe basi en, èn foe dati ede Gado ben jagi Kain poeroe foe a kontren pe a libisma famiri ben tan. Wan „marki”, kande soso wan serjoesoe komando ben seti so taki no wan sma ben sa teki refensi tapoe Kain foe di a ben kiri Abel. — Genesis 4:15.
Baka wan pisi ten Kain ben go bow wan foto, èn ben gi a foto a nen foe en manpikin. A no de foe froewondroe, taki den bakapikin foe en ben tron sma di ben doe ogri nanga tranga. Te foe kaba, a famirilin foe Kain ben kon na wan kaba di a Froedoe foe den dei foe Noa ben figi ala onregtfardiki sma poeroe. — Genesis 4:17-24; 7:21-24.
A bijbel tori foe Kain nanga Abel no ben kibri soso foe de wan switi sani foe leisi. Na presi foe dati, a ben „skrifi foe gi wi leri” èn a „boen foe gi leri, foe piri-ai gi sma, foe poti sani kon reti” (Romesma 15:4; 2 Timoteus 3:16). San wi kan leri foe a tori disi?
Wan lès gi wi
Leki Kain nanga Abel, kresten na ini a ten disi e kisi a kari foe òfer wan srakti-ofrandi gi Gado — no wan troetroe bron-ofrandi, ma ’wan srakti-ofrandi foe prèise, dati wani taki, a froktoe foe den mofoboeba di e meki en nen bekènti na poebliki’ (Hebrewsma 13:15). Disi e doe nownow na heri grontapoe, ala di Jehovah Kotoigi e preiki a boen njoensoe foe Gado Kownoekondre na ini moro leki 230 kondre (Mateus 24:14). Joe e doe a wroko dati toe? Dan joe kan de seiker taki „Gado no de onregtfardiki, so taki a sa frigiti a wroko foe oenoe èn a lobi di oenoe ben sori gi a nen foe en”. — Hebrewsma 6:10.
Soleki fa a ben de nanga den ofrandi foe Kain nanga Abel, Jehovah no e kroetoe joe srakti-ofrandi na a fasi fa a e sori na dorosei — foe eksempre, soso foe den joeroe di joe gebroiki na ini a diniwroko. Jehovah e loekoe go moro dipi. Jeremia 17:10 e taki dati a e „ondrosoekoe na ati” èn srefi „e ondrosoekoe den niri” — den moro dipi prakseri, firi, nanga sani di e boeweigi a fasi fa wan sma de. So boen, a prenspari penti na foe san ede wan sma e doe wan sani, no o foeroe wan sma e doe. Foe troe, awansi a bigi noso pikin, wan srakti-ofrandi warti gi Gado te a òfer nanga wan ati di abi lobi. — Teki gersi Markus 12:41-44 nanga 14:3-9.
Na a srefi ten, wi moesoe froestan taki Jehovah no sa teki malengri srakti-ofrandi, neleki fa a no ben teki na afoe-ati ofrandi foe Kain (Maleaki 1:8, 13). Jehovah wani taki joe e gi en a moro boen sani di joe abi, taki joe e dini en nanga joe heri ati, sili, froestan, nanga krakti (Markus 12:30). Joe e doe dati? Dan joe abi boen reide foe de tevrede nanga joe srakti-ofrandi. Paulus ben skrifi: „Meki ibri sma boeweisi san na en eigi wroko, èn dan a sa abi wan reide foe prisiri foe ensrefi wawan, èn no te a teki ensrefi gersi nanga a tra sma.” — Galasiasma 6:4.
Kain nanga Abel ben kweki na a srefi fasi. Ma ten nanga situwâsi ben gi ibriwan foe den na okasi foe kweki aparti eigifasi. A denki foe Kain ben kon broko safrisafri nanga djaroesoe, strei, nanga atibron.
Kontrari foe dati, Gado e memre Abel leki wan regtfardiki man (Mateus 23:35). En fasti bosroiti foe plisi Gado awansi san na a bakapisi, ben meki Abel de heri tra fasi foe den sma na ini en famiri di no ben abi tangi, — Adam, Eva, nanga Kain. Bijbel e taigi wi taki ala di Abel dede, tokoe a „e taki ete”. En getrow diniwroko gi Gado de wan pisi foe a historia di skrifi gi ala ten na ini bijbel. Meki wi waka na baka na eksempre foe Abel foe di ala ten wi e tjari srakti-ofrandi di Gado feni boen. — Hebrewsma 11:4.
[Foetoewortoe]
a Son sma e prakseri taki a djari foe Eden ben moesoe de na den bergi kontren na a owstoesei foe a disiten Torkoekondre.
[Faki/Prenki na tapoe bladzijde 23]
Wan eksempre gi kresten di e gi rai
„FOE san ede joe kisi bigi atibron èn foe san ede joe fesi kon swa?” Nanga na aksi disi Jehovah ben rideneri nanga Kain na wan boen fasi. A no ben dwengi en foe kenki, bika Kain ben de wan fri sma. (Teki gersi Deuteronomium 30:19.) Tokoe Jehovah no ben draidrai foe sori den bakapisi foe a takroe pasi foe Kain. A ben warskow Kain: „Efoe joe no go doe baka san boen, dan sondoe e wakti joe na a dromofo èn en tranga lostoe e soekoe joe.” — Genesis 4:6, 7.
A de moi foe si taki srefi nanga a serjoesoe piri-ai disi, Jehovah no ben handri nanga Kain neleki a ben de wan sma di no wan sma no ben man jepi moro. Na presi foe dati, a ben taigi Kain den blesi di ben o de gi en efoe a ben kenki en pasi, èn a ben sori taki a ben abi a froetrow taki Kain ben kan wini a problema disi efoe a ben wani doe dati. „Efoe joe go doe baka san boen,” Jehovah ben taki, „bigi prisiri no sa de dan?” A ben aksi Kain so srefi foe na ogri atibron foe en: „Joe, foe joe sei, sa man basi en?”
Na ini a ten disi, den owroeman na ini a kresten gemeente moesoe waka na baka na eksempre foe Jehovah. Soleki fa a skrifi na 2 Timoteus 4:2, den moesoe „gi piri-ai” èn „gi strafoe”, èn den moesoe sori langalanga san na den bakapisi foe a takroe pasi di a sma e waka. Na a srefi ten den owroeman moesoe „froemane”. A Grikiwortoe pa·ra·ka·leʹo wani taki „foe gi deki-ati”. „A froemane no faja, noso a no foe strei nanga a sma, èn a no e soekoe fowtoe nomo”, a Theological Dictionary of the New Testament e taki. „A troetori taki a Grikiwortoe wani taki trowstoe toe, e sori go na a srefi prakseri.”
A de prenspari foe si taki wan Grikiwortoe di abi foe doe nanga dati, pa·raʹkle·tos, kan taki foe wan jepiman noso wan afkati na ini wan kroetoe afersi. Foe dati ede, srefi te owroeman e gi spesroetoe piri-ai, den moesoe hori na prakseri taki den na jepiman — no feanti — foe a sma di abi rai fanowdoe. Leki Jehovah, den owroeman moesoe de positief, moesoe hori na prakseri taki a sma di e kisi rai kan basi a problema. — Teki gersi Galasiasma 6:1.
A no de foe taki, dati te foe kaba, a e didon na a sma efoe a wani gebroiki a froemane (Galasiasma 6:5; Filipisma 2:12). Sma di e gi rai kan si taki son sma no wani arki den warskow foe den, neleki fa Kain ben froekisi foe no arki a piri-ai di a Kriaman srefi ben gi en. Tokoe, te owroeman e waka na baka na eksempre foe Jehovah, a volmaakti Eksempre gi kresten di e gi rai, dan den kan de seiker taki den doe san den ben moesoe doe.