„Mi ben man firi a vrede di ben de drape”

WAN man di e taki Doisritongo ben go leki „spion” na wan kongres di Jehovah Kotoigi ben orga. Foe san ede? A marki foe en ben de foe „poeroe a bere foe a sekte disi kon na doro èn jepi den mati foe en foe den no lasi pasi”. Baka di a ben fisiti a kongres, a ben skrifi a brifi disi gi den mati foe en:

„Di mi ben e doro a presi foe a kongres, mi ben aksi misrefi efoe disi ben de a joisti presi. Mi no ben si no wan sma, èn no wan papira noso biri-blik ben de na tapoe a gron. Di mi ben kon moro krosibei, mi ben si toe man e tanapoe na a presi foe go na ini a stadion. Den ben gi mi odi èn ben meki mi kon na inisei.

Mi ben denki taki mi ben o jere babari foe den doesoendoesoen sma di ben moesoe de drape, ma a ben pî srefisrefi. ’We’, mi ben prakseri, ’kande wan toe sma nomo ben de na a heri presi.’

Di mi ben go na inisei, wantewante wan drama di ben plèi na tapoe a podium ben hari mi prakseri. Ma baka ten, mi ben kon sabi taki a stadion ben foeroe te na noko nanga doesoendoesoen sma di ben e poti prakseri e arki. Mi ben man firi a vrede di ben drape. Den sani di mi ben jere, ben si, èn ben firi na ini a tra pisi foe a kongres ben naki mi ati srefisrefi.

Di mi ben de na mindri den Kotoigi, mi ben si den kolokoe fesi èn ben jere den lobi-ati wortoe foe den. Wantewante so, mi no ben man dwengi a prakseri, ’Den sma disi na troetroe a pipel foe Gado!’”

Na presi foe ’jepi den mati foe en foe den no lasi pasi’, a jonkoeman disi ben aksi den foe studeri bijbel nanga en. San ben de a bakapisi? Now en na wan kresten owroeman. En nanga en osofamiri de fajafaja na ini wan foe den gemeente na ini Zug, Switserland.