Jehovah e gi en pipel trangaleri
A HEBREW zelfstandig naamwortoe moe·sarʹ nanga a werkwortoe ja·sarʹ e sori wi san na „trangaleri”, „strafoe”, „piri-ai”, „froemane”. Na ini a Griki Septuaginta èn na ini den kresten Griki Boekoe foe bijbel, joe kan taki dati a zelfstandig naamwortoe pai·deiʹa di e kroederi nanga dati nanga a werkwortoe pai·deuʹo, wani taki a srefi sani. Pai·deiʹa, di e kon foe pais, san wani taki „pikin”, e sori moro foeroe san de fanowdoe foe kweki pikin — trangaleri, leri sma sani, gi skoro, piri-ai, nanga strafoe.
Foe pe a komopo èn san-ede a moesoe gi
Jehovah e gi en pipel trangaleri, foe di a lobi den (Odo 3:11, 12). A e leri den sani di e jepi den foe no abi fowtoe prakseri èn di e kenki a fasi fa den e denki èn fa den e tjari densrefi. Gi den Israèlsma di ben libi na ini a ten foe Moses, a trangaleri ben wani taki toe dati densrefi ben si den boeweisi foe a bigi di Gado bigi. Di Jehovah ben tjari strafoe kon na tapoe ala den gado foe Egipti, di a ben fri en pipel, èn ben kiri a legre foe Egipti na ini a Redi Se, dan den sani disi ben de fasi fa Jehovah ben sori en krakti di joe no man teki gersi nanga no wan tra sani. Trangajesi Israèlsma ben kisi strafoe di ben skreki sma. Èn nanga jepi foe wondroe den ben kisi njanjan nanga watra foe leri den toe o prenspari a de foe gi jesi èn doe ala sani di Jehovah e taki. Ala a trangaleri disi ben moesoe gi den sakafasi èn meki den froestan krin taki a de fanowdoe foe frede Jehovah na a joisti fasi, san den ben kan sori nanga bribi èn te den ben gi jesi. — Deuteronomium 8:3-5; 11:2-7.
Nofotron te Jehovah e gi trangaleri, dan a e gebroiki sma di a poti foe teki presi gi en. Den owroeman, di ben doe a wroko foe kroetoeman, ben moesoe gi wan Israèlman trangaleri foe di a ben lei taki en wefi no ben de wan njoenwenke di den ben trow (Deuteronomium 22:13-19). Papa nanga mama e teki presi gi Jehovah te den e gi den pikin foe den trangaleri na a joisti fasi. Èn pikin moesoe gi jesi na a trangaleri dati, foe di a de wan fasi fa papa nanga mama e sori taki den lobi den pikin, so taki a kan go boen nanga den wan langa ten (Odo 1:8; 4:1, 13; 6:20-23; 13:1, 24; 15:5; 22:15; 23:13, 14; Efeisesma 6:4). Owroeman na ini a kresten gemeente, e gebroiki Gado Wortoe foe gi trangaleri — froemane, nanga piri-ai (2 Timoteus 3:16). Te kresten doe wan ogri, dan Jehovah e gi den trangaleri, foe jepi den opo baka te den fadon na ini sondoe, so taki den srefi no sa kisi a takroe kroetoe di na ogri grontapoe sa kisi (1 Korentesma 11:32). Te Jesus Krestes leki edeman foe a kresten gemeente e sori a lobi foe en, dan a e sorgoe taki trangaleri e gi te dati de fanowdoe. — Openbaring 3:14, 19.
Wan toemoesi serjoesoe fasi foe gi trangaleri na te den e sluit wan sma uit foe a gemeente. Na apostel Paulus ben doe disi di a ben gi Aleksander nanga Himeneus „abra na Satan” (1 Timoteus 1:20). Di den ben koti Aleksander nanga Himeneus poeroe foe a gemeente, den disi ben de wan pisi baka foe grontapoe di Satan e tiri. — 1 Korentesma 5:5, 11-13.
Te Jehovah e gi pasi taki den foetoeboi foe en e kisi froefolgoe, dan dati kan de foe gi den trangaleri, noso foe leri den wan sani, so taki den e kisi a moi froktoe regtfardikifasi di den kan prisiri foe dati na ini vrede, baka te a tesi kaba (Hebrewsma 12:4-11). Srefi a Manpikin foe Gado ben man de wan gran-priester di ben abi sari-atifasi nanga switifasi, foe di en Tata ben gi pasi taki pina miti en. — Hebrewsma 4:15.
San na den bakapisi te wan sma e gi jesi èn te wan sma no e gi jesi
Den godelowsoe sma, den don sma, noso den sma di no warti noti na moreel sei, e sori taki den no lobi a trangaleri foe Jehovah kwetikweti, foe di den e weigri krinkrin foe teki en (Psalm 50:16, 17; Odo 1:7). Den takroe bakapisi foe a don fasi disi, e meki taki moro trangaleri, èn nofotron hebi strafoe de fanowdoe. Soleki fa na odo e taki dan „a trangaleri foe den don sma na donfasi” (Odo 16:22). Den kan meki densrefi kon pôti, noso kisi sjen, den kan siki densrefi, èn dede toemoesi froekoe srefi. A historia foe den Israèlsma e sori omeni wan sma kan lasi. Den no ben arki a trangaleri di den profeiti ben gi nanga jepi foe piri-ai. Den no ben prakseri a trangaleri di Jehovah ben gi den foe di a no ben gi den kibri nanga blesi moro. Te foe kaba, Gado ben gi den serjoesoe trangaleri, san a ben meki bekènti na fesi kaba — sma ben o kon feti nanga den èn wini den, èn den ben o go na ini katibo. — Jeremia 2:30; 5:3; 7:28; 17:23; 32:33; Hosea 7:12-16; 10:10; Sefanja 3:2
Na a tra sei, te wan sma e teki trangaleri, èn abi wan gosontoe frede toe gi Jehovah, dan a e kon koni, èn a man gebroiki sabi na a joisti fasi, èn na so fasi dati sa jepi en foe bigi pen nanga pina no miti en. Te wan sma abi warderi gi a trangaleri di a kisi èn a e handri akroederi dati, dan a kan meki taki a e libi moro langa now èn a kan wani taki toe wan pramisi gi wan têgo tamara. Foe dati ede, a boen foe abi foeroe warderi gi trangaleri. — Odo 8:10, 33-35; 10:17.