Leisi nanga den pikin foe joe

Soleki fa a Brasjon tijdschrift Veja e taki, dan nofotron a de so taki den pikin foe sma di lobi leisi sa kon lobi boekoe toe, moro leki den pikin di no abi wan eksempre na ini den oso foe sma di e leisi. „Te papa nanga mama e leisi makandra nanga den pikin foe den, dan a matifasi na den mindri sa kon moro tranga èn a e gi a pikin na okasi foe froestan moro boen san skrifi na ini den boekoe”, na so Martha Hoppe, wan sabiman foe a fasi fa pikin e gro, e taki.

Te joe e leisi nanga wan tranga sten gi den pikin foe joe, dan dati e gi joe na okasi toe foe piki den aksi foe den. Joe kan taki foe iniwan prenki di de nanga den sani di skrifi. „O moro wan pikin e froestan san de na ini den boekoe”, na so Hoppe e taki, „o moro a sa kisi a deki-ati foe go soekoe den boekoe te a wani sabi moro sani.”

Foeroe papa nanga mama na mindri Kotoigi foe Jehovah lobi leisi nanga den pikin foe den. Den kan leisi boekoe leki Mi boekoe nanga bijbel tori, Naar de Grote Onderwijzer luisteren (Arki a Bigi Leriman), nanga A moro bigi man di oiti ben libi.a Den sortoe boekoe disi no wawan e jepi den pikin foe tron boen leisiman, ma a e meki den kisi moro belangstelling toe gi a boekoe di seri moro ala tra boekoe na grontapoe — a Santa Bijbel. Foe dati ede, efoe joe na wan papa noso wan mama, dan gi den pikin foe joe na eksempre foe di joe de wan fajafaja leisiman foe Gado Wortoe (Josua 1:7, 8). Èn na tapoe foe dati, teki ten foe leisi gi den!

[Foetoewortoe]