A fatoe gron foe Venda

NA INI den tin jari di pasa, mi nanga mi wefi wroko leki foeroeten preikiman na mindri den sma foe Venda. Den sma foe Venda e tan na a zuidsei foe a Limpopoliba, na a noordsei foe Zuid-Afrika, èn a nâsi foe den abi wan toe lo di ben koti a Limpopoliba abra na ini den jarihondro di pasa. Wan toe sma foe Venda e froeklari taki den fositata foe den ben kon libi djaso moro leki 1000 jari pasa kaba.

Ija, a kontren disi ben de wan pisi foe wan owroe libimakandra di nen Mapungubwe Kownoekondre. A ben de a fosi bigi foto foe Zuid-Afrika, èn ben tiri a kefalek bigi lagipresi foe a Limpopoliba, foe Botswana na a westsei te go na Mosambik na a owstoesei. Na ini a pisi ten foe 900 G.T. te na ini 1100 G.T., Mapungubwe ben gi den bisnisman foe Arabia, ivoor, a toetoe foe neushoorn, skin foe meti, kopro, èn srefi gowtoe. Na tapoe wan pikinbergi pe wan kownoe beripe ben de èn di nen Mapungubwe, den ben diki sani poeroe di ben kerfoe na wan koni fasi èn di ben tapoe nanga gowtoe. Wan encyclopedia e taki dati disi na wan foe „den fosi sani di ben sori taki sma ben e diki gowtoe na ini Zuid-Afrika”.

Den no e diki gowtoe djaso moro. Na ini a ten disi a kondre Venda de pôpi bika foe a fatoe gron. Na a zuidsei foe den Soutpansberg Bergi, wan lagipresi de pe foeroe bon e gro, pe den froktoe soleki afkati, bâna, manja, nanga goejaba e gro bogobogo. Boiti den noto soleki pecan noto nanga macadamia noto, so srefi foeroe sortoe groentoe de. Disi na so srefi a muroho di e gro na ala presi, èn a e tesi leki spinasi èn den sma di e libi drape lobi en srefisrefi.

Den sma foe Venda na sma di lobi vrede èn den lobi foe ontfanga sma. A de wan gewoon sani te na ede foe na osofamiri e meki na osofamiri bori wan fowroe gi wan fisitiman di den no ben froewakti. Den e njan a fowroe nanga vhuswa, na aladei njanjan di meki foe karoe. Na baka a fisiti, dan na edeman foe na osofamiri e tjari en fisitiman wan sjatoe pisi na tapoe pasi. Disi na a fasi fa den gwenti foe sori lespeki gi wan fisitiman. Den pikin e leri foe taki den fisitiman odi na wan switi fasi, te den e boigi èn e vow den anoe. Na tapoe a bladzijde disi joe kan si toe Venda oema e taki makandra odi leki fa a gwenti de.

Wan moeilek tongo

Gi den sma di gebore na Europa a no makriki foe man taki a Vendatongo. Wan moeilek sani na taki foeroe foe den wortoe e skrifi a srefi, ma den e taki tra fasi. Di mi ben gi wan Bijbel lezing na ini wan Venda gemeente foe Jehovah Kotoigi wan dei, dan mi ben e proeberi foe gi den arkiman a deki-ati foe taki nanga ibri sma. Wan sma na ini a poebliki ben moesoe lafoe bika mi ben taki „finga na finga”, na presi foe „sma na sma”.

Di mi ben proeberi a fosi leisi foe taki a Vendatongo na ini a poebliki preikiwroko, dan wan Venda oema ben piki: „Mi no e taki Ingrisitongo.” Mi ben prakseri taki mi ben taki Vendatongo boen, ma na oema ben prakseri taki a ben de Ingrisitongo! Di mi ben go na wan oso na wan tra okasi, dan mi ben aksi wan jongoe sma foe kari na edeman foe na osofamiri. A wortoe gi famiri edeman na ini Vendatongo na thoʹho. Ma mi ben meki wan fowtoe, mi ben taki thohoʹ, èn na so fasi mi ben aksi en efoe mi kan taki nanga a kesikesi foe na oso! Den sortoe fowtoe disi ben meki mi lasi-ati, ma foe di mi nanga mi wefi ben horidoro, meki wi man taki a Vendatongo pikinso boen na wan reidelekfasi now.

Froktoe na jeje fasi

A kondre Venda e gi foeroe froktoe na jeje fasi. Na ini den jari na baka 1950, wan gemeente foe Jehovah Kotoigi ben seti na mindri sma di ben kon foe dorosei birtikondre foe wroko kopro na ini a foto Messina. A fajafaja wroko foe den ben meki foeroe sma foe Venda kon leri sabi a waarheid foe Bijbel. Tin jari na baka, wan groepoe foe Venda Kotoigi ben hori konmakandra na ini wan oso foe wan sma na ini a foto Sibasa.

Foe meki a gro go moro esi, dan a Zuid-Afrika bijkantoro foe a Waktitoren Genootschap ben seni foeroeten preikiman go na ini a veld disi di fatoe srefisrefi. Heri esi a Sibasa groepoe ben gro kon tron wan bigi gemeente. Den Kresten konmakandra ben hori na ini wan klas na a ten dati. Ma nanga a jepi foe Kotoigi foe Jehovah na ini a kontren foe Pietersburg, so wan 160 kilometer go na a zuidsei, wan Kownoekondre zaal ben bow na ini Thohoyandou, wan krosibei foto.

Moro leki 500.000 sma di e libi na a noordsei foe Zuid-Afrika e taki a Vendatongo. Venda Kotoigi no ben de di a Kownoekondre preikiwroko ben bigin djaso na ini den jari na baka 1950. Now moro leki 150 Kotoigi de. Ma foeroe kontren de ete pe den Kotoigi no ben go ete èn foeroe wroko de foe doe ete. Na ini 1989 wi ben bigin fisiti wan Venda dorpoe di nen Hamutsha. Wán Kotoigi nomo ben libi drape na a ten dati. Now moro leki 40 Kownoekondre preikiman e libi na ini a dorpoe dati. Wi e wroko tranga foe kaba bow wi Kownoekondre zaal, tangi foe a jepi foe den Kotoigi foe den Pietersburg gemeente nanga a moni bijdrage foe den brada na ini den kondre di abi en moro boen.

Wi e libi na ini wan karavan (wan pikin wagi di de wan tanpresi toe) na wan boeroegron. Foe di wi e libi eenvoudig, meki wi abi moro ten foe tjari a boen njoensoe gi den sma di e libi drape (Markus 13:10). Leki wan bakapisi foe dati, wi ben kisi a bigi blesi foe abi a grani foe jepi foeroe sma foe gi den libi abra na Jehovah Gado. Wan eksempre na foe wan man di nen Michael, di ben si a boekoe Joe kan libi foe têgo na ini wan paradijs na grontapoe, na a oso foe wan mati.a A ben bigin leisi en èn wantewante a ben si a waarheid. Foe dati ede a ben skrifi go na a Waktitoren Genootschap foe kisi moro Bijbel poeblikâsi. Na ini en brifi Michael e froeklari taki no so langa pasa a ben dopoe leki wan memre foe na Apostolisch kerki na ini a kontren. A ben taki moro fara: „Mi kon si taki mi de na tapoe a fowtoe pasi foe go na a Kownoekondre foe Gado. Mi bosroiti foe tron wan foe den memre foe oenoe, ma mi no sabi fa mi moesoe doe dati.” Dan a ben gi en adres èn ben aksi foe seni wan Kotoigi foe Jehovah kon na en foe jepi en. Mi ben man feni Michael èn ben bigin wan oso-bijbelstudie nanga en. Nownow a de wan dopoe Kotoigi èn a e dini Jehovah na wan loyaal fasi.

Na ini december 1997 wi ben fisiti a „Bribi na ini Gado Wortoe”-distriktkongres foe Jehovah Kotoigi di ben hori na ini wan sport stadium na Thohoyandou. Den sma di ben de drape ben doro 634, èn 12 njoen sma ben teki dopoe. Mi ben abi a grani foe gi toe lezing na ini a Vendatongo. Dati ben de troetroe wan heimarki na ini den moi tin jari di wi ben de na ini a fatoe kondre disi! — A seni kon.

[Foetoewortoe]