Lobi Den Wan ’Di Abi a Srefi Bribi Leki Wi’
TRUTRU Kresten abi wan banti neleki di fu wan famiri. Iya, sensi a fosi yarihondro G.T., den kari makandra „brada” nanga „sisa” (Markus 3:31-35; Fileimon 1, 2). Disi a no soso wortu; den e sori san sma di e anbegi Gado e firi gi makandra. (Teki gersi 1 Yohanes 4:7, 8.) Yesus ben taki: „Nanga disi ala sma sa sabi taki unu na mi disipel, efu unu abi lobi na un mindri.”—Yohanes 13:35.
A lobi dati ben de fu si na ini yuli 1997 di, baka wan langa dreiten, bigi alen ben fadon èn ben sungu Chili. Wantronso, wan heri ipi sma ben abi nyanyan, krosi nanga tra sani fanowdu. Te rampu de, dan Yehovah Kotoigi e pruberi fu gi yesi na a frumane di Paulus ben gi den Galasiasma: „We dan, so langa a ten bun gi wi ete, meki wi du bun gi ala sma, ma spesrutu gi den wan di de na ini a srefi bribi leki wi.”—Galasiasma 6:10.
Fu dati ede, Yehovah Kotoigi ben orga densrefi esi-esi fu kan du wan sani. Den ben tyari nyanyan, krosi, nanga den sortu sani dati kon na wán, èn den ben piki den sortu, poti den na makandra, ben poti den na ini dosu, èn baka dati den ben tyari den go na a kontren pe a rampu ben pasa. ¡Pikin-nengre ben gi preisani srefi! Wan sisa ben fruwondru di a ben si taki a Kownukondre zaal ben furu nanga sani fu gi yepi. „Mi ben fruwondru trutru, èn mi no ben sabi efu mi ben musu lafu noso krei”, a ben taki. „A ben de soifri san wi ben abi fanowdu.”
Dan wantronso, gronseki ben naki wan pisi fu a srefi presi di ben sungu. Furu oso ben broko. Moro yepikomte ben opo fu sorgu gi den sani di ben de fanowdu. Den Regionaal Bow Komte, di na tra ten e bow den konmakandra presi fu Yehovah Kotoigi, ben gi wan anu tu èn ben yepi den. San ben de a bakapisi? Oso sondro pranpran — di den brada ben sidon denki fa fu meki den èn di den ben bow — ben gi na den wan di ben lasi den oso. Ala di den oso disi no ben moi kefalek, toku den ben de heri tra fasi leki den oso di sma ben kan borgu na grontapu organisâsi di ben gi yepi. Den oso disi no ben abi wan gron nanga fensre èn den no ben ferfi.
Son brada ben kon fu farawe fu gi yepi. Tu dei baka makandra a fesiman fu wan Regionaal Bow Komte ben go na a heri kontren fu ondrosuku san ben pasa — ala di a musu sidon na ini wan rolsturu. Wan breni brada ben wroko tranga e tyari udu go na a temreman di ben koti den na ini den yoisti pisi. Wan dofu brada ben teki den pisi udu èn ben tyari den go na a presi pe den ben de fanowdu.
Furu sma di ben si san ben pasa ben fruwondru fu si fa den brada ben e gi yepi. Na ini wan foto, wan skowtu-oto ben tanapu krosibei fu wan sisa en oso di ben e meki. Den skowtu ben wani sabi san e pasa. Wan fu den ben aksi wan brada: „Suma na den wrokoman disi di e luku so prisiri, èn omeni moni den e pai den?” A brada ben fruklari taki den alamala ben de friwani wrokoman. Wan fu den skowtu ben fruklari taki a ben pai wan moni na a kerki fu en ibri mun, ¡ma a pastoor fu en no ben kon srefi na en sensi a gronseki! A dei na baka, wan skowtu ben bel a sisa. En ben si tu san den wrokoman ben du. ¡A ben taki dati a ben fruwondru someni fu a faya fu den wrokoman, taki pikinmoro a ben kon wroko nanga den tu!
Fu tru, a muiti di den ben meki fu gi yepi na Chili ben de wan prisiri ondrofeni gi den friwani wrokoman èn wan heri bun kotoigi gi den sma di ben si disi.