¡Libilibi Diriston De na Namibia! — Waktitoren LIBRARY TAPU INTERNET

¡Libilibi Diriston De na Namibia!

NAMIBIA, di de na a zuidwest syoro fu Afrika, langa pikinmoro 1500 kilometer. A heri syoro fu a kondre abi bigi ipi santi, pikin stonbergi èn bigi pisi gron nanga pikinpikin ston na tapu. Diriston di abi ala sortu kloru di wan sma man denki, moksi nanga den ston na tapu den syoro fu Namibia. Srefi dyamanti yu e feni drape wanwan leisi. Ma a kondre abi wan sani di warti moro den ston disi srefisrefi. Namibia abi libilibi diriston — a pipel fu den furu nationaal grupu fu a kondre.

Den fosi sma di ben kon libi na Namibia ben e taki difrenti tongo di ben e kruderi nanga makandra èn di den ben e kari Khoisan. Sma ben sabi a fasi fa den ben taki, fu di den ben meki wan sani di ben piki neleki te sma e naki tongo. Na mindri den sma di e taki Khoisan na ini a ten disi yu abi den dungruskin Damarasma, den syatu lektiskin sma di nen den Namasma èn den barinen Busiman ontiman. Furu blakaman lo kon tu na Namibia na ini den yarihondro di no pasa so langa ete. Yu kan prati den na ini dri bigi nationaal grupu: den Ovambosma (a moro bigi etnisch grupu na Namibia) den Hererosma nanga den Kavangosma. Sma fu Europa ben bigin kon na Namibia na ini a di fu 19 yarihondro. Moro sma fu doroseikondre ben kon libi drape baka di sma feni dyamanti na ini a santi fu den sabana.

Den sma fu Namibia warti furu, fu di den na wan pisi fu a libisma famiri di Gado ben gi en Manpikin, èn na so fasi a ben opo a pasi di e go na têgo libi (Yohanes 3:16). Hondrohondro sma fu Namibia di e kon fu furu lo gi yesi kaba na a boskopu fu frulusu. Wi kan agersi den sma disi nanga libilibi diriston fu di den de na mindri „den warti sani fu ala den nâsi”, di e tyari kon na wán now na ini Yehovah en oso fu anbegi.—Hagai 2:7.

Den Bigin Diki Gron na Yeye Fasi fu Feni Diriston

Den ben bigin diki gron fu feni den diriston na yeye fasi na Namibia na ini 1928. Na ini a yari dati a bijkantoro fu a Waktitoren Genootschap na Zuid-Afrika ben seni 50.000 pisi Bijbel publikâsi go na sma di ben panya na ini a heri kondre. A yari na baka wan salfu Kresten fu Zuid-Afrika di nen Lenie Theron ben go na den sma di ben abi belangstelling. Na ini fo mun a ben reis a heri bigi kondre dati en wawan, èn a ben libi moro leki 6000 yepisani na sma fu studeri Bijbel na ini Afrikaans, Ingrisitongo, nanga Doisritongo. Ala a wroko disi no ben de fu soso kwetikweti.

Fu eksempre, luku Bernhard Baade, wan Doisri man di ben e diki gron fu feni diriston. Na ini 1929, a ben kisi eksi fu wan gronman di ben lolo ibriwan fu den eksi na ini wan bladzijde fu wan publikâsi fu a Waktitoren Genootschap. Bernard ben gridi fu leisi ibri bladzijde, ala di a ben aksi ensrefi suma ben skrifi a buku. Te fu kaba a ben doro a lasti bladzijde, di ben abi wan Doisri adres fu a Waktitoren Genootschap. Bernhard ben skrifi den fu seni moro buku kon gi en èn a ben tron a fosi Namibiasma di ben teki a waarheid.

Furuten Dinari E Doro

Na ini 1950, fo zendeling di ben kisi skoro na a Waktitoren Bijbelskoro Gilead ben doro na Namibia. A nomru fu den zendeling ben kren kon tron aiti na ini 1953. Na mindri den yu ben abi so srefi Dick nanga Coralie Waldron, wan trowpaar fu Australia di e dini dyaso getrow te now ete. Furu tra furuten Kownukondre preikiman fu Zuid-Afrika nanga tra kondre ben abi wan prati tu na a wroko fu diki gron fu feni diriston na yeye fasi na Namibia. Tra zendeling, so srefi den wan di komoto na a Bedinariskoro, seni go tu na Namibia.

Ete wan sani di ben meki taki gro na yeye fasi ben de na Namibia ben de fu di den vertaal Bijbel publikâsi èn tyari den kon na doro na ini den moro prenspari tongo fu drape, soleki Hererotongo, Kwangalitongo, Kwanyama, Nama/Damaratongo, nanga Ndonga. Sensi 1990, wan bun vertaalkantoro nanga wan oso gi furuten friwani wrokoman de na ini a mamafoto Windhoek. Karen Deppisch, di du a furuten evangeliewroko makandra nanga en masra na difrenti pisi fu Namibia, e taki: „Furu sma e fruwondru te wi e pristeri den publikâsi na ini den eigi tongo, spesrutu fu di furu buku no de fu feni na ini a tongo dati.”

Grati den Diriston

Den skwala nanga a santi grati son wan fu den trutru diriston fu Namibia dusundusun yari langa. Ma a no de fu taki dati so wan fasi fa a naturu e wroko no e meki libilibi diriston. A muiti fu onvolmaakti libisma de fanowdu fu puru „na owru fasi fa wan sma de” èn weri wan nyun fasi fu wan Kresten (Efeisesma 4:20-24). Fu eksempre, furu lo na Namibia abi a tranga gwenti fu gi grani na fositen tata di dede kaba. Furutron, famiriman nanga birtisma e frufolgu den sma di no e gi grani na den fositen tata. Te sma e leri fu Bijbel taki dedesma „no sabi notinoti” dan wan tesi e wakti den (Preikiman 9:5). Sortu tesi?

Wan Herero Kotoigi e fruklari: „A ben de wan bigi tyalensi fu gi yesi na a waarheid. Mi ben teki wan bijbelstudie nanga Kotoigi fu Yehovah, ma mi ben abi ten fanowdu fu du den sani di mi ben e leri. Mi ben musu overtoigi misrefi fosi efu a ben o bun gi mi fu no libi akruderi den sani di sma gwenti bribi. Fu eksempre, mi ben rij pasa son presi na Namibia sondro fu stop fu poti wan ston na tapu wan grebi noso fu puru mi ati fu gi den dedesma odi. Safrisafri mi ben kon si taki noti ben o pasa nanga mi efu mi no ben anbegi den fositen tata di dede kaba. ¡Mi breiti trutru taki Yehovah blesi a muiti di mi ben du fu yepi mi famiri nanga tra sma di ben abi belangstelling fu leri a waarheid!”

Sma De Fanowdu fu Diki Gron fu Feni Diriston na Yeye Fasi

Bifo den zendeling ben kon na ini 1950, yu ben abi soso wán preikiman fu a bun nyunsu na Namibia. Safrisafri a nomru kren kon tron wan heimarki fu 995. Ma furu wroko de fu du ete. Fu taki en leti, son presi de pe sma no wroko furu srefisrefi. ¿Yu man go dini pe a nowtu gi fayafaya Kownukondre preikiman bigi? Dan abra go na Namibia grantangi èn yepi wi fu feni moro diriston na yeye fasi èn fu grati den.—Teki gersi Tori fu den Apostel 16:9.

[Karta na tapu bladzijde 26]

(Efu yu wani si pe den sani disi skrifi, luku a tijdschrift)

AFRIKA

NAMIBIA

[Prenki]

Namibia na wan kondre nanga moi diriston

[Sma di abi a reti fu a karta]

[Prenki na tapu bladzijde 26]

Den e preiki a bun nyunsu na ala den etnisch grupu fu Namibia

[Prenki na tapu bladzijde 28]

¿Yu kan go dini pe a nowtu gi Kownukondre preikiman moro bigi?