¿Yu E Memre Disi Ete?

¿Yu feni taki den uitgave fu A Waktitoren fu no so langa pasa, ben yepi yu? We, dan luku nanga yepi fu den aksi di e kon now, efu yu sabi wan tu sani ete:

◻ Sortu tu aksi yepi furu Kresten di ben musu bosroiti sortu wroko den sa du, fu teki wan bosroiti gi densrefi?

A fosi prenspari aksi na: ¿Bijbel e krutu a grontapu wroko dati? A di fu tu aksi na: ¿Efu wan sma ben sa du a wroko disi, dan dati ben o wani taki dati a e wroko makandra fu du wan sani di Bijbel e krutu?—15/4, bladzijde 28.

◻ ¿Na sortu fasi ’libisma kriaturu ben kon na ondro soso sani’? (Romesma 8:20)

Wi ben „kon na ondro soso sani” bika fu den sani di Adam nanga Eva, wi fosi papa nanga mama, ben du. A no ben de „fu di [wisrefi] ben wani”, noso taki a ben de a bakapisi fu wan bosroiti di wisrefi ben teki, taki den sani disi ben pasa. Wi gebore na a fasi disi. Fu di Yehovah abi sari-ati, èn ala di a fosi papa nanga mama fu wi ben man gi soso onvolmaaktifasi, sondu, nanga dede abra na den pikin fu den now, meki a ben gi den primisi fu meki pikin. Dede panya go na ala libisma, èn na a fasi dati Gado „ben poti [den kriaturu] na ondro soso sani”.—1/5, bladzijde 5.

◻ Fu san ede a fiti fu taki dati „a tegu sani” sa „tanapu na ini wan santa presi” na ini a ten di e kon? (Mateus 24:15)

Na ini na owruten eksempre, ’a tegu sani di ben tanapu na ini wan santa presi’ ben abi fu du nanga a feti di Rome ben go feti nanga Yerusalem na ondro a tiri fu Legre-edeman Galus na ini a yari 66 G.T. A disiten agersi fu a feti dati — a bigin fu a „bigi banawtu” — musu feni presi ete (Mateus 24:21). So bun, „a tegu sani di e tyari pori kon” musu tanapu na ini wan santa presi ete.—1/5, bladzijde 16, 17.

◻ Fa wan papa nanga wan mama di e wroko ben sa kan feni ten gi den pikin fu den?

A mama di weri srefisrefi na baka wan wrokodei, ben kan aksi den pikin fu en fu sreka a nyanyan nanga en. A papa di abi furu sani fu du na a kaba fu a wiki, ben kan du wan tu fu den pikinpikin oso-wroko nanga den pikin fu en.—15/5, bladzijde 6.

◻ San den sma di ’e waka a pasi fu Yehovah’ musu du? (Yeremia 7:23)

Loyaalfasi — wan fasti bosroiti fu dini Yehovah wawan — de fanowdu fu waka a pasi fu en. A de fanowdu fu abi frutrow — fu bribi dorodoro taki den pramisi fu Yehovah de fu frutrow èn taki den sa kon tru. A de fanowdu fu gi yesi na Gado efu wi wani waka a pasi fu Yehovah — fu waka na baka den wet fu en sondro fu lasi pasi èn fu hori den hei markitiki fu en (Psalm 11:7).—15/5, bladzijde 14.

◻ San na fo prenspari frantwortu di „presenti ini libisma” kan kisi? (Efeisesma 4:8)

Na wan safu fasi den kan meki wi kon bun baka, den kan bow wi nanga lobi, den kan tyari wánfasi kon ini a gemeente, èn den kan kibri wi na wan deki-ati fasi (Efeisesma 4:12-14).—1/6, bladzijde 14.

◻ San wi kan leri fu a kontakti di Paulus ben abi nanga so wan wán hondro sma di kari na ini Tori fu den Apostel èn na ini den brifi fu en?

Ala ten wi musu wroko makandra nanga na organisâsi fu Gado, nanga wi eigi gemeente, èn nanga den kompe-bribiman fu wi. Wi abi den yepi nanga trowstu fanowdu na ini bun ten èn na ini muilek ten.—1/6, bladzijde 31.

◻ Sortu dri fasi fu rideneri wi kan gebroiki fu yepi tra sma fu prakseri a Kriaman?

A soifrifasi fa sani e wroko na ini a bigi universum, a bigin fu a libi na grontapu, èn a trutru apartifasi fu a libisma edetonton di man du difrenti sani.—15/6, bladzijde 18.

◻ Fu san ede a de so prenspari fu frustan san a nen fu a Kriaman srefi wani taki?

A nen fu Gado wani taki „En E Meki Sani Du Kon” èn a nen e sori taki a e poti sani na prakseri fu du èn taki a e du en tu. Te wi sabi a nen èn e gebroiki en, dan dati kan yepi wi fu frustan moro betre taki a e du san a pramisi èn taki a e sori nanga den sani di a e du taki a e meki den prakseri fu en kon tru.—15/6, bladzijde 21.

◻ Fa pikin-nengre kan abi wan prati na wan osofamiri bijbelstudie?

Efu a kan, seti sani fu meki ibri pikin abi en eigi Bijbel nanga publikâsi di o studeri. Yu kan aksi wan yongu pikin fu fruteri fu wan prenki di de na ini a studie, èn wan yongu pikin kan kisi a toewijzing na fesi fu leisi wan bijbeltekst. Wan moro owru pikin ben kan kisi a toewijzing fu kari okasi pe den kan gebroiki den sani di den leri na ini a studie.—1/7, bladzijde 15.

◻ San na wan tu marki di wan osofamiri kan abi te den e sreka densrefi gi den gemeente konmakandra?

(1) Ibriwan sma na ini na osofamiri musu sreka ensrefi fu gi wan piki na den konmakandra; (2) ibriwan fu den musu du muiti fu gi komentaar nanga en eigi wortu; (3) taki fu wan tekst na ini en komentaar; èn (4) ondrosuku a tori nanga a marki fu gebroiki en gi ensrefi.—1/7, bladzijde 20.

◻ San na wan sroto gi wan bun trowlibi?

Wan bun komunikâsi na wan prenspari sani di sa meki taki wi man feni èn ondrofeni a trutru prisiri fu wan bun trowlibi. Disi wani taki, dati wi e taigi makandra san wi e firi èn san wi e denki. Èn wan bun komunikâsi abi fu du nanga sani di e bow sma, di e meki sma firi bun, di bun, di warti fu kisi prèise, èn di e gi trowstu (Efeisesma 4:29-32; Filipisma 4:8).—15/7, bladzijde 21.

◻ San na a ’pasi fu Yehovah’? (Psalm 25:8, 9, 12)

A pasi dati na a pasi fu lobi. A abi gron tapu a du di sma musu du san bun akruderi den markitiki fu Gado. Bijbel e kari a sori di sma e sori a lobi disi di abi gron tapu gronprakseri, „wan pasi di moro bun leki ala tra pasi” (1 Korentesma 12:31).—1/8, bladzijde 12.