Ala sma sa de fri

„Mi e denki dati a pina di wi e pina now no de notinoti efoe joe teki en gersi nanga a glori di sa tjari kon na krin na ini wi. Bika a fajafaja froewakti foe den kriatoeroe e wakti taki den manpikin foe Gado tjari kon na krin. Bika den kriatoeroe ben kon na ondro soso sani, no foe di densrefi ben wani, ma foe Gado ede di ben poti dati na en ondro, tapoe a fondamenti foe howpoe so taki den kriatoeroe srefi sa kon fri toe foe a katibo foe pori èn sa abi a glori fri foe den pikin foe Gado. Bika wi sabi taki te nanga now a heri mekisani makandra e tan geme èn abi pen makandra.” — ROMESMA 8:18-22.

NA INI a pisi disi foe en brifi gi den Kresten na ini Rome, na apostel Paulus ben gi wan kefalek aparti sjatoe froeklari foe san ede a libi no abi troetroe fri èn foe san ede a libi no abi waarde èn a abi so foeroe pen. A e froeklari toe fa wi kan kisi troetroe fri.

„A pina di wi e pina now”

Paulus no e taki dati „a pina di wi e pina now” na noti, te a e taki dati den pina „no de notinoti efoe joe teki en gersi nanga a glori di sa tjari kon na krin na ini wi”. Na ini a ten foe Paulus èn so srefi baka ten, den Kresten ben pina hebi na ondro na ogri-ati tirimakti foe Rome di ben abi ala makti èn di no ben broko den ede kwetikweti nanga den reti foe libisma. Baka di Rome ben kon bribi taki den Kresten ben de feanti foe Lanti, dan Rome ben kwinsi den na wan ogri-ati fasi. A historia skrifiman J. M. Roberts e taki: „Foeroe Kresten na ini na edefoto [Rome] ben dede na wan ogri-ati fasi na ini na arena noso sma ben bron den libilibi” (Shorter History of the World). Wan tra verslag e taki foe den sma disi di ben dede na ondro a froefolgoe foe Nero: „Den ben spikri wan toe foe den na wan kroisi, trawan den ben nai na ini den skin foe meti èn ben meki dagoe onti den, trawan den ben tapoe nanga pek èn ben soetoe faja gi den foe gebroiki den leki frambo te a ben kon doengroe.” — New Testament History, di F. F. Bruce skrifi.

Den fosi Kresten dati, seiker ben sa wani foe kon fri foe so wan kwinsi, ma den no ben wani foe no doe san Jesus Krestes ben leri den foe kan kisi fri. Den ben tan neutraal dorodoro, foe eksempre, na ini a feti na mindri den Rome tirimakti èn den Djoe fetiman gi fri, soleki den Zelootsma (Johanes 17:16; 18:36). Den Zelootsma ben bribi taki „a taki di sma e taki dati wi moesoe wakti a ten te Gado sa doe wan sani, a no san wi abi fanowdoe na ini a kefalek moeilek ten disi”. Den ben taki dati a sani di den ben abi fanowdoe ben de „ogri di e doe nanga tranga teige a feanti”, Rome (New Testament History). Den fosi Kresten ben denki wan tra fasi. „Foe wakti a ten te Gado sa doe wan sani” ben de a wan-enkri troetroe jepi di kan de. Den ben abi na overtoigi taki noti, boiti Gado, ben sa tjari wan kaba kon foe ala ten na „a pina di wi e pina now” èn a sa tjari troetroe èn têgo fri kon (Mika 7:7; Habakuk 2:3). Ma bifo wi e go loekoe fa dati sa pasa, meki wi go ondrosoekoe na a fosi presi foe san ede „den kriatoeroe ben kon na ondro soso sani”.

„Ben kon na ondro soso sani”

Benjamin Wilson e taki na ini The Emphatic Diaglott, taki djaso a wortoe „kriatoeroe” no wani taki „den sani di kria èn di no abi libi èn den kriatoeroe di no abi froestan”, soleki fa son sma e prakseri, ma na presi foe dati, a wani taki „ala libisma”. (Teki gersi Kolosesma 1:23.) A e taki foe a heri libisma famiri — wi alamala e angri foe kon fri. Wi ben „kon na ondro soso sani” bika foe den sani di wi fosi papa nanga mama ben doe. A no ben de „foe di [wisrefi] ben wani”, noso taki a ben de a bakapisi foe wan bosroiti di wisrefi ben teki taki den sani disi ben pasa. Wi ben kon na ini a situwâsi disi di wi ben gebore. Soleki fa Bijbel e taki en, dan Rousseau ben fowtoe di a ben taki dati „libisma ben gebore fri”. Ibriwan foe wi gebore na ini katibo foe sondoe nanga onvolmaaktifasi, foe taki en so, wi ben de srafoe foe wan sistema di lai nanga broeja èn nanga soso sani. — Romesma 3:23.

Foe san ede disi ben de so? Bika wi fosi papa nanga mama, Adam nanga Eva, ben wani de „leki Gado”, foe bosroiti sani gi densrefi èn den ben wani bosroiti gi densrefi san boen èn san ogri (Genesis 3:5). Den ben frigiti wan prenspari penti di abi foe doe nanga fri. Soso a Kriaman kan abi troetroe fri. En na a Universeel Soeverein (Jesaja 33:22; Openbaring 4:11). A fri foe libisma moesoe abi skotoe. Na foe dati ede meki a disipel Jakobus ben gi den Kresten na ini a ten foe en a deki-ati foe meki „a volmaakti wet di e meki wi kon fri” tiri den. — Jakobus 1:25.

Nanga reti Jehovah ben poeroe Adam nanga Eva foe na universeel osofamiri foe en, èn dati meki den dede (Genesis 3:19). Ma fa a de nanga den pikin foe den? Nanga sari-ati, ala di den ben man gi soso onvolmaaktifasi, sondoe, nanga dede abra na den pikin foe den, tokoe Jehovah ben gi den primisi foe meki pikin. Na so fasi „dede panja go na ala libisma” (Romesma 5:12). Na a fasi dati Gado „ben poti [den kriatoeroe] na ondro soso sani”.

„Den manpikin foe Gado tjari kon na krin”

Jehovah ben poti den kriatoeroe na ondro soso sani „tapoe a fondamenti foe howpoe”, taki wan dei a libisma famiri sa kon fri baka nanga jepi foe den sani di „den manpikin foe Gado” sa doe. Soema na den „manpikin foe Gado”? Den na disipel foe Jesus Krestes di, leki den tra „[libisma] kriatoeroe”, gebore leki srafoe foe sondoe èn foe onvolmaaktifasi. Di den ben gebore den no ben abi no wan reti foe de na ini a krin èn volmaakti universeel famiri foe Gado. Ma Jehovah e doe wan prenspari sani gi den. Nanga jepi foe a froeloesoe-ofrandi foe Jesus Krestes, Jehovah e fri den foe katibo na a sondoe di den kisi èn A e froeklari den „regtfardiki”, noso taki den krin na jeje fasi (1 Korentesma 6:11). Dan a e teki den leki „manpikin foe Gado”, te a e tjari den kon baka na ini na universeel famiri foe en. — Romesma 8:14-17.

Leki manpikin di Jehovah teki, den sa abi wan kefalek moi grani. Den sa de „priester gi wi Gado, èn den sa tiri grontapoe leki kownoe” makandra nanga Jesus Krestes, leki wan pisi foe a hemel Kownoekondre foe Gado, noso a tirimakti foe en (Openbaring 5:9, 10; 14:1-4). Disi na wan tirimakti di sa tiri troetroe nanga gronprakseri di abi foe doe nanga fri èn nanga retidoe — no nanga kwinsi èn ogri-atifasi (Jesaja 9:6, 7; 61:1-4). Na apostel Paulus e taki dati den manpikin disi foe Gado na kompe foe Jesus, a „siri foe Abraham” di Gado pramisi langa ten kaba (Galasiasma 3:16, 26, 29). Leki kompe foe Jesus den e plèi wan prenspari ròl foe meki a pramisi di Gado ben doe en mati Abraham, kon troe. Wan pisi foe a pramisi dati na taki nanga jepi foe a siri foe Abraham [noso, pikin], „ala nâsi foe grontapoe foe troe sa blesi densrefi”. — Genesis 22:18.

Sortoe blesi den e tjari kon gi a libisma famiri? Den manpikin foe Gado e jepi foe meki a heri libisma famiri kon fri foe den kefalek takroe bakapisi foe a sondoe foe Adam èn den e jepi foe meki a libisma famiri kon volmaakti baka. Sma „di komoto na ala nâsi nanga lo nanga pipel” kan blesi densrefi te den e bribi na ini a froeloesoe-ofrandi foe Jesus Krestes èn te den e saka densrefi na ondro a Kownoekondre tiri foe en di sa tjari boen gi den (Openbaring 7:9, 14-17; 21:1-4; 22:1, 2; Mateus 20:28; Johanes 3:16). Na a fasi disi „ala kriatoeroe” sa abi „a glori fri foe den pikin foe Gado” baka. Disi no sa de wan sortoe politiek fri di skotoe èn di de gi wan pisi ten nomo, ma na presi foe dati, a sa de wan fri foe ala sani di ben tjari pen nanga banawtoe kon gi a libisma famiri foe sensi di Adam nanga Eva ben trowe a soevereiniteit foe Gado. Na foe dati ede na apostel Paulus ben kan taki dati „a pina di wi e pina now no de notinoti” te joe teki en gersi nanga a kefalek moi diniwroko di getrow foetoeboi sa doe!

O ten a tjari di „den manpikin foe Gado e tjari kon na krin” sa bigin? A sa de heri esi now, te Jehovah sa meki ala sma kon sabi krinkrin, soema na den manpikin foe Gado. Dati sa de te den „manpikin” disi, di opo baka go na a jeje kondre, makandra nanga Jesus Krestes sa krin a grontapoe disi foe ala ogri nanga kwinsi na a orlokoe foe Gado na Har–Mágedon (Danièl 2:44; 7:13, 14, 27; Openbaring 2:26, 27; 16:16; 17:14; 19:11-21). Wi e si moro nanga moro boeweisi na wi lontoe taki wi de boen fara kaba na ini „den lasti dei”, te wan kaba sa kon na a froedrage di Gado e froedrage langa ten kaba na oproeroe di sma e oproeroe èn na ogridoe di de a bakapisi foe dati. — 2 Timoteus 3:1-5; Mateus 24:3-31.

Ija, a de troe soleki fa na apostel Paulus e taki, dati „te nanga now a heri mekisani makandra e tan geme èn abi pen makandra” — ma a no sa de gi wan langa pisi ten moro. Miljoenmiljoen sma di e libi now sa si „te ala den sani kon boen baka, di Gado ben taki foe dati nanga jepi foe a mofo foe den santa profeiti foe en foe owroeten”, èn den sa si so srefi taki a heri libisma famiri sa abi vrede, fri, nanga retidoe baka. — Tori foe den Apostel 3:21.

Te foe kaba, troetroe fri

San joe moesoe doe foe abi a „glori fri foe den pikin foe Gado”? Jesus Krestes ben taki: „Efoe oenoe e tan na ini mi wortoe, dan oenoe na troetroe disipel foe mi, èn oenoe sa sabi waarheid, èn waarheid sa meki oenoe kon fri” (Johanes 8:31, 32). Dati na a prenspari fasi foe kon fri — leri èn doe den komando èn den leri foe Krestes. Srefi na ini a ten disi a sani disi e meki wi kon fri pikinso. Na ini a ten di no de so fara moro, a sa tjari dorodoro fri kon na ondro a tiri foe Jesus Krestes. A koni sani foe doe na foe kon sabi Jesus „wortoe” nanga jepi foe bijbelstudie (Johanes 17:3). Neleki den fosi Kresten, abi wan fajafaja demakandra nanga a gemeente foe den troetroe disipel foe Krestes. Te joe e doe dati dan joe kan kisi wini foe den waarheid di e gi fri, èn di Jehovah e gi nanga jepi foe na organisâsi foe en na ini a ten disi. — Hebrewsma 10:24, 25.

Ala di joe e „wakti te den manpikin foe Gado sa tjari kon na krin”, dan joe kan meki a froetrow gro di na apostel Paulus ben abi taki Krestes sa sorgoe en èn sa jepi en foe kisi kibri, srefi te a gersi taki wi no man tjari den pina nanga den kroektoedoe kwetikweti moro. Baka di Paulus ben taki foe a tjari di den manpikin foe Gado sa tjari kon na krin, a ben aksi: „Soema sa prati wi foe a lobi foe Krestes? Pina noso banawtoe noso froefolgoe noso angri noso soso skin noso kefar noso feti-owroe?” (Romesma 8:35) A no de foe taki, soleki fa Rousseau ben taki, dati den Kresten na ini a ten foe Paulus ben de „na ini katibo” ete foe makti di ben e kwinsi den na iniwan fasi. Den ben „e kiri [den] a heri dei” leki „skapoe di moesoe srakti” (Romesma 8:36). Den ben gi pasi meki den sani disi basi den?

„Kontrari foe dati”, Paulus e skrifi, „na ini ala den sani disi wi wini den dorodoro nanga jepi foe a lobi foe a sma di ben lobi wi” (Romesma 8:37). Den fosi Kresten ben wini ala di den ben ondrofeni ala den sani disi? Fa dati kan? „Mi abi na overtoigi”, a e piki, „taki no wan dede noso libi, no wan engel noso tiri, no wan sani di de now noso no wan sani di moesoe kon ete, no wan makti, no wan hei noso dipi, no wan tra mekisani sa man prati wi foe a lobi foe Gado, di de na ini Krestes Jesus, wi Masra” (Romesma 8:38, 39). Joe toe kan „wini” awansi sortoe „banawtoe noso sari noso froefolgoe” joe moesoe ondrofeni disiten kande. A lobi foe Gado e gi wi a djaranti taki djonsro — heri esi now — wi „sa kon fri foe [ala] katibo . . . èn sa abi a glori fri foe den pikin foe Gado”.

[Prenspari pisi na tapoe bladzijde 6]

„Te nanga now a heri mekisani makandra e tan geme èn abi pen makandra”

[Prenspari pisi na tapoe bladzijde 7]

’Den kriatoeroe srefi sa kon fri foe ala katibo èn sa abi a glori fri foe den pikin foe Gado’