Kownukondre Preikiman E Fruteri
A Theokrasia E Gro na ini Namibia
A FOSI leisi di a bun nyunsu fu Gado Kownukondre ben doro Namibia ben de leti bifo 1930. Fu sensi a ten dati, hondrohondro opregti sma arki a boskopu fu Gado fu frulusu. Den ondrofenitori di e kon now e sori fa Yehovah e tyari den warti sma disi kon na ini en koi.—Hagai 2:7.
◻ A fosi leisi di Paulus, wan man di e du gronwroko gi ensrefi èn di e libi na a noord-owstu sei fu Namibia, ben kisi kontakti nanga Yehovah Kotoigi ben de di a ben fisiti Windhoek, a mamafoto. Paulus ben abi na overtoigi heri esi taki a ben feni a waarheid. A ben go baka na oso nanga a buku Joe kan libi foe têgo na ini wan paradijs na grontapoe. Baka dati, di a ben go na Rundu, wan krosibei foto pe wan Kownukondre zaal ben de, dan Paulus ben feni den Kotoigi èn a ben begi den fu fisiti en.
Ma a pasi ben fara tumusi gi den Kotoigi fu kon na Paulus èn fu studeri ibri wiki nanga en. Sondro fu lasi-ati, Paulus ben bigin studeri Bijbel en wawan. Na tapu fu dati, a ben preiki den sani di a ben e leri gi trawan fayafaya. Baka ten, wan bijbelstudie grupu ben seti. Di a pikin grupu ben yere na radio taki wan bigi konmakandra fu Yehovah Kotoigi ben o hori na ini Rundu, dan den ben poti den pikinso moni di den ben wroko, kon na wan, èn den ben sreka wagi fu fisiti a konmakandra.
¡A ben de wan tumusi prisiri ondrofeni gi den fu de makandra nanga Yehovah Kotoigi gi a fosi leisi! Heri esi sani ben seti so taki bekwaam brada ben kan fisiti a grupu disi doronomo. Nownow, siksi preikiman de na ini a dorpu pe Paulus e libi.
◻ Johanna ben kisi belangstelling gi a nen fu Gado, di a ben yere wan sma ben e taki ogri fu Yehovah Kotoigi. A e memre: „A fosi leisi kaba di mi ben yere a nen Yehovah, mi no ben man frigiti en moro, èn mi ben bigin aksi misrefi suma na Yehovah. Mi nanga mi masra ben libi krosibei fu Walvisbaai, na a syoro fu Namibia. Wan leisi wi ben go na foto èn mi ben si wan tu Kotoigi e prati a Waktitoren tijdschrift na strati. Mi ben teki wan eksemplaar èn mi ben aksi wan bijbelstudie, fu di mi ben abi furu aksi. Mi ben krei di den ben taigi mi taki den no ben man kon bika a wagi fu den ben broko. Syatu baka dati, mi masra dede èn mi ben go libi na ini Keetmanshoop. Wan spesrutu pionier (furuten preikiman) ben kisi a toewijzing fu wroko drape, èn mi ben kisi a buku De waarheid die tot eeuwig leven leidt (A Waarheid Di E Tyari Yu Go na Têgo Libi) fu en. Fu sensi a bigin mi ben si taki disi ben de a waarheid.
Te fu kaba mi ben kisi a kari fu du a preikiwroko, ma frede gi libisma ben basi mi. Di mi ben e wroko oso fu oso, dan mi ben begi Yehovah fu a meki mi dede na presi fu meki mi preiki. Di mi ben bigin gi kotoigi na strati, dan mi ben kibri misrefi na ini wan pikin smara pasi so taki no wan sma ben sa si mi. Te fu kaba, mi ben kisi nofo deki-ati fu pristeri wan tijdschrift gi sma di ben e waka pasa, èn so wawan mi ben man taki wan sani. A dei dati, nanga a yepi fu Yehovah, mi ben fruteri furu sma a howpu di Bijbel gi mi.
Nownow, 12 yari baka dati, ala di mi e pina na materia sei, mi e warderi a grani fu a pionierwroko ete èn a e tan de wan bigi prisiri gi mi fu fruteri tra sma a Kownukondre waarheid.”