Wi Papa Nanga Mama Ben Leri Wi fu Lobi Gado
SOLEKI FA ELIZABETH TRACY BEN FRUTERI
Man di ben tyari gon èn di bifo dati ben teki fesi na ini wan grupu ogri-ati sma fu du wi ogri, ben dwengi Mâ nanga Pâ fu komoto na ini a wagi. Mi nanga mi sisa, di ben tan wi wawan na a bakasei sturu fu a wagi, ben e aksi wisrefi efu oiti wi ben o si wi papa nanga mama baka. San meki wi ben ondrofeni a frede sani disi, ini a birti fu Selma, Alabama, Amerkankondre, na ini a yari 1941? Èn san den sani di wi papa nanga mama ben leri wi, abi fu du nanga na ondrofeni disi?
MI PAPA, Dewey Fountain, ben kisi kweki fu en famiri tapu wan boerderij na ini Texas, baka di en papa nanga mama ben dede di a ben de wan beibi ete. Baka ten a ben go wroko na presi pe den e suku oli. Na ini 1922, di a ben abi 23 yari, dan a ben trow Winnie, wan moi yongu uma fu Texas, èn a ben bigin sreka sani fu seti en libi èn fu kweki wan osofamiri.
A ben bow wan oso na den kontren pe udu e wroko, na a owstu sei fu Texas, na ini a birti fu a pikin foto Garrison. Drape a ben prani difrenti gron-nyan, so srefi katun nanga karu. A ben kweki ala sortu meti tu. Baka ten, wi, den pikin ben gebore — Dewey a boi, na ini mei 1924, Edwena na ini december 1925, èn na ini yuni 1929 mi ben gebore.
Leri Waarheid fu Bijbel
Mâ nanga Pâ ben prakseri taki den ben sabi Bijbel, fu di den ben de na ini a Kerki fu Krestes. Ma na ini 1932, G. W. Cook ben libi den buku Bevrijding nanga Regeering di A Waktitoren Genootschap tyari kon na doro, na a brada fu Papa, Monroe Fountain. Fu di Monroe ben angri fu fruteri mi papa nanga mama den sani di a ben e leri, meki a ben kon furutron na a mamanten nyan-yuru, dan a ben leisi wan artikel fu A Waktitoren, èn baka dati a ben libi a tijdschrift na baka fu di a ben „frigiti”. Baka dati, dan Mâ nanga Pâ ben leisi en.
Wan sonde mamanten, Omu Monroe ben kari Pâ kon na a oso fu wan birtisma gi wan bijbelstudie. A ben gi Pâ a dyaranti taki Masra Cook ben kan piki ala den aksi fu en nanga yepi fu Bijbel. Di Papa ben drai kon baka fu a studie, dan nanga prisiri a ben taigi na osofamiri: „¡Mi feni den piki na tapu ala den aksi fu mi èn mi ben kon leri moro tu! ¡Mi ben denki taki mi ben sabi ala sani, ma di Masra Cook ben bigin fruklari sani fu hel, a sili, a prakseri di Gado abi gi grontapu, èn fa Gado Kownukondre sa meki en kon tru, dan mi ben bigin si taki mi no ben sabi noti fu Bijbel kwetikweti!”
Wi oso ben de wan presi pe sma ben gwenti kon fu miti makandra. Famiri nanga mati ben kon fisiti wi, èn den ben meki tòfi nanga pikinpikin bal fu popcorn, èn den ben e singi ala di Mâ ben e plèi piano. Safrisafri wi ben bigin taki Bijbel tori na presi fu du den sani disi. Ala di wi leki pikin no ben man frustan ala den sani di den ben taki, toku a tranga lobi di wi papa nanga mama ben abi gi Gado èn gi Bijbel ben de so krin fu si taki ibriwan fu wi leki pikin ben kon kisi wan srefi sortu lobi gi Gado èn gi en Wortu.
Tra osofamiri tu ben opo den oso gi ibriwiki Bijbel takimakandra, di moro furu ben taki fu wan tori di ben de na ini a moro nyun Waktitoren tijdschrift. Te osofamiri na ini den birti foto Appleby nanga Nacogdoches ben sreka den konmakandra, dan wi ben furu wi Model A Ford oto èn wi ben rèi go drape, awansi fa a weer ben de.
Du San Den Ben Leri
A no ben teki langa di wi papa nanga mama ben si taki den ben musu du wan sani. Lobi gi Gado ben aksi fu den taki den ben musu fruteri tra sma den sani di den ben leri (Tori fu den Apostel 20:35). Ma a stap disi fu sori na publiki sortu bribi den abi ben de wan tyalensi, spesrutu fu di wi papa nanga mama ben de sma di ben e fruleigi, èn di ben abi sakafasi. Ma a lobi di den ben abi gi Gado ben gi den deki-ati, èn disi fu en sei ben yepi den fu leri wi fu poti frutrow na ini Yehovah dorodoro. Pâ ben taki en so: „¡Yehovah e meki gronman tron preikiman!” Na ini 1933, Mâ nanga Pâ ben dopu na ini wan pikin watra, krosibei fu Henderson, Texas fu sori taki den ben gi densrefi abra na Yehovah.
Na ini a bigin fu 1935, Pâ ben skrifi go na a Waktitoren Genootschap èn a ben aksi wan tu sani di abi fu du nanga a Kresten howpu fu têgo libi (Yohanes 14:2; 2 Timoteus 2:11, 12; Openbaring 14:1, 3; 20:6). A ben kisi wan piki langalanga fu Joseph F. Rutherford, di ben de presidenti fu a Genootschap na a ten dati. Na presi taki Brada Rutherford ben piki den aksi fu Pâ, a ben gi Pâ wan kari fu fisiti a kongres fu Yehovah Kotoigi na ini Washington, D.C., na ini mei.
’¡Wi no man!’ Pâ ben prakseri. ’Wi na gronman di abi 26 hektare gron di prani nanga gruntu. Wi sa abi fu koti den alamala èn tyari den go na wowoyo na a ten dati.’ Ma syatu na baka, wan bigi frudu ben kon èn ben wasi ala sani puru di ben hori en fu go — gron-nyan, skotu, nanga broki. Fu dati ede wi ben go nanga den tra Kotoigi na ini wan yuru skorobus di ben tyari wi 1600 kilometer go na a noord-owstusei, na a kongres.
Na a kongres Pâ nanga Mâ ben breiti srefisrefi fu arki a krinkrin fruklari di ben gi fu sori suma na a „bigi ipi” di sa pasa a „bigi banawtu” libilibi (Openbaring 7:9, 14, King James Version). Den heri libi moro fara, a howpu fu libi fu têgo na ini wan paradijs na grontapu ben buweigi Mâ nanga Pâ, èn den ben gi wi leki pikin deki-ati fu „hori a trutru libi steifi”, èn gi wi a ben wani taki têgo libi na grontapu di Yehovah e pristeri (1 Timoteus 6:19; Psalm 37:29; Openbaring 21:3, 4). Ala di mi ben abi feifi yari nomo, toku mi ben lobi trutru fu de nanga mi famiri na den prisiri okasi disi.
Baka di wi ben drai kon fu a kongres, dan a famiri ben prani den gron-nyan baka, èn baka ten wi ben koti moro leki san wi koti oiti. Disi trutru ben meki Mâ nanga Pâ bribi taki te den ben frutrow na ini Yehovah dorodoro, dan ala ten den ben sa kisi wini fu dati. Den ben bigin nanga wan spesrutu preikiwroko pe ibriwan fu den ben agri fu wroko, 52 yuru ibri mun na ini a diniwroko. ¡Èn baka dati, te a ten ben doro baka dati fu prani sani, dan den ben seri ala sani di den ben abi! Pâ ben meki sma bow wan trailer (wan pikin wagi di de wan tanpresi tu) èn a ben bigi 6 x 2,4 meter gi den feifi fu wi so taki wi ben kan libi na ini, èn a ben bai wan nyun Ford sedan oto di abi tu doro, fu hari a trailer. Omu Monroe ben du a srefi sani, èn en tu ben froisi go tan na ini wan trailer nanga en osofamiri.
Leri Wi a Waarheid
Pâ nanga Mâ ben bigin nanga a pionierwroko, soleki fa den e kari a furuten diniwroko, na ini oktober 1936. Leki wan osofamiri wi ben bigin preiki na den bigi pisi kontren na a owstusei fu Texas, di pikinmoro noiti ben kisi a Kownukondre boskopu. Pikinmoro wan heri yari wi ben froisi fu a wan presi go na a trawan, ma moro furu wi ben lobi a libi disi trutru. Mâ nanga Pâ ben leri wi nanga wortu èn nanga na eksempre fu den fu de leki den fositen Kresten di ben gi densrefi fu tyari a waarheid fu Bijbel go na tra sma.
Wi leki pikin ben lespeki wi mama spesrutu fu den òfer di a ben tyari di a ben gowe libi en oso. Ma wán sani ben de di noiti a ben o gowe libi, èn dati ben de en naimasyin. A ben bun tu taki a no ben du dati. Fu di a ben man nai krosi, meki ala ten a ben sorgu taki wi ben weri bun krosi. Na ibri kongres wi ben abi moi nyun krosi fu weri.
Mi kan memre heri bun di Herman G. Henschel ben kon nanga en osofamiri na a kontren fu wi nanga wan oto fu a Waktitoren Genootschap di ben abi boksu na tapu. Den ben e poti na oto na wan kontren pe furu sma ben e libi, èn den ben drai wan syatu lezing na tapu plaat, èn dan den ben fisiti ibriwan fu den sma fu leri den moro. Dewey a boi, ben lobi fu de nanga a manpikin fu Herman, Milton, di ben de wan tini ete. Now Milton na a presidenti fu a Waktitoren Genootschap.
Na tapu a kongres na ini 1937, na ini Columbus, Ohio, Edwena ben dopu, èn Mâ nanga Pâ ben kisi a grani fu dini leki spesrutu pionier. Na a ten dati, a wroko dati ben wani taki dati den ben musu wroko 200 yuru ibri mun na ini a preikiwroko. Te mi e prakseri baka, dan mi e frustan o furu a moi eksempre fu Mâ yepi mi fu horibaka gi mi masra na ini den Kresten wroko di a ben kisi fu du.
Te Pâ ben bigin wan bijbelstudie nanga wan osofamiri, dan a ben tyari wi leki pikin go nanga en fu de wan bun eksempre gi den pikin fu na osofamiri. A ben meki wi suku den bijbeltekst èn leisi den èn a ben meki wi piki wan tu fu den prenspari aksi. Leki wan bakapisi fu dati, furu fu den yonguwan di wi ben studeri nanga den, e dini Yehovah getrow te now ete. Iya, wan tranga fondamenti ben poti gi wi tu fu tan lobi Gado.
Di Dewey a boi, ben kon moro owru, dan a ben feni en muilek fu libi na ini so wan pikin oso nanga tu sisa di ben moro yongu. Fu dati ede a ben bosroiti na ini 1940 fu gowe èn fu bigin nanga a pionierwroko nanga wan tra Kotoigi. Te fu kaba a ben trow nanga Audrey Barron. Na so fasi Audrey ben leri furu sani tu fu wi papa nanga mama, èn a ben kon lobi Mâ nanga Pâ trutru. Baka di Dewey a boi, ben go na strafu-oso na ini 1944 bika a no ben teki partij leki Kresten, dan Audrey ben kon libi nanga wi na ini wi pikin wagi di de wan tanpresi tu.
Na a bigi kongres na ini St. Louis, Missouri, na ini 1941, Brada Rutherford ben taki langalanga nanga den pikin di ben abi 5 te go miti 18 yari, èn di ben sidon na wan spesrutu faki na fesisei. Mi nanga Edwena ben arki a safu èn krin sten fu en; a ben de leki wan lobi papa di e gi den eigi pikin fu en leri na oso. A ben gi den papa nanga mama deki-ati: „Tide Krestes Yesus tyari en frubontu pipel kon na en fesi, èn na a moro krakti fasi a e taigi den fu leri den pikin fu den a pasi fu regtfardikifasi.” A ben taki: „¡Hori den na oso èn leri den a waarheid!” ¡A bun taki wi papa nanga mama ben du dati!
Na a kongres dati wi ben kisi a nyun brochure Jehovah’s Servants Defended, di ben taki fu den krutu-afersi di Yehovah Kotoigi ben wini, so srefi den wan na ini a Hei Krutubangi fu Amerkankondre. Pâ ben studeri disi nanga wi leki osofamiri. Wi no ben sabi srefisrefi taki wi ben sreka wisrefi gi den sani di ben pasa wan tu wiki na baka na ini Selma, Alabama.
Sani Di wan Grupu Ogri-ati Sma Ben Du na ini Selma
A mamanten fu a frede ondrofeni dati, Pâ ben gi a sheriff wan tu kopi fu wan brifi, so srefi a komsarsi, nanga na edeman fu skowtu na ini Selma, èn a brifi dati ben taki fu a reti di wi abi na ini a mamawet fu du wi diniwroko na ondro a wet. Ma toku den ben bosroiti fu dwengi wi fu gowe libi a foto.
Lati bakadina, feifi man nanga gon ben kon na a trailer fu wi èn den ben hori Mâ, mi sisa, nanga mi leki panti. Den ben bigin ondrosuku ala sani finifini na inisei fu feni sani di de teige a tiri fu a kondre. Pâ ben de na dorosei, èn den ben komanderi en fu fasi a trailer na a wagi, ala di den ben e hori den gon fu den na en tapu a heri pisi ten. Na a momenti dati, mi no ben frede. A ben gersi so wan don sani taki den man disi ben denki taki wi ben de sma di ben kan du trawan ogri, taki mi nanga mi sisa ben bigin lafu. Ma di Pâ ben luku wi, dan wi ben seryusu wantewante.
Di wi ben kaba fu gowe, dan den man ben wani taki Edwena nanga mi ben musu rèi nanga den na ini a wagi fu den. Pâ no ben wani dati kwetikweti. „¡So langa mi de na libi unu no e teki den umapikin fu mi na ini un wagi!” a ben taki. Baka di den ben haritaki pikinso den ben gi wi osofamiri primisi fu rèi nanga makandra, èn den man di ben tyari gon ben rèi na wi baka nanga a wagi fu den. So wan 25 kilometer dorosei fu foto, den ben komanderi wi fu poti a wagi na sei wan bigipasi èn dan den ben tyari Mâ nanga Pâ gowe. Ibriwan fu den man ben pruberi fu overtoigi den: „Gowe libi a relisi dati. ¡Go baka na a boerderij, èn kweki den umapikin fu unu bun!” Pâ ben pruberi fu rideneri nanga den, ma a ben de fu soso.
Te fu kaba, wan man ben taki: „¡Gowe, èn efu oiti unu e kon baka na ini a kontren fu Dallas, dan wi o kiri ibriwan fu unu!”
Baka di wi ben komoto na a banawtu èn wi ben de na makandra baka, dan wi ben reis wan tu yuru langa èn dan wi ben parkeer a wagi fu pasa a neti. Wi ben si a nomru fu a wagi fu den man di ben du wi ogri. Wantewante Pâ ben taigi a Waktitoren Genootschap ala sani, èn wan tu mun na baka, den ben feni den man èn den ben sroto den.
Na a Zendelingskoro Gilead
Edwena ben kisi wan kari fu fisiti a di fu seibi klas fu a Waktitoren Bijbelskoro Gilead na ini South Lansing, New York, na ini a yari 1946. Albert Schroeder, wan fu den leriman na a skoro ben fruteri Bill Elrod, di fosi ben de a pionier patna fu en, den moi eigifasi fu Edwena, èn na a ten dati Bill ben dini na Bethel, na edekantoro fu Yehovah Kotoigi na ini Brooklyn, New York.a Edwena nanga Bill ben kon leri sabi makandra, èn so wan yari na baka di a ben klari Gilead nanga bun bakapisi, den ben trow. Den ben tan getrow na ini a furuten diniwroko yari langa, èn makandra den ben dini so srefi feifi yari na Bethel. Dan wan dei na ini 1959, Brada Schroeder ben taigi a di fu 34 klas fu Gilead taki en bun mati ben tron papa fu wan twelengi, wan boi nanga wan meisje.
Di mi ben e dini nanga mi papa nanga mama na ini Meridian, Mississippi, na a kaba fu a yari 1947, dan mi nanga den ben kisi wan kari fu fisiti a di fu erfu klas fu Gilead. Wi ben fruwondru srefisrefi bika mi ben yongu tumusi, èn Mâ nanga Pâ ben owru tumusi te yu ben luku den markitiki. Ma disi leisi den no ben luku so fini, èn wi ben kisi a grani dati fu leri moro fu Bijbel, wan sani di wi no ben frudini.
Zendelingwroko Nanga Mi Papa èn Mi Mama
A toewijzing fu wi na ini a zendelingwroko ben de Kolombia, Zuid-Amerika. Ma a ben de na ini december 1949 fosi, moro leki wan yari baka di wi ben kaba a skoro nanga bun bakapisi, taki wi ben doro na ini Bogotá na wan zendeling-oso pe dri tra zendeling ben e libi kaba. ¡Na ini a bigin, pikinmoro Pâ ben denki taki a ben moro makriki fu leri den sma fu taki Ingrisitongo, na presi taki en ben e leri Spanyoro! ¡Iya, tesi ben de, ma den blesi ben bigi trutru! ¡Yu no ben abi moro leki wan hondro Kotoigi na ini Kolombia na ini 1949, ma now moro leki 100.000 Kotoigi de!
Baka di wi ben dini feifi yari kaba na ini Bogotá, dan Mama nanga Papa ben seni go na a foto Cali. Na ini a ten dati, na ini 1952, mi ben trow nanga Robert Tracy, wan tra zendeling na ini Kolombia.b Wi ben tan na ini Kolombia te leki 1982, èn na a ten dati den ben seni wi go na Meksikow, pe wi dini fu sensi a ten dati. Te fu kaba, na ini 1968, mi papa nanga mama ben musu drai go baka na Amerkankondre fu kisi datrayepi. Baka di den ben kon gosontu baka, den ben tan dini leki spesrutu pionier krosibei fu Mobile, Alabama.
Sorgu gi Wi Papa Nanga Mama
Na baka wan tu yari, Mâ nanga Pâ ben bigin go na baka èn den ben abi moro yepi nanga sorgu fanowdu. Di Pâ nanga Mâ ben aksi fu dati, dan den ben seni den go fu dini krosibei fu Edwena nanga Bill na ini Athene, Alabama. Baka ten wi brada, Dewey a boi, ben prakseri taki a ben o de wan koni sani te a famiri ben e libi moro krosibei fu makandra na South Carolina. Fu dati ede Bill ben froisi nanga en famiri go na Greenwood, makandra nanga Mâ èn nanga Pâ. A bun seti disi ben meki taki mi nanga Robert ben kan tan na ini wi zendelingwroko na Kolombia, fu di wi ben sabi taki den ben e sorgu bun gi mi papa nanga mama.
Baka dati, na ini 1985, Pâ ben kisi wan berurtu di ben meki taki a no ben man taki moro èn a ben musu tan na bedi nomo. Wi ben kon makandra gi wan famiri takimakandra fu luku fa wi ben kan sorgu moro bun gi wi papa nanga mama. Wi ben teki a bosroiti taki Audrey ben o tron a fosi sma di ben o sorgu Pâ èn taki mi nanga Robert ben kan yepi bun tu te ibri wiki wi ben o seni wan brifi gi en nanga ondrofenitori di e gi deki-ati, èn te wi ben o fisiti en so furu leki wi kan.
Mi man memre a lasti leisi di mi fisiti Pâ krinkrin ete. A no ben man taki den wortu na wan normaal fasi, ma baka di wi ben taigi en taki wi ben o drai go baka na Meksikow, dan a ben taki wán wortu nanga furu muiti èn nanga furu firi: „¡Odi!” Nanga disi wi ben sabi taki a ben horibaka na ini en ati gi a bosroiti di wi ben teki fu go doro na ini wi zendelingwroko. A dede na ini yuli 1987, èn Mâ dede neigi mun na baka dati.
Wan brifi di mi ben kisi fu mi sisa di de wan weduwe, e taki heri bun fa ibriwan fu wi e warderi wi papa nanga mama. „Mi e warderi a bigi Kresten gudu fu mi èn noiti mi ben firi taki mi ben o moro koloku efu wi papa nanga mama ben kweki wi wan tra fasi. Na eksempre di den ben gi leki sma di ben abi wan tranga bribi, a gi di den ben e gi densrefi, èn a frutrow di den ben frutrow na ini Yehovah dorodoro, ben yepi mi fu pasa den muilek ten na ini mi libi.” Edwena ben taki te fu kaba: „Mi e taigi Yehovah tangi gi a papa nanga mama di nanga den wortu èn nanga na eksempre fu den ben sori wi a koloku di wi kan abi te wi e gebroiki wi libi soso fu dini wi lobi Gado, Yehovah.”
[Futuwortu]
[Prenki na tapu bladzijde 22, 23]
A famiri Fountain: (fu a kruktu-anusei go na reti-anusei) Dewey, Edwena, Winnie, Elizabeth, Dewey a boi; na reti-anusei: Elizabeth nanga Dewey a boi, na tapu a bumper fu na oto fu Henschel pe boksu ben de na tapu (1937); ondrosei na a reti-anusei: Elizabeth e waka nanga bord di a ben abi 16 yari