¿Yu E Memre Disi Ete?

¿Yu poti prakseri finifini na tapu den eksemplaar fu A Waktitoren fu no so langa pasa? Efu dati de so, dan yu sa feni en moi fu memre den sani disi:

◻ San na wan tu aksi di tu Kresten ben sa kan aksi densrefi bifo den e bigin prakseri fu meki mofo fu trow?

’¿Mi de seiker fu a yeye fasi fu a trawan èn taki a e gi ensrefi na ini a dini fu Gado? ¿Mi denki taki mi kan dini Gado nanga a sma dati mi heri libi langa? ¿Wi kon sabi den eigifasi fu makandra nofo kaba? ¿Mi de seiker taki wi sa fiti makandra fu ala ten? ¿Wi sabi nofo fu den sani di a trawan ben du na ini a ten di pasa èn wi sabi nofo fu a situwâsi pe a de na ini?’—15/8, bladzijde 31.

◻ San Yesus ben wani taki di a ben taigi den bakaman fu en: „Unu na a sowtu fu grontapu”? (Mateus 5:13)

Yesus ben sori taki a preiki di den bakaman fu en ben o preiki a Kownukondre fu Gado gi trawan, ben o man gi den sma di ben o arki den na okasi fu kibri a libi fu den. Iya, den sma di ben o du den sani di Yesus taki, ben o kibri densrefi gi a go di a grontapu e go na baka na moreel sei èn na yeye fasi.—15/8, bladzijde 32.

◻ San tu sma di e hori nanga makandra kan du fu no fadon na ini a trapu fu du seks hurudu?

Te yu meki mofo nanga wan sma, dan a de wan koni sani fu no de yu wawan nanga a sma di yu o trow nanga en, na ini situwâsi di no bun. A ben sa moro bun fu prisiri nanga makandra te yu de ini wan grupu fu sma, noso na publiki presi. Poti skotu na a fasi fa yu o sori yu lobi, èn lespeki den firi èn a konsensi fu a trawan.—1/9, bladzijde 17, 18.

◻ San na frustan?

Frustan, na a sabi di wan sma sabi fu si a fini fu wan tori èn fu si krin fa a tori de trutru, fu di a e frustan san den aparti pisi fu a tori èn a heri tori srefi abi fu du nanga makandra, so taki a kan frustan a tori (Odo 4:1).—15/9, bladzijde 13.

◻ San Yehovah e aksi fu wi na ini a ten disi?

Moro furu, san Yehovah e aksi fu wi na fu arki En Manpikin èn fu waka na baka na eksempre fu en èn fu du san a e leri wi (Mateus 16:24; 1 Petrus 2:21).—15/9, bladzijde 22.

◻ Suma wawan kan abi vrede?

Fu di Yehovah na „a Gado di e gi vrede”, meki soso den sma di lobi Gado èn di abi bigi lespeki gi den regtfardiki gronprakseri fu en, kan abi vrede (Romesma 15:33).—1/10, bladzijde 11.

◻ Fa Yosef ben kisi a moreel krakti fu taigi a wefi fu Potifar taki a no ben wani, ibri dei baka?

Yosef ben si a banti di a ben abi nanga Yehovah leki wan sani di ben warti moro leki a prisiri di a ben kan kisi gi wan syatu pisi ten. So srefi, ala di Yosef no ben de na ondro wan wet fu Gado, toku a ben frustan den moreel gronprakseri heri bun (Genesis 39:9).—1/10, bladzijde 29.

◻ O prenspari a de taki wi musu wani gi wi brada pardon?

A fruwakti di wi e fruwakti taki Gado sa tan gi wi pardon, abi furu fu du nanga a wani di wi wani gi tra sma pardon (Mateus 6:12, 14; Lukas 11:4).—15/10, bladzijde 17.

◻ Fu sortu sondu Mateus 18:15-17 ben e taki, èn san e sori dati?

Den sondu di Yesus ben abi na prakseri, ben de so seryusu, taki sma ben sa kan si a sma di du na ogri „leki wan man di de fu den nâsi èn leki belastingman”. Dyu no ben wani abi demakandra nanga Heiden, èn den ben o wai pasi gi belastingman. So bun, Mateus 18:15-17 e taki fu seryusu sondu, no fu na afrontu di sma e afrontu yu noso a hati di den hati a firi fu yu, sani di yu kan gi den pardon fu dati èn di yu kan frigiti (Mateus 18:21, 22).—15/10, bladzijde 19.

◻ San a wani taki fu lobi Gado Wortu trutru?

A lobi di wan sma lobi Gado Wortu e meki a e libi akruderi den markitiki fu Gado Wortu (Psalm 119:97, 101, 105). Disi wani taki dati doronomo a musu kenki en denki èn a fasi fa a e libi.—1/11, bladzijde 14.

◻ Fu di wi kisi so furu fu Yehovah, san wi kan gi a moro bigi Kownu èn Giman baka?

Bijbel e tyari kon na krin taki a moro bun presenti di wi kan gi Yehovah na „wan srakti-ofrandi fu prèise” (Hebrewsma 13:15). Fu san ede? Bika a srakti-ofrandi disi abi langalanga fu du nanga a kibri di wi kan kibri sma libi, wan sani di Yehovah e broko en ede trutru nanga en na ini a ten disi fu a kaba (Esekièl 18:23).—1/11, bladzijde 21.

◻ San Salomo ben wani taki di a ben skrifi: „Den wortu fu den koni sma de leki srapu tiki di e pusu mankaw fu waka”? (Preikiman 12:11)

Den wortu fu den sma di abi a koni fu Gado e pusu den leisiman noso den arkiman fu go na fesi akruderi den koni wortu di den leisi noso yere.—15/11, bladzijde 21.

◻ San na a koni fu man si sani krin soleki fa Gado wani?

A de a koni fu man si san bun noso san ogri, èn dan a e teki a yoisti bosroiti. Wi e kisi a koni fu si sani krin te wi e studeri Gado Wortu èn te wi e gebroiki en.—15/11, bladzijde 25.

◻ Nanga san a wani di wan sma wani teki frantwortu na en tapu, musu hori na ini balansi? (2 Timoteus 3:1)

Disi musu hori na ini balansi nanga a man di a sma man krutu sani na wan bun fasi. No wan sma musu teki so furu toewijzing na en tapu taki a e lasi en prisiri na ini a diniwroko fu Yehovah. A de fu prèise te wan sma wani dini, ma a wani di wan sma wani wroko musu sori so srefi taki a sma de bescheiden èn taki a abi wan „gosontu frustan” (Titus 2:12; Openbaring 3:15, 16).—1/12, bladzijde 28.

◻ Fa den papa nanga mama man kakafutu gi a tyalensi fu kweki pikin?

Gado e gi papa nanga mama a rai fu de wan eksempre gi den pikin fu den, fu de wan mati gi den, fu de wan sma di e taki nanga den, èn fu de wan leriman gi den (Deuteronomium 6:6, 7).—1/12, bladzijde 32.