¡Den Tyari a Buku Danièl Kon na Krin!
SMA di ben de na a kongres ben angri fu kisi den eigi eksemplaar fu a buku ¡Poti Prakseri na a Profeititori fu Danièl! di ben tyari kon na doro no so langa ete èn di abi 320 bladzijde. Fa den ben denki fu a buku? Luku san son sma ben taki.
„Neleki moro furu yongusma, mi feni en wan muilek sani fu abi prisiri fu studeri historia fu owruten. Fu dati ede, di mi ben kisi mi eigi eksemplaar fu a nyun buku, ¡Poti Prakseri na a Profeititori fu Danièl!, dan mi no ben de so fayafaya fu go leisi en, ma toku mi ben pruberi fu du dati. ¡Yongu, a fasi fa mi ben denki ben fowtu srefisrefi! Disi na wan fu den moro bun buku di oiti mi feni fu leisi. ¡Fu tru a de wan buku di e meki wan sma wani leisi go doro! Mi no abi a firi moro taki mi e leisi wan tori di ben feni presi dusundusun yari pasa kaba. Fositron mi abi a firi taki mi kan poti misrefi na ini a presi fu Danièl. Mi kan si na ini mi prakseri trutru fa a ben o de efu sma ben o teki yu puru fu yu famiri, seni yu go na wan tra kondre, èn tesi a soifri retifasi fu yu doronomo. Grantangi fu a buku disi.”—Anya.
„San e yepi mi moro furu, na a tumusi krin boskopu taki Yehovah e tiri den afersi di abi krakti na tapu en pipel, dorodoro. Nanga yepi fu den fisyun nanga den dren fu Danièl nanga den di fu tra sma di a ben fruklari, a de krin taki a Gado fu wi sa meki ala sani pasa soleki fa a prakseri. Disi e tranga a howpu di wi abi na ini den profeiti prenki di de fu feni na ini Bijbel èn di abi fu du nanga a nyun grontapu di a sa meki.”—Chester.
„Mi ben lobi a fasi fa yu ben meki Danièl kon na libi. A fasi fa yu ben meki den sorgu nanga den broko-ede fu en kon na krin, meki taki mi ben kon sabi en moro bun. Mi ben man frustan moro betre fu san ede Yehovah ben feni en so wan warti sma. Na ini a ten fu ala den tesi nanga a frufolgu di a ben kisi, a no ben prakseri ensrefi. A ben broko en ede moro furu nanga Yehovah èn nanga a moi nen fu En. Tangi fu unu, taki yu meki den penti disi kon na krin.”—Joy.
„¡Disi na san wi ben e wakti! Noiti na fesi wan buku sori wi o furu fu a buku Danièl abi fu du trutru nanga ibriwan fu wi. Baka di mi ben leisi furu fu a nyun buku a neti baka di mi ben kisi en, mi ben abi fu stop èn taigi Yehovah tangi na ini begi.”—Mark.
„San wi no ben fruwakti na a bigi krakti di a ben o abi na tapu den pikin fu wi. Den abi feifi yari nanga dri yari. . . . Den tori fu Danièl, Hananya, Misaèl, èn Asarya ala ten ben de tori di den lobi srefisrefi na ini Mi boekoe nanga bijbel tori. Ma a fasi fa den tori tyari kon na fesi na ini na a Profeititori fu Danièl-buku, meki taki dati ben abi wan bigi krakti na den tapu na wan fasi di wi no ben fruwakti. Ala di den yongu so, toku a gersi leki den man firi san den regtfardiki yonguman disi ben firi. ¡Dati na tumusi moi eksempre gi den pikin fu wi fu waka na den baka! ¡Unu gi wi wan tumusi bun wrokosani! ¡Grantangi fu unu, a bigi te a bigi!”—Bethel.
„Mi ben firi taki mi ben de leti drape nanga den yongu Hebrew boi di sma ben tesi a bribi fu den; èn dati ben gi mi deki-ati fu go ondrosuku na eigi bribi fu mi. A faki nanga aksi fu luku san wi ben leri di nen „San Yu Ben Kon Frustan?” e meki den tori di de na ini a kapitel go dipi na ini na ati. Tangi fu unu ete wan leisi fu wan tra moi buku di yu skrifi na so wan kefalek bun fasi.”—Lydia.