„Wan Stonbokoboko Di E Plisi na Ai”

FURU sma no ben sa gebroiki den wortu „di e plisi na ai” fu taki fu wan bokoboko. A kan taki wi e denki taki bokoboko na meti di wi kan gebroiki bun fu nyan pikinmoro ala sani. A meti fu en switi so srefi èn a merki fu en gosontu. Ma kande noiti wi ben sa taki dati wan bokoboko e plisi na ai.

Ma toku, Bijbel e taki dati wan uma de leki „wan moi dia nanga wan stonbokoboko di e plisi na ai” (Odo 5:18, 19). Salomo, wan skrifiman fu a buku Odo, ben de wan sma di ben e ondrosuku a libi fu den busimeti fu Israèl bun. Dati meki sondro tweifri a ben abi bun reide fu gebroiki den wortu „di e plisi na ai” fu taki fu a stonbokoboko (1 Kownu 4:30-33). Kande, neleki en papa David, a ben e luku den stonbokoboko di ben e kon furutron ini a kontren fu En-gedi, krosibei fu den syoro fu a Dede Se.

Den pikin ipi stonbokoboko di e libi krosibei fu a Woestijn fu Yudea, gwenti fu go na a watra peti fu En-gedi. Sensi a presi En-gedi na a wan enkri watra-olo pe watra de fu feni ala ten na ini a drei kontren disi, meki den stonbokoboko lobi a watra presi disi furu hondrohondro yari langa kaba. Fu taki en leti, a nen En-gedi kande wani taki „fonten fu pikin bokoboko”, san e sori taki den yongu bokoboko gwenti fu go na a kontren disi. Dyaso Kownu David ben kibri di Kownu Saul ben frufolgu en, ala di a ben e libi leki wan loweman „na tapu den kalikali stonbergi fu den stonbokoboko”.—1 Samuèl 24:1, 2.

Te now ete yu kan si fa wan uma-stonbokoboko na En-Gedi e waka so moi èn sondro fu hasti ensrefi èn e saka go na ini wan bun dipi presi na mindri den bigi stonbergi ala di a e waka baka wan man-stonbokoboko go na a watra. Kande now fosi yu e bigin frustan fu san ede den teki na uma-stonbokoboko gersi nanga wan loyaal uma. A safri-atifasi nanga a tumusi moi fasi a e du sani, e sori go na den bun fasi fu umasma. A wortu „e plisi na ai” e sori go na a moi fasi nanga a prodo fasi di de fu si na den stonbokoboko.a

Na uma-stonbokoboko musu man fu frudrage tranga libi, ma toku a musu du sani na wan moi fasi. Neleki fa Yehovah ben sori Yob, dan a stonbokoboko e meki pikin na ini den klepston di e tanapu leti-opo. A muilek fu doro den stonbergi disi. Den presi disi kande no abi nofo nyanyan èn a kan faya noso kowru drape srefisrefi (Yob 39:1). Ala di na uma-stonbokoboko e kisi den problema disi, toku a e sorgu gi den pikin fu en èn a e leri den fu kren èn fu dyompo na mindri den stonbergi neleki fa a e du dati heri bun. Nanga deki-ati a stonbokoboko e kibri den yongu pikin fu en tu, gi den meti di wani nyan den. Wan ondrosukuman ben si fa wan stonbokoboko ben feti nanga wan aka wan afu yuru langa, ala di den yongu pikin fu en ben plata go na en ondro fu suku kibri.

Furutron Kresten wefi nanga Kresten mama musu kweki den pikin fu den na ini muilek situwâsi. Neleki a stonbokoboko, den sori taki den e gi densrefi fu du a wroko di den kisi fu Gado, sondro fu prakseri densrefi nomo. Èn nanga deki-ati den e meki muiti fu kibri den pikin fu den gi kefar na yeye fasi. So bun, Salomo no e afrontu umasma srefisrefi te a e teki wan uma gersi nanga wan stonbokoboko. Ma a e poti prakseri trutru na a sani di e meki wan uma moi — Kresten eigifasi di musu de fu si srefi na ini den moro muilek situwâsi.

[Futuwortu]

[Prenki na tapu bladzijde 30, 31]

Wan Kresten wefi nanga Kresten mama e sori den moi Kresten eigifasi te a e du a wroko di Gado gi en