Yu E Handri Nanga Koni?
DI MOSES ben musu poti krutuman na wroko na ini Israèl, dan a du furu muiti fu feni „mansma di abi bun frustan fu sani èn di e handri nanga koni” (Deuteronomium 1:13). Den ben musu abi ondrofeni, wan sani di e kon nanga den yari, ma dati no ben sari. A ben prenspari tu taki den ben abi bun frustan fu sani èn taki den ben handri nanga koni.
Wan sma di e handri nanga koni, e sori taki a abi a koni fu man si krin san na a yoisti ten fu taki èn fu handri. Soleki fa Webster’s Ninth New Collegiate Dictionary e taki, dan wan sma di e handri nanga koni so srefi man „tan tiri te a de fanowdu fu du so”. Iya, „wan ten [de] fu taki”, èn „wan ten [de] fu tan tiri”, èn a sma di e handri nanga koni e frustan san na a difrenti na mindri den tu sani disi (Preikiman 3:7). Furutron bun reide de fu tan tiri, bika a Bijbel e taki: „Te sma e taki furu wortu pasa marki, dan fowtu no e mankeri, ma a sma di e dwengi en mofobuba, e handri nanga koni.”—Odo 10:19.
Kresten e sorgu taki den e handri nanga koni te den e handri nanga makandra. A no de so taki a sma di e taki moro furu noso di e taki nanga moro krakti, ala ten na a moro prenspari wan. Memre taki Moses ben „krakti na ini den wortu fu en”, ma a no ben man tiri a nâsi Israèl na wan bun fasi teleki a ben kweki pasensi, safri-atifasi, èn teleki a ben leri fu dwengi ensrefi (Tori fu den Apostel 7:22). Fu dati ede, den wan di kisi a frantwortu fu tiri na trawan tapu, musu du spesrutu muiti fu de bescheiden èn fu sori taki den no de sma di de tumusi strak.—Odo 11:2.
A Wortu fu Gado e taki fu den wan di Yesus poti fu luku „ala den gudu fu en”, leki sma di de „getrow èn koni” (Mateus 24:45-47). Den no e lon pasa Yehovah na wan fasi di no de bescheiden fu du sani wantronso, so srefi den no e draidrai te den e kisi krin tiri fu Yehovah na ini wan tori. Den sabi o ten den musu taki èn den sabi o ten den musu tan tiri èn wakti te sani tyari kon na krin moro fara. Ala Kresten e du bun fu no waka baka a bribi fu den nomo, ma so srefi fu sori taki densrefi e handri nanga koni, soleki fa a srafu grupu e du dati.—Hebrewsma 13:7