A Fasi Fa Den E Kakafutu gi a Krakti Di Speri Abi na Den Tapu
FURU sma wani nomonomo taki trawan feni den bun. A sani disi e meki taki den sma disi e denki èn handri na a srefi fasi leki den speri fu den. A de so taki spesrutu yongu sma abi krakti fanowdu fu weigri fu du ogri sani, soleki a gebroiki fu drugs èn so srefi seks hurudu. Fa den kan kakafutu gi a krakti di speri abi na den tapu?
No so langa pasa, tu tini meisje na ini Polen ben skrifi: „A yeye fu grontapu de krin fu si na mindri furu fu den speri fu wi. Den e spiek te den e meki repetitie, den e taki dotitaki, den lobi weri ala sortu modo krosi di no fiti èn so srefi den lobi fisti, doti poku. Wi breiti srefisrefi taki artikel de gi wi leki yonguwan di e yepi wi fu kakafutu gi tini di no de koloku èn di trangayesi!
Wortu no man taki fa wi e warderi den Waktitoren artikel di meki wi kon frustan taki tra sma lobi wi leki yonguwan, èn den breiti so srefi nanga wi. A Bijbel rai di wi kisi, yepi wi fu waka wan yoisti pasi, so taki wi kan tan du sani na a fasi di Yehovah Gado feni bun. Wi de seiker taki a moro bun fasi fu libi, na fu dini Yehovah na wan getrow fasi.”
Iya, yongu sma kan kakafutu gi a krakti di speri abi na den tapu. Te Kresten yonguwan e gebroiki den eigi „koni fu si sani krin” dan den e leri fu teki koni bosroiti di no e sori „a yeye fu grontapu” ma, na presi fu dati, e sori „a yeye di e kon fu Gado.”—Hebrewsma 5:14; 1 Korentesma 2:12.