Wan Prenspari Sani Di Meki Bekènti
NA ALAYARI konmakandra fu a Waktitoren Bijbel nanga Traktaat Genootschap fu Pennsylvania hori na tapu 7 oktober 2000. Na a kaba fu a konmakandra disi a fesiman, John E. Barr fu a Tiri Skin, meki wan prenspari sani bekènti. A sani di a meki bekènti ben go moro dipi na tapu den tori di Theodore Jaracz nanga Daniel Sydlik ben taki na ini den lezing di den ben hori kaba a srefi dei dati.—Luku bladzijde 12-16 nanga 28-31 fu a tijdschrift disi.
Brada Barr ben tyari wan prenspari penti kon na fesi di a ben taki: „ ’A getrow èn koni srafu’ nanga a Tiri Skin fu en kisi moro bigi èn moro furu frantwortu leki iniwan tra korporâsi di de akruderi wet. Den wet nanga den markitiki fu iniwan fu den sortu korporâsi dati skrifi sortu sani den man du èn sortu sani den no man du. Ma wi Masra, Yesus Krestes, poti a getrow srafu grupu fu luku ala den ’gudu’ fu en, noso den Kownukondre afersi dyaso na grontapu.”—Mateus 24:45-47.
Brada Barr e taki moro fara fu a Pennsylvania korporâsi: „Sensi a Waktitoren Bijbel nanga Traktaat Genootschap fu Pennsylvania tron wan korporâsi na ini 1884, a korporâsi disi du tumusi prenspari wroko na ini wi disiten historia. Toku, a Waktitoren Bijbel nanga Traktaat Genootschap na wan korporâsi nomo di a ’getrow èn koni srafu’ kan gebroiki te dati de fanowdu.”
Brada Sydlik nanga Brada Jaracz ben fruteri na ini den lezing fu den, taki ala di „a getrow èn koni srafu” kisi a frantwortu fu luku ala den gudu fu Masra na grontapu, dan dati no e tapu a srafu grupu fu gi lepi brada fu den „tra skapu” na okasi fu sorgu gi spesrutu aladei papira tori (Yohanes 10:16). Bijbel no e sori taki ala noso sonwan fu den memre fu a bestuur fu den korporâsi di Yehovah Kotoigi e gebroiki, musu de salfu Kresten.
Brada Barr taigi den arkiman taki no so langa pasa, wan tu memre fu a Tiri Skin fu Yehovah Kotoigi di ben dini leki memre fu a bestuur fu den korporâsi, ben teki a bosroiti fu tapu nanga a wroko disi. Den memre disi fu a Tiri Skin tapu nanga den wroko disi na ala den korporâsi di „a getrow èn koni srafu” e gebroiki na Amerkankondre. Den memre fu den korporâsi stem tapu getrow brada fu a grupu fu tra skapu so taki den ben man teki den presi disi di den brada fu a Tiri Skin ben abi na ini den korporâsi.
A bosroiti disi trutru e tyari winimarki kon. A e gi memre fu a Tiri Skin na okasi fu gebroiki moro furu fu den ten fu sreka nyanyan na yeye fasi. A e gi den na okasi so srefi fu sorgu gi den sani di a bradafasi na heri grontapu abi fanowdu na yeye fasi.
Na a kaba fu a lezing, a fesiman taigi den arkiman di ben de nanga prisiri a sani disi: „Ala di lepi opziener kisi difrenti frantwortu ini den korporâsi, . . . toku den alamala e dini na ondro a yeye tiri fu a Tiri Skin. . . . Wi alamala musu begi Yehovah fu blesi a muiti di wi alamala e meki fu du a wani fu en, wan sani di e gi en bigi nen grani nanga glori.”