Wroko makandra nanga na tiri skin ini na ten disi
„A sa poti en tapu ala en gudu.” — LUKAS 12:44.
1. Na ini sortu kownukondre Krestes ben bigin fu tiri ini 33 G.T., èn nanga yepi fu san?
NANGA Penkstri 33 G.T. Yeyses Krestes, na Ede fu na gemeente, ben bigin fu tiri aktief na ini a kowukondre fu den srafu fu en di kisi salfu nanga santa yeye. Fa dati ben psa? Nanga yepi fu na santa yeye, fu engel èn fu wan tiri skin di sma kan si. So leki fa na apostru Paulus ben sori, dan Gado ben ’fri salfuwan puru fu na makti fu dungru èn poti den go abra na ini na kownukondre fu na Manpikin fu en lobi’. — Kolose sma 1:13-18; Tori fu den Apostru 2:33, 42; 15:2; Galasiya sma 2:1, 2; Openbaring 22:16.
2. Na ini sortu moro bigi kownukondre Krestes ben bigin fu tiri ini 1914?
2 Na a kba fu „den fasti ten fu den nâsi”, dan Yehovah ben bradi na kownu makti fu Krestes go dorosey fu na kresten gemeente (Lukas 21:24). Iya, ini 1914 Gado ben gi en Manpikin kownu makti tapu den „nâsi”, „na kownukondre fu grontapu”, na heri libismafamiri. — Psalm 2:6-8; Openbaring 11:15.
Den poti den „tapu ala en gudu”
3, 4. (a) Suma ini na agersitori fu den mina e prenki na man fu hey kobortu? (b) Sortu sani di psa ini na tori fu na Kownukondre ben feni presi ini 1918 nanga 1919?
3 Ini na tori disi a de bun fu poti prakseri na a agersitori fu Yeyses fu wan man fu hey kobortu (Lukas 19:11-27). Bifo na man ben rèys go na dorosey kondre fu kisi kownu makti, a ben gi en srafu moni (mina) fu wroko nanga en. Baka di a dray kon baka, dan na man disi, di de wan agersifasi fu Krestes, ben seni kari „den srafu disi di a ben gi na solfru moni kon na en fesi, fu kon sabi san den ben wini nanga na du fu bisnis” (Lukas 19:15). Fa disi ben kontru baka di Yeyses ben kisi kownu makti?
4 Ini 1918 Yeyses Krestes di ben poti na tapu na kownusturu ben feni wan pikin grupu kresten di ben gwe libi den kerki fu na krestenhèyt èn di ben de druk bezig nanga na sorgu fu den grontapu belang fu na meystri fu den. Baka di Yeyses ben meki den kon soyfri leki nanga faya, dan a ben gi en srafu ini 1919 moro bigi makti (Maleachi 3:1-4; Lukas 19:16-19). A ben poti den na „tapu ala en gudu”. — Lukas 12:42-44.
’Nnyan di de fanowdu na a reti ten’
5, 6. (a) Sortu moro bigi wroko Krestes basya ben kisi? (b) Sortu profeytitori ben musu kontru baka 1914, èn fa na basya-grupu ben sa teki prati fayafaya ini a kontru fu en?
5 Na Kownu Yeyses Krestes di e tiri ben gi en basya, ofu oso-tiriman, na grontapu wan wroko di de moro bigi. Salfu kresten leki „boskopuman” fu Gado ben sa du wroko ini na presi fu wan kownu di ben poti na tapu na kownusturu èn di ben kisi makti fu tiri tapu ala folku fu grontapu (2 Korente sma 5:20; Daniël 7:14). Na frantiwortu di den alamala ben abi no ben sa de soso fu gi Krestes skin fu salfu futuboy „na a reti ten na marki fu den nnyan di de fanowdu” (Lukas 12:42). Den ben sa musu abi now wan aktief prati na a kontru fu den profeytitori di ben sa kontru baka di na Kownukondre opo ini 1914.
6 San disi ben wani taki now ini na ala dey libi? A ben wani taki taki na preyki fu „na bun nyunsu disi fu na kownukondre” ben musu bradi go te „na a heri grontapu pe sma e libi” (Mateyus 24:14). A ben wani taki taki krakti krutu-boskopu, di ben de teyge Satan ogri grontapu nanga den horibakaman fu en, ben musu meki bekenti. Na bakapisi fu disi ben de wan ’seki fu den nâsi’. Na so fasi „den sani di ala sma ben sa wani abi”, Krestes „tra skapu”, ben bigin kon na ini (Haggaï 2:7; Yohanes 10:16). Fu sensi 1935 sma fu na „bigi ipi” na a heri grontapu ben bigin hari kon na ini Yehovah organisâsi (Openbaring 7:9, 10). Disi ben aksi fu tyari kenki kon na ini na organisâsi fu meki sani go na fesi. Te yu taki en na agersifasi, dan isri ben musu kon na ini na presi fu ston, kopro na ini na presi fu udu, solfru na ini na presi fu isri èn gowtu na ini na presi fu kopro (Yesaya 60:17). Ala disi ben feni presi fu sensi 1919 ondro na aktief èn rechtstreeks tirimakti fu Krestes, di ben gi ala en grontapu Kownukondre belang ofu gudu na en kotrow srafu-grupu nanga en Tiri Skin.
7. San na kisi di na basya kisi moro frantiwortu ben wani taki?
7 Wi kan frustan makriki taki na lay fu frantiwortu disi di kon moro furu èn di ben kon de tapu na skowru fu na srafu fu Meystri, en basya ofu oso-tiriman ben tyari furu wroko kon gi na grupu fu skrifiman nanga den sma di abi na frantiwortu fu dati. Yeye nnyan di ben de fanowdu ben musu druk geregeld na a reti ten na ini Na Waktitoren. Ini 1919 den ben bigin nanga na druk fu na sisa tijdschrift, Het Gouden Tijdperk (Na Gowtu Pisiten di den ben kari bakaten Trowstu èn now Ontwaakt!), di na sey na bow fu den „oso-knekti” ben abi spesrutu leki marki fu wiki na belangstelling fu den sma a dorosey (Mateyus 24:45). Boyti dati, ini ala den yari di psa, dan bun furu buku, brochure nanga traktaat ben druk.
A Kenki fu sani kon moro bun e go doro
8. Biginbigin nanga suma den ben si na Tiri Skin leki na srefi sani, èn san The Watchtower ben taki ini 1944 fu disi?
8 Te wi e luku go na baka ini na „ten disi fu na kba”, dan a no a fu fruwondru wi, taki biginbigin sma ben si memre fu na Tiri Skin leki den skrifiman fu na Wachttorengenootschap (Daniël 12:4). Ini na artikel „Na teyokrasiya opstelling ini na ten disi”, di ben kon a doro na ini The Watchtower fu 1 november 1944, ben tanapu: „Nanga reti yu kan taki taki den sma ben si den man, di ben kisi na frantiwortu fu tyari den beybri waarheid kon a doro di ben kon a krin, leki na tiri skin di Masra ben teki èn di ben sa gi tiri na ala sma di wani dini Gado ini yeye èn waarheid èn di ben wani dini en ini wànfasi ini na prati fu den waarheid disi di kon a krin gi tra sma di ben e angri èn e dreywatra.”
9. Nanga san sma ben si na Tiri Skin bakaten leki na srefi èn fu san-ede?
9 Ini na tyari kon a doro fu tijdschrift èn tra beybri yepi sani lanti wèti ben e aksi bepaalde sani. Fu dati-ede den ben opo na Watch Tower Bible and Tract Society èn den ben meki den skrifi en officieel na ini den lanti buku fu na deelstaat Pennsylvania (VS, Amerkankondre). Furu yari langa sma ben si na Tiri Skin di sma kan si a srefi leki den seybi memre fu na bestuur fu na corporatie disi di den ben opo fu tyari den beybristudi yepisani di na pipri fu Masra na a heri grontapu ben abi fanowdu èn ben e kobroyki, kon a doro.
10, 11. Sortu kenki fu sani kon moro bun ben feni presi na ini 1944, èn san ben tanapu na ini The Watchtower fu dati?
10 Den seybi tiriman fu na Genootschap ben de kotrow kresten. Ma fu di den ben de tiriman fu wan corporatie di skrifi na ini lanti buku, dan makriki den sma ben kan denki taki den ben kisi na presi fu den na ini na Tiri Skin fu di den wettelijk memre fu na Watch Tower Society ben stem poti den drape. Boyti fu dati, na de fu so wan memre, nanga den grani fu a reti fu stem di tay nanga disi, lanti wéti ben gi biginbigin soso na bepaalde sma di ben gi bijdrage na a Genootschap. Kenki ben musu kon na ini na seti disi. Disi ben psa tapu na ala yari-konmakandra fu na Pennsylvania-corporatie fu na Watch Tower Society tapu 2 oktober 1944. Nanga yepi fu amendement den statuut fu na Genootschap ben kenki, so taki na de fu wan memre no ben sa de moro langa tapu na gron fu moni. Den ben sa teki den memre puru na mindri kotrow dienstknekti fu Yehovah, èn furu fu den disi ben kon de sma di e wroko furuten tapu den ede-kantoro fu na Genootschap na ini Brooklyn (New York) èn den bijkantoro fu na Genootschap alape na grontapu.
11 Ini wan bericht fu na kenki disi fu sani kon moro bun na The Watchtower fu 1 november 1944 ben taki: „Moni, so leki disi de na ini moni bijdrage, no musu abi wan sten di e bepaal sani, te yu luku en bun no musu abi noti fu du nanga na poti fu den memre fu na tiri skin fu Yehovah kotoygi na grontapu fu du wroko. . . . Na Santa yeye, na wroko krakti di nanga yepi fu Krestes Yeyses e saka komoto fu Yehovah, de na wrokosani di musu bepaal èn tyari na afersi.”
A no de a srefi leki a bestuur
12. San e sori taki Yehovah ben blèsi den kenki fu sani kon moro bun, di ben feni presi ondro tiri fu na Tiri Skin?
12 Na go na fesi fu na preykiwroko ini na ten fu den tintin yari di ben kon a baka e buweysi taki Yehovah blesi na inzicht di kon moro bun ini na tori fu na disiten Tiri Skin (Odo 10:22). Na nomru fu Kownukondre preykiman na a heri grontapu frey fu moro mendri leki 130.000 ini 1944 go na 1.483.430 na ini 1970! Ma moro kenki fu meki sani kon moro bun ben sa kon.
13. (a) San ben de te nanga 1971 na situwâsi ini na tori fu na Tiri Skin? (b) San ben psa ini na ten fu na ala yari-konmakandra fu na Genootschap ini 1971?
13 Te nanga 1971 sma ben si na Tiri Skin ete leki den seybi memre fu na bestuur fu na Watch Tower Bible and Tract Society of Pennsylvania. Na president fu na Genootschap ben tyari na prenspari frantiwortu fu teki bosroyti di ben abi krakti tapu na fasi fa den bijkantoro fu na Genootschap alape na grontapu ben musu wroko. Ne ini na ten fu 1 oktober 1971 na a ten fu na ala yari-konmakandra di ben hori, dan prenspari lezing ben hori. Na presidenti fu na Genootschap ben taki fu na tori: „Tyari na santa presi kon ini na yoysti toestand” èn na vice-president ben taki fu na penti „Wan Tiri Skin di no de a srefi leki na corporatie di skrifi na lanti buku”. San na a difrenti a mindri na Tiri Skin nanga na corporatie di skrifi na lanti buku?
14. Sortu difrenti de a mindri wan corporatie na Lanti èn na Tiri Skin?
14 So leki ben taki kba, dan na Watch Tower Bible and Tract Society of Pennsylvania abi wan bestuur di skotu te seybi memre. Den memre fu na corporatie, di na nomru fu den noyti mag de moro leki 500, e stem poti den kresten man disi di gi den srefi abra fu wan pisiten fu dri yari. Na moro bigi pisi fu den memre fu na corporatie no de salfu kresten. Boyti fu dati, caesar, dati na Lanti, kan puru na reti fu na corporatie, fu di dati de soyfri wan sani na ini lanti buku, nanga wan ede-kantoro di de na tapu wan bepaalde presi na grontapu (Markus 12:17). Na a tra sey, na Tiri Skin no de wan wrokosani fu Lanti Buku. Den memre fu en, sma no e stem poti den na wroko. Nanga yepi fu santa yeye ondro na tiri fu Yehovah nanga Krestes den e poti den na wroko. (Teki gersi Tori fu den Apostru 20:28.) Den memre fu na Tiri Skin de fu dati-ede wan skin di santa yeye poti èn di no tay na wan bepaalde presi na grontapu ofu wan ede-kantoro.
15. Sortu fruklari ini na tori fu organisâsi ben doro na ini Na Waktioren fu 1 april 1972, èn san wi kan taki fu na disiten Tiri Skin?
15 Fu den kenki disi fu kon frustan sani moro bun, Na Waktitoren fu 1 april 1972 ben taki: „Yehovah kresten kotoygi e sabi èn e fruklari nanga tangi taki na kerki organisâsi disi a no wán man e tyari en, ma taki a abi wan tiri skin fu kresten sma di kisi salfu nanga santa yeye.” Na Tiri Skin fu na salfu srafu-grupu nanga den milyunmilyun patna fu den a mindri den tra skapu, na wan progressief fasi de srekasreka fu sorgu gi en wroko fu hori ay tapu sani.
16. Fa den grontapu gudu fu Krestes fu sensi 1971 gro, èn san na wantu fu den, di a ben gi na a sorgu fu na kotrow èn koni srafu di na Tiri Skin e teki presi fu en?
16 Den grontapu gudu fu na Kownu Yeyses Krestes ben gro doronomo. Fu sensi 1971 na nomru fu Kotoygi frey fu moro mendri leki 1.600.000 go te na wan heymarki fu moro leki 3.700.000 ini 1989. Fa disi de wan krin buweysi fu na blèsi fu Yehovah! (Yesaya 60:22) Na gro disi ben meki a de fanowdu fu bradi den faciliteit fu na ede-kantoro èn furu bijkantoro èn den fasi fu na meki èn panya fu lektuur kon moro modern. A ben meki taki na a heri grontapu furu Kownukondrezaal nanga congreshal ben musu bow. Ala na ten dati, na Tiri Skin tan du en frantiwortu tu fu hori ay tapu na preykiwroko, fu meki materiaal fu beybristudi èn fu poti opziener na ini den bijkantoro, distrikt, kring nanga gemeente. Disi de den Kownukondre belang di Krestes gi na a sorgu fu na kotrow èn koni srafu, di na Tiri Skin e teki presi fu en.
17. Sortu kenki moro fara na ini disi ben tyari kon ini 1971, 1974 nanga 1976?
17 Na tiri skin ini na fosi yarihondro ben kon moro bigi èn ben abi tra sma leki den apostru fu Yeyses na ini. Di wan bosroyti ben musu teki ini na afersi fu na besnijdenis, dan a ben de krin taki na skin dati ben abi „apostru nanga owruman na ini Yerusalen” na ini (Tori fu den Apostru 15:1, 2). Te yu teki dati gersi nanga now dan na so na Tiri Skin ini 1971 èn agen ini 1974 ben kon moro bigi. Fu meki na wroko fu den fu hori ay tapu sani kon moro makriki dan na Tiri Skin ben seti sani taki tapu 1 januari 1976 feyfi komte ben bigin fu wroko. Ibri komte abi dri te siksi memre, èn den alamala abi wan srefi sten na ini afersi di den e luku. Ibri komte abi wan fesiman, di e du wroko fu wán yari. Aparti memre fu na Tiri Skin de na ini wan ofu moro fu den komte disi. Ibriwan fu den feyfi komte disi e poti spesrutu prakseri na wan aparti pisi fu den grontapu gudu fu Krestes. Wan di fu siksi komte — na Fesimankomte, di ibri yari wan tra memre fu en e kon tron fesiman — e behandel tranga fanowdu problema.
Wroko aktief makandra nanga na Tiri Skin
18. Fa na Tiri Skin e wroko, èn san na wán fasi fa wi kan wroko makandra nanga en?
18 Den difrenti komte fu na Tiri Skin e hori ala wiki konmakandra fu luku prenspari afersi, e teki bosroyti baka te den wegi sani go-kon ini begi èn e meki plan fu teyokrasiya aktiviteit di musu kon. So leki wi ben si kba, dan Tori fu den Apostru kapitri 15 e meki wi si taki wan prenspari afersi pe wan bosroyti ben musu teki na ini, ben poti na fesi na fosi yarihondro tiri skin. Na so a de ini na ten disi, taki prenspari afersi e go na a heri Tiri Skin, di e miti ala wiki wantron ofu moro tron efu disi de fanowdu. Den memre fu na Tiri Skin, twarfu den de now, e suku nanga yepi fu na Beybri èn nanga yepi fu begi na tiri fu Yehovah Gado. Wán fasi fa wi kan sori taki wi e wroko makandra nanga na Tiri Skin, de fu memre ini wi ala dey begi den brada disi di den ben poti spesrutu na wroko. — Rome sma 12:12.
19. Fa instruktie fu na Tiri Skin e miti den gemeente?
19 Fa den instruktie nanga bosroyti fu na Tiri Skin e kon na den gemeente? Baka di den memre fu na fosi yarihondro tiri skin nanga yepi fu Gado yeye ben kon na a bosroyti fu den, dan den ben seni wan brifi go na den gemeente (Tori fu den Apostru 15:22-29). Ma ini na ten disi kresten publikâsi de na moro prenspari fasi fu du disi.
20. (a) Sortu kenki fu sani kon moro bun fu na sey fu organisâsi tori ben feni presi ini 1976? (b) Fa den Bijkantoro-komte fu na Tiri Skin e wroko makandra?
20 Sensi 1 februari 1976 dan ibri bijkantoro fu na Wachttorengenootschap abi wan bijkantoro komte fu bekwaam man di na Tiri Skin ben poti. Leki sma di teki presi fu na Tiri Skin ini na kondre ofu den kondre ondro na ay fu na bijkantoro, den brada disi musu de kotrow, loyaal man. Disi e memre wi na den bekwaam man di ben frede Gado èn ben hori wortu èn ben yepi Moses fu taki reti na ini na Israèl fu owruten (Exodus 18:17-26). Den memre fu wan bijkantoro komte e luku na tapu fu wroko nanga den instruktie di den e kisi nanga yepi fu den buku nanga tijdschrift fu na Genootschap èn Wi Kownukondredienst, so srefi nanga algemene brifi nanga spesrutu brifi di e go fu problema fu a kondre. Den bijkantoro komte e fruteri na Tiri Skin fu na go-na-fesi fu na wroko na ini ibri kondre èn fu problema di kan opo ede kon. Den sortu bericht disi di den e kisi fu na heri grontapu, e yepi na Tiri Skin fu bosroyti sortu tori musu behandel na ini den publikâsi fu na Genootschap.
21. Fa den e poti opziener di e waka lontu, èn san de den wroko fu den?
21 Ondro na tiri fu santa yeye, dan den Bijkantoro-komte e rikomanderi lepi man di abi fasi fu na yeye fu kan du wroko leki kring- nanga distriktopziener. Baka di na Tiri Skin poti den brada disi fu du wroko, dan den e du dienst leki opziener di e waka luku gemeente. Den brada disi e fisiti kring nanga gemeente fu bow den na yeyefasi èn fu yepi den fu poti den instruktie di den kisi fu na Tiri Skin na ini den libi. (Teki gersi Tori fu den Apostru 16:4; Rome sma 1:11, 12.) Opziener di e waka lontu e seni verslag go na a bijkantoro. Nanga na yepi fu santa yeye èn den Buku di skrifi ondro krakti fu santa yeye den e rikomanderi makandra nanga den owruman fu na gemeente (fu na presi pe den de) brada di bun nofo taki na Tiri Skin ofu den sma di e teki presi gi den poti den brada disi leki dinari na ini na diniwroko ofu owruman. — Filipi sma 1:1; Titus 1:5; teki gersi 1 Timoteyus 3:1-13; 4:14.
22. (a) Fa gemeente owruman e wroko makandra nanga na Tiri Skin? (b) San na a buweysi taki Yehovah e blèsi na teyokrasiya seti disi?
22 Den sma di de wan pisi fu na skin fu owruman fu den sey ’e poti prakseri na den srefi èn na a heri ipi di a mindri den na santa yeye ben poti den leki opziener’ (Tori fu den Apostru 20:28). Den opziener disi e feti na baka fu poti kotrow den instruktie di den kisi fu Yehovah nanga Krestes nanga yepi fu na koni srafu nanga en Tiri Skin. Yehovah e blèsi na teyokrasiya seti disi, bika ’den gemeente e tan kon de moro steyfi ini bribi èn e gro ini nomru dey fu dey’. — Tori fu den Apostru 16:5.
23. San musu de wi fasti bosroyti ini na tori fu na Tiri Skin?
23 Fa a de wan moy sani taki Yehovah Gado nanga na Meystri Yeyses Krestes nanga yepi fu na Tiri Skin e sori taki den e horibaka gi Gado pipri! (Psalm 94:14) Leki wan pisi fu Yehovah organisàsi, wi e ondrofeni leki aparti sma den winimarki fu so wan horibaka gi sani (Psalm 145:14). Disi musu meki wi bosroyti kon moro fasti fu wroko makandra nanga den seti fu Gado. Iya, meki wi sori alaten taki wi e wroko makandra nanga na Tiri Skin fu Yehovah Kotoygi, ala di wi e go na fesi te leki na ten doro te „na grontapu seyker sa kon furu nanga na sabi fu Yehovah, so leki den watra e furu na se”. — Yesaya 11:9.
Edeprakseri fu hori na ede
◻ Sortu frantiwortu di kon moro furu na basya-grupu ben kisi ini 1919?
◻ Nanga san sma ben si na Tiri Skin leki na srefi sani, fu furu yari langa?
◻ Sortu progressief kenki fu sani kon moro bun ben tyari kon ini na poti fu den memre fu na Tiri Skin?
◻ San na wantu fu den grontapu gudu fu Krestes di a ben gi na a srafu-grupu nanga en Tiri Skin?
◻ Fa wi kan wrokomakandra nanga na Tiri Skin?
[Prenki na tapoe bladzijde 28, 29]
Komoto fu dyaso tapu en internationaal ede-kantoro na ini New York na Tiri Skin e hori ay nanga yepi fu 93 bijkantoro fu na Wachttorengenootschap tapu na tyari kon a doro fu buku èn na preykiwroko fu Yehovah Kotoygi
Doysrikondre
Yapan
Zuid-Afrika
Brasyon