Na dren fu vrede na grontapu — Wan luku di syatu

NA FIRI taki sani e waka bun ini a tori fu den fruwakti tapu vrede na grontapu de bigi. Na ini The Toronto Star Carol Goar ben skrifi: „Fu Afghanistan te Angola, ala pe wi e si kruderi fu vrede e kon. Feti na ini a kontren di wantu mun psa kba ben gersi ete taki noti ben kan du nanga den, e sori marki fu ontspanning. Èn na VN e ondrofeni wan kon a libi di e gi deki-ati.” Disi, na so misi Goar e taki, meki wan „howpu kon di e panya en srefi leki wan siki na a heri grontapu”. USA Today na a srefi fasi ben taki na ini wan redactioneel artikel: „Na a heri grontapu vrede e broko kon.”

Wan tumusi aparti sani di e psa ini den lasti ten de san ben skrifi na ini UN Chronicle leki „na kon krosibey na makandra moro nanga moro fu Sovjet Unie nanga den Verenigde Staten”. Kari legre kon na oso, sani di psa na ini Oost-Europa di no wan sma ben fruwakti, a kan di a kan fu meki legre nanga fetisani kon moro pikinso — ala den sani disi wiki na howpu taki den bigi makti te fu kba sa stòp na strey fu kisi moro fetisani. Na ini wan grontapu pe den kostu fu srudatiwroko, leki fa den taki, e puru moro leki 850 milyard dala ibri yari fu na ekonomiya, dan disi de wan tumusi bun fruwakti.

Ma o seyker a de ete, taki na vrede na grontapu di libisma e dren fu en, sa kan kon tru? Srefi den sma di e luku sani so taki den o waka bun, e piki taki na dyonpo komoto fu a meki fu moro mendri wapen go na a puru fu ala fetisani de kofarlek bigi. Wan kofarlek bigi frutrow na ini makandra de fanowdu fu puru nucleaire fetisani. Na wan sari sani fu taki taki den bigi makti abi wan langa historiya fu no frutrow makandra a den baka. So leki taki a fesi na ini na beybri, dan wi e libi now na ini wan pisiten pe sma e sori den srefi „leki sma di e broko kruderi”. — 2 Timoteyus 3:3, King James Version.

Boyti fu dati, a no ala sma abi na overtoygi taki na puru fu kernwapen krinkrin sa tyari vrede kon. Srefi efu den nâsi ben sa kan kon so fara fu trowe den maksin di furu nanga fetisani na tapu doti-ipi dan toku gewoon wapen heri bun kan say te now ete dede nanga pori. Na Fosi nanga na Di Fu Tu Grontapu Feti e gi wan . . . kotoygi fu disi di e skreki yu. So srefi na techniek di de fanowdu fu meki kernwapen agen sa de dan ete — klariklari e wakti tapu na fosi marki fu politiek spanning. Son sma so leki na politikoloogman Richard Ned Lebow, e taki srefi: „A de kande seyker so, taki na hori fu wantu kernwapen e memre den sma trutru fu de voorzichtig.”

Ma so langa den kernwapen de, dan na hogri prenki fu wan nucleair pori sa meki ibri kontru fu vrede tron wan lafutori; a srefi de so gi a tan go doro fu den no-srudati problema di e fufuru fu milyunmilyun sma na vrede ini den ala dey libi. Na secretaris-generaal fu den Verenigde Nâsi, Javier Perez de Cuellar, ben taki fu „na pina fu milyunmilyun fu wi konpe borgru di no abi wan dak tapu den ede ofu fu libi na wan fasi di no bun gi sma srefisrefi. A problema e kon dey fu dey moro ogri.” Na ini na UN Chronicle moro fara den e taki taki ekonomiya onderontwikkeling „e [kisi] tu fu den dri pisi fu na libisma famiri, pe na pina nanga na fanowdu ini son tori de so bigi, taki disi no de moro mendri leki na pina di feti e tyari kon”. Èn san de fu taki fu na situwâsi, leki fa den schat, fu 12 milyun sma na ini grontapu di lowe gwe libi den kondre? Na abi fu moro mendri fetisani ofu srefi puru fetisani krinkrin a pasi sa tyari vrede kon na ini den libi?

A de krin taki a dren fu libisma fu tyari vrede kon na grontapu e kotoygi fu wan luku di syatu — wan di no bradi, di de smara èn di skotu. Wan moro bun fruwakti tapu vrede de? Iya, fu tru. Na beybri e gi wan howpu di sma kan frutrow a tapu. Heri esi Yeyses Krestes, leki Kownu fu Gado kownukondre, sa tyari wan vrede kon di sa psa na fruwakti fu libisma. San na vrede disi e wani taki gi libisma, na tra artikel e taki fu en.