San a Tiri Skin e du na ini a ten disi?

Na ini a fosi yarihondro wan tu fu „den apostel nanga den owru man na ini Yerusalem” ben de na ini a tiri skin di ben teki prenspari bosroiti gi ala den salfu Kresten na ini den gemeente (Tori fu den apostel 15:2). Fosi den ben teki wan bosroiti di ala sma feni bun, dan den ben taki nanga makandra san Gado Buku e taki èn den ben meki Gado yeye tiri den (Tori fu den apostel 15:25). A Tiri Skin na ini a ten disi e du a srefi sani tu.

Gado e gebroiki a Tiri Skin fu du en wani. Den salfu brada na ini a Tiri Skin wani sabi trutru san Gado Wortu e taki. Boiti dati, den abi furu ondrofeni te a abi fu du nanga a fasi fa a wroko fu wi musu du èn den sabi fa fu gi piki tapu aksi di abi fu du nanga na anbegi fu wi. Den e kon makandra ibri wiki fu luku san den brada nanga sisa na heri grontapu abi fanowdu. Neleki fa a ben de na ini a fosi yarihondro, na so den e gi rai fu Bijbel, fu di den e seni brifi noso kring-opziener nanga distrikt-opziener noso tra brada. Disi e meki taki a pipel fu Gado e denki na a srefi fasi èn den e du sani na a srefi fasi (Tori fu den apostel 16:4, 5). A Tiri Skin e sreka ala sani di de fanowdu fu gi leri fu Bijbel. Den e gi ala sma a deki-ati fu si a preikiwroko leki a moro prenspari wroko èn den e poti brada fu tyari frantwortu na ini na organisâsi.

A Tiri Skin e meki a yeye fu Gado tiri en. A Tiri Skin e suku tiri na Yehovah, a Moro Heiwan, èn na Yesus, na ede fu a gemeente (1 Korentesma 11:3; Efeisesma 5:23). Den brada disi no e si densrefi leki fesiman fu a pipel fu Gado. Makandra nanga ala den salfu Kresten, den e „tan waka na baka a Pikin Skapu [Yesus] awansi pe a e go” (Openbaring 14:4). A Tiri Skin e warderi en trutru te wi e begi gi den.

• Suma ben de na ini a tiri skin fu a fosi yarihondro?

• Na sortu fasi a Tiri Skin na ini a ten disi e suku a tiri fu Gado?