Suku fu Feni Sma Di Wani Arki na ini Kenia

KENIA na wan kondre di moi srefisrefi. A switi kondre disi abi grun busi, bigi opo presi, woestijn pe son faya srefisrefi, èn bergi di abi snew na tapu. Moro leki wan milyun wildebeest (wan bigi sortu dia) de na ini a kondre disi. Neushoorn de drape tu, ma den no de so furu moro, fu di sma e suku nomonomo fu kiri den. Yu kan si so srefi bigi grupu fu giraf di e waka na ini den opo presi pe soso grasi e gro.

Furu fowru e frei drape tu, fu den bigi aka di e frei hei na loktu, te kon miti milyunmilyun fu den singifowru di abi difrenti kloru èn di e froiti moi. Èn suma no ben sa si den asaw nanga den lew? Wan sma no sa man frigiti den sani di de fu si èn fu yere na ini Kenia.

Ma wan moro moi sani de fu yere na ala sei fu a moi kondre disi. Dati na den sten fu dusundusun sma di e tyari a boskopu fu howpu go na trawan (Yesaya 52:7). Den sten disi e doro sma fu moro leki 40 lo nanga tongo. Efu yu luku en so, dan Kenia na wan kondre di moi tu na yeye fasi.

Furu fu den sma na ini Kenia abi wan bribi èn den wani taki fu yeye afersi. Ala di disi de so, toku a de wan tyalensi fu feni sma drape fu taki nanga den, bika neleki fa a de na ini furu tra kondre, wan kenki e kon na ini Kenia.

Fu di a situwâsi na ekonomia sei muilek drape, meki furu sma ben musu kenki a fasi fa den ben libi. Uma di ben gwenti fu wroko na oso, e wroko now na ini kantoro noso na sei pasi e seri froktu, gruntu, fisi, nanga brei baskita. Den man e wroko furu yuru langa te den weri, fu di den e meki muiti fu sorgu gi na osofamiri fu den. Den anu fu pikin-nengre srefi lai nanga paki losi pinda nanga bori eksi. Den e waka na strati e seri den sani disi. Leki bakapisi fu dati wan tu sma nomo de na oso na deiten. A sani disi meki taki den preikiman fu a Kownukondre bun nyunsu ben musu tyari wan tu kenki kon.

Den gemeente fu Yehovah Kotoigi ben kisi rai fu poti moro prakseri na sma di ben de na strati e du den aladei sani, èn so srefi na mati, famiriman, sma di e du bisnis, nanga wrokokompe. Den brada ben fiti a rai disi, èn den bigin taki nanga sma na ala presi pe den ben man feni den (Mateus 10:11). Den kisi bun bakapisi fu a muiti disi di den du fu feni moro sma? Iya, srefisrefi! Luku wan tu eksempre.

Famiriman​—Den Sma Di De Moro Krosibei fu Wi

So wan dri milyun sma e tan na ini Nairobi, a mamafoto fu Kenia. Wan owru mayoro fu a legre di ben de nanga pensyun, ben tan na a owstusei fu a foto. Wan langa pisi ten kaba a man disi no ben lobi Kotoigi fu Yehovah, ala di en eigi manpikin ben de wan Kotoigi, èn a no ben lobi disi srefisrefi. Wan leisi na ini a mun februari, a mayoro disi di ben de nanga pensyun, reis 160 kilometer fu go na a manpikin fu en di e libi na ini wan foto na a presi Rift Valley di de na Nakuru. Di a ben de drape, dan a manpikin fu en gi en wan presenti — a buku Sabi di e tjari joe go na têgo libi.a A papa teki en dan a gowe.

Di a man di ben de wan mayoro fosi ben de baka na oso, a gi a wefi fu en a buku. A wefi bigin leisi en, ala di a no ben sabi taki Yehovah Kotoigi ben tyari a buku disi kon na doro. Safrisafri Bijbel waarheid bigin teki rutu na ini en ati, èn a fruteri a masra fu en san a ben leisi. Fu di a mayoro ben wani sabi moro, a bigin leisi a buku tu. Di den si suma ben tyari a buku kon na doro, dan den kon frustan taki den sani di sma ben fruteri den fu Kotoigi fu Yehovah, no ben tru. Den kontakti Kotoigi na ini a foto fu den, èn den bigin studeri Bijbel. Den sani di densrefi ben leisi na ini a buku, ben meki den kon frustan taki Kresten no mag gebroiki noso seri tabaka (Mateus 22:39; 2 Korentesma 7:1). Den no draidrai, ma den pori ala den sigaret di ben de na ini a wenkri fu den. Baka wan tu mun den doro den markitiki fu tron preikiman di no dopu, èn no langa baka dati, den teki dopu na a distrikt kongres.

Sma E Feni Gudu na Mindri Doti

Na wan tu presi na ini a moro prenspari distrikt fu a kondre, furu hondro dusundusun sma e libi na ini dorpu di de na ala sei fu a distrikt dati. Dyaso yu kan si furu rij nanga oso di meki fu tokotoko, udu, pisipisi metaal, noso frustu isri plaat. Te sma no man feni wroko na den bigi wrokopresi èn na den fabriki, dan den e suku tra fasi fu sorgu densrefi. Jua kali (san wani taki „bun faya son” na ini Swahili) wrokoman e wroko na ini faya son e meki sandaal fu owru oto banti noso den e meki oli lampu fu broko blik. Trawan e suku na ini doti-ipi nanga dotibaki fu feni papira, broko blik, nanga batra fu tyari go seri.

Gudu de fu feni na mindri doti? Iya! Wan brada e memre: „Wan hipsi, doti man di ben sori grofu, ben waka kon na tapu a prasi fu wi Kongreshal. A man ben tyari wan bigi plastik saka di ben lai nanga koranti nanga tijdschrift. Baka di a taigi mi taki en nen na William, dan a aksi mi: ’Yu abi nyun Waktitoren?’ Mi ben frede pikinso, fu di mi no ben sabi san a ben abi na prakseri. Di mi sori en feifi difrenti Waktitoren, dan a luku den wan-fru-wan èn a taki: ’Gi mi den alamala.’ Mi no ben fruwakti disi, èn mi go baka na ini mi kamra fu drai kon baka nanga a buku Joe kan libi foe tego na ini wan paradijs na grontapoe.b Mi sori en a prenki fu Paradijs èn mi fruteri en taki wi e studeri Bijbel nanga sma sondro taki den abi fu pai wan sani. Dan mi taki: ’William, fu san ede yu no e kon tamara, so taki wi kan bigin studeri Bijbel?’ Na dati a du!

Wan sonde a kon na wan konmakandra fu a fosi leisi. Mi ben e hori a publikitaki a dei dati. Di William waka kon na ini a zaal, a fringi en ai luku den sma, a si mi na tapu a podium, èn a lon komopo na ini a zaal. Baka ten mi aksi en fu san ede a ben du dati. A ben fruleigi pikinso di a piki: ’Den sma ben krin tumusi. Senwe naki mi.’

Di William ben go na fesi nanga a bijbelstudie fu en, dan a bigin kenki en libi fu di a ben kon sabi Bijbel waarheid. A wasi en skin, koti en wiwiri, weri krin krosi, èn heri esi a ben kon na den konmakandra doronomo. Di a buku Sabi di e tjari joe go na têgo libi ben tyari kon na doro, mi bigin studeri en nanga William. Na a srefi ten, a ben hori tu lezing tapu a Theokrasia Diniwroko-skoro èn a ben tron wan preikiman di no ben dopu. Mi ben prisiri fu bari en wan switikon leki mi yeye brada di a teki dopu tapu a spesrutu dei-konmakandra.”

San ben de a fosi leisi di William kon si a waarde fu A Waktitoren? „Mi ben feni wan tu fu den na mindri papira di sma ben trowe gowe leki doti.” Iya, na so wan aparti fasi a ben feni wan gudu!

Gi Kotoigi na a Wrokope

Wi e teki okasi ala ten fu gi kotoigi na a wrokope fu wi? James, wan owruman na ini wan gemeente na Nairobi, kon leri sabi Bijbel waarheid na so wan fasi. Now ensrefi e gebroiki a fasi disi fu preiki nanga koni te a e tyari a bun nyunsu go na trawan. Fu gi wan eksempre, wan leisi, James ben si taki wan kompe na wroko di ben waka kon na ini a kantoro ben weri wan pikin karta na tapu en krosi èn den wortu „Jesus Saves (Yesus E Frulusu)” ben skrifi na tapu. James du neleki fa na evangelie preikiman Filipus ben du, èn a aksi a wrokoman: „Yu e frustan trutru san den wortu dati wani taki?” (Tori fu den Apostel 8:30) Na aksi dati opo pasi gi wan moi takimakandra. James bigin studeri Bijbel nanga a man èn baka ten a man teki dopu. James ben abi bun bakapisi nanga tra sma? Meki ensrefi fruteri unu:

„Mi nanga Tom ben wroko na ini a srefi bedrijf. Wi ben gwenti fu rei nanga makandra na ini a bus fu a bedrijf di e tyari wrokoman. Wan mamanten, sani waka so taki wi ben sidon sei makandra. Mi ben e leisi wan fu den buku fu wi, èn mi hori en na sowan fasi taki seiker Tom ben o man si en bun. Neleki fa mi ben howpu, a no ben man puru en ai fu a buku, èn mi ben breiti taki a ben wan leni en. Den sani di a ben leisi ben naki en ati, èn a ben wani wan bijbelstudie. Now en nanga en wefi na dopu futuboi fu Yehovah.”

James e fruteri moro fara: „Furutron mi e hori moi takimakandra nanga kompewrokoman na a ten te brekten pauze de na a bedrijf pe wi e wroko. Na wan fu den leisi dati mi miti Ephraim, èn na wan tra leisi mi miti Walter. Den ala tu ben sabi taki mi ben de wan Kotoigi. Ephraim ben wani sabi fu san ede sma ben gens Yehovah Kotoigi so. Walter ben wani sabi sani di ben abi fu du nanga den difrenti di de na mindri Kotoigi nanga tra bribi. Den ala tu ben agri nanga den piki di mi gi den nanga yepi fu Bijbel èn den ben wani studeri. Ephraim go na fesi heri esi. Baka wan pisi ten, en nanga en wefi gi den libi abra na Yehovah. Now a e dini leki wan owruman, èn a wefi fu en na wan gewoon pionier. Ma sma ben gens Walter so furu taki a trowe en buku di a ben gebroiki fu studeri. Ma fu di mi tan meki muiti nanga en, dati meki a bigin studeri baka. Now en tu abi a grani fu dini leki wan owruman.” Ala nanga ala, 11 sma tron tru Kresten fu di James ben teki na okasi fu gi kotoigi na en wrokope.

Wan Tumusi Moi Bakapisi

Na ini wan pikin dorpu na a lanki fu Victoria Meer, mati nanga famiriman ben kon makandra na wan beri. Wan owru Kotoigi ben de na mindri den sma drape di ben sari trutru. A brada waka go na wan skoromisi di nen Dolly èn a taigi en san e pasa nanga sma baka te den dede. A fruteri na uma so srefi fu a prakseri di Yehovah abi fu puru dede fu ala ten. Di a si taki na uma disi ben piki na wan bun fasi, dan a gi en a dyaranti: „Te yu drai go baka na a foto pe yu e libi, dan wan fu den zendeling fu wi sa kon na yu oso èn sa studeri Bijbel nanga yu.”

A foto pe Dolly e tan na a di fu dri moro bigi foto na ini Kenia. Fo Kotoigi zendeling nomo ben e dini drape na a ten dati. Fu taki en leti, na owru brada no ben taigi no wan fu den zendeling fu go na Dolly en oso. A ben abi a frutrow nomo taki dati ben o pasa trutru. Èn na so a pasa! A no ben de langa baka dati, di wan zendeling sisa miti Dolly èn a bigin studeri nanga en. Dolly dopu now, a moro yongu umapikin fu en e teki prati na a Theokrasia Diniwroko-skoro, èn den tu manpikin fu en dopu tu. A ben abi a prisiri so srefi fu go na a Pionier Diniwroko Skoro.

Sorgu gi den Nyun Sma Di E Teki Waarheid

Fu di den Kotoigi na ini Kenia poti moro prakseri na okasi kotoigi, meki a bakapisi de taki dusundusun sma moro man yere a bun nyunsu. Moro leki 15.000 preikiman e teki prati now na a tumusi prenspari wroko disi, èn a yari di pasa moro leki 41.000 sma ben de na a Memrefesa fu Krestes en dede. Na ala sei fu Kenia, a nomru fu sma di e kon na den konmakandra, furutron na tu tron moro leki a nomru fu Kownukondre preikiman. A sani disi meki taki moro Kownukondre zaal de fanowdu.

Den brada e bow Kownukondre zaal na ini bigi foto èn so srefi na farawe presi. Den e bow wán fu den zaal disi na ini wan farawe foto pe den Samburusma e tan. A foto disi de so wan 320 kilometer pasa go na a noord-owstusei fu Nairobi. Na ini 1934, sma kari a foto Maralal, san wani taki „brenki” na ini Samburutongo bika a fosi daki fu isri plaat di sma ben gebroiki drape, ben e brenki na ini a son. Siksitenti nanga tu yari baka dati, sma bow ete wan oso na ini Maralal di ben abi wan daki fu isri plaat. Na oso disi „e brenki” èn a e „skèin” tu fu di den sma fu Maralal e anbegi a tru Gado drape.

A moi fu si fa den 15 preikiman du muiti fu bow a fosi Kownukondre zaal na ini a farawe presi disi fu Kenia. Fu di furu moni no ben de, den brada ben musu gebroiki sani di den ben man feni drape. Den gebroiki redi doti fu meki den skotu fu a zaal. Den moksi a redi doti nanga watra, dan den stampu en poti na mindri postu di opo tanapu. Den griti den skotu kon grati, dan den pleister den nanga kaw pupe di den ben moksi nanga asisi. A sani disi meki taki den skotu kon tranga èn den e tan bun furu yari langa.

Lanti ben gi den brada primisi fu koti bon puru so taki den ben man abi postu fu bow a zaal. Ma a busi di ben de a moro krosibeiwan, ben de so wan 10 kilometer pasa a presi pe den ben o bow a zaal. Den brada nanga sisa ben musu waka go na a busi, koti den bon, koti den taki puru, èn tyari den postu go baka na a presi pe den ben e bow a zaal. Wan leisi, di den ben komopo fu a busi, skowtu tapu den fu di a ben feni taki den brada no ben abi primisi fu koti den bon puru. A skowtu taigi wan spesrutu pionier taki den ben o hori en fu di a ben koti den bon puru. Wán fu den sisa ben tan na a presi drape èn ala sma drape ben sabi en. Skowtu srefi ben sabi en. A sisa disi opo en sten fu taki: „Efu yu e hori a brada fu wi, dan yu sa musu hori wi alamala, fu di wi alamala koti bon puru!” Baka dati a skowtu libi den alamala meki den gowe.

Fu di meti ben de na ini a busi, sma no ben man waka drape sondro taki kefar ben de. Wan leisi wan sisa ben koti wan bon puru. Di a bon fadon na gron, a si taki wan meti dyompo lon. Fu di a ben si taki wan geri-bruin sani ben koti pasa, a prakseri taki na wan dia nomo ben dyompo lon gowe. Ma baka ten, a si na den marki na gron taki a ben de wan lew! Ala di den sortu kefar disi ben de, den brada klari a zaal èn a e tanapu drape leki wan presi di „e brenki” fu di sma e prèise Yehovah drape.

A fosi dei fu februari 1963 ben de wan prenspari dei na ini a theokrasia historia fu Kenia. Na a dei dati a fosi bijkantoro opo. A bijkantoro disi ben abi wán kamra nomo fu 7,4 fokanti meter. Tapu 25 oktober 1997, wan tra prenspari sani pasa na ini a theokrasia historia fu Kenia — a dei fu na inwijding fu wan nyun Bethel-oso fu 7800 fokanti meter! Baka dri yari fu tranga wroko di den brada nanga sisa ben du nanga den heri ati, den ben doro a prenspari momenti taki a bowwroko ben klari. Friwani-wrokoman fu 25 difrenti kondre ben wroko na tapu wan presi fu 3,2 hectare èn a presi disi ben lai nanga tokotoko èn nanga hei grasi. A bijkantoro e tanapu na tapu a presi disi di den brada nanga sisa kenki kon tron wan moi bromkidyari. Aititenti memre fu a Bethelfamiri e tan na a bijkantoro disi.

Den sani di Yehovah du gi a pipel fu en e gi wi ala reide fu prisiri. Wi e taki en tangi fu di a buweigi na ati fu den futuboi fu en fu du moro muiti fu feni sma di warti na ini Kenia. Na so Kenia kon tron wan kondre di moi na yeye fasi.

[Futuwortu]