Kownukondre preikiman e fruteri
Sma na ini a ten disi di nyan pina gi a bribi fu den, e gi kotoigi na ini Sweden
A GRIKI wortu di vertaal nanga „kotoigi” na martyr. Wan martyr na wan sma di „gi kotoigi fu di a dede [gi a bribi fu en]”. Furu Kresten fu a fosi yarihondro ben gi kotoigi fu Yehovah, fu di den dede gi a bribi fu den.
Na ini a di fu twenti yarihondro, dusundusun Kotoigi dede gi a bribi fu den tu. Den bakaman fu Hitler kiri den Kotoigi disi, fu di den no ben wani moksi densrefi nanga politiek afersi èn fu di den no ben wani tron srudati. Den sma disi di nyan pina gi a bribi fu den na ini a ten disi, e gi wan bun kotoigi tu. Disi na san pasa no so langa ete na ini Sweden.
Fu memre sma taki a di fu Tu Grontapufeti ben tapu 50 yari pasa, dan den tiriman fu Sweden ben bigin nanga wan programa fu leri sma fu na Holocaust [na ogri-ati fasi fa Hitler ben kiri milyunmilyun sma]. Den kari a leri programa disi: „Disiten historia”. Yehovah Kotoigi ben kisi wan kari fu teki prati tu èn fu fruteri san densrefi ben ondrofeni.
Den Kotoigi ben seti sani so taki sma ben kan si san ben pasa nanga den na a ten fu a Holocaust. Na okasi disi ben abi leki nen: „Den wan di nyan pina ini a Holocaust, ma di sma frigiti”. Disi ben de fu si a fosi leisi na a kongreshal fu Yehovah Kotoigi na ini a foto Strängnäs. Moro leki 8400 sma ben kon a fosi dei! Sma di pasa a Holocaust libilibi ben de drape fu fruteri sma san ben pasa na ini a ten dati. Na a kaba fu a yari 1999, sma ben kon luku den sani disi di Yehovah Kotoigi seti na ini moro leki 100 presi na ini a heri kondre fu Sweden. Ala nanga ala sowan 150.000 sma ben kon. Na mindri den sma disi yu ben abi heihei lantiman di ben taki bun fu san den ben si.
No wan-enkri tra sani di abi fu du nanga a wroko di Yehovah Kotoigi e du na ini Sweden, ben hari a prakseri fu so furu sma. Sma ben lobi a sani disi srefisrefi èn den ben taki furu fu en. Furu sma ben aksi den Kotoigi: „Fu san ede unu no ben fruteri wi langa ten kaba san miti unu na ini a Holocaust?”
Baka di den sma na ini a kontren fu wan gemeente ben kon luku san Yehovah Kotoigi ben seti fu sori a publiki, dan den ben skrifi taki den abi 30 procent moro furu bijbelstudie now! Wan Kotoigi ben aksi wan sma di e wroko nanga en fu go luku san den Kotoigi ben e sori sma. A wrokoman disi ben teki a kari èn a ben tyari wan mati tu. Di den luku ala sani, dan na uma disi taki dati a no ben kaba frustan fa sma ben kan abi so wan tranga bribi taki den ben wani dede gi a bribi fu den na presi taki den e skrifi den nen na ondro wan papira fu sori taki den drai baka gi a bribi fu den. We, baka ten den taki a tori disi moro fara, èn den Kotoigi bigin studeri Bijbel nanga na uma.
Neleki den Kresten na ini a fosi yarihondro, den getrow Kotoigi di ben nyan pina ini a di fu twenti yarihondro disi, ben gi kotoigi fayafaya taki Yehovah na a wan-enkri tru Gado. Den ben gi kotoigi tu taki Gado warti fu sma sori so wan tranga bribi na ini en èn taki den e tan getrow na en.—Openbaring 4:11.
[Sma di abi a reti fu a prenki na tapu bladzijde 13]
Camp prisoner: Państwowe Muzeum Oświęcim-Brzezinka, courtesy of the USHMM Photo Archives