Kresten kotoigi gi a soevereiniteit foe Gado
„’Oenoe moesoe meki den toemoesi boen sani bekènti na ala sei’, foe a sma di kari oenoe poeroe foe doengroe go na ini en toemoesi moi leti.” — 1 PETRUS 2:9.
1. Sortoe boen kotoigi ben gi foe Jehovah, na ini a ten bifo a ten foe den kresten?
NA INI a ten bifo a ten foe den kresten, wan langa lijst foe kotoigi ben kotoigi fajafaja èn sondro frede taki Jehovah na a wan-enkri troe Gado (Hebrewsma 11:4–12:1). Tranga na ini bribi èn sondro frede, den ben gi jesi na den wet foe Jehovah èn den ben weigri foe skeki na ini afersi di abi foe doe nanga a troe anbegi. Den ben gi wan krakti kotoigi foe na universeel soevereinfasi foe Jehovah. — Psalm 18:21-23; 47:1, 2.
2. (a) Soema na a moro bigi Kotoigi foe Jehovah? (b) Soema ben teki a presi foe a nâsi Israèl leki kotoigi foe Jehovah? Fa wi doe sabi dati?
2 A lasti nanga moro bigi kotoigi foe a ten bifo a ten foe den kresten, ben de Johanes a Dopoeman (Mateus 11:11). A ben abi a grani foe meki bekènti a kon foe a Wan di Jehovah Froekisi, èn a ben meki sma kon sabi Jesus leki a Mesias di ben pramisi (Johanes 1:29-34). Jesus na Jehovah en moro bigi Kotoigi, „a getrow nanga troe kotoigi” (Openbaring 3:14). Bikasi na Israèl na skinfasi ben trowe Jesus, meki Jehovah ben trowe den èn a poti wan njoen nâsi foe den de en kotoigi, na Israèl na jejefasi foe Gado (Jesaja 42:8-12; Johanes 1:11, 12; Galasiasma 6:16). Petrus ben kari wan profeititori di e taki foe Israèl èn ben sori taki a e fiti tapoe „na Israèl foe Gado”, a kresten gemeente, di a ben taki: „Oenoe na ’wan nâsi di mi froekisi, wan kownoe priesterschap, wan santa nâsi, wan pipel leki wan spesroetoe goedoe, taki oenoe moesoe meki den toemoesi boen sani bekènti na ala sei’ foe a sma di kari oenoe poeroe foe doengroe go na ini en toemoesi moi leti.” — 1 Petrus 2:9; Exodus 19:5, 6; Jesaja 43:21; 60:2.
3. San na a moro prenspari frantiwortoe foe na Israèl foe Gado nanga foe a „bigi ipi”?
3 Den wortoe foe Petrus e sori taki a moro prenspari frantiwortoe foe na Israèl foe Gado, na foe gi kotoigi na poebliki foe a glori foe Jehovah. Na ini a ten foe wi „wan bigi ipi” foe kotoigi di e gi Gado glori na poebliki toe, moksi densrefi nanga a nâsi na jejefasi disi. Nanga tranga sten den e bari so taki ala sma kan jere den: „Froeloesoe wi abi foe taki tangi na wi Gado di e sidon na tapoe a kownoestoeroe, èn na a Pikin skapoe” (Openbaring 7:9, 10; Jesaja 60:8-10). Fa na Israèl foe Gado nanga den kompe foe den kan gi a kotoigi disi? Nanga jepi foe a bribi foe den èn a gi di den e gi jesi.
Falsi Kotoigi
4. Foe san ede den djoe foe den dei foe Jesus, ben de falsi kotoigi?
4 Bribi èn a gi di sma e gi jesi, wani taki dati sma moesoe libi akroederi den gronprakseri foe Gado. O prenspari disi de, de foe si na ini san Jesus ben taki foe den djoe relisi fesiman foe den dei foe en. Den „poti densrefi sidon na tapoe a stoeroe foe Moses” leki leriman foe a Wet. Den ben seni srefi zendeling foe drai a libi foe sma di no e bribi. Ma tokoe Jesus ben taigi den: „Oenoe e koti se nanga drei gron abra foe meki wán proseliet, èn te a tron wan kaba, dan oenoe e meki a tron wan sani gi Gehenna, toe tron moro ogri leki oensrefi.” Den relisiman disi ben de falsi kotoigi — den ben abi bigimemre, hoigrifasi, èn den ben de sondro lobi (Mateus 23:1-12, 15). Na wan okasi Jesus ben taigi wan toe djoe: „Oenoe na foe oen tata Didibri, èn oenoe wani doe den lostoe foe oen tata.” Foe san ede Jesus ben sa taki so wan sani na den memre foe a nâsi di Gado ben froekisi? Bikasi den no ben wani gi jesi na den wortoe foe a moro bigi Kotoigi foe Jehovah. — Johanes 8:41, 44, 47.
5. Fa wi doe sabi taki krestenhèit gi wan falsi kotoigi foe Gado?
5 Na wan srefi fasi, na ini den hondrohondro jari foe sensi a ten foe Jesus, hondrohondro miljoen sma na ini krestenhèit ben taki dati den na disipel foe Jesus. Ma den no doe a wani foe Gado, èn foe dati ede Jesus no e erken den (Mateus 7:21-23; 1 Korentesma 13:1-3). Krestenhèit seni zendeling go na doro, èn sondro tweifri foeroe foe den ben de opregti. Ma den ben leri sma foe anbegi wan gado di de wan dri-wánfasi èn di e bron sondari na ini wan helfaja, èn foeroe foe den sma foe den di drai den libi, no e sori srefisrefi taki den na kresten. Foe eksempre, na Afrikan kondre Rwanda ben de wan lepi gron gi den Lomsoe zendeling. Ma tokoe, Lomsoesma na Rwanda ben moksi densrefi nanga den heri ati na ini a feti na mindri sma foe difrenti ras foe no so langa pasa na a kondre dati. Den froktoe na ini a veld dati foe den zendeling e sori taki a veld no ben kisi wan troetroe kresten kotoigi foe krestenhèit. — Mateus 7:15-20.
Libi akroederi den gronprakseri foe Gado
6. Na sortoe fasi a joisti fasi foe tjari wisrefi, de wan prenspari fasi foe gi kotoigi?
6 A takroe fasi fa den sma di e taki dati den na kresten e tjari densrefi, e tjari wan takroe nen kon na tapoe „a pasi foe waarheid” (2 Petrus 2:2). Wan troetroe kresten e libi akroeeri den gronprakseri foe Gado. A no e foefoeroe, lei, bidrigi sma, noso e doe hoeroedoe (Romesma 2:22). Èn foe troe, a no e kiri en kompe. Kresten trowmasra e tiri na osofamiri foe den na wan lobi fasi. Den wefi e horibaka na wan lespeki fasi gi a tiri dati. Pikin e kisi leri foe den papa nanga mama foe den, èn na so fasi den e sreka foe tron bigi krestensma di sabi den frantiwortoe (Efeisesma 5:21–6:4). A troe taki wi alamala de onvolmaakti èn e meki fowtoe. Ma wan troetroe kresten e lespeki den markitiki foe bijbel èn a e doe troetroe moeiti foe fiti den na ini en libi. Disi na wan sani di tra sma e si èn a e gi wan toemoesi boen kotoigi. Son tron, den sma di ben gens a waarheid fosi, ben si a joistifasi fa wan kresten e tjari ensrefi èn dati ben meki den drai den libi. — 1 Petrus 2:12, 15; 3:1.
7. O prenspari a de taki kresten moesoe lobi makandra?
7 Jesus ben sori wan prenspari fasi foe a fasi fa wan kresten moesoe tjari ensrefi, di a ben taki: „Nanga disi ala sma sa sabi taki oenoe na mi disipel, efoe oenoe abi lobi gi makandra” (Johanes 13:35). A grontapoe foe Satan abi den eigifasi soleki: „onregtfardikifasi, ogridoe, bigi-ai, takroedoe, foeroe nanga djaroesoe, kiri, trobi, bidrigifasi, ogri-atifasi, na wan kibrifasi den e froeteri ogri foe trawan, konkroefasi, sma di no wani si Gado na ai, sondro sjen, nanga heimemrefasi, asrantifasi, sma di e feni ogri foe doe, èn di no e gi jesi na papa nanga mama” (Romesma 1:29, 30). Na ini so wan libikontren, wan organisâsi na heri grontapoe di abi na eigifasi foe lobi, ben sa de wan krakti boeweisi foe a fasi fa a santa jeje foe Gado e wroko — a e gi wan kotoigi nanga boen bakapisi. Den Kotoigi foe Jehovah na so wan organisâsi. — 1 Petrus 2:17.
Kotoigi na studenti foe bijbel
8, 9. (a) Fa a psalm singiman ben kisi tranga nanga jepi foe a studeri di a ben studeri a Wet foe Gado èn foe a prakseri di a ben prakseri dipi foe dati? (b) Na sortoe fasi a studeri foe bijbel èn a prakseri di wi e prakseri dipi foe bijbel, sa gi wi tranga foe tan gi kotoigi?
8 Foe man gi wan boen kotoigi, wan kresten moesoe sabi èn moesoe lobi den regtfardiki gronprakseri foe Jehovah èn a no moesoe wani si den kroektoe fasi foe grontapoe na ai srefisrefi (Psalm 97:10). Grontapoe wani srefisrefi foe meki na eigi denki foe en go na fesi, èn a kan de moeilek foe kakafoetoe gi a jeje foe en (Efeisesma 2:1-3; 1 Johanes 2:15, 16). San kan jepi wi foe tan hori a joisti fasi foe denki? Wan doronomo èn boen studie foe bijbel. A skrifiman foe Psalm 119 ben taki foeroetron foe a lobi di a abi gi a Wet foe Jehovah. Doronomo a ben leisi en èn ben prakseri dipi foe en, „a heri dei” (Psalm 119:92, 93, 97-105). Leki wan bakapisi foe dati, a ben kan skrifi: „Falsifasi mi no wani si na ai, èn mi e tan abi wan tegoe gi en foe troe. Joe wet mi lobi.” Boiti dati, a dipi lobi foe en ben poesoe en foe handri. A e taki: „Seibi tron na ini wan dei mi prèise joe bikasi foe den regtfardiki kroetoe bosroiti foe joe.” — Psalm 119:163, 164.
9 Na wan srefi fasi, a studeri di wi e studeri Gado Wortoe doronomo èn a prakseri di wi e prakseri dipi foe en, sa naki wi ati èn a sa boeweigi wi foe ’prèise en’ — foe gi kotoigi foe Jehovah — foeroetron, srefi „seibi tron na ini wan dei” (Romesma 10:10). Akroederi nanga disi, a skrifiman foe a fosi psalm e taki dati wan sma di e prakseri dipi doronomo foe den wortoe foe Jehovah „sa tron foe troe leki wan bon di prani pe watra e lon, èn di e gi en eigi froktoe te a ten lepi gi dati èn den wiwiri foe en no sa flaw, èn ibri sani di a e doe sa waka boen” (Psalm 1:3). Na apostel Paulus ben sori so srefi a krakti foe a Wortoe foe Gado, di a ben skrifi: „Ala den Boekoe foe bijbel Gado ben meki sma skrifi den èn den boen foe gi leri, foe piri-ai, foe poti sani reti, foe gi tranga leri na ini regtfardikifasi, so taki a sma di de foe Gado kan abi koni dorodoro èn a de bekwaam gi ibri boen wroko.” — 2 Timoteus 3:16, 17.
10. San de krinkrin foe si na a pipel foe Jehovah na ini den lasti dei?
10 A gro di a nomroe foe troe anbegiman e gro esi-esi na ini a di foe 20 jarihondro disi, e sori a blesi foe Jehovah. Sondro tweifri, leki wan groepoe, den disiten Kotoigi foe a soevereinfasi foe Gado, kweki lobi gi a wet foe Jehovah na ini den ati. Neleki a psalm singiman, sani e boeweigi den foe gi jesi na a Wet foe En èn foe gi kotoigi na wan getrow fasi foe a glori foe Jehovah, „dei nanga neti”. — Openbaring 7:15.
Den krakti wroko foe Jehovah
11, 12. San den wondroe wroko di Jesus nanga den bakaman foe en ben doe, ben tjari kon?
11 Na ini a fosi jarihondro, santa jeje ben gi den getrow kresten kotoigi a krakti foe doe wondroe wroko, èn dati ben de wan krakti boeweisi taki a kotoigi foe den ben troe. Di Johanes a Dopoeman ben de na ini doengroe-oso, a ben seni den disipel foe aksi Jesus: „Joe na a Sma di e kon, noso wi moesoe froewakti wan tra sma?” Jesus no ben piki nanga ija noso nôno. Na presi foe dati, a ben taki: „Go taigi Johanes san oenoe e jere èn e si: Den breniwan e si baka, den malengriwan e waka lontoe, den gwasiman e kon krin èn den dofoewan e jere, èn den dedewan e kisi wan opobaka, èn sma e meki a boen njoensoe bekènti na den pôtiwan; èn kolokoe a sma di no e feni wan sani na mi foe naki foetoe” (Mateus 11:3-6). Den krakti wroko disi ben de leki wan kotoigi gi Johanes taki Jesus ben de foe troe „a Sma di e kon”. — Tori foe den Apostel 2:22.
12 Na wan srefi fasi, wan toe foe den bakaman foe Jesus ben dresi den sikiwan èn ben opo srefi den dedewan (Tori foe den Apostel 5:15, 16; 20:9-12). Den wondroe disi ben de leki wan kotoigi foe Gado srefi gi a boen foe den (Hebrewsma 2:4). Èn den sortoe wroko disi ben sori a kefalek bigi krakti foe Jehovah. Foe eksempre, a troe taki Satan, „a tiriman foe grontapoe”, man foe kiri sma (Johanes 14:30; Hebrewsma 2:14). Ma di Petrus ben opo a getrow oema Dorkas baka na dede, a ben kan doe disi nomo nanga a krakti foe Jehovah, foe di na En wawan kan gi sma libi baka. — Psalm 16:10; 36:9; Tori foe den Apostel 2:25-27; 9:36-43.
13. (a) Na sortoe fasi den wondroe di skrifi na ini bijbel e gi kotoigi ete foe a krakti foe Jehovah? (b) Fa a kontroe foe profeititori e plèi wan prenspari ròl foe sori taki Jehovah na Gado?
13 Na ini a ten disi, den wondroe wroko dati no e feni presi moro. Den doro den marki kaba (1 Korentesma 13:8). Ma tokoe wi abi den tori foe den ete na ini bijbel, di foeroe sma di ben de drape e kotoigi foe dati. Te den kresten na ini a ten disi e poti prakseri na tapoe den sani disi di pasa na ini historia, dan den wroko disi e gi wan boen kotoigi ete foe a krakti foe Jehovah (1 Korentesma 15:3-6). Boiti dati, na ini a ten foe Jesaja, Jehovah ben sori go na den soifri profeititori leki wan heri boen boeweisi taki En na a troe Gado (Jesaja 46:8-11). Foeroe bijbel profeititori di skrifi nanga jepi foe Gado en santa jeje, e kon troe na ini a ten disi — wan toe foe den e kon troe na ini a kresten gemeente (Jesaja 60:8-10; Danièl 12:6-12; Maleaki 3:17, 18; Mateus 24:9; Openbaring 11:1-13). Boiti taki a e sori krinkrin taki wi e libi na ini „den lasti dei”, a kontroe foe den profeititori disi e regtfardiki Jehovah toe leki a wan-enkri troe Gado. — 2 Timoteus 3:1.
14. Na sortoe fasi a disiten historia foe Jehovah Kotoigi, de wan krakti kotoigi taki Jehovah na a Soeverein Masra?
14 Te foe kaba, Jehovah e doe bigi sani ete, wondroe sani gi en pipel. A leti na tapoe bijbel waarheid di e kon moro nanga moro, de na ondro a tiri foe a jeje foe Jehovah (Psalm 86:10; Openbaring 4:5, 6). A toemoesi aparti gro di wi e jere na heri grontapoe, de wan boeweisi taki Jehovah ’e meki a go moro esi, na ini en eigi ten’ (Jesaja 60:22). Di ogri-ati froefolgoe ben broko kon na ini a wan kondre baka a trawan na ini den lasti dei, dan a hori di Jehovah pipel horidoro na wan deki-ati fasi, ben kan, foe di a santa jeje ben tranga den (Psalm 18:1, 2, 17, 18; 2 Korentesma 1:8-10). Ija, a disiten historia foe den Kotoigi foe Jehovah de foe ensrefi wan krakti kotoigi taki Jehovah na a Soeverein Masra. — Sakaria 4:6.
A boen njoensoe moesoe preiki
15. Sortoe moro bigi kotoigi a fosi kresten gemeente ben moesoe gi?
15 Jehovah ben poti Israèl leki en kotoigi gi den nâsi (Jesaja 43:10). Ma soso wan toe Israèlsma ben kisi a komando foe Gado, foe go èn foe preiki gi sma di no ben de Israèlsma, èn disi ben de moro foeroe foe meki den kroetoe foe Jehovah bekènti (Jeremia 1:5; Jona 1:1, 2). Ma tokoe den profeititori na ini den Hebrew Boekoe foe bijbel e sori, taki wan dei Jehovah ben sa poti en prakseri na tapoe den nâsi na wan moro bigi fasi, èn a ben doe disi nanga jepi foe na Israèl na jejefasi foe Gado (Jesaja 2:2-4; 62:2). Bifo Jesus ben opo go na hemel, a ben komanderi den bakaman foe en: „Go foe dati ede èn meki disipel foe sma foe ala nâsi” (Mateus 28:19). Ala di Jesus ben poti en prakseri na tapoe „den lasi skapoe foe na oso foe Israèl”, tokoe a ben seni den bakaman foe en go na „ala nâsi”, srefi „go na den moro farawe presi foe grontapoe” (Mateus 15:24; Tori foe den Apostel 1:8). A heri libisma famiri ben moesoe jere a kresten kotoigi.
16. Sortoe wroko a kresten gemeente foe a fosi jarihondro ben doe, èn te o fara a wroko ben doe?
16 Paulus ben sori taki a ben froestan disi heri boen. Pikinmoro na a jari 61 G.T., a ben kan taki dati a boen njoensoe ben „e tjari froktoe èn e gro na heri grontapoe”. A boen njoensoe no ben preiki soso gi wán nâsi nomo noso gi wán sekte, soleki a wan di abi foe doe nanga na „anbegi foe den engel”. Na presi foe dati, a ben „preiki gi ala mekisani na ondro hemel” sondro foe kibri wan sani (Kolosesma 1:6, 23; 2:13, 14, 16-18). So boen, na Israèl foe Gado na ini a fosi jarihondro, ben doe en wroko foe „’meki den toemoesi boen sani bekènti na ala sei’, foe a sma di kari [den] poeroe foe doengroe go na ini en toemoesi moi leti”.
17. Fa Mateus 24:14 e tan kon troe na wan bigi fasi?
17 Ma tokoe a preikiwroko foe a fosi jarihondro dati, ben waka nomo na fesi foe san ben sa doe na ini den lasti dei. Jesus ben taki ala di a ben loekoe go na fesi, spesroetoe na ini wi ten: „A boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala nâsi; èn dan a kaba sa kon” (Mateus 24:14; Markus 13:10). A profeititori disi kon troe? Ija, a kon troe. Foe wan pikin bigin na ini 1919, a preiki foe a boen njoensoe ben panja go na moro leki 230 kondre. Sma e jere a kotoigi na a toemoesi kowroe Noordsei èn na den moro waran kondre. Den boen bigi pisi foe grontapoe e kisi kotoigi, èn den e soekoe den farawe tabiki so taki den sma di e tan drape kan kisi wan kotoigi. Srefi na ini bigi broeja, soleki den feti na Bosnia nanga Hersegofina, a boen njoensoe e tan preiki. Soleki na ini a fosi jarihondro, a kotoigiwroko e tjari froktoe „na heri grontapoe”. Den e meki a boen njoensoe bekènti sondro foe kibri wan sani „gi ala mekisani na ondro hemel”. San na a bakapisi? Na fosi presi, den wan di ben tan abra foe na Israèl foe Gado ben tjari kon makandra „komoto na ibri lo nanga tongo nanga pipel nanga nâsi”. A di foe toe, den miljoenmiljoen sma foe a „bigi ipi” ben tjari kon na inisei komoto na „ala nâsi nanga lo nanga pipel nanga tongo” (Openbaring 5:9; 7:9). Mateus 24:14 e kon troe ete na wan bigi fasi.
18. San na wan toe sani di e doe nanga jepi foe a preiki foe a boen njoensoe na heri grontapoe?
18 A preiki foe a boen njoensoe na heri grontapoe, e jepi foe boeweisi taki a denoja foe Jesus leki kownoe bigin (Mateus 24:3). Moro fara, a de a moro prenspari jepisani nanga jepi foe san „a kotiwroko foe grontapoe” e doe, foe di a e tjari sma go na a wan-enkri troe howpoe gi a libisma famiri, Jehovah Kownoekondre (Openbaring 14:15, 16). Foe di na soso troetroe kresten abi wan prati na ini a preiki foe a boen njoensoe, meki a prenspari wroko disi e jepi foe kon sabi a difrenti na mindri den troe kresten nanga den falsi kresten (Maleaki 3:18). Na a fasi disi, a abi leki bakapisi a froeloesoe foe den wan di e preiki èn foe den wan di e handri na tapoe dati (1 Timoteus 4:16). Ma san de moro prenspari, na taki a preiki foe a boen njoensoe e tjari prèise nanga grani gi Jehovah Gado, a Sma di ben gi a komando foe doe a wroko disi èn di e horibaka gi den sma di e doe dati èn a Sma di e meki a wroko tjari froktoe. — 2 Korentesma 4:7.
19. Sortoe fasti bosroiti ala kresten e kisi deki-ati foe abi, ala di den e go na ini a njoen dienst-jari?
19 A no e froewondroe srefisrefi taki wan sani ben poesoe na apostel Paulus foe taki: „Heloe foe mi efoe mi no ben meki a boen njoensoe bekènti!” (1 Korentesma 9:16) Den kresten foe a ten disi e denki na a srefi fasi. A de wan bigi grani nanga wan bigi frantiwortoe foe de „kompe wrokoman foe Gado”, di e skèin a leti foe waarheid na ini a doengroe grontapoe disi (1 Korentesma 3:9; Jesaja 60:2, 3). A wroko di ben abi wan pikin bigin na ini 1919, doro wan kefalek bigi nomroe now. Pikinmoro feifi miljoen kresten e gi kotoigi gi a soevereinfasi foe Gado ala di den e gebroiki moro leki wán miljard joeroe na ini wán jari, foe tjari a boskopoe disi di e gi froeloesoe na tra sma. A de wan prisiri srefisrefi foe abi wan prati na ini a wroko disi foe santa a nen foe Jehovah! Ala di wi e doro a dienst-jari foe 1996, meki wi abi a fasti bosroiti foe no go doe en safrisafri. Na presi foe dati, moro leki oiti wi sa gi jesi na den wortoe foe Paulus na Timoteus: „Preiki a wortoe, doe en leki wan sani di de tranga fanowdoe” (2 Timoteus 4:2). Ala di wi e doe dati, wi e begi nanga wi heri ati taki Jehovah sa tan blesi den moeiti di wi e doe.
Joe e memre disi?
◻ Soema ben teki a presi foe Israèl leki „kotoigi” foe Jehovah gi den nâsi?
◻ Fa a fasi fa kresten e tjari densrefi e jepi foe gi kotoigi?
◻ Foe san ede a de so prenspari gi wan kresten Kotoigi foe studeri bijbel èn foe prakseri dipi foe en?
◻ Na sortoe fasi a disiten historia foe Jehovah Kotoigi de wan boeweisi taki Jehovah na a troe Gado?
◻ San a preiki foe a boen njoensoe e doe?
[Prenki na tapoe bladzijde 14]
A boen njoensoe no e skotoe srefisrefi, ma a e meki bekènti now „gi ala mekisani na ondro hemel”