Kotoigi di ben kotoigi teige falsi gado
„’Oenoe na mi kotoigi,’ na so Jehovah taki, ’ija, mi foetoeboi di mi froekisi.’” — JESAJA 43:10.
1. Foe san ede libisma moesoe sabi soema na a troe Gado, èn fa den Boekoe foe bijbel e piki na tapoe na aksi dati?
SOEMA na a troe Gado? Na ini a ten disi, a heri libisma famiri abi foe doe nanga a toemoesi prenspari aksi disi. Ala di libisma e anbegi wan lo gado, tokoe na soso wán Gado kan gi wi libi nanga wan kolokoe tamara. Foe soso wán Gado wi kan taki: „Nanga en wi abi libi èn e boeweigi èn wi de” (Tori foe den Apostel 17:28). Ija, soso wán Gado abi a reti foe sma anbegi en. A de soleki fa a singi groepoe na hemel na ini a boekoe Openbaring e taki: „Joe, Jehovah, ija wi Gado, warti foe kisi a glori nanga a grani nanga a krakti, bika na joe ben meki ala sani, èn na foe joe ede den de èn den ben meki.” — Openbaring 4:11.
2, 3. (a) Fa Satan nanga wan lei ben tjalensi a reti di Jehovah abi foe sma anbegi en? (b) Sortoe bakapisi a sondoe foe Eva ben abi gi Eva nanga den pikin foe en, èn san ben de a bakapisi gi Satan?
2 Na ini a djari foe Eden, Satan ben tjalensi a reti di Jehovah abi foe sma anbegi en, èn disi a ben doe nanga wan lei. Satan ben gebroiki wan sneki, èn a ben taigi Eva taki efoe Eva ben opo ensrefi teige a wet foe Jehovah èn ben njan foe a bon di Jehovah no ben wani foe den njan foe dati, dan Eva srefi ben sa de leki Gado. Den wortoe foe Satan ben de: „Gado sabi taki na a dei ete di oenoe sa njan foe en, seiker oen ai sa kon opo èn seiker oenoe sa de leki Gado, sabi boen nanga ogri” (Genesis 3:5). Eva ben bribi a sneki èn a ben njan foe a froktoe di den no ben mag njan.
3 A no de foe taki dati Satan ben lei (Johanes 8:44). A wan-enkri fasi fa Eva ben tron „leki Gado” di a ben sondoe, ben de di a ben teki a frantiwortoe na en tapoe foe bosroiti gi ensrefi san ben boen noso san ben fowtoe, wan sani di a ben moesoe libi gi Jehovah. Èn ala di Satan lei, tokoe Eva dede te foe kaba. So boen, a wan-enkri sma di troetroe ben abi wini foe a sondoe foe Eva, ben de Satan. Foe troe, a sani di Satan ben abi na prakseri, ma di a no ben taki, ben de foe meki Eva sondoe, so taki ensrefi ben kan tron wan gado. Di Eva ben sondoe, a ben tron a fosi libisma bakaman foe Satan, èn no langa baka dati Adam ben kon na en sei. Moro foeroe foe den pikin foe den no ben gebore „na ini sondoe” wawan, ma den ben kon toe na ondro a makti foe Satan, èn heri esi wan heri grontapoe ben kon de, di ben drai en baka gi a troe Gado. — Genesis 6:5; Psalm 51:5.
4. (a) Soema na a gado foe a grontapoe disi? (b) San de tranga fanowdoe?
4 A grontapoe dati ben kisi pori na ini a Froedoe (2 Petrus 3:6). Baka a Froedoe wan tra grontapoe ben kon di ben drai en baka gi Jehovah, èn te now ete a de. Foe a grontapoe disi bijbel e taki: „Heri grontapoe didon na ini a makti foe na ogriwan” (1 Johanes 5:19). Foe di a grontapoe disi no e doe san a wet foe Jehovah e taki èn no e handri akroederi san a wani taki, meki grontapoe e doe san Satan abi na prakseri. En na a gado foe a grontapoe disi (2 Korentesma 4:4). Ma foe taki en leti, a de wan gado di no abi foeroe makti. A no kan meki sma de kolokoe noso gi den libi. Soso Jehovah kan doe dati. Dati meki te sma wani wan libi di wani taki wan sani èn wan moro betre grontapoe, dan den moesoe leri fosi taki Jehovah na a troe Gado èn baka dati den moesoe leri foe doe en wani (Psalm 37:18, 27, 28; Preikiman 12:13). So boen, a de tranga fanowdoe gi man nanga oema di e bribi, foe gi kotoigi, noso foe meki a waarheid foe Jehovah bekènti.
5. Foe sortoe „wolkoe foe kotoigi” Paulus ben taki? Kari wan toe sma di a poti na tapoe a lijst disi.
5 Na a bigin kaba foe libisma historia, den sortoe getrow sma dati ben de na grontapoe. Na ini Hebrewsma kapitel 11, na apostel Paulus gi wan langa lijst foe den èn a e kari den „so wan bigi wolkoe foe kotoigi” (Hebrewsma 12:1). Abel, a di foe toe manpikin foe Adam nanga Eva, ben de a fosiwan na tapoe a lijst foe Paulus. Heinok nanga Noa na sma foe a ten bifo a Froedoe di den e kari toe (Hebrewsma 11:4, 5, 7). Wan prenspari sma na den mindri na Abraham, na afo foe a djoe ras. Abraham, di den e kari a „mati foe Jehovah”, ben tron a fositen tata foe Jesus, „a getrow èn troe kotoigi”. — Jakobus 2:23; Openbaring 3:14.
A kotoigi di Abraham ben gi foe a waarheid
6, 7. Na sortoe fasi a libi foe Abraham nanga san a ben doe, ben de wan kotoigi taki Jehovah na a troe Gado?
6 Fa Abraham ben de wan kotoigi? Foe di a ben abi wan tranga bribi na ini Jehovah èn a ben gi jesi na En na wan loyaalfasi. Di Abraham ben kisi a komando foe gowe libi a foto Ur èn foe go libi a tra pisi foe en libi na ini wan farawe kondre, dan a ben gi jesi (Genesis 15:7; Tori foe den Apostel 7:2-4). Nofo tron a de so, taki den man di de foe wan lo di e waka lontoe, e tapoe nanga a fasi foe libi dati, èn sa teki a bosroiti foe go libi na wan foto, foe di dati e gi moro seikerfasi. Foe dati ede, di Abraham ben gowe libi a foto foe bigin libi na ini tenti, dan a ben sori krinkrin taki a ben froetrow tapoe Jehovah Gado. A gi di a ben gi jesi ben de wan kotoigi gi sma di ben e loekoe a waka nanga a libi foe en. Jehovah ben blesi Abraham foeroe foe a bribi di a ben sori. Ala di Abraham ben e libi na ini tenti, tokoe a ben go boen nanga en na materia sei. Di sma ben tjari Lot nanga en osofamiri gowe leki strafoeman, dan Jehovah ben meki Abraham abi boen bakapisi di a ben hari go na den baka, so taki a ben man fri den. A wefi foe Abraham ben kisi wan manpikin di a ben owroe kaba, èn na so fasi a pramisi foe Jehovah taki Abraham ben o tron a papa foe wan siri, ben kon troe. Foe a fasi fa a ben go nanga Abraham, sma ben si taki Jehovah na wan libilibi Gado di e meki den pramisi foe en kon troe. — Genesis 12:1-3; 14:14-16; 21:1-7.
7 Di Abraham ben drai kon baka foe a fri di a ben go fri Lot, dan a ben miti Mèlkiseidèk, a kownoe foe Salem (baka ten den ben kari disi Jerusalem), di ben kari Abraham „Abram foe a Moro Hei Gado”. A kownoe foe Sodom ben miti en toe èn a ben wani foe gi en presenti. Abraham ben weigri foe teki den. Foe san ede? A no ben wani foe sma tweifri na soema ben de a Fonten foe den blesi foe en. A ben taki: „Foe troe, mi e opo mi anoe go na tapoe na ini wan sweri gi Jehovah, a Moro Hei Gado, a Sma di meki hemel nanga grontapoe, taki mi no sa teki no wan pisi titei noso wan banti foe wan sandaal srefi, nôno, no wan sani di de foe joe, so taki joe no kan taki: ’Na mi ben meki Abraham kon goedoe’” (Genesis 14:17-24). Abraham ben de troetroe wan heri boen kotoigi!
Wan nâsi foe kotoigi
8. Fa Moses ben sori foeroe bribi na ini Jehovah?
8 Moses, wan bakapikin foe Abraham, de toe na tapoe Paulus en lijst nanga kotoigi. Moses ben drai en baka gi den goedoe foe Egipti èn baka ten a ben kakafoetoe gi a tiriman foe a bigi grontapoemakti dati sondro foe frede, so taki a ben kan meki den pikin foe Israèl kon fri. Foe pe a ben kisi a deki-ati? Foe a bribi foe en. Paulus e taki: „[Moses] ben tan de stanfaste neleki a ben si a Sma di wi no kan si” (Hebrewsma 11:27). Sma ben kan si den gado foe Egipti, den ben kan fasi den. Srefi na ini a ten disi, den stonpopki di sma ben meki foe den, e meki sma e froewondroe. Ma Jehovah, ala di wi no man si en, ben de wan troetroe sma gi Moses moro leki ala den falsi gado dati. Moses no ben tweifri taki Jehovah ben de, èn taki a ben sa pai den anbegiman foe En (Hebrewsma 11:6). Moses ben tron wan toemoesi aparti kotoigi.
9. Fa a nâsi Israèl ben moesoe dini Jehovah?
9 Baka di Moses ben meki den Israèlsma kon fri, a ben de a mindriman foe wan froebontoe di ben de na mindri Jehovah nanga den bakapikin foe Abraham nanga jepi foe Jakob. Leki bakapisi, a nâsi Israèl ben kon de èn a ben tron a spesroetoe goedoe foe Jehovah (Exodus 19:5, 6). Fosi tron, wan heri nâsi ben o gi kotoigi. Den wortoe di Jehovah ben taki nanga jepi foe Jesaja, so wan 800 jari na baka, ben fiti, foe taki en so, foe sensi a bigin foe a nâsi: „’Oenoe na mi kotoigi,’ na so Jehovah ben taki, ’ija, mi foetoeboi di mi froekisi, so taki oenoe kan sabi dati èn abi bribi na ini mi, èn so taki oenoe kan froestan taki mi na a srefi Sma’” (Jesaja 43:10). Fa a njoen nâsi disi ben sa de leki kotoigi foe Jehovah? Nanga a bribi foe den èn nanga a gi di den ben o gi jesi na en èn nanga den sani di Jehovah ben o doe gi den.
10. Na sortoe fasi den krakti wroko di Jehovah ben doe gi Israèl de wan kotoigi, èn nanga sortoe bakapisi?
10 So wan 40 jari baka a bigin foe Israèl, a nâsi ben o teki a Pramisi Kondre abra. Spion ben go foe loekoe fa a foto Jerikow ben de, èn Rakab, wan sma di ben libi na Jerikow, ben gi den kibri. Foe san ede? A ben taki: „Wi jere fa Jehovah ben drei a watra foe a Redi Se poeroe en na oen fesi di oenoe ben komoto na Egipti, èn san oenoe ben doe nanga den toe kownoe foe den Amorietsma di ben de na a tra sei foe Jordan liba, dati wani taki, Sihon nanga Og, di oenoe ben pori krinkrin. Di wi ben kisi foe jere dati, na ati foe wi bigin smèlter, èn no wan jeje kon ete na ini no wan sma foe oenoe ede, bika Jehovah oen Gado, na a Gado na ini den hemel na tapoesei èn na grontapoe na ondro” (Josua 2:10, 11). San sma ben froeteri foe den krakti wroko foe Jehovah ben meki Rakab nanga a famiri foe en gowe libi Jerikow nanga den falsi gado foe a foto, èn a ben go foe anbegi Jehovah makandra nanga Israèl. A de krin, taki Jehovah ben gi wan krakti kotoigi nanga jepi foe Israèl. — Josua 6:25.
11. Sortoe frantiwortoe ala papa nanga mama foe Israèl ben abi na ini a tori foe a gi foe kotoigi?
11 Di den Israèlsma ben de ete na Egipti, Jehovah ben seni Moses go na Farao èn ben taki: „Go na Farao, bika mi — mi meki na ati foe en nanga na ati foe den foetoeboi foe en kon tranga, so taki mi kan poti den marki disi foe mi leti na en fesi, èn so taki joe kan meki bekènti na ini den jesi foe den manpikin foe joe èn na ini den jesi foe den manpikin foe joe manpikin o tranga mi ben handri nanga Egipti èn [meki] den marki bekènti di mi ben poti na den mindri; èn oenoe sa sabi seiker taki mi na Jehovah” (Exodus 10:1, 2). Den Israèlsma di ben e gi jesi, ben o froeteri den pikin foe den foe den makti sani di Jehovah ben doe. Den pikin foe den, foe den sei, ben o froeteri den pikin foe den, èn na so a ben o go, geslakti baka geslakti. So boen, sma ben o memre den krakti sani di Jehovah ben doe. Na ini a ten disi so srefi, papa nanga mama abi a frantiwortoe foe gi kotoigi na den pikin foe den. — Deuteronomium 6:4-7; Odo 22:6.
12. Fa a blesi di Jehovah ben blesi Salomo nanga Israèl, ben de wan kotoigi?
12 Den foeroe blesi di Jehovah ben gi Israèl di a ben de getrow, ben de wan kotoigi gi den nâsi na den lontoe. A ben de soleki fa Moses ben taki, baka di a ben froeteri foe den blesi di Jehovah ben pramisi: „Ala den pipel foe grontapoe sa moesoe si taki a nen foe Jehovah kari na joe tapoe, èn foe troe den sa frede joe” (Deuteronomium 28:10). Salomo ben kisi koni nanga goedoe foe a bribi foe en ede. Na ondro a tiri foe en, a ben go boen nanga a nâsi èn wan heri pisi ten den ben njan boen foe vrede. Foe a ten dati wi e leisi: „Foe ala den pipel sma ben tan kon foe arki a koni foe Salomo, srefi foe ala den kownoe foe grontapoe di ben jere foe a koni foe en” (1 Kownoe 4:25, 29, 30, 34). Wan foe den prenspari sma di ben kon loekoe Salomo, ben de na oema-kownoe foe Skeba. Baka di a si nanga en eigi ai taki Jehovah ben blesi a nâsi nanga a kownoe foe en, na oema-kownoe ben taki: „Meki a de so taki Jehovah joe Gado kisi blesi, di prisiri na ini joe foe di a ben poti joe na tapoe en kownoestoeroe leki kownoe gi Jehovah joe Gado; bika joe Gado ben lobi Israèl.” — 2 Kroniki 9:8.
13. San ben de kande a moro boen kotoigi di Israèl ben gi, èn fa wi abi wini foe dati te now ete?
13 Na apostel Paulus ben froeteri san ben de kande a moro boen kotoigi di Israèl ben gi. Di a ben taki foe Israèl na skinfasi, nanga a kresten gemeente na Rome, a ben taki: „Den ben kisi den santa wortoe foe Gado” (Romesma 3:1, 2). Foe bigin nanga Moses, Jehovah ben meki wan toe getrow Israèlsma nanga jepi foe en santa jeje, skrifi fa A ben handri nanga Israèl, èn a ben meki den skrifi a rai foe en toe nanga den wet foe en, nanga den profeititori foe en. Nanga jepi foe den sani disi di ben skrifi, den owroeten skrifiman disi ben gi kotoigi na ala den geslakti di ben moesoe kon ete — so srefi a geslakti foe wi na ini a ten disi — taki soso wán Gado de, èn en nen na Jehovah. — Danièl 12:9; 1 Petrus 1:10-12.
14. Foe san ede son sma di ben gi kotoigi foe Jehovah, ben kisi hebi froefolgoe?
14 A de wan sari foe taki, dati nofo tron Israèl no ben sori bribi, èn dan Jehovah ben abi foe seni kotoigi go na en eigi nâsi. Foeroe foe den kotoigi disi den ben froefolgoe. Paulus ben taki dati son wan foe den „ben kisi a tesi foe den foe di den ben spotoe den èn ben fon den, ija, moro leki dati, foe di den ben tai den na boei èn foe di den ben poti den na ini strafoe-oso” (Hebrewsma 11:36). Getrow kotoigi foe troe! A de wan sari troetroe taki nofo tron a froefolgoe di den ben kisi ben kon foe den srefi sma foe a nâsi di Jehovah ben froekisi! (Mateus 23:31, 37) Foe taki en leti, dan a sondoe foe a nâsi ben kon so bigi, taki na ini 607 b.G.T., Jehovah ben gi pasi taki den Babilonsma pori Jerusalem nanga a tempel foe en, èn a ben meki den tjari moro foeroe foe den Israèlsma di ben tan na libi go na ini katibo. Disi ben de a kaba foe a kotoigi di wan heri nâsi ben gi kotoigi foe Jehovah nen? Nôno.
Wan kroetoe-afersi foe den gado
15. Fa wan kotoigi ben gi, srefi di den ben de na ini katibo na Babilon?
15 Srefi di getrow memre foe a nâsi dati ben de na ini katibo na Babilon, den no ben draidrai foe gi kotogi foe a de di Jehovah de Gado èn foe a makti foe en. Foe eksempre, sondro foe frede, Danièl ben froeteri san den dren foe Nebukadnesar ben wani taki, a ben tjari kon na krin gi Belsasar san ben skrifi na tapoe a skotoe, èn a ben weigri foe meki wan skeki na fesi Darius na ini a tori foe begi. Den dri Hebrewsma toe, di den ben weigri foe boigi gi wan stonpopki, ben gi Nebukadnesar wan heri moi kotoigi. — Danièl 3:13-18; 5:13-29; 6:4-27.
16. Fa Jehovah ben froeteri na fesi taki Israèl ben o drai go baka na a kondre foe den, èn san ben sa de a marki foe disi?
16 Ma tokoe, Jehovah ben abi na prakseri taki wan heri nâsi ben o gi kotoigi baka na a kondre Israèl. Esekièl, di ben froeteri profeititori na den djoe di ben de na ini katibo na Babilon, ben skrifi foe a fasti bosroiti di Jehovah ben abi na ini a tori foe a kondre di ben kon tron leki wan broko pranasi: „Na tapoe oenoe mi sa meki libisma kon foeroe, a heri oso foe Israèl, ala sani foe en, èn sma moesoe kon libi na ini den foto, èn den presi di gersi broko pranasi srefi, den sa bow den baka” (Esekièl 36:10). Foe san ede Jehovah ben sa doe disi? Na ini a fosi presi, leki wan kotoigi gi en eigi nen. Nanga jepi foe Esekièl a ben taki: „No foe oenoe ede mi e doe disi, o, oso foe Israèl, ma foe mi santa nen ede, di oenoe meki kon lasi en santafasi na mindri den nâsi.” — Esekièl 36:22; Jeremia 50:28.
17. San ben de a reide foe den wortoe foe Jesaja 43:10 taki Israèl ben de a kotoigi foe Jehovah?
17 A ben de di a profeiti Jesaja ben froeteri a profeititori taki Israèl ben o komoto na a katibo na Babilon, taki Gado ben meki en skrifi den wortoe foe Jesaja 43:10, èn ben e taki dati Israèl ben de Jehovah en kotoigi, en foetoeboi. Na Jesaja 43 nanga 44, den e taki foe Jehovah leki a Mekiman foe Israèl, nanga a Sma di seti en, en Gado, en Santawan, en Froeloesoeman, a Sma di bai en baka, en Kownoe, nanga a Sma di meki en (Jesaja 43:3, 14, 15; 44:2). Gado ben gi pasi taki Israèl ben go na ini katibo foe di ibri tron baka a nâsi ben misi foe gi glori na en leki a Sma di e doe ala den sani disi gi en. Ma den ben de en pipel ete. Jehovah ben taigi den: „No frede, bika mi bai joe baka. Mi kari joe na joe nen. Joe na foe mi” (Jesaja 43:1). Wan kaba ben sa kon na a katibo foe Israèl na Babilon.
18. Fa a fri di Israèl ben kon fri foe Babilon, ben boeweisi taki Jehovah na a wan-enkri troe Gado?
18 Ija, Jehovah ben meki a kon fri foe Israèl komoto na Babilon, kon tron wan kroetoe-afersi foe den gado. A ben tjalensi den falsi gado foe den nâsi foe meki den kon nanga den kotoigi foe den, èn a ben kari Israel leki a kotoigi foe en (Jesaja 43:9, 12). Di a ben meki Israèl kon fri, a ben boeweisi taki den gado foe Babilon no ben de gado kwetikweti èn taki en na a wan-enkri troe Gado (Jesaja 43:14, 15). Di, so wan 200 jari na fesi, a ben kari Cirus a Persiasma leki a sma di a ben o gebroiki foe fri den djoe, dan a ben gi moro boeweisi taki en na Gado (Jesaja 44:28). Israel ben o kon fri. Foe san ede? Jehovah e tjari kon na krin: „So taki den [Israèl] ben sa moesoe froeteri foe a glori foe mi” (Jesaja 43:21). Disi ben o gi moro okasi foe gi kotoigi.
19. Sortoe kotoigi ben gi foe di Cirus ben gi Israèl a kari foe drai go baka na Israèl èn sortoe kotoigi ben gi foe den sani di den getrow djoe ben doe, baka di den drai go baka?
19 Di a ten doro, dan Cirus a Persiasma ben wini Babilon, neleki fa a profeititori ben taki. Cirus, ala di a ben de wan heiden, ben meki a de di Jehovah de Gado bekènti, di a ben bariwroko gi den djoe na Babilon: „Ibriwan sma di de na mindri oenoe, foe ala en pipel, meki en Gado sori foe de nanga en. So boen, meki a hari go na Jerusalem, di de na Juda, èn bow na oso baka, foe Jehovah, a Gado foe Israèl — en na a troe Gado — di ben de na Jerusalem” (Esra 1:3). Foeroe djoe ben doe dati. Den ben teki a langa waka foe go na a Pramisi Kondre èn den ben opo wan altari na tapoe na owroe tempel djari. Ala di den ben lasi-ati èn sma ben gens den foeroe, tokoe den ben man bow a tempel nanga a foto Jerusalem baka te foe kaba. Ala den sani disi ben pasa, soleki fa Jehovah srefi ben taki, „no nanga wan legre, èn no nanga krakti, ma nanga mi jeje” (Sakaria 4:6). Den sani disi di ben doe, ben gi moro boeweisi taki Jehovah na a troe Gado.
20. San wi kan taki foe a gi di Israèl ben gi kotoigi foe a nen foe Jehovah na ini a grontapoe foe owroeten, ala di a ben abi fowtoe?
20 So boen, Jehovah ben tan gebroiki Israèl leki en kotoigi, ala di a ben de wan nâsi nanga onvolmaakti sma èn son tron den ben opo densrefi teigi En. Na ini a ten bifo a kresten ten, a nâsi dati, nanga a tempel nanga a priesterwroko foe en, ben de a moro prenspari presi foe troe anbegi na grontapoe. A sma di e leisi den Hebrew Boekoe foe bijbel di e taki foe den sani di Jehovah ben doe nanga Israèl, no kan tweifri na no wan fasi taki soso wán troe Gado de, èn taki en nen na Jehovah (Deuteronomium 6:4; Sakaria 14:9). Ma wan moro bigi kotoigi ben sa gi foe a nen foe Jehovah, èn wi sa taki foe disi na ini na artikel di e kon now.
Joe e memre disi ete?
◻ Fa Abraham ben gi wan kotoigi taki Jehovah na a troe Gado?
◻ Sortoe toemoesi aparti eigifasi foe Moses ben meki en de wan getrow kotoigi?
◻ Na sortoe fasi Israèl ben gi kotoigi foe Jehovah leki wan heri nâsi?
◻ Fa a fri di Israèl ben kon fri foe Babilon, ben sori taki Jehovah na a wan-enkri troe Gado?
[Prenki na tapoe bladzijde 9]
Foe di Abraham ben bribi èn ben gi jesi, meki a ben gi wan heri boen kotoigi foe Jehovah leki a troe Gado