Fa wan manpikin yepi en papa
JAMES na wan man fu Ingrisikondre di abi 32 yari. James en ede sei no de so bun èn a babaw pikinso. Toku a e go furu yari kaba na den konmakandra fu Yehovah Kotoigi makandra nanga en mama nanga en sisa. Ma en papa noiti ben wani sabi moro fu a bribi fu den. Wan neti di James ben de na wan konmakandra, dan den brada ben demo fa fu gi wan famiriman noso wan mati wan kari fu kon na a Memrefesa fu Krestes en dede. Di a doro na oso a neti dati, dan a go na ini en kamra esi-esi. Fu di en mama ben wani sabi san ben de nanga James, dan a go luku na ini a kamra èn a si taki James ben e feti fu suku wan spesrutu tijdschrift na mindri den owru Waktitoren nanga Ontwaakt! di den ben abi. A teki wan di ben e gi sma wan kari fu kon na a Memrefesa, èn a lon go na en papa. A sori go na a prenki fosi, èn baka dati a sori go tapu en papa èn a taki „Yu”! En mama nanga en papa luku makandra. Den no ben man bribi srefisrefi taki James ben e gi en papa wan kari fu go na a Memrefesa. Sobun, en papa taki dati kande a ben o go.
A neti fu a Memrefesa, James go na ini a krosikasi fu en papa èn a teki wan langabruku tyari go gi en. A sori en papa taki a ben musu weri en. En papa piki en taki a no ben o go na a konmakandra. Sobun, James nanga en mama wawan go na a Kownukondre zaal.
Ma wan pisi ten baka dati, James bigin du muilek srefisrefi. Te en mama ben wani tyari en go na den gemeente konmakandra, dan a no ben wani go. Na presi fu dati a ben wani tan na oso nanga en papa. Ma wan sonde mamanten di en mama ben e pruberi fu sreka en fu go na a konmakandra, dan James ben weigri baka fu go na a konmakandra. Ne wan sani pasa di fruwondru a mama fu en srefisrefi. A dei dati, James en papa taigi en: „James, yu sa go na a konmakandra tide efu mi go tu?” James en fesi kenki wantron fu di a ben firi prisiri. A brasa en papa en a taki „Iya!”. A dei dati den ala dri go na a Kownukondre zaal.
Sensi a dei dati, James en papa ben go doronomo na ala den konmakandra tapu sonde. A no ben de langa baka dati di a taigi en osofamiri taki efu a ben wani go na fesi, dan a ben sa musu go na den tra konmakandra tu (Hebrewsma 10:24, 25). A du dati, èn tu mun baka dati a bigin studeri Bijbel doronomo. A go na fesi heri esi èn a no draidrai fu tyari kenki kon na ini en libi. Fosi yu denki a bigin teki prati na a Kownukondre preikiwroko. Wan yari baka di a bigin studeri Bijbel, a gi ensrefi abra na Yehovah èn a teki dopu na ini watra. A e dini now leki wan dinari ini a diniwroko na ini a gemeente fu en. Now ala sma na ini na osofamiri e dini Yehovah na ini wánfasi.