Yepi trawan fu kisi wini fu a lusu-paiman
A Memrefesa fu a dede fu Krestes sa hori tapu 12 april
1. San na wán fasi fa a pipel fu Gado e sori warderi gi a lusu-paiman?
1 „Tangi fu Gado taki a gi wi a fri presenti fu en di bigi pasa marki” (2 Kor. 9:15). Den wortu disi e sori heri bun o furu warderi wi abi gi a bunfasi nanga a lobi bun-ati di Gado e sori en pipel nanga yepi fu en Manpikin, Yesus Krestes. A tangi di wi abi gi Gado, sa de fu si te wi sa kon makandra tapu 12 april fu hori a Memrefesa.
2. Suma e go makandra nanga den futuboi fu Yehovah na a Memrefesa, èn san den musu du fu kisi wini fu a lusu-paiman?
2 Ibri yari, sowan tin milyun sma e go na a Memrefesa makandra nanga den futuboi fu Yehovah. Na a fasi disi, den sma dati e sori taki den abi warderi gi na ofrandi fu Krestes. Ma efu den wani kisi wini fu a lusu-paiman, dan den musu sori bribi na ini a seti dati (Yoh. 3:16, 36). Fa wi kan yepi den fu kisi sowan bribi? Na a ten fu a Memrefesa disi, wi kan gi den deki-ati fu bigin wan bijbelstudie, èn fu go na den gemeente konmakandra ibri wiki. Luku den rai di e kon now.
3. Fa wi kan bigin wan bijbelstudie nanga den sma di wi e gi wan kari fu kon na a Memrefesa?
3 Bijbelstudie: Te yu e gi sma wan kari fu kon na a Memrefesa, dan fu san ede yu no e pruberi fu bigin wan bijbelstudie nanga den nanga yepi fu a Bijbel leri-buku? Aksi a sma efu yu kan sori en san na a Memrefesa. Opo bladzijde 206-208 fu a buku disi, èn taki fu a tori „A Neti-nyanyan fu Masra—Wan fesa di e gi Gado glori”. Kande yu man poti prakseri na a heri tori a fosi leisi te yu e studeri nanga a sma, noso yu man studeri wan pisi fu a tori na a fosi studie, èn a tra pisi wan tra leisi. Kande yu kan studeri den sani disi nanga a sma na en mofodoro. Te yu kaba nanga a pisi tori disi, dan kande yu kan aksi a sma efu a wani taki fu kapitel 5, di nen „A lusu paiman—A moro warti kado di Gado gi wi.” Te yu e bigin studeri doronomo nanga a sma, dan taki fu den fosi fo kapitel fu a buku.
4. Nanga suma wi kan bigin studeri Bijbel na a ten fu a Memrefesa?
4 Nanga suma wi kan bigin studeri Bijbel na a fasi disi? Kande son sma na wi wrokopresi, wi skoromati, noso birtisma sa wani taki nanga wi fu a tori disi. Efu sisa de na ini a gemeente di abi masra di no de na bribi, dan kande brada fu a gemeente kan go taki nanga a masra. Èn no frigiti den sma fu yu eigi famiri di no de Kotoigi. Boiti dati, wi sa wani meki muiti sosrefi fu kari den sma di fosi ben abi demakandra nanga a gemeente doronomo (Luk. 15:3-7). Meki wi du muiti fu yepi ala den sma disi fu kisi wini fu a lusu-paiman.
5. Fa wi kan gi bijbelstudenti nanga sma di wani sabi moro, deki-ati fu go na den gemeente konmakandra ibri wiki?
5 Gemeente Konmakandra: Gi furu bijbelstudenti nanga tra sma di wani sabi moro, a Memrefesa na a fosi konmakandra pe den e go. Ma fa wi kan gi den deki-ati fu kon na den tra gemeente konmakandra fu wi, so taki den kan kisi wini fu dati? Wi Kownukondre diniwroko fu april 2005, bladzijde 8, e gi a rai disi: „Kari a nen fu a publikitaki di sa hori a wiki di e kon. Sori den san wi sa studeri na a Waktitoren-studie èn na a Gemeente Bukustudie. Fruteri den wan tu sani fu a Theokrasia Diniwroko-skoro nanga a Diniwroko Konmakandra. Efu yu abi wan prati na a skoro, dan kande yu kan sreka dati nanga den. Fruteri den wan tu moi penti di kon na krin na den konmakandra. Gebroiki den fowtow na ini den publikâsi fu wi fu yepi den sma fu kon si san e pasa na den konmakandra. Na a fosi studie kaba yu musu gi den wan kari fu kon na den konmakandra.”
6. San na tu fasi fa wi kan yepi opregtisma fu kisi wini fu a lusu-paiman?
6 Te opregtisma e studeri Bijbel doronomo èn te den e go na den gemeente konmakandra doronomo, dan nofo tron den e go na fesi na yeye fasi moro esi. Fu dati ede wi musu gi trawan a deki-ati fu kisi wini fu den sani disi di Gado seti, èn fu kisi wini fu a moro bigi kado di Gado gi wi, namku a lusu-paiman.