Meki wi sori taki wi de nanga tangi
A Memrefesa o hori tapu 17 april
1. Sortu sani di a psalm skrifiman ben taki, fiti spesrutu na a ten fu a Memrefesa?
1 Yehovah ben du furu sani di e sori taki a abi sari-ati èn taki a e frulusu sma. Fu dati ede a psalm skrifiman di ben de nanga tangi, ben aksi: „San mi o pai Yehovah baka fu ala bun di a e du gi mi?” (Ps. 116:12) Na ini a ten disi, den futuboi fu Gado abi moro reide fu de nanga tangi. Hondrohondro yari baka di Gado meki sma skrifi den wortu disi, dan Yehovah gi libisma a moro bigi kado, iya, a gi den a lusu-paiman. Te wi o sreka wisrefi fu memre a dede fu Krestes tapu 17 april, dan wi abi bun reide tu fu sori taki wi de nanga tangi.—Kol. 3:15.
2. San na wan tu reide fu san ede wi de nanga tangi gi a lusu-paiman?
2 Den blesi di wi e kisi fu a lusu-paiman: Nanga yepi fu a lusu-paiman, wi man kisi „pardon fu wi sondu” (Kol. 1:13, 14). Disi e meki taki wi man anbegi Yehovah nanga wan krin konsensi (Hebr. 9:13, 14). Wi kan taki nanga Yehovah na ini begi, sondro fu frede (Hebr. 4:14-16). Den sma di poti bribi na ini a lusu-paiman, abi a moi howpu fu libi fu têgo!—Yoh. 3:16.
3. Fa wi kan sori Yehovah taki wi de nanga tangi gi a lusu-paiman?
3 Fa wi kan sori taki wi de nanga tangi: Wan fasi fa wi kan sori taki wi de nanga tangi trutru, na te wi e teki ten ibri dei fu leisi den pisi fu Bijbel di wi musu leisi na a ten fu a Memrefesa èn te wi denki dipi fu den sani dati. Na ini A Waktitoren fu 1 februari 2011 wan artikel de di nen „Yu de srekasreka gi a moro prenspari dei fu a yari?” Na artikel disi meki spesrutu fu yepi wi leisi den pisi dati. Boiti dati, wi kan begi Yehovah nanga wi heri ati, èn wi kan taigi en o furu warderi wi abi gi a lusu-paiman (1 Tes. 5:17, 18). Wi e sori taki wi de nanga tangi èn taki wi e gi yesi, te wi o de na a Memrefesa, soleki fa Yesus ben gi a komando (1 Kor. 11:24, 25). Boiti dati, wi kan teki na eksempre fu a bigi lobi di Yehovah sori, te wi e kari so furu sma leki wi man fu kon na a Memrefesa makandra nanga wi.—Yes. 55:1-3.
4. Sortu fasti bosroiti wi musu abi?
4 Den futuboi fu Yehovah di abi warderi, no o si a Memrefesa leki wan konmakandra nomo. Disi na a moro prenspari konmakandra fu a yari! Aladi a Memrefesa e kon moro krosibei, meki a de so taki yu abi a fasti bosroiti fu du a srefi leki a psalm skrifiman di ben skrifi: „Mi ati, prèise Yehovah. Èn no frigiti ala den sani di a du gi yu.”—Ps. 103:2.