Sori warderi gi a moro bigi presenti di Gado gi libisma
1. Spesrutu gi sortu sani wi de Yehovah tangi?
1 Yehovah e gi wi furu ’bun presenti’. Ma a moro bigi presenti di a gi wi, na a lusu-paiman di en lobi Manpikin pai (Yak. 1:17). A lusu-paiman e meki taki wi kan kisi furu blesi, èn wan fu den blesi na taki wi kan kisi pardon gi den sondu fu wi (Ef. 1:7). Wi de nanga tangi ala ten gi a sani disi. Spesrutu na a pisi ten fu a Memrefesa, wi e teki ten fu denki dipi fu a bigi presenti disi.
2. Fa wi nanga wi osofamiri kan kisi moro warderi gi a lusu-paiman?
2 Kon kisi moro warderi: Efu yu wani yepi yu osofamiri fu kisi moro warderi gi a lusu-paiman na ini den wiki bifo 30 maart, dan kande yu kan gebroiki pikinso ten tapu a neti te unu e hori na Osofamiri Anbegi, fu taki fu a lusu-paiman. Boiti dati, leki osofamiri unu kan leisi den pisi fu Bijbel di wi musu leisi ibri dei na a ten fu a Memrefesa. Denki dipi fu a fasi fa a lusu-paiman tyari wini kon gi yu, èn fa a abi krakti tapu a fasi fa yu e denki fu Yehovah, fu yusrefi, fu tra sma èn fu a ten di e kon.—Ps. 77:12.
3. Fa wi kan sori taki wi abi warderi?
3 Fa wi kan sori warderi: A warderi di wi abi gi a lusu-paiman, o meki taki wi fruteri trawan fu a bigi lobi di Yehovah sori di a seni en Manpikin kon na grontapu (Ps. 145:2-7). Na ini den mun fu maart, april, nanga mei, son osofamiri e sori taki den abi warderi fu di den e seti sani so taki awinsi wán memre fu na osofamiri kan dini leki yepipionier. Efu dati no kan, dan yu kan „bai ten” fu du moro na ini a preikiwroko? (Ef. 5:16, futuwortu) Fu di wi de nanga tangi, meki wi sa yepi trawan tu fu kon makandra nanga wi na a Memrefesa (Openb. 22:17). Bigin skrifi na tapu papira suma yu o gi wan kari fu kon na a Memrefesa. Yu kan kari den gobaka fu yu, Bijbelstudenti, famiriman, sma na yu wrokope, nanga den birtisma fu yu. Teki prati so furu leki yu man na a spesrutu wroko fu gi sma wan kari fu kon na a Memrefesa.
4. Na sortu moi fasi wi kan gebroiki a pisi ten fu a Memrefesa?
4 A pisi ten fu a Memrefesa e gi wi nyun okasi fu sori Yehovah o furu warderi wi abi gi a lusu-paiman di a gi libisma. Meki a de so taki wi gebroiki a ten disi fu sori moro warderi gi a lusu-paiman èn gi „a kefalek bigi gudu fu Krestes”.—Ef. 3:8.