Yu o gebroiki na okasi disi?
Sori warderi na a pisi ten fu a Memrefesa
1. Sortu spesrutu okasi wi abi na a pisi ten fu a Memrefesa?
1 A Memrefesa di o hori tapu 14 april o gi wi wan moi okasi fu sori taki wi de nanga tangi gi den bun sani di Yehovah du gi wi. A tori na ini Lukas 17:11-18 e sori fa Yehovah nanga Yesus e firi te wi de nanga tangi. Na wan sari tori taki fu den tin gwasiman di kon betre, wán nomo ben taki Yesus tangi. Na ini a ten di e kon, a lusu-paiman o meki taki nowan sma o siki moro. Sma o man libi fu têgo! A no de fu taki dati wi o taigi Yehovah tangi ibri dei gi den blesi disi. Ma fa wi kan sori taki wi de nanga tangi na ini den wiki di e kon?
2. Fa wi kan sori taki wi e warderi a lusu-paiman?
2 San wi kan du fu de nanga tangi? Fu man de nanga tangi wi musu prakseri bun fu a lusu-paiman. Fu man yepi wi fu abi warderi, dan wi kan gebroiki a leisipisi di abi fu du nanga a Memrefesa. Wi kan feni disi na ini a deitekst buku nanga a kalender. A ben o bun fu luku a leisipisi makandra nanga yu osofamiri. Te wi e du dati, dan wi o kisi moro warderi gi a lusu-paiman. A leisipisi disi o yepi wi fu tyari wisrefi na wan bun fasi.—2 Kor. 5:14, 15; 1 Yoh. 4:11.
3. Na sortu fasi wi kan sori taki wi de nanga tangi na a pisi ten fu a Memrefesa?
3 Sori taki yu de nanga tangi: Efu wi de nanga tangi, dan wi o sori dati nanga den sani di wi e du (Kol. 3:15). A gwasiman di ben de nanga tangi, ben du muiti fu feni Yesus èn fu taki en tangi. A no de fu taki dati a ben de fayafaya fu fruteri trawan taki Yesus ben meki a kon betre na wan wondru fasi (Luk. 6:45). Efu wi de nanga tangi gi a lusu-paiman, dan wi o du ala muiti fu gi sma wan kari fu kon na a Memrefesa. Wan tra fasi fa wi kan sori taki wi de nanga tangi, na te wi e du a yepi-pionierwroko èn te wi e du moro na ini a diniwroko na a pisi ten fu a Memrefesa. Wi e sori taki wi de nanga tangi te wi e gi den sma wan switikon na a neti fu a Memrefesa, èn te wi e piki den aksi di den abi.
4. San wi kan du fu meki taki a pisi ten fu a Memrefesa disi, de wan spesrutu wan?
4 A Memrefesa disi o de a lastiwan gi wi? (1 Kor. 11:26) Wi no sabi. Ma san wi sabi na taki te a Memrefesa disi pasa kaba, dan wi no o abi na okasi dati moro fu sori taki wi de nanga tangi. Yu o gebroiki na okasi disi? Den sani di wi e taki fu di wi de nanga tangi èn den sani di wi e prakseri musu prisiri Yehovah, a Gado di sorgu gi a lusu-paiman.—Ps. 19:14.