Ondrofenitori fu a Jaarboek 2013
A begi efu a ben kan yepi wan sma
Irene, di e libi na ini Sweden, skrifi: „Mi abi 80 yari èn fu di mi abi furu skin-ati, meki mi no man go preiki. Mi begi Yehovah fu yepi mi fu miti wan sma di mi ben fisiti fosi, èn di wani sabi moro now.
Wan dei, wan sma bèl èn mi masra teki a telefon. A ben de wan uma di taigi en: ’Mi bèl fu di unu na den wan-enkri sma di mi man memre. Yu wefi ben o man kon na mi fu taki fu a Wortu fu Gado? Mi ben studeri sowan 15 noso 20 yari pasa, ma a masra fu mi di dede now, ben e gens mi. Dati meki mi tapu fu studeri.’
Mi e memre taki mi ben e fisiti na uma nanga wan tra sisa di ben e studeri nanga en. Mi ben fruwondru taki na uma ben sabi mi ete. Mi ben breiti, dati meki mi sreka sani fu go miti en. Sensi a ten dati, wi e studeri ibri wiki. Na uma kon na a Memrefesa nanga a spesrutu lezing. A e kon na ala den konmakandra tu. Mi e taki Yehovah tangi ibri dei taki a piki a begi fu mi.”
Yehovah meki mi tron wan bun sma
WILSON THEIN
A GEBORE NA INI 1924
A DOPU NA INI 1955
A LIBI FU EN: A man disi ben de wan fufuruman fosi, ma a meki muiti fu kenki den fasi fu en èn a e dini leki spesrutu pionier 54 yari.
◆ Di mi ben yongu, mi ben leri boks, worstel nanga judo. Fu dati ede, mi ben lobi feti, èn mi ben atibron esi-esi. Di mi ben abi 19 yari, mi tron wan fufuruman di ben tyari gon èn mi ben waka nanga tra fufuruman. Te fu kaba, den kisi mi èn den poti mi na strafu aiti yari langa. Drape mi bigin denki fu na ogri fasi fa mi ben e libi èn mi ben e begi furu. Dipi na ini mi ati, mi ben wani kon leri sabi Gado.
Baka di mi komoto na strafu-oso, mi froisi go tan na Yangon, pe mi bigin go na den konmakandra fu Yehovah Kotoigi. Te fu kaba, mi ben man teki dopu. Mi breiti taki furu brada ben abi pasensi nanga mi èn yepi mi teleki mi dopu.
Baka di mi teki dopu, a ben muilek ete gi mi fu libi leki wan Kresten (Ef. 4:24). Mi ben abi a gwenti fu krutu trawan èn nofo tron mi ben e atibron nanga den. Mi ben wani tron wan bun sma, ma a ben muilek gi mi fu no atibron esi. Mi ben feni taki mi ben de wan takru sma, èn son leisi mi ben go na liba sei èn mi ben e krei wan heri pisi ten.
Na ini 1957, mi tron wan spesrutu pionier. A fosi presi pe mi ben musu wroko, ben de Mandalay. Drape mi ben wroko nanga Robert Richards, wan zendeling. Robert ben de leki wan papa gi mi. A leri mi fu tan poti prakseri na den bun sani di tra sma e du èn fu no frigiti taki mi na wan sondu sma tu (Gal. 5:22, 23). Te mi ati ben e bron, dan mi ben e begi Yehovah fu gi mi „wan nyun denki”, so taki mi kan hori misrefi (Ps. 51:10). Yehovah piki den begi fu mi, èn baka wan syatu pisi ten mi ben man kenki den fasi fu mi.
Bakaten mi studeri Bijbel nanga wan man di abi 80 yari èn di ben de fu a Baptist Kerki. Den sma fu a kerki fu en ben atibron èn den ben taki dati mi „fufuru” a skapu fu den. Wan fu den ben hori wan nefi na mi fesi èn a taigi mi: „A de wan sondu fu kiri wan sma?” Mi bigin atibron srefisrefi. Wantewante mi begi Yehovah na ini misrefi èn sondro frede mi taigi a man: „Yusrefi musu piki na aksi dati.” A man bigin tweifri, dan a gowe. Mi taki Yehovah tangi taki a yepi mi fu hori misrefi. Na owru man di mi ben studeri nanga en, teki dopu no langa baka dati èn a tan wan Kotoigi teleki a dede.
Na ini a ten di pasa, mi dini na ini 17 difrenti presi leki spesrutu pionier èn mi ben yepi 64 sma fu kon leri sabi a tru bribi. Te mi e prakseri fa Yehovah yepi mi, dan mi ai e furu nanga watra. Yehovah yepi mi, wan man di ben lobi feti, di ben atibron esi-esi èn di no ben de koloku, fu tron wan sma di lobi freide.