Sori warderi gi a froeloesoe paiman
1 A firi foe sori warderi gi wan mati noso wan famiri di dede de wan gwenti foe ala koeltoeroe. A firi disi kan tranga spesroetoe te a lobiwan dede nanga reide foe kibri a libi foe trawan. Ala sma di abi a howpoe foe libi foe têgo abi wan moro bigi reide foe sori warderi gi na froeloesoe paiman, foe di den e fisiti a Memrefesa foe a dede foe Krestes tapoe 6 april. — 2 Kor. 5:14; 1 Joh. 2:2.
2 Warderi a lobi foe Jehovah: Fa a fiti taki wi e sori dipi warderi gi a moro bigi Sma di e doe wi boen, Jehovah Gado, di ben sorgoe foe a froeloesoe paiman! (1 Joh. 4:9, 10) A dipi foe a lobi foe Jehovah e kon na krin ini na aparti presenti di a gi leki oenoe froeloesoe paiman, no soso wan foe den miljoenmiljoen regtfardiki engel, ma en wan enkri gebore Manpikin di a lobi moro tranga (Odo 8:22, 30). A Manpikin Jesus Krestes disi di sabi Jehovah moro boen, e memre wi: „Gado ben lobi libisma sote taki a ben gi en wan enkri gebore Manpikin, so taki ibriwan sma di sori bribi na ini en no sa pori ma ben sa abi têgo libi.” — Joh. 3:16.
3 Warderi a lobi foe Jesus Krestes: So srefi, a fiti taki wi sori dipi respeki gi Jesus, di gi en sili leki wan froeloesoe paiman gi foeroe sma (Mat. 20:28). A lobi foe en kon na krin na ini a wani foe en foe saka ensrefi na ondro a wani foe Jehovah di abi foe doe nanga a froeloesoe paiman. Prakseri fa a ben libi den boen omstandigheid pe a ben de makandra nanga en Tata nanga den miljardmiljard regtfardiki engel soso foe kan de na froeloesoe paiman foe wi. No a tjalensi foe libi na mindri èn saka ensrefi ondro sondoe libisma, no a sabi taki foe a froeloesoe paiman ben kan pai, no a dede di a ben sa moesoe dede ben meki a kenki prakseri. Boiti dati, a „teki a skin foe wan srafoe èn a ben tron a srefi leki den libisma. Moro ete, . . . a saka ensrefi èn ben gi jesi te na dede, ija, dede na a pina oedoe.” — Fil. 2:5-8.
4 Fa wi e sori warderi gi na froeloesoe paiman?: Oenoe warderi gi a froeloesoe paiman moesoe go moro fara leki soso wan frafra grantangi. A de fanowdoe taki wi leri fa Gado ben sorgoe taki froeloesoe kon nanga jepi foe Jesus Krestes (Joh. 17:3). Dan wi moesoe sori bribi ini a froeloesoe paiman (Tori. 3:19). Moro fara, wi moesoe sabi a reide foe san ede wi moesoe gi wisrefi abra na Jehovah èn teki dopoe (Mat. 16:24). Efoe wi e libi ini akroederi nanga a gi di wi gi wisrefi abra, wi sa bai ibri okasi foe froeteri trawan foe a toemoesi moi seti foe froeloesoe paiman foe kon kisi froeloesoe. — Rom. 10:10.
5 A no de pasa a man di iniwan foe wi man foe doro den sani disi di den e aksi foe wi. Mika 6:8 e gi wi a djaranti. „Èn san Jehovah e aksi baka foe oen leki foe doe geregtighèit èn foe lobi boen fasi èn foe waka bescheiden nanga oenoe Gado?” Na a srefi fasi David ben taigi Jehovah: „Ala sani e kon foe joe, èn foe joe eigi anoe wi e gi joe.”—1 Kron. 29:14.
6 Foe kan meki wi warderi gi a toemoesi moi fasi fa Jehovah sorgoe gi wi kon moro dipi, san ede wi no e leisi èn takimakandra leki wan famiri foe den kapitel 112 te 126 ini a Moro bigi man boekoe bifo a Memrefesa? Na a fasi disi, wi alamala kan sreka na jejefasi foe sori warderi foe na froeloesoe paiman tapoe a Memrefesa di sa hori tapoe 6 april 1993.