San Yeyses dede wani taki gi yu?

„ALA legre di oyti ben hari go na feti, ala feti-boto di oyti ben bow, ala assambleeman di oyti ben sdon na assambleesturu, ala kownu di oyti tiri, alamala makandra, no ben abi so wan krakti tapu na libi fu libisma na grontapu leki na wán spesrutu man disi.” Na so na skrifiman James A. Francis ben skrifi fu Yeyses Krestes.

Sma e si Yeyses na difrenti fasi, ma beybri e meki unu kon sabi en leki Gado Manpikin èn leki wan sma nanga a lobi fu òfer en srefi. Yeyses ben kari wan prenspari fasi fa a ben sori na lobi dati, di a ben taki fu en srefi: „Na Manpikin fu libisma no kon fu sma dini en, ma fu dini èn fu gi en sili leki wan lusuprèys ini na presi fu furu sma.” — Mateyus 20:28.

San na lusuprèys disi wani taki? Fu san-ede a ben de fanowdu? Suma a e bay kon fri? Iya, san Yeyses dede wani taki gi yu?

San na a lusuprèys?

Wan lusuprèys na wan sani di e tyari fri kon. Fu bay wan sma kon fri, wani taki fu fri en fu katibo ofu fu wan strafu, fu di yu e pay wan moni. Na yeye fasi, „bay kon fri” wani taki fu meki fri kon fu sondu èn na strafu fu en. Na fu dati-ede Yeyses ben dede. So leki na kresten apostru Paulus ben skrifi: „Na payman di sondu e pay na dede, ma na presenti di Gado e gi na têgo libi nanga yepi fu Krestes Yeyses, wi Masra.” — Rome sma 6:23.

Wan lusuprèys ofu frimoni beybri e kari sosrefi ransun. Na ini Psalm 49:6-9 tanapu: „Den sma di e poti frutrow na ini den sani di den abi fu tan a libi, èn di e tan meki bigi nanga den gudu fu den di den abi psa marki, no wan fu den kan bay srefi wan brada tu kon fri tapu wan ofu tra fasi, èn so tu no man gi Gado wan lusuprèys (èn na lusuprèys fu na sili fu den de so diri taki dati stop te ten di no abi skotu), so taki a ben sa libi ete fu têgo èn no ben sa si na olo.” Na lusuprèys na wan seti fu Gado, no fu wan onvolmaakti libisma.

Fu san-ede a de fanowdu?

Na lusuprèys de fanowdu fu di wi fosi libisma tta, Adam, ben sondu. A ben lasi nanga disi volmaakti libi sondro kba, èn nanga leti dedestrafu ben leysi gi en èn te fu kba a ben dede (Genesis 2:15-17; 3:1-7, 17-19; 5:5). Leki en bakapikin wi ben kisi sondu nanga dede. ’Nanga wán sma sondu ben kon na grontapu, èn nanga na sondu na dede,’ Paulus ben skrifi, ’èn na so fasi dede ben panya go na ala sma fu di den alamala ben sondu’ (Rome sma 5:12). Iya, ’ini Adam wi alamala e dede’ (1 Korente sma 15:22). Na psalmskrifiman David ben taki sobun nanga leti: „Nanga sondu mi mma ben meki mi nanga berepen, èn ini sondu mi mma ben kisi mi.” — Psalm 51:5.

Kon fri fu na strafu fu sondu èn dede de fanowdu srefisrefi efu sondu bakapikin fu Adam wani fu kisi têgo libi. Fu di onvolmaakti libisma no kan sorgu fu na lusuprèys disi, meki Yehovah nanga lobi ben du disi nanga yepi fu Yeyses Krestes. Ma san wan lusuprèys e bay? We, di Adam ben sondu, a ben lasi têgo èn volmaakti libisma libi, nanga ala en reti nanga fruwakti. Ala disi ben bay kon fri nanga yepi fu Yeyses frulusu-ofrandi.

San na lusuprèys e meki kon

San geregtighèyt e aksi ben feni presi, di libisma ben ondrofeni dede, na strafu fu sondu. Sobun na lusuprèys de wan sori fu na sari-ati nanga lobi bunfasi fu Gado. Yeyses volmaakti libisma libi, nanga ala en reti nanga fruwakti, ben poti na ini dede èn noyti a ben teki den moro, bika a no ben kisi opobaka leki wan libisma fu meti nanga brudu, ma leki wan yeye mekisani di no e dede moro (1 Korente 15:50; 1 Petrus 3:18). Na libisma libi fu Yeyses Krestes di ben òfer tan abi fu dati-ede na krakti fu frulusu ofu fu bay sma fri.

Leki wan sma di ben de sondro sondu, Yeyses ben de na ini wan srefi posisi leki di na volmaakti Adam ben de na ini biginbigin. Fu di Yeyses te na dede ben gi yesi na Gado, meki a ben kisi na wroko fu gran Heypristri di ben pristeri na waarde fu en volmaakti libisma ofrandi na ini heymel (Hebrew sma 9:24-26). Fu di Gado ben teki na prèys disi di e tyari lusu kon, meki Yeyses ben kan bay den bribi bakapikin fu Adam kon fri fu sondu nanga dede fu di a ben kobroyki na waarde fu en ofrandi fu na bun fu den (1 Korente sma 6:20; 7:23; 1 Yohanes 2:1, 2). Yeyses na a fasi dati „ben tron gi ala sma di e gi en yesi, wan sani fu kisi têgo frulusu” (Hebrew sma 5:8, 9). Nanga disi den kan kisi nanga yepi fu Gado Manpikin wan regtfardiki posisi na fesi fu Gado.

Suma na lusuprèys e bay kon fri?

Suma e nyanbun fu dati-ede fu na lusuprèys? Sma di e poti bribi na ini na seti disi èn na so fasi e kon ini wánfasi nanga Gado. Fu di den e dini en kotrow, meki den kan kon fri fu sondu nanga a strafu fu en, dede, èn kisi têgo libi. — Yohanes 17:3.

Na fosi libisma ben kan teki na bosroyti efu a ben sa gi yesi na Gado ofu no. A ben teki na bosroyti fu trangayesi. „Den no ben bidrigi Adam”, ma a ben dede leki wan espresi sondari (1 Timoteyus 2:14). Ma fa a de nanga den bakapikin fu Adam? Den ben kan teki na bosroyti fu dini Gado so bun leki a kan na ini ala onvolmaaktifasi fu den ofu trangayesi den Mekiman. — Yosuwa 24:15.

Yeyses kon fu „gi en sili leki wan lusuprèys na ini na presi fu furu sma” (Markus 10:45). Ma suma na den „furu sma”? A de krin taki Adam no de na ini, bika a ben de wan volmaakti libisma, di fu espresi ben bosroyti fu trangayesi Gado èn ben dede leki wan espresi sondari sondro fu abi berow. Ma fa a de nanga en bigi famiri, di a nomru fu den e go na ini milyardmilyard sma? Nanga wan srefi preys Yeyses Krestes e tapu na strafu di kon de na tapu Adam famiri (Teki gersi 1 Timoteyus 2:5, 6.) Fu na bun fu den ’furu’ bribiman Yeyses e kobroyki na waarde fu en lusuprèys.

Den bribiwan di bay kon fri na dyu nanga heyden sma, ofu sma fu den nâsi. Paulus e taki: „Fu di nanga wán sondu a bakapisi ben de strafu gi ala sortu fu sma, na so nanga wán du fu regtfardikifasi na bakapisi gi ala sortu fu sma de taki den e fruklari den regtfardiki fu kisi libi” (Rome sma 5:18). Fu di Yeyses dede na wan postu, „dan [Krestes] bay den dyu kon fri fu na fluku fu na Wèti fu di a tron wan fluku na ini na presi fu [den], bika Buku taki: ’Fluku musu de tapu ibriwan sma di anga na wan postu’” (Galasiya sma 3:13; Deuteronomium 21:23). Rome sma 4:11 e sori tapu den heyden sma te a e taki drape taki Abraham, na fositen tta fu den dyu, na ini a fasi pe a no ben besnij ete, ben tron „na tta fu ala sma di abi bribi ala di den no besnij”. Na frulusu-ofrandi fu Yeyses sobun abi wini gi bribi dyu nanga bribi heyden sma.

Na fasi fu libi nanga waka di ibri sma e teki, e bepaal ofu a sa nyanbun fu Yeyses ofrandi. Neleki Adam, na so den no e dwengi espresi sondari di ogri fu teki na waarde fu na frulusu-ofrandi nanga têgo libi. A de so leki Krestes ben taki: „A sma di e sori bribi na ini na Manpikin abi têgo libi; a sma di e trangayesi na Manpikin no sa si na libi, ma na ati-bron fu Gado e tan na tapu en” (Yohanes 3:36). Na frulusu payman e meki wan opobaka de tu gi den dedewan di de na ini na memre fu Gado (Yohanes 5:28, 29). Efu den gi yesi èn sori taki den de tangi, dan na kobroyki di den e kobroyki na waarde fu na frulusu payman fu na bun fu den e wani taki taki den sa libi fu têgo. Ma gi den sma di e libi na ini den „lasti dey” disi, na okasi de fu libi fu têgo sondro fu abi fu dede oyti. — 2 Timoteyus 3:1-5; Mateyus 24:3-14, 21, 34; Yohanes 11:25, 26.

Reyde fu de grantangi

Ala sma di wani nyanbun fu na lusuprèys, musu abi wan dipi warderi gi dati. Èn fa so wan tangi de wan sani di fiti! Te yu luku en bun, na lusuprèys e aksi lobi psa marki fu na sey fu Gado nanga Krestes.

Yehovah Gado ben sori bigi lobi di a ben sorgu fu wan lusuprèys nanga yepi fu na dede fu en Manpikin. Yeyses ben taki: „Gado ben lobi na grontapu [fu den libisma] sote taki a ben gi en wan enkri koboru Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi. Bika Gado no ben seni en Manpikin kon na grontapu fu a ben sa krutu na grontapu, ma fu grontapu ben sa kisi frulusu nanga yepi fu en” (Yohanes 3:16, 17). Yu no musu warderi na sori disi di Gado sori na lobi fu en?

Go prakseri pikinso moro fara fu na dipi fu Yehovah lobi ini den sani di a seti fu na lusuprèys. Bifo Gado ben seni en Manpikin kon na grontapu fu libi èn dede leki wan volmaakti libisma, dan a ben libi kba (bifo a ben tron wan libisma). A ben de na „fosi koboruwan fu heri den sani di Gado meki”, di nanga yepi fu en „ala tra sani na ini den heymel èn na grontapu ben meki, den sani di wi kan si èn den sani di wi no kan si” (Kolose sma 1:13-16). Fa Yehovah ben lobi en Manpikin! Toku Gado no ben seni so maar wan fu den milyunmilyun regtfardiki engel go na grontapu. Na lobi fu en gi na libisma famiri ben de so bigi taki a ben seni en fosi koboru Manpikin kon.

Luku pikinso tu na dipi lobi di Yeyses sori ini na tori fu na lusuprèys. Leki wan yeye mekisani na ini heymel a ben de Gado „basi-wrokoman”. A de tru, taki ’den sani di [Gado Manpikin] ben lobi srefisrefi, ben de den manpikin fu libisma’ (Odo 8:22-31). Toku a no ben de makriki gi en fu gwe libi heymel, nanga den tumusi bun omstandigheden di ben de drape na ini wánfasi nanga en Tta nanga milyardmilyard regtfardiki engel. Komoto fu en bun heymel posisi, Gado Manpikin ben kan si den ogri toestand na grontapu èn na pori krakti fu sondu nanga dede tapu na libismafamiri. A ben sabi tu, taki na gi fu na lusuprèys ben sa meki na dede fu en wan fanowdu sani. Toku a „ben teki na skin fu wan srafu èn ben tron leki den libisma. Moro ete, . . . a ben saka en srefi èn ben gi yesi te na dede.” Fu na kotrowfasi disi meki den ben wiki Yeyses baka go kisi glori libi na ini heymel (Filipi sma 2:5-11). Fa a ben sori lobi ini na tori fu na lusuprèys! Yu e warderi san Yeyses ben du?

San yu sa du?

Na Ingrisi kerkifesiman Richard fu Chichester (na wan sani fu 1198-1253) ben begi wan dey efu man nanga uma ben kan kon so fara fu „sabi Yeyses Krestes moro betre, fu lobi en moro tranga èn fu waka moro krosibey na en baka”. Na lusuprèys fu Yeyses ofrandi seyker e gi wan bun reyde fu leri sabi en, fu lobi en èn fu waka na en baka.

Efu na lusuprèys no ben pay, dan leki sondari wi ben sa de sondro howpu, bika „na maka di e tyari dede kon na sondu” (1 Korente sma 15:56). San yu musu du sobun fu kisi frulusu fu dede di ben sa kisi yu fu di na maka fu sondu sutu yu? Yu musu kisi sabi fu na seti fu Gado fu kisi frulusu nanga yepi fu Yeyses Krestes. Dan yu musu sori taki yu e poti bribi na ini na lusuprèys. Fa? Fu di yu e sori wan dipi warderi gi en, e gi yu libi abra na Gado èn e fruteri tra sma fu na tumusi moy seti disi fu frulusu.

Te yu e du disi, dan yu kan de a mindri na „bigi ipi” sma di ’e psa na bigi banawtu, èn di wasi den langa krosi fu den èn meki a kon weti na ini na brudu fu na Lam’, Yeyses Krestes (Openbaring 7:9, 14). Den abi na howpu fu libi fu têgo na ini wan grontapu paradeys (Lukas 23:43). Iya, efu Yeyses dede trutru de wan bigi sani gi yu, dan yu kan de wan sma fu na koloku ipi disi.

[Prenki na tapoe bladzijde 4]

Na Yeyses di ben de sondro sondu ben de ini wan posisi leki di na volmaakti Adam ben de na ini biginbigin

[Prenki na tapoe bladzijde 6]

Yu e warderi san Yeyses dede wani taki trutru?