A loesoe-paiman foe Krestes — Gado pasi foe kisi froeloesoe

Gado ben lobi grontapoe sote, taki a ben gi en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi.” — JOHANES 3:16.

1, 2. Sori a moeilek situwâsi di pasa nanga a libisma famiri.

KON taki joe e pina foe wan siki di seiker sa kiri joe, boiti te joe teki wan oparâsi. Fa joe ben sa firi te a moni gi na oparâsi ben foeroe kefalek, moro leki san joe ben man pai? Fa joe ben sa firi te srefi a moni di joe famiri nanga mati poti na makandra no ben nofo foe pai gi na oparâsi? Foe kon na ini so wan kefalek moeilek situwâsi pe joe libi de na ini kefar ben sa broeja joe srefisrefi!

² Disi e sori a situwâsi pe a libisma famiri kon na ini. Gado ben kria wi fosi papa nanga mama, Adam nanga Eva, na wan volmaakti fasi (Deuteronomium 32:4). Den ben abi a froewakti foe libi foe têgo èn foe meki a prakseri foe Gado kon troe: „Oen meki pikin èn kon foeroe èn foeroe grontapoe èn poti en na oen ondro” (Genesis 1:28). Ma Adam nanga Eva ben opo densrefi kontrari a Kriaman foe den (Genesis 3:1-6). A tranga-jesi foe den no ben tjari sondoe kon na tapoe Adam nanga Eva wawan, ma so srefi na tapoe den bakapikin foe den di no ben gebore ete. A getrow man Job ben taki baka ten: „Soema kan meki wan krin sma komoto na wan sma di no krin? No wan sma.” — Job 14:4.

3. Fa dede panja go na ala libisma?

³ So boen, sondoe de leki wan siki di kisi ibriwan foe wi, bika bijbel e taki dati „den alamala sondoe”. A situwâsi disi de wan kefar gi a libi. Ija, „a pai foe sondoe na dede” (Romesma 3:23; 6:23). No wan foe wi kan wai pasi gi en. Ala libisma e sondoe, èn foe dati ede ala libisma e dede. Leki bakapikin foe Adam, wi ben gebore na ini a moeilek situwâsi disi (Psalm 51:5). „Nanga wán man,” Paulus ben skrifi, „sondoe ben kon na grontapoe èn nanga sondoe dede kon, èn na so dede panja go na ala libisma, foe di den alamala ben sondoe” (Romesma 5:12). Ma disi no wani taki dati wi no abi no wan howpoe foe kisi froeloesoe.

Poeroe sondoe nanga dede

4. Foe san ede libisma wawan no man poeroe siki nanga dede?

⁴ San ben o de fanowdoe foe poeroe sondoe nanga en bakapisi, dede? A de krin, moro sani de fanowdoe leki san iniwan libisma kan gi. A psalm singiman ben kragi: „A pai gi wan libisma libi bigi toemoesi. A sani di a ben sa kan pai, noiti ben sa de nofo foe poeroe en foe a grebi, foe meki a libi foe têgo” (Psalm 49:8, 9, Today’s English Version). A troe, kande wi man meki a libi foe wi kon wan toe jari moro langa nanga jepi foe gosontoe njanjan èn nanga datra-jepi, ma tokoe no wan foe wi kan dresi na onvolmaakti sondoe situwâsi di wi kisi. No wan foe wi kan drai den takroe bakapisi foe na owroe di wi e kon owroe èn foe meki wi skin kisi a volmaaktifasi baka di Gado ben abi na prakseri na ini a bigin. Paulus no ben skepi srefisrefi di a ben skrifi taki, bika foe a sondoe foe Adam, libisma kriatoeroe „ben kon na ondro soso sani” — noso leki fa The Jerusalem Bible e vertaal en, „no ben man doro en marki” (Romesma 8:20). Ma kolokoe taki a Kriaman no gowe libi wi. Gado seti sani foe poeroe sondoe nanga dede foe ala ten. Fa?

5. Fa a wet di ben gi na Israèl e sori taki a lobi retidoe?

⁵ Jehovah na „wan sma di lobi regtfardikifasi nanga retidoe” (Psalm 33:5). A Wet di a ben gi Israèl e sori taki a e ondrosoekoe ala sani di abi foe doe nanga wan afersi èn den de prenspari na a srefi fasi èn taki a abi retidoe sondro foe teki sma partèi. Foe eksempre, na ini a wet disi wi e leisi taki ’sili moesoe gi foe sili’. Nanga tra wortoe, efoe wan Israèlsma ben kiri wan tra sma, dan a ben sa moesoe pai nanga en eigi libi gi a libi di a ben teki (Exodus 21:23; Numeri 35:21). Na so fasi a wegi foe a retidoe foe Gado ben sa de na ini balansi. — Teki gersi Exodus 21:30.

6. (a) Na sortoe fasi den ben kan kari Adam wan kiriman? (b) Sortoe libi Adam ben lasi, èn sortoe srakti-ofrandi ben sa de fanowdoe tjari a wegi foe retidoe kon na ini balansi?

⁶ Di Adam ben sondoe, a ben tron wan kiriman. Na sortoe fasi? Na a fasi taki a ben gi en sondoe situwâsi — èn so boen, dede — na ala den bakapikin foe en. A de bika foe a trangajesi foe Adam taki nownowde wi skin e go na baka, e go safrisafri na a grebi (Psalm 90:10). A sondoe foe Adam abi srefi moro serjoesoe bakapisi. Prakseri taki a sani di Adam ben lasi gi ensrefi èn gi en bakapikin no ben de soso wan gewoon libi foe 70 noso 80 jari nomo. A ben lasi volmaakti libi — troetroe, têgo libi. So boen, efoe ’libi moesoe gi foe libi’, dan sortoe libi ben sa moesoe gi foe meki retidoe de na ini a kefal disi? A de logis taki a ben sa moesoe de wan volmaakti libisma libi — wan libi di, leki di foe Adam, ben sa man meki volmaakti libisma pikin. Efoe a ben moesoe òfer leki wan srakti-ofrandi, dan wan volmaakti libisma libi no ben sa tjari a wegi foe retidoe kon na ini balansi wawan, ma a moesoe meki a kan so srefi foe poeroe sondoe dorodoro èn so srefi a bakapisi foe en, namkoe dede.

Pai den kostoe foe sondoe

7. Taki san a wortoe „loesoe-paiman” wani taki.

⁷ A pai di de fanowdoe foe loesoe wi foe sondoe, kari na ini bijbel leki „wan loesoe-paiman” (Psalm 49:7). Na ini Ingrisitongo, a wortoe dati kan abi foe doe nanga a loesoe-moni di e pai na wan sma di e tjari wan tra sma gowe nanga tranga, na foe kisi a sma baka di den ben teki nanga tranga. A no de foe taki, a loesoe-paiman di Jehovah gi no abi foe doe nanga no wan tjari di sma tjari trawan gowe nanga tranga. Ma na idea taki wan sma e pai wan prijs, de a srefi. Foe taki en leti, a werkwortoe foe a Hebrew wortoe di vertaal nanga „loesoe-paiman” wani taki troetroe „foe tapoe”. Foe verzoen sondoe, a loesoe-paiman moesoe warti a srefi leki a sani di a moesoe tapoe — a volmaakti libisma libi foe Adam.

8. (a) Taki san na a gronprakseri te wan sma e bai wan trawan baka. (b) Fa a gronprakseri foe bai wan sma loesoe baka, abi foe doe nanga wi leki sondari?

⁸ Disi de akroederi a gronprakseri di de na ini a Wet foe Moses — a gronprakseri foe bai wan sma baka. Te wan Israèlsma ben kon pôti èn ben seri ensrefi leki srafoe gi wan sma di no de wan Israèlsma, dan wan famiri ben kan bai en baka (noso, loesoe) en te a e pai wan prijs di ben warti a srefi leki di foe a srafoe (Lefitikus 25:47-49). Bijbel e taki dati leki onvolmaakti libisma wi na „srafoe foe sondoe” (Romesma 6:6; 7:14, 25). San ben sa de fanowdoe foe bai wi baka? Soleki fa wi si kaba, a lasi di volmaakti libisma libi ben lasi, ben sa meki a de fanowdoe foe pai nanga wan volmaakti libisma skin — noti moro foeroe èn noti moro mendri.

9. Fa Jehovah sreka sani foe tapoe sondoe?

⁹ A no de foe taki, wi leki libisma gebore leki onvolmaakti sma. No wan foe wi de a srefi leki Adam; no wan foe wi kan pai a loesoe-paiman di de fanowdoe gi retidoe. Soleki fa wi ben taki kaba na a bigin, a de neleki wi abi wan siki di kan kiri wi èn wi no man pai gi na oparâsi di de fanowdoe foe dresi a siki. Na ini so wan situwâsi, wi no ben sa de nanga tangi te wan sma ben sa kon leki wan mindriman gi wi èn ben sa pai den kostoe? Na dati Jehovah doe troetroe! A sreka sani foe loesoe wi foe sondoe, foe têgo. Ija, a abi a wani foe gi wi a sani di wisrefi noiti ben sa man pai wawan. Fa? „A presenti di Gado e gi”, Paulus ben skrifi, „na têgo libi nanga jepi foe Krestes Jesus, wi Masra” (Romesma 6:23). Johanes ben kari Jesus „a Pikin Skapoe foe Gado di e teki a sondoe foe grontapoe tjari gowe” (Johanes 1:29). Meki wi go loekoe fa Jehovah ben gebroiki en lobi Manpikin foe pai a loesoe-paiman.

„Wan srefi sortoe loesoe-paiman”

10. Fa den profeititori di abi foe doe nanga wan „siri” ben poti prakseri na tapoe Josef nanga Maria?

¹⁰ Leti na baka di den ben meki oproeroe na ini Eden, Jehovah ben taki a prakseri foe en foe meki wan „siri”, noso pikin, di ben sa loesoe a libisma famiri komoto na sondoe (Genesis 3:15). Nanga jepi foe wan toe openbaring di Gado ben tjari kon na krin, Jehovah ben sori sortoe famirilin ben sa meki a siri disi. Baka ten, den openbaring disi ben poti prakseri na tapoe Josef nanga Maria, di ben libi na ini Palestina èn di ben meki mofo foe trow. Na ini wan dren Josef ben kisi foe jere taki Maria ben o de nanga bere nanga jepi foe santa jeje. Na engel ben taki: „A sa kisi wan manpikin, èn joe moesoe kari en Jesus, bika a sa froeloesoe en pipel foe den sondoe foe den.” — Mateus 1:20, 21.

11. (a) Fa Jehovah ben sreka sani meki en Manpikin gebore leki wan volmaakti libisma? (b) Foe san ede Jesus ben man gi „wan srefi sortoe loesoe-paiman”?

¹¹ Disi no ben de wan gewoon fasi fa a ben kon de nanga bere kwetikweti, bika Jesus ben libi na hemel bifo a ben tron libisma (Odo 8:22-31; Kolosesma 1:15). A kefalek makti foe Jehovah ben tjari a libi foe Jesus go na ini a moeroe foe Maria, èn dati ben meki a kan taki a lobi Manpikin foe Gado ben gebore leki wan libisma (Johanes 1:1-3, 14; Filipisma 2:6, 7). Jehovah ben tiri sani na so fasi taki a sondoe foe Adam no ben flaka Jesus. Kontrari taki a ben flaka nanga sondoe, Jesus ben gebore leki wan volmaakti sma. Na so fasi a ben abi a sani di Adam ben lasi — volmaakti libisma libi. Te foe kaba, wan libisma ben de di ben kan pai gi sondoe! Èn na dati Jesus ben doe tapoe 14 Nisan, 33 G.T. Tapoe a toemoesi prenspari dei dati, Jesus ben gi pasi taki den gensman ben kiri en, èn na so fasi a ben gi „wan srefi sortoe loesoe-paiman”. — 1 Timoteus 2:6.

A waarde foe volmaakti libisma libi

12. (a) Taki san na a prenspari difrenti na mindri a dede foe Jesus nanga di foe Adam. (b) Fa Jesus tron a „Têgo Tata” gi libisma di e gi jesi?

¹² Wan difrenti de na mindri a dede foe Jesus èn di foe Adam — wan difrenti di e poti krakti na tapoe a waarde foe a loesoe-paiman. Adam ben froedini foe dede, bika foe espresi a ben trangajesi en Kriaman (Genesis 2:16, 17). Kontrari foe dati, Jesus en dede ben de wan sani di a no ben froedini srefisrefi, bika „a no ben doe no wan sondoe” (1 Petrus 2:22). So boen, di Jesus dede, a ben abi wan kefalek warti sani di a sondari Adam no ben abi na a dede foe en — a reti foe abi volmaakti libisma libi. Foe dati ede a dede foe Jesus ben abi waarde leki srakti-ofrandi. Di a ben opo go na hemel leki wan jeje, a ben gi Jehovah a waarde foe en srakti-ofrandi (Hebrewsma 9:24). Di Jesus ben doe dati, dan a ben bai a sondoe libisma famiri èn ben tron a njoen Tata foe den, èn a ben kon na ini a presi foe Adam (1 Korentesma 15:45). A e fiti foe dati ede taki den e kari Jesus a „Têgo Tata” (Jesaja 9:6). Prakseri san dati wani taki! Adam, wan sondoe papa, ben panja dede na ala den pikin foe en. Jesus, wan volmaakti Tata, e gebroiki a waarde foe en srakti-ofrandi foe gi libisma di e gi jesi, volmaakti libi.

13. (a) Sori fa Jesus ben pai a paiman di Adam ben meki. (b) Foe san ede na ofrandi foe Jesus no e tapoe a sondoe foe wi fosi papa nanga mama?

¹³ Ma fa a dede foe wán libisma nomo ben kan tapoe den sondoe foe so foeroe sma? (Mateus 20:28) Na ini wan artikel wan toe jari pasa, wi ben agersi a loesoe-paiman na a fasi disi: „Prakseri foe wan bigi fabriki nanga hondrohondro wrokoman. Wan basi di no de eerlijk e bankroetoe a bisnis; a fabriki e sroto den doro foe en. Hondrohondro sma no de na wroko now èn no man pai den paiman foe den. Den trowpatna foe den, den pikin, èn, ija, sma pe den borgoe sani alamala e pina foe a kroektoedoe ede foe a wán man dati! Dan wan goedoeman di e doe boen, e kon èn e pai a paiman foe a wrokopresi èn e opo a fabriki baka. A pai foe a wan paiman dati, e tjari dorodoro froelekti gi foeroe wrokoman, gi den famiri foe den nanga gi den sma pe den ben borgoe sani. Ma a fosi basi e njan boen foe a njoen boen bakapisi? Nôno, a de na ini doengroe-oso èn noiti moro a e kisi a wroko foe en baka! Na a srefi fasi, a pai foe a wan-enkri fowtoe foe Adam e tjari boen gi miljoenmiljoen sma foe den bakaman foe en — ma no gi Adam.”

14, 15. Foe san ede wi kan taki dati Adam nanga Eva ben sondoe foe espresi, èn na sortoe fasi a situwâsi foe wi e difrenti nanga di foe den?

¹⁴ Disi na wan eerlijk sani. Prakseri taki Adam nanga Eva ben sondoe foe espresi. Den ben froekisi foe tranga-jesi Gado. Kontrari foe den, wi gebore na ini sondoe. Wi no man tra fasi. Awansi o tranga wi e proeberi, wi no man de sondro sondoe krinkrin (1 Johanes 1:8). Son tron kande wi e firi leki Paulus di a ben skrifi: „Te mi winsi foe doe san boen, dan takroe de na ini mi. Mi e prisiri troetroe foe a wet foe Gado akroederi a sma di mi de na inisei, ma na ini den memre foe mi skin mi e si wan tra wet e feti nanga a wet foe mi froestan èn di e tjari mi go na ini katibo foe a wet foe a sondoe di de na ini den memre foe mi skin. Ke, mofina sma di mi de!” — Romesma 7:21-24.

¹⁵ Tokoe, foe a loesoe-paiman ede, wi abi howpoe! Jesus na a siri di Gado sa gebroiki, soleki fa a pramisi, foe meki „ala nâsi foe grontapoe foe troe sa blesi densrefi” (Genesis 22:18; Romesma 8:20). Na srakti-ofrandi foe Jesus e opo a doro gi kefalek moi okasi gi den sma di e bribi na ini en. Meki wi go loekoe wan toe foe den moi okasi disi.

Kisi wini foe Krestes en loesoe-paiman

16. Ala di wi de na ini wan sondoe situwâsi, sortoe wini wi kan kisi now kaba foe Jesus en loesoe-paiman?

¹⁶ A bijbel skrifiman Jakobus e erken taki „wi alamala e naki foetoe fadon foeroetron” (Jakobus 3:2). Ma foe a loesoe-paiman foe Krestes ede wi kan kisi pardon foe den sondoe foe wi. Johanes e skrifi: „Efoe wan sma doe wan sondoe, dan wi abi wan jepiman na a Tata, Jesus Krestes, wan regtfardikiwan. Èn a de wan zoen-ofrandi gi den sondoe foe wi” (1 Johanes 2:1, 2). A no de foe taki dati wi no moesoe prakseri foe sondoe leki wan gewoon sani (Judas 4; teki gersi 1 Korentesma 9:27). Ma efoe wi sondoe, dan wi kan poeroe wi ati kon na doro gi Jehovah, nanga a froetrow taki a de „klariklari foe gi pardon” (Psalm 86:5; 130:3, 4; Jesaja 1:18; 55:7; Tori foe den Apostel 3:19). Na so fasi a loesoe-paiman e meki wi man dini Gado nanga wan krin konsensi èn a e meki wi man taki nanga en na ini begi nanga jepi foe a nen foe Jesus Krestes. — Johanes 14:13, 14; Hebrewsma 9:14.

17. Sortoe blesi na ini a ten di e kon wi kan froewakti bika foe a loesoe-paiman?

¹⁷ A loesoe-paiman foe Krestes opo a pasi foe meki a prakseri foe Gado kon troe — taki libisma di e gi jesi sa libi foe têgo na ini wan paradijs na grontapoe (Psalm 37:29). Paulus ben skrifi: „Awansi o foeroe den pramisi foe Gado de, den kon tron Ija nanga jepi foe en [Jesus]” (2 Korentesma 1:20). A troe, dede „tiri leki kownoe” (Romesma 5:17). A loesoe-paiman e gi wan fondamenti foe meki Gado figi a „lasti feanti” disi poeroe (1 Korentesma 15:26; Openbaring 21:4). A loesoe-paiman foe Jesus abi so srefi wini gi den sma di dede. „A joeroe e kon”, Jesus ben taki, „pe ala sma di de na ini den memre-grebi, sa jere en [Jesus] sten èn sa kon na doro.” — Johanes 5:28, 29; 1 Korentesma 15:20-22.

18. Sortoe sari bakapisi sondoe abi na tapoe libisma, èn fa disi sa kon boen baka na ini a njoen grontapoe foe Gado?

¹⁸ Prakseri o foeroe prisiri a sa gi foe ondrofeni a libi soleki fa a ben moesoe de — sondro den sorgoe di hebi gi wi na ini a ten disi! Sondoe ben meki taki wi no de akroederi nanga Gado wawan, ma so srefi nanga wi eigi froestan, ati, nanga skin. Ma bijbel e pramisi taki na ini Gado en njoen grontapoe „No wan sma di e libi drape sa taki: ’Mi siki.’” Ija, siki na skin sei èn na emotioneel sei no sa kisi libisma moro. Foe san ede? Jesaja e piki: „Den sma di e libi na ini a kondre sa de den wan di sa kisi pardon foe den fowtoe foe den.” — Jesaja 33:24.

A loesoe-paiman — Wan fasi foe sori lobi

19. Fa ibriwan foe wi moesoe handri na tapoe a loesoe-paiman foe Krestes?

¹⁹ Lobi ben boeweigi Jehovah foe seni en lobi Manpikin kon (Romesma 5:8; 1 Johanes 4:9). Foe en sei, lobi ben boeweigi Jesus foe „tesi dede gi ibri sma” (Hebrewsma 2:9; Johanes 15:13). A e fiti foe dati ede taki Paulus ben skrifi: „A lobi di Krestes abi, e poesoe wi . . . [a] ben dede gi ala sma, so taki den wan di e libi, no moesoe libi moro langa gi densrefi, ma gi a sma di ben dede gi den èn di ben kisi wan opobaka” (2 Korentesma 5:14, 15). Efoe wi e warderi san Jesus ben doe gi wi, dan wi sa doe wan sani na tapoe dati. Boiti dati, a loesoe-paiman e meki taki wi alamala kan froeloesoe foe dede! Foe troe, wi no ben sa wani sori nanga den sani di wi e doe taki wi e si a srakti-ofrandi foe Jesus leki wan sani di abi gewoon waarde. — Hebrewsma 10:29.

20. San na wan toe fasi fa wi kan hori a „wortoe” foe Jesus?

²⁰ Fa wi kan sori troetroe warderi gi a loesoe-paiman? Sjatoe bifo den ben hori en, Jesus ben taki: „Efoe wan sma lobi mi, dan a sa hori a wortoe foe mi” (Johanes 14:23). A „wortoe” foe Jesus na so srefi a komando taki wi moesoe de fajafaja foe doe a wroko: „Go foe dati ede, èn meki disipel foe sma foe ala nâsi, èn dopoe den” (Mateus 28:19). Foe gi jesi na Jesus wani taki toe taki wi moesoe lobi wi jeje brada. — Johanes 13:34, 35.

21. Foe san ede wi moesoe fisiti a Memrefesa tapoe 1 april?

²¹ Wán foe den moro moi fasi fa wi kan sori warderi gi a loesoe-paiman na foe fisiti a Memrefesa foe a dede foe Krestes, di sa hori tapoe 1 april foe a jari disi.a Disi de wan pisi toe foe Jesus „wortoe”, bika di a ben seti a fesa disi, Jesus ben komanderi den bakaman foe en: „Tan doe disi foe memre mi” (Lukas 22:19). Te wi de drape na a moro prenspari okasi disi èn te wi e poti serjoesoe prakseri na tapoe ala sani di Krestes ben komanderi, dan wi sa sori wi fasti overtoigi taki a loesoe-paiman foe Jesus, na Gado pasi foe kisi froeloesoe. Foe troe, „froeloesoe no de ini no wan tra sma”. — Tori foe den Apostel 4:12.

[Foetoewortoe]

Joe kan memre disi ete?

◻ Foe san ede libisma no man verzoen a sondoe situwâsi foe den?

◻ Na sortoe fasi Jesus de „wan srefi sortoe loesoe-paiman”?

◻ Fa Jesus ben gebroiki en reti foe abi volmaakti libisma libi gi a boen foe wi?

◻ Sortoe blesi libisma kan kisi foe a loesoe-paiman foe Krestes?

[Prenki na tapoe bladzijde 15]

Soso wan volmaakti libisma — a speri foe Adam — ben kan tjari a wegi foe retidoe kon na ini balansi

[Prenki na tapoe bladzijde 16]

Foe di Jesus ben abi a reti foe abi wan volmaakti libisma libi, meki en dede ben abi waarde leki srakti-ofrandi