Bigi osofamiri e wroko makandra na ini Gado diniwroko
„Manpikin na wan goedoe di e kon foe jehovah”, a psalm singiman ben skrifi. „A froktoe foe a bere na wan pai. Leki peiri na ini na anoe foe wan tranga man, na so den manpikin foe den jongoe jari de. Kolokoe foe a man gosontoe èn tranga na skinfasi èn di ben foeroe en peirikokro nanga den”. — Psalm 127:3-5.
IJA, pikin-nengre kan de wan blesi foe Jehovah. Èn neleki wan man di e soetoe peiri nanga bo, e prisiri foe di a sabi boen fa foe soetoe den peiri di a abi na ini en peirikokro, na so papa nanga mama de kolokoe toe te den e jepi den pikin foe den foe waka na tapoe a pasi di e tjari den go na têgo libi. — Mateus 7:14.
Langa ten pasa, osofamiri ben ’foeroe den peirikokro’ nanga foeroe pikin èn dati ben de wan gewoon sani gi a pipel foe Gado. Prakseri foe eksempre den jari di den ben de na ini katibo na Egipti: „Èn den manpikin foe Israèl ben kisi foeroe pikin èn ben bigin lai ipi-ipi; èn den ben tan kon moro foeroe èn ben kon tranga moro nanga moro, so taki a kondre ben kon foeroe nanga den” (Exodus 1:7). Te wi e gersi omeni Israèlsma ben go na ini Egipti, nanga den wan di ben gowe libi Egipti, dan dati e sori taki den osofamiri ben abi gemiddeld tin pikin!
Baka ten, Jesus ben gro na ini wan osofamiri di ben sa sori bigi gi foeroe sma na ini a ten disi. Jesus ben de a fosi geborewan, ma Josef nanga Maria ben abi ete fo tra manpikin nanga wan toe oemapikin (Mateus 13:54-56). A tori taki den ben abi so foeroe pikin e froeklari kande fa Maria nanga Josef ben kan bigin teki waka foe drai komoto na Jerusalem sondro foe sabi taki Jesus no ben de na ini a groepoe foe den. — Lukas 2:42-46.
Bigi osofamiri na ini a ten disi
Na ini a ten disi foeroe kresten e bosroiti foe no abi foeroe pikin, bika foe reide na jeje sei, ekonomia sei, sociaal sei, nanga tra reide. Ma tokoe bigi osofamiri de wan gwenti ete na ini foeroe libimakandra. Soleki fa The State of the World’s Children 1997 e taki, a kontren pe sma e kisi moro foeroe pikin na a zuidsei foe a Sahara na ini Afrika. Drape wan oema e meki siksi pikin.
Gi kresten papa nanga mama di abi bigi osofamiri a no makriki foe kweki den pikin foe meki den lobi Jehovah, ma foeroe foe den e doe dati nanga boen bakapisi. Boen bakapisi e anga foe a wroko di na osofamiri e wroko makandra na ini soifri anbegi. A sani di na apostel Paulus ben skrifi a gemeente Korente e fiti toe na a srefi fasi gi kresten osofamiri na ini a ten disi. A ben skrifi: „Now mi e froemane oenoe brada, . . . taki oen alamala moesoe taki na ini wánfasi nanga makandra, èn taki no wan prati moesoe de na oen mindri, ma taki oenoe de makandra na ini wánfasi soleki fa a fiti, nanga a srefi denki èn nanga a srefi fasi foe prakseri” (1 Korentesma 1:10). Fa wi kan kisi so wan wánfasi?
Papa nanga mama moesoe de sma di abi jejefasi
Wan prenspari penti na taki papa nanga mama moesoe gi densrefi dorodoro na ini a dini foe Gado. Loekoe san Moses ben taigi den Israèlsma: „Arki, o Israèl: Jehovah, wi Gado, na wán Jehovah. Èn joe moesoe lobi Jehovah, joe Gado, nanga heri joe ati èn nanga heri joe sili èn nanga heri joe krakti. Èn den wortoe disi di mi e komanderi joe tide, moesoe sori taki den de na tapoe joe ati; èn joe moesoe poti den go dipi na ini a manpikin foe joe èn taki foe den te joe e sidon na ini joe oso èn te joe e waka na pasi èn te joe e go didon èn te joe e opo.” — Deuteronomium 6:4-7.
Loekoe taki Moses ben sori taki den komando foe Gado ben moesoe de ’na tapoe den ati’ foe den papa nanga mama. Na so fasi wawan den papa nanga mama ben sa wani gi doronomo jeje leri na den pikin foe den. Foe taki en leti, te papa nanga mama tranga na jejefasi, dan den sa de fajafaja foe leri den pikin foe den na ini jeje afersi.
Foe tron sma di abi jejefasi èn foe lobi Jehovah nanga heri joe ati, a de prenspari foe leisi, foe prakseri dipi, èn foe gebroiki Gado Wortoe doronomo. A psalm singiman ben skrifi taki a sma di e prisiri nanga a wet foe Jehovah èn di e leisi en „dei nanga neti” sa „tron leki wan bon di prani na libawatra, di e gi en eigi froktoe te en ten doro èn den wiwiri foe en no e kon flaw, èn a sa waka boen nanga ala san a e doe.” — Psalm 1:2, 3.
Neleki te wan bon e tjari boen froktoe te a e kisi watra doronomo, na so osofamiri di e kisi jeje njanjan sa tjari froktoe foe Gado, èn dati sa prèise Jehovah. Wan boen eksempre na a osofamiri foe Uwadiegwu, di e libi na ini West-Afrika. Ala di Uwadiegwu nanga en wefi abi aiti pikin, tokoe ala toe e dini leki gewoon pionier, noso foeroeten dinari foe Jehovah Kotoigi. A e taki: „Wi osofamiri abi wan doronomo osofamiri bijbelstudie moro leki 20 jari kaba. Wi leri den pikin foe Gado Wortoe foe sensi den ben de beibi, no soso na wi osofamiri studie, ma so srefi na ini a diniwroko èn na tra okasi. Ala den pikin foe wi na preikiman foe a Kownoekondre boen njoensoe, èn soso a moro jongoewan, di abi siki jari, no dopoe ete.”
Wroko leki wán man makandra
„Koni sa bow wan osofamiri”, bijbel e taki (Odo 24:3). Na ini na osofamiri sowan koni e meki taki sma e wroko makandra leki wán man. A „kapten” foe na osofamiri na a papa; en na a edeman foe na osofamiri di Gado poti (1 Korentesma 11:3). Na apostel Paulus di ben skrifi nanga jepi foe Gado en santa jeje, ben taki o serjoesoe a frantiwortoe foe na edeman de di a ben skrifi: „Efoe wan sma no e sorgoe [na skin sei èn na jeje sei] gi den sma foe en, èn spesroetoe gi den wan di de memre foe en osofamiri, dan a drai en baka gi a bribi èn a moro takroe leki wan sma sondro bribi.” — 1 Timoteus 5:8.
Akroederi a rai disi foe Gado Wortoe, kresten masra moesoe sorgoe gi a jejefasi foe den wefi foe den. Efoe den osowroko hebi toemoesi gi den wefi, dan a jejefasi foe den sa abi takroe bakapisi foe dati. Na ini wan Afrikan kondre wan kresten di no ben dopoe so langa ete ben kragi na den owroeman na ini en gemeente taki a gersi leki en wefi no e span nanga jeje afersi. Den owroeman ben gi en a rai taki kande en wefi ben abi praktis jepi fanowdoe. Foe dati ede a masra ben bigin jepi en nanga den osowroko foe en. A ben jepi en toe foe leisi moro boen èn foe meki a kisi moro sabi foe bijbel. Na oema ben handri boen na tapoe dati, èn now a heri osofamiri e wroko makandra na ini a diniwroko foe Gado.
Papa moesoe abi foe doe toe nanga a jejefasi foe den pikin foe den. Paulus ben skrifi: „Oenoe, papa, no tanteri den pikin foe oenoe, ma tan kweki den na ini a tranga leri èn a serjoesoe froemane foe Jehovah” (Efeisesma 6:4). Te papa nanga mama e gi jesi na a froemane foe no tanteri den pikin foe den, èn so srefi na a komando foe leri den, dan den pikin e firi taki den de wan pisi foe na osofamiri di e wroko leki wán man makandra. Leki wan bakapisi foe dati, den pikin sa wani jepi makandra èn gi makandra deki-ati foe doro marki na jejefasi.
Foe wroko leki wán man makandra wani taki toe foe gi den pikin jeje frantiwortoe te den de klariklari foe kisi den. Wan papa, wan kresten owroeman di abi 11 pikin, e wiki froekoe mamanten èn e studeri nanga difrenti foe den pikin bifo a e gowe na wroko. Ibriwan foe den moro owroewan, baka a dopoe foe den, e kisi na okasi a wan baka a trawan foe jepi den moro jongoe brada nanga sisa, èn so srefi foe leri den foe bijbel. A papa e hori ai na tapoe den èn e prèise den gi den moeiti di den e doe. Siksi foe den pikin dopoe kaba, èn den trawan e tan doe moeiti foe dopoe toe.
Boen komunikâsi, èn abi den srefi marki
Wan prenspari sani gi osofamiri di e wroko makandra, na lobi-ati komunikâsi èn a abi di den abi den srefi jeje marki. Gordon, wan kresten owroeman di e libi na ini Nigeria, de papa foe seibi pikin di abi 11 jari te go miti 27 jari. Siksi foe den pikin e pionier, leki a papa nanga mama foe den. A moro jongoe pikin, di dopoe no so langa pasa, e teki prati doronomo na a wroko foe meki disipel makandra nanga den trawan na ini na osofamiri. Den toe bigi manpikin na dinari ini a diniwroko na ini a gemeente.
Gordon srefi ben hori bijbelstudie nanga ibriwan foe den pikin foe en. Boiti dati, na osofamiri abi wan finifini programa foe bijbel leri. Ibri mamanten den e kon makandra foe loekoe wan bijbeltekst èn dan den e sreka densrefi gi den gemeente konmakandra.
Wan foe den marki foe ibri memre foe na osofamiri, na foe leisi ala den artikel foe a Waktitoren nanga Ontwaakt! No so langa pasa, den ben bigin leisi bijbel ibri dei toe leki wan foe den sani di den e doe ibri dei. Te den e taki foe den sani di den leisi, dan den memre foe na osofamiri e gi makandra deki-ati foe tan go doro nanga a gwenti dati.
Na alawiki osofamiri bijbelstudie seti so boen taki no wan sma abi foe memre wan trawan na dati — ibriwan foe den e wakti a ten foe a studie. Na ini ala den jari, a sani di den e studeri na a osofamiri studie, a fasi fa den e studeri, èn o langa den e studeri, kenki ala di den pikin kon moro owroe èn akroederi den sani di den pikin abi fanowdoe. Na osofamiri kon moro krosibei foe tra getrow foetoeboi foe Gado, èn disi abi wan boen bakapisi na tapoe den pikin.
Leki wan osofamiri den e doe sani makandra èn e poti ten na wan sei gi ontspanning. Wán leisi wan wiki den abi wan „osofamiri neti”, di abi raitori na ini, boen lafoetori, a prei di den e prei piano, e froeteri tori, nanga a rostoe di den e rostoe. Wawan leisi den e go na sekanti nanga tra presi di den lobi.
Froetrow tapoe Jehovah
No wan foe den sani di wi kari na tapoesei e poeroe den problema di e kon foe kweki bigi osofamiri. „A de wan bigi tjalensi foe de wan boen papa foe aiti pikin”, wan kresten e taki. „Foeroe materia sani nanga jeje njanjan de fanowdoe foe jepi den; mi moesoe wroko tranga foe froedini nofo moni foe horibaka gi den. Den moro owroe pikin na tini, èn ala den aiti pikin e go na skoro. Mi sabi taki jeje leri de prenspari, ma tokoe wan toe foe mi pikin tranga-ede èn den no e arki. Den e sari mi, ma mi sabi taki sontron mi e doe sani di e sari na ati foe Jehovah, èn a e gi mi pardon foe dati. So boen, nanga pasensi mi moesoe go doro foe meki den pikin foe mi kon reti te leki den kisi densrefi.
Mi e proeberi foe waka na baka na eksempre foe Jehovah taki a abi pasensi nanga wi, bika a wani taki ala sma moesoe abi berow. Mi e studeri nanga mi osofamiri, èn wan toe foe den pikin foe mi e doe moeiti foe teki dopoe. Mi no e froetrow tapoe mi eigi krakti nomo foe man abi boen bakapisi; mi no man doe foeroe nanga mi eigi krakti. Mi e proeberi foe kon moro krosibei na Jehovah na ini begi èn foe gebroiki na odo di e taki: ’Froetrow tapoe Jehovah nanga joe heri ati èn no froetrow tapoe joe eigi froestan. Poti prakseri na tapoe en na ini ala joe pasi, èn ensrefi sa meki joe pasi kon reti.’ Jehovah sa jepi mi foe leri den pikin foe mi.” — Odo 3:5, 6.
Noiti no gi abra!
Son tron a kan gersi taki a gi di wi e gi den pikin leri, na wan sani di den no e warderi, ma noiti no gi abra! Tan horidoro! Efoe den pikin foe joe no e handri boen na tapoe den moeiti foe joe now noso no e warderi dati, kande den sa doe dati baka ten. A e teki ten foe meki wan pikin gro tron wan kresten di abi den froktoe foe a jeje. — Galasiasma 5:22, 23.
Monica di e libi na ini Kenia, de wán foe den tin pikin. A e taki: „Foe sensi wi ben de beibi mi papa nanga mama ben leri wi waarheid foe bijbel. Papa ben e studeri den kresten poeblikâsi ibri wiki nanga wi. Bika foe a wroko foe en, a studie no ben de ala ten tapoe a srefi dei. Son tron, te a ben komoto na wroko, èn a ben e si wi e plèi na dorosei, dan a ben e taigi wi taki na ini feifi miniti wi alamala moesoe kon na inisei foe abi wi bijbelstudie. Na baka a bijbelstudie foe wi, wi ben kisi a deki-ati foe poti aksi noso foe taki foe iniwan problema.
A ben sorgoe taki wi ben abi demakandra nanga pikin di lobi Gado. Doronomo Papa ben e fisiti a skoro foe aksi den leriman fa wi ben e tjari wisrefi. Na wan foe den fisiti a ben jere taki den dri bigi brada foe mi ben feti nanga tra boi èn taki son tron den ben grofoe. Papa ben strafoe den foe di den ben tjari densrefi na wan takroe fasi, ma a ben teki ten toe foe froeklari nanga bijbel foe san ede den moesoe tjari densrefi na wan fasi di Gado lobi.
Wi papa nanga mama ben sori wi den winimarki foe fisiti den konmakandra foe di den ben sreka den pisi foe den konmakandra makandra nanga wi. Wi ben kisi leri foe tron dinari foe di wi ben e oefen sani na oso. Foe sensi pikin-nengreten wi ben go nanga wi papa nanga mama na ini a velddienst.
Nownow, toe bigi brada foe mi na spesroetoe pionier, wan sisa na wan gewoon pionier, wan tra sisa di trow èn di abi wan osofamiri, na wan fajafaja Kotoigi. Den toe moro jongoe sisa foe mi, di abi seibi nanga neigi jari, na preikiman di no dopoe ete. Den toe moro jongoe boi e kisi leri ete. Mi e dini dri jari kaba na a bijkantoro foe Jehovah Kotoigi na Kenia. Mi lobi èn e warderi mi papa nanga mama bika den na sma di abi jejefasi; den poti wan moi eksempre gi wi.”
Awansi o foeroe pikin joe abi, noiti no gi abra foe jepi den na tapoe a pasi di e tjari den go na têgo libi. Te Jehovah e blesi den moeiti foe joe, joe sa taki den wortoe baka foe na apostel Johanes di a ben taki foe den jeje pikin foe en: „Mi abi no wan moro bigi reide foe de nanga tangi, leki den sani disi taki, mi e jere dati den pikin foe mi e tan waka na ini waarheid.” — 3 Johanes 4.