San de fanowdoe gi wan boen trowlibi?

Joe ben sa bosroiti foe djompo go na ini wan liba sondro foe leri swen fosi? So wan don sani ben sa kan doe joe ogri — a ben kan kiri joe srefi. Ma prakseri o foeroe sma e djompo go na ini wan trowlibi sondro foe sabi fa foe tjari den frantiwortoe di abi foe doe nanga dati.

JESUS ben taki: „Soema foe oenoe di wani bow wan toren no e go sidon fosi foe teri den kostoe, foe si efoe a abi nofo foe kaba en?” (Lukas 14:28) Den sani di de fanowdoe foe bow wan toren de fanowdoe toe foe bow wan trowlibi. Den sma di wani trow moesoe prakseri den kostoe foe a trowlibi boen foe de seiker taki den kan handri nanga den tjalensi.

Ondrosoekoe a trowlibi

A de troetroe wan blesi foe abi wan patna nanga soema joe kan prati den prisiri nanga den sari foe a libi. A trowlibi kan foeroe na olo di de te wan sma e firi en wawan noso te wan sma lasi-ati. A kan satisferi na angri di wi ben kisi na a geborte foe kisi lobi, foe abi demakandra, èn foe abi wan krosibei matifasi. Na foe dati ede Gado ben taki na baka a ben kria Adam: „A no boen taki a libisma e tan en wawan. Mi e go meki wan jepiman gi en, leki wan fitipisi foe en.” — Genesis 2:18; 24:67; 1 Korentesma 7:9.

Ija, a trowlibi kan loesoe wan toe problema. Ma a sa tjari wan toe njoen wan kon toe. Foe san ede? Bika a trowlibi na a bondroe di toe aparti sma e bondroe kon na wan, di kande kan fiti na makandra, ma den no kan de a srefi kwetikweti. So boen, srefi trowpatna di e fiti boen na makandra sa ondrofeni problema wanwan leisi. A kresten apostel Paulus ben skrifi taki den wan di e trow sa kisi „kwinsi ini a skin” — noso soleki fa Njoe Testament Nanga Dem Psalm e vertaal en, „dem maka vo disi liebi”. — 1 Korentesma 7:28.

Paulus ben abi wan negatief denki? Kwetikweti! A ben gi den wan di e prakseri foe trow deki-ati nomo foe loekoe fa sani de troetroe. A switi firi taki joe lobi wan sma a no wan soifri marki di e sori fa a trowlibi sa de na ini den moen nanga den jari na baka a trowdei. Ibri trowlibi abi en eigi aparti tjalensi nanga problema. Na aksi no de efoe den sa kon, ma fa foe kakafoetoe gi den te den kon.

Den problema e gi wan masra nanga wan wefi na okasi foe sori na opregtifasi foe a lobi di den abi gi makandra. Foe gi wan eksempre: Wan koirisipi kan sori kefalek moi te a e sidon na sjoro sondro foe doe wan sani. Ma a boen di a boen na se, e boeweisi na se — kande srefi na ini den tranga skwala foe wan bigi winti. Na a srefi fasi, a tranga foe a banti na ini wan trowlibi no de foe si nomo na den tiri momenti foe lobi demakandra. Son tron a tranga foe en e boeweisi na ini situwâsi di de wan tesi te wan trowpaar e pasa na ini gens di de leki bigi winti.

Foe doe dati, wan trowpaar moesoe doe makandra wan pramisi, bika Gado ben wani taki wan man moesoe „tai hori na en wefi” èn taki den toe sma ben sa „tron wán skin” (Genesis 2:24). A prakseri foe doe makandra wan pramisi e frede foeroe sma na ini a ten disi. Tokoe a e fiti taki toe sma di lobi makandra troetroe sa wani meki wan serjoesoe pramisi foe tan na makandra. Foe doe makandra wan pramisi e kroederi nanga a wartifasi foe a trowlibi. A e gi wan fondamenti foe froetrow, taki awansi san e pasa, wan masra nanga wan wefi sa horibaka gi makandra.a Efoe joe no de klariklari foe doe so wan pramisi na makandra, dan joe no de klariklari troetroe foe trow. (Teki gersi Preikiman 5:4, 5.) Srefi den sma di trow kaba moesoe kon warderi moro boen o prenspari wan pramisi de gi wan langa trowlibi.

Ondrosoekoe joesrefi

Seiker joe kan kari den eigifasi di joe wani na ini wan patna. Ma a moro moeilek foe ondrosoekoe joesrefi foe si fa joe kan de wan jepi na ini wan trowlibi. A de toemoesi prenspari foe ondrosoekoe joesrefi, bifo èn na baka joe doe den pramisi foe trow. Foe eksempre, aksi joesrefi den aksi di e kon now.

• Mi wani foe doe wan pramisi gi mi wefi mi heri libi langa? — Mateus 19:6.

Na ini den dei foe a bijbel profeiti Maleaki, foeroe masra ben gowe libi den wefi foe den, kande foe trow nanga moro jongoe oema. Jehovah ben taki dati en altari ben foeroe nanga watra-ai foe den wefi di den masra ben gowe libi den, èn a ben kroetoe den man di ben „handri feradelek” nanga den trowpatna foe den. — Maleaki 2:13-16.

• Efoe mi e prakseri foe trow, dan mi pasa den jongoe jari kaba pe den seks firi de so tranga taki mi no man denki krinkrin foe sani? — 1 Korentesma 7:36.

„A de toemoesi kefalek foe trow toemoesi jongoe”, na so Nikki e taki, di ben abi 22 jari di a ben trow. A e warskow: „Den firi foe joe, den sani di joe wani, nanga den sani di joe lobi sa tan kenki, bigin na a ten te joe doro na a kaba foe den tini jari te go miti den jari na mindri 25 te nanga 30 jari.” A no de foe taki dati a jari di wan sma abi no e bepaal wawan efoe a klari foe go trow. Ma tokoe, efoe wan sma e trow te a no pasa den jongoe jari te den seks firi njoen ete èn tranga spesroetoe ete, dan dati kan broeja a denki foe a sma èn kan tapoe en ai gi den problema di kan kon.

• Sortoe eigifasi mi abi di sa jepi mi foe meki a trowlibi waka boen? — Galasiasma 5:22, 23.

Na apostel Paulus ben skrifi den Kolosesma: „Weri gi oensrefi den safoe firi foe lobi foe sari-ati, boen-ati, sakafasi foe jeje, safri-atifasi nanga langa pasensi” (Kolosesma 3:12). A rai disi boen gi den sma di e prakseri foe trow èn so srefi gi den sma di trow kaba.

• Mi abi a lepifasi di de fanowdoe foe jepi wan trowpatna na ini moeilek ten? — Galasiasma 6:2.

„Te problema de”, na so wan datra e taki, „a de a gwenti taki a wan trowpatna e gi a trawan a fowtoe. Ma a no prenspari soema abi a fowtoe. Na presi foe dati, a de prenspari fa a masra nanga wefi kan wroko makandra foe meki a trowlibi foe den kon moro boen.” Den wortoe foe a koni kownoe Salomo de gi den trowpaar. „Toe moro boen leki wán”, a ben skrifi, „bika efoe wan foe den ben sa fadon, dan a trawan kan opo en patna. Ma fa a sa de nanga a wan-enkri sma di e fadon te no wan trawan no de foe opo en?” — Preikiman 4:9, 10.

• Mi de moro foeroe nanga prisiri èn mi de positief, noso mi swa moro foeroe noso mi abi wan negatief denki? — Odo 15:15.

Wan negatief sma e si ibri dei leki wan takroe dei. A trowlibi no sa kenki a denki disi na wan wondroe fasi! Wan sma di no trow — man noso oema — èn di moro foeroe e kroetoe tra sma noso di abi wan negatief denki, sa tron wan sma di trow èn di e kroetoe sma èn di abi wan negatief denki na a srefi fasi. So wan negatief denki kan poti hebi druk na tapoe wan trowlibi. — Teki gersi Odo 21:9.

• Mi e tan bedari na ondro druk, noso mi e taki sani di e sori taki mi no man basi mi atibron? — Galasiasma 5:19, 20.

Kresten kisi a komando foe ’no [de] esi foe kisi atibron’ (Jakobus 1:19). Bifo a trow èn na ini a trowlibi, wan man noso wan oema moesoe leri foe man libi akroederi a rai disi: „Kisi atibron èn tokoe no sondoe; no meki son dongo ala di joe de na ini wan atibron fasi.” — Efeisesma 4:26.

Ondrosoekoe a sma di kande sa tron joe trowpatna

„A koniwan e poti prakseri na tapoe en foetoemarki”, wan odo foe bijbel e taki (Odo 14:15). Disi de seiker so te wan sma e soekoe wan trowpatna. Foe teki wan trowpatna de wan foe den moro prenspari bosroiti di oiti wan man noso wan oema sa teki. Tokoe sma si taki foeroe sma e teki moro foeroe ten foe bosroiti sortoe oto den sa bai noso na sortoe skoro den sa go, moro leki soema den sa trow.

Na ini a kresten gemeente den e „tesi den [sma di e kisi frantiwortoe] fosi foe si efoe den boen” (1 Timoteus 3:10). Efoe joe e prakseri foe go trow, dan joe sa wani sabi seiker efoe a tra sma „boen”. Foe eksempre, loekoe den aksi di e kon now. Ala di den aksi disi na aksi di poti soleki fa wan oema e si en, tokoe foeroe foe den gronprakseri e fiti so srefi gi wan man. Èn srefi den sma di trow kaba kan prakseri foe den penti disi gi a boen foe den.

• Sortoe nen a abi? — Filipisma 2:19-22.

Odo 31:23 e taki foe wan masra di „sma sabi na den portoe, te a e sidon nanga den owroeman foe a kondre”. Den owroeman foe wan foto ben e sidon na den portoe foe a foto foe kroetoe sani. So boen, soleki fa a de foe si, a ben abi a froetrow foe a poebliki. A fasi fa tra sma e prakseri foe wan man, e taki wan sani foe a nen di a abi. Efoe a kan, loekoe so srefi fa tra sma di de na en ondro e prakseri foe en. Disi kan sori fa joe leki en trowpatna, sa prakseri foe en baka ten. — Teki gersi 1 Samuèl 25:3, 23-25.

• Sortoe moreel markitiki a abi?

A koni foe Gado de „na a fosi presi soifri” (Jakobus 3:17). A sma di o tron joe trowpatna abi moro belangstelling foe satisferi en eigi seks lostoe, na presi foe abi belangstelling gi a nen foe en nanga joe na Gado? Efoe a no e doe moeiti foe libi nownow akroederi den moreel markitiki foe Gado, dan sortoe reide de foe bribi taki a sa doe dati na baka a trow? — Genesis 39:7-12.

• Fa a e handri nanga mi? — Efeisesma 5:28, 29.

A bijbel boekoe Odo e taki foe wan masra di ’poti froetrow’ na ini en wefi. Moro fara, „a e prèise en” (Odo 31:11, 28). A no e djaroesoe na wan kefalek takroe fasi, èn a no e froewakti toemoesi foeroe sani foe en trowpatna. Jakobus ben skrifi taki a koni foe tapoesei „lobi vrede, a de reidelek, . . . a foeroe nanga sari-atifasi nanga boen froktoe.” — Jakobus 3:17.

• Fa a e handri nanga en eigi famiri? — Exodus 20:12.

Lespeki gi papa nanga mama a no soso sani di den pikin moesoe doe. Bijbel e taki: „Arki joe papa di meki joe gebore, èn no wisiwasi joe mama soso foe di a kon owroe” (Odo 23:22). A de prenspari foe si san Dr. W. Hugh Missildine ben skrifi: „Foeroe problema na ini a trowlibi èn a fiti di sma no e fiti makandra, no ben sa abi foe feni presi — noso den ben sa kan si dati na fesi — te a man nanga na oema di no trow nanga makandra ete, ben sa fisiti na oso foe makandra na wan informeel fasi èn ben sa si a banti na mindri a ’sma di a o trow’ èn a papa nanga mama foe en. A fasi fa a e prakseri foe en papa nanga mama sa abi krakti na tapoe a fasi fa a sa prakseri foe en trowpatna. Wan sma moesoe aksi ensrefi: ’Mi wani taki a e handri nanga mi soleki fa a e handri nanga en papa nanga mama?’ Èn a fasi fa en papa nanga mama e handri nanga en sa sori heri boen fa a sa handri nanga ensrefi èn fa a sa froewakti taki joe moesoe handri nanga en — baka a prisiri pisi ten leti na baka a trowdei.”

• A e atibron esi-esi noso e taki skempi taki?

Bijbel e gi a rai: „Poeroe ala takroe bita-atifasi nanga atibron nanga babari nanga skempi taki na oen mindri” (Efeisesma 4:31). Paulus ben warskow Timoteus gi wan toe kresten di ben sa „siki na jejefasi na ini sani di abi foe doe nanga aksi di e tjari trobi kon èn a hari di sma e haritaki nanga wortoe” èn di ben sa „djaroesoe, strei, [taki] skempi takitaki, [abi] ogri prakseri, haritaki foe pikinpikin sani ede.” — 1 Timoteus 6:4, 5.

Boiti dati, Paulus ben skrifi taki wan sma di doro den markitiki foe kisi spesroetoe grani na ini a gemeente „no [moesoe] de wan sma di e naki trawan” — „no wan sma di e naki trawan”, akroederi a fosi Griki wortoe (1 Timoteus 3:3, foetoewortoe). A no kan de wan sma di e naki sma na skinfasi noso di e fon den nanga wortoe. Wan sma di abi a gwenti foe doe ogri nanga tranga na ini atibron no de wan boen trowpatna.

• San na den marki di a abi?

Son sma e soekoe goedoe èn den e koti den bakapisi di seiker sa kon (1 Timoteus 6:9, 10). Tra sma e libi somarso sondro taki den abi wan marki ini a libi (Odo 6:6-11). Ma wan man di lobi Gado sa sori a srefi fasti bosroiti leki di foe Josua, di ben taki: „Ma mi nanga mi osofamiri, wi sa dini Jehovah.” — Josua 24:15.

Den pai nanga den frantiwortoe

A trow na wan seti foe Gado. Na Jehovah Gado ben gi a komando èn ben seti en (Genesis 2:22-24). A ben seti a trow foe meki wan banti di moesoe tan na mindri wan man nanga wan oema so taki den kan de wan jepi gi makandra. Te den e gebroiki den bijbel gronprakseri, dan wan masra nanga wan wefi kan froewakti taki a libi foe den kan gi prisiri. — Preikiman 9:7-9.

Ma wi moesoe froestan taki wi e libi na ini ’moeilek ten di tranga foe pasa’. Bijbel ben taki na fesi taki na ini a ten disi „sma [ben] sa lobi densrefi nomo, sma sa lobi moni, de asranti, abi heimemre, . . . no sa de loyaal, no sa abi natuurlijk firi foe lobi, no sa de klariklari foe meki kroederi, . . . de toriman, no sa ke foe noti, sa abi bigimemre” (2 Timoteus 3:1-4). Den eigifasi disi kan abi wan tranga krakti na tapoe a trowlibi foe wan sma. Foe dati ede, den sma di e prakseri foe go trow moesoe teri den kostoe na wan bedari fasi. Èn den wan di trow now kaba moesoe tan wroko foe meki a wánfasi foe den kon moro boen te den e leri èn e gebroiki den tirilin foe Gado di de foe feni na ini bijbel.

Ija, den wan di e prakseri foe trow sa doe boen foe loekoe pasa a trowdei. Èn ala sma moesoe prakseri no soso a trow di den sa trow, ma so srefi a trowlibi. Go na Jehovah foe kisi tirilin so taki joe sa man si sani leki fa den de troetroe, na presi foe denki soso foe lobi. Te joe e doe dati dan a tjans sa moro bigi taki joe sa abi wan trowlibi di abi boen bakapisi.

[Foetoewortoe]

[Faki na tapoe bladzijde 5]

„A moro boen fasi fa sma taki san na lobi, èn di oiti mi leisi”

„Fa joe doe sabi efoe joe lobi en troetroe?”, na so Dr. Kevin Leman e skrifi. „Wan owroeten boekoe de di e taki san na lobi. A boekoe owroe pikinmoro toe doesoen jari, ma tokoe a de ete a moro boen fasi fa sma taki san na lobi, èn di oiti mi leisi.”

Dr. Leman ben taki foe den wortoe foe a kresten apostel Paulus di de foe feni na ini bijbel na 1 Korentesma 13:4-8:

„Lobi abi langa pasensi èn a abi switifasi. Lobi no e djaroesoe, a no e djaf, a no abi bigifasi, no e tjari ensrefi na wan fasi di no e fiti, no e soekoe en eigi belang, no e kisi atibron. A no e memre na ogri foe trawan. A no e prisiri foe onregtfardikifasi, ma a e prisiri nanga waarheid. A e froedrage ala sani, e bribi ala sani, e howpoe ala sani, e teki ala sani. Lobi no e misi noiti.”

[Faki na tapoe bladzijde 8]

Den firi kan kori joe

A sori krinkrin taki a meisje foe Sulem na ini bijbel ten ben sabi heri boen taki lobifiri kan kori wan sma. Di a makti kownoe Salomo ben soekoe en foe trow nanga en, dan a meisje foe Sulem ben taigi den tra oema-kompe foe en foe ’no wiki lobi na ini mi te leki ensrefi firi so’ (Heisingi 2:7). A koni jo­ngoe oema disi no ben wani meki den mati foe en dwengi en foe meki den firi foe en basi en. Den wan di e prakseri foe trow na ini a ten disi kan gebroiki disi toe. Basi den firi foe joe. Efoe joe e trow, dan a moesoe de bika joe lobi wan sma, no soso taki joe lobi na idea taki joe trow.

[Prenki na tapoe bladzijde 6]

Srefi den wan di trow langa ten kaba kan tranga a banti na ini a trowlibi foe den

[Prenki na tapoe bladzijde 7]

Fa a e handri nanga en papa nanga mama?