Gebroiki yu frustan fu man wai pasi gi problema

BUN hei skwala na moi sani fu si trutru, ma gi botoman den sani disi wani taki dati kefar de. Den bigi skwala dati kan meki taki den lasi den libi.

Neleki fa skwala kan de wan kefar gi botoman na se, na so den futuboi fu Gado kan tan kisi problema di kan meki den lasi-ati dorodoro. Kande yu kon si taki Kresten e tan kisi moro nanga moro tesi nanga problema, neleki te skwala e tan naki wan boto. A no de fu taki dati yu wani lusu den problema disi na wan yoisti fasi fu di yu no wani taki den meki yu lasi yu bribi, wan sani di wi kan agersi nanga wan boto di sungu (1 Timoteyus 1:19). Te yu wani kakafutu gi problema nanga tesi, dan a de tranga fanowdu taki yu gebroiki yu frustan. San dati wani taki, èn san sa yepi yu fu man du dati?

A Hebrew wortu mezim·mahʹ di vertaal nanga den wortu „a gebroiki di wan sma e gebroiki en frustan”, komoto fu a rutu wortu di wani taki „a sreka di wan sma e sreka sani” (Odo 1:4). Fu dati ede, wan tu Bijbel e vertaal a wortu mezim·mahʹ leki „a koni di wan sma abi fu teki bun bosroiti” noso „a koni di wan sma abi fu si sani na fesi”. Den Bijbel sabiman Jamieson, Fausset, nanga Brown e taki dati mezim·mahʹ wani taki dati wan sma „sabi fa fu wai pasi gi ogri fu man du san bun”. Disi wani taki dati wi musu poti prakseri na den bakapisi di sa kon wantewante noso den bakapisi di sa kon baka wan heri pisi ten te wi du wan sani. Te wi e gebroiki wi frustan, dan wi sa prakseri bun fosi wi e du wan sani, spesrutu te wi musu teki prenspari bosroiti.

Wan man di e gebroiki en frustan e luku fosi sortu kefar noso ogri ben sa kan miti en te a e teki wan bosroiti di abi fu du nanga a ten di de na en fesi, noso nanga situwâsi di a de na ini now. Te a man disi kon si krin sortu kefar ben kan miti en, dan a e luku fa a kan wai pasi gi den kefar dati. A e hori na prakseri sosrefi taki den sani di e pasa na en lontu èn sosrefi den sma nanga suma a abi demakandra kan de wan kefar gi en. Na so fasi a kan teki wan bosroiti di sa tyari bun bakapisi kon gi en, èn a kan kisi blesi fu Gado srefi. Meki wi poti prakseri na wan tu eksempre di sa sori wi krin fa wi kan teki bosroiti leki sma di e gebroiki den frustan.

No fadon na ini a trapu fu seks hurudu

A winti kan meki taki bun bigi skwala e lolo kon naki a fesi-sei fu wan boto. Efu botoman no e tyari a boto na so wan fasi taki a e koti pasa den skwala disi, dan a boto kan kanti.

Wan srefi sortu sani e pasa nanga wi fu di wi e libi na ini wan grontapu di e poti so furu prakseri na seks. Ibri dei, wi e kisi sani fu yere èn fu si di abi fu du nanga a skin fu libisma, èn den sani disi de leki bigi skwala di e lolo kon miti wi. Wi no kan du neleki den sani disi no abi nowan enkri krakti tapu den seks firi fu wi. Wi musu gebroiki wi frustan fu teki wan krakti bosroiti teige den sortu tesi disi na presi fu drifi go na ini situwâsi di e poti wi na ini kefar.

Fu gi wan eksempre, Kresten mansma furu tron e wroko makandra nanga tra mansma di no e lespeki umasma, fu di den e denki taki umasma bun soso gi seks. Sma na wrokope kande abi a gwenti fu fruteri doti lafutori noso tori di abi fu du nanga seks. Te den sani disi e miti wan Kresten na en wrokope, dan dati kan meki te fu kaba taki a e bigin prakseri sani di no fiti.

A kan de fanowdu sosrefi taki wan Kresten uma e du grontapuwroko, èn leki bakapisi fu dati a kan ondrofeni problema. A kan taki a e wroko makandra nanga mansma èn nanga umasma di e libi akruderi tra markitiki. Kande wan fu den mansma na en wrokope wani leri sabi en moro bun. A kan taki biginbigin a man disi e sori lespeki gi en, èn a kan sori lespeki srefi gi a bribi fu en. Te a mansma disi e tan du muiti fu kon sabi a Kresten uma disi moro bun, èn te a e tan abi demakandra nanga en, dan a sisa disi ben kan bigin firi wan sani gi a man disi.

Fa wi leki Kresten kan kisi wini te wi e gebroiki wi frustan na ini den sortu situwâsi disi? Na a fosi presi a de so taki te wi e gebroiki wi frustan, dan wi sa sabi soifri sortu sani kan pori a banti di wi abi nanga Gado. Boiti dati, wi sa sabi sosrefi san na a yoisti sani fu du (Odo 3:21-23). Te den sortu situwâsi disi e miti wi, dan wi musu sori den tra sma na wi wrokope krin taki wi e libi akruderi tra markitiki, fu di wi e bribi na ini Bijbel (1 Korentesma 6:18). Den sa man frustan dati moro bun te wi e taki èn te wi e tyari wisrefi na wan fasi di fiti wan Kresten. Boiti dati, a kan de fanowdu tu taki wi no abi so furu demakandra moro nanga sonwan fu den sma na wi wrokope.

Ma a no na wrokope wawan wi e miti nanga situwâsi di kan meki taki wi e tyari wisrefi na wan fasi di no fiti. Den situwâsi disi kan opo ede kon tu te trowpatna e gi pasi taki problema e pori a trowlibi fu den. Wan kringopziener ben taki: „A trowlibi fu sma no e pori wantronso. A kan taki a man nanga na uma safrisafri e bigin go den eigi pasi, fu di den no e taki so furu moro nanga makandra, noso fu di den no e du sani moro nanga makandra. A kan taki den e feti baka gudu fu di den e denki taki dati sa poti baka san den e mankeri na ini a trowlibi fu den. Èn fu di den no e korikori makandra moro, dan tra mansma noso umasma ben kan bigin hari a prakseri fu den.”

A kringopziener disi di ben abi ondrofeni, ben taki go moro fara: „Trowpatna musu teki ten doronomo fu luku efu wan sani de di e meki taki a trowlibi fu den no e waka bun. Den musu luku fa den kan studeri, begi, èn preiki nanga makandra. Den ben o kisi wini trutru te den e taki nanga makandra ’na ini na oso fu den, na pasi, te den didon, èn te den opo’, neleki fa papa nanga mama e du dati nanga den pikin fu den.”—Deuteronomium 6:7-9.

Fa fu kakafutu gi problema di wi e kisi nanga tra Kresten

Te wi e gebroiki wi frustan, dan dati no sa yepi wi nomo fu tan tyari wisrefi na wan fasi di Gado feni bun, ma a sa yepi wi sosrefi fu kakafutu gi problema di wi e kisi nanga tra Kresten. Son leisi a winti e tyari den skwala go naki a bakasei fu wan boto. Den skwala dati kan opo a boto fu bakasei, èn den kan drai a boto so taki a e didon dwarsi. A sani disi sa meki taki den skwala sa naki a sei fu a boto, èn a sani dati kan broko a boto.

Kefar kan miti wi tu, aladi wi no ben fruwakti dati. Wi e dini Yehovah „skowru na skowru” makandra nanga den someni getrow Kresten brada nanga sisa (Sefanya 3:9). Efu wan fu den e tyari ensrefi na wan fasi di no fiti wan Kresten, dan a kan gersi leki wi no kan frutrow a sma dati moro, èn a sani dati kan gi wi furu broko-ede. Te wi e gebroiki wi frustan, dan dati kan yepi wi fu no lasi-ati, èn wi no sa teki a sani dati tumusi hebi. Fa so?

Memre taki „nowan sma no de di no e sondu” (1 Kownu 8:46). Fu dati ede a no musu fruwondru wi taki son leisi wan Kresten brada kan afrontu wi, noso wi kan kisi atibron nanga en. Fu di wi sabi dati, dan wi kan sreka wisrefi gi a sani dati, èn wi kan denki dipi fu a yoisti sani di wi musu du. San Paulus ben du di sonwan fu den Kresten brada fu en ben taki takru sani fu en di ben e hati en? Na presi taki a ben lasi-ati, a ben feni en moro prenspari taki Yehovah ben feni en bun, na presi taki libisma ben feni en bun (2 Korentesma 10:10-18). Te wi abi a denki disi, dan wi no sa de gaw fu du wan sani baka nanga den wan di afrontu wi.

A sani dati de pikinmoro a srefi leki te wi e stotu wi futu. Te a sani disi pasa nanga wi, dan wi kan bruya wan syatu pisi ten. Ma te wi futu no e hati so furu moro, dan wi e kisi wisrefi baka. Te wan sma e taigi wi wan fruferi sani, noso te wan sma e du wan fruferi sani nanga wi, dan wi no musu de gaw fu taki noso fu du wan sani baka soso fu di wi e mandi nanga a sma dati. Na presi fu dati, wakti pikinso èn prakseri san sa de den bakapisi te yu de gaw fu du wan sani nanga wan sma di taki wan sani di hati yu.

Malcolm na wan zendeling furu yari kaba, èn a e fruklari san a e du te wan sma e taki sani di e hati en. „Mi e bigin aksi misrefi wan tu sani soleki: Mi e atibron nanga a brada disi fu di mi nanga en no abi den srefi fasi? Mi musu broko mi ede trutru nanga a sani di a taki? Na malaria e meki taki mi e mandi so? Mi sa denki tra fasi baka wan tu yuru?” Soleki fa Malcolm kon si, dan furu tron a kesekese dati no wani taki noti, èn wi kan puru en na wi prakseri.a

Malcolm e taki moro fara: „Son leisi, a tra brada e tan hori mi na ati, aladi mi du muiti fu lusu a problema di mi ben abi nanga en. Mi e pruberi fu no broko mi ede tumusi nanga a sani dati. Te mi du ala kaba san mi kan du, dan mi no e si a tori dati moro leki wan problema. Mi e libi en leki fa a de, bika misrefi no man du noti moro. Mi no sa meki a sani dati swaki a bribi fu mi, èn mi no sa meki tu taki a e pori a banti di mi abi nanga Yehovah èn nanga den brada nanga sisa fu mi.”

Neleki Malcolm, wi no musu broko wi ede tumusi te wan sma e tyari ensrefi na wan fasi di no fiti. Ibri gemeente abi furu bun brada nanga sisa di de getrow. A e gi wi prisiri te wi e waka a Kresten pasi „sei na sei” nanga den (Filipisma 1:27). Te wi e hori na prakseri taki wi hemel Tata e horibaka gi wi na wan lobi-ati fasi, dan dati sa yepi wi tu fu kon sabi san na a moro prenspari sani fu du te wi kisi problema nanga trawan.—Psalm 23:1-3; Odo 5:1, 2; 8:12.

Wi no musu lobi den sani fu grontapu

Te wi e gebroiki wi frustan, dan dati kan yepi wi fu kakafutu gi wan tra sani di safrisafri kan meki taki wi e fadon komoto na bribi. Son leisi, a winti e tyari den skwala kon naki a sei fu a sipi. Te a winti e didon, dan a watra safrisafri kan tyari a sipi go na wan heri tra presi. Ma te wan ogri winti e wai, dan a sipi kan kanti te skwala e tan naki a sei fu en.

Te wi wani abi ala den sani di de fu kisi na ini na ogri grontapu disi, dan dati kan meki tu taki wi no e poti so furu prakseri moro na a tru anbegi, fu di wi sa libi soso fu kon gudu (2 Timoteyus 4:10). Te wi no e luku bun, dan a lobi di wi abi gi grontapu ben kan meki te fu kaba taki wi e tapu fu libi leki wan Kresten srefi (1 Yohanes 2:15). Ma te wi e gebroiki wi frustan, dan den sani disi no abi fu pasa nanga wi. Fa so?

Te wi e gebroiki wi frustan, dan wi sa luku fosi sortu kefar kan miti wi. Grontapu e gebroiki ala sortu trikifasi fu kan meki wi bai wan lo sani. A e gi wi deki-ati doronomo fu libi leki gudu sma, pôpi sma, leki sma di abi en „bun” na ini a libi, èn fu prodo nanga den gudu di wi abi, neleki fa den sortu sma dati e du (1 Yohanes 2:16). A grontapu disi e pramisi wi taki ala sma, èn spesrutu den speri nanga den birtisma fu wi, sa lobi wi èn sa feni wi bun te wi e libi a sortu libi dati. Te wi e gebroiki wi frustan, dan wi no sa du den sani disi di grontapu e gi wi deki-ati fu du, èn wi sa prakseri taki a de tumusi prenspari fu ’no lobi moni’, fu di Yehovah pramisi wi taki a ’no sa libi wi kwetikweti’.—Hebrewsma 13:5.

Wan tra sani di wi sa man du te wi e gebroiki wi frustan, na taki wi no sa teki na eksempre fu den wan di „gowe libi a waarheid” (2 Timoteyus 2:18). A no makriki srefisrefi fu drai baka gi sma di wi ben lobi èn di wi ben e frutrow fosi (1 Korentesma 15:12, 32-34). Srefi te den wan di tapu fu de Kresten no abi furu krakti na wi tapu, dan toku dati kan tapu wi fu gro na yeye fasi, èn te fu kaba a kan poti wi na ini kefar. Wi ben o de leki wan sipi di misi a yoisti pasi pikinso nomo. Ma baka te a sipi disi waka wan heri langa pasi, dan a no sa doro kwetikweti na a presi pe a musu doro.—Hebrewsma 3:12.

Te wi e gebroiki wi frustan, dan wi sa sabi soifri fa a de nanga wi na yeye fasi èn fa a sa go nanga wi na ini a ten di de na wi fesi. Kande wi e si taki wi musu abi wan moro bigi prati na a Kresten diniwroko (Hebrewsma 6:11, 12). Luku fa wan yongu Kotoigi ben man poti yeye marki gi ensrefi fu di a gebroiki en frustan: „Mi ben abi na okasi fu tron wan nyunsuman. Mi ben wani du a wroko dati trutru, ma mi memre a vers na ini Bijbel di e taki dati ’grontapu e pasa gowe’, ma taki ’a sma di e du a wani fu Gado, e tan fu têgo’ (1 Yohanes 2:17). Mi ben feni taki a fasi fa mi e libi ben musu sori taki mi na wan Kresten. Mi papa nanga mama ben drai baka gi a Kresten bribi, èn mi no ben wani teki na eksempre fu den. Sobun, mi bosroiti fu libi na wan fasi di ben sori taki mi abi wan marki na ini mi libi, èn fu dati ede mi tron wan gewoon pionier. Now, baka fo yari di gi mi prisiri, mi sabi taki mi teki a yoisti bosroiti.”

Fa fu kakafutu gi problema di de leki wan bigi winti

Fu san ede a de prenspari taki wi e gebroiki wi frustan na ini a ten disi? Botoman musu man si wantewante te kefar e kon, spesrutu te sibibusi de fu kon. Te a e kon moro kowru èn te a winti e wai moro tranga, dan botoman e tapu den doro bun di de na ini a sipi, èn den e sreka densrefi gi san ben kan miti den. Wi musu sreka wisrefi tu fu man kakafutu gi problema di de leki wan bigi winti aladi a seti fu sani disi e kon na wan kaba. Libisma moro nanga moro e tyari densrefi na wan fasi di no fiti, èn ’ogri sma nanga bedrigisma sa kon moro ogri’ (2 Timoteyus 3:13). Neleki fa botoman e arki doronomo san radio nanga telefisi e taki fu a weer, na so wi musu gi yesi na den Bijbel profeititori di skrifi nanga yepi fu santa yeye, èn di e warskow wi gi den sani di o kon.—Psalm 19:7-11.

Te wi e gebroiki wi frustan, dan wi sa libi akruderi a sabi di sa meki wi kisi têgo libi (Yohanes 17:3). Wi sa man si na fesi taki problema o kon èn wi sa man teki a yoisti bosroiti fu kakafutu gi den. Na so fasi wi sa sreka wisrefi bun so taki noti no e puru wi fu a Kresten pasi, èn wi sa man poti „wan bun fondamenti gi a tamara” fu di wi sa poti yeye marki gi wisrefi.—1 Timoteyus 6:19.

Te wi e tan du san Gado feni bun èn te wi e tan gebroiki wi frustan, dan wi no abi „fu frede nowan ogri sani di sa kon na [wi] tapu wantronso” (Odo 3:21, 25, 26). Na presi fu dati, wi kan kisi trowstu fu a pramisi fu Gado: „Te koni e kon na ini yu ati èn sabi srefi e tron wan prisiri sani gi yu eigi sili, dan yu frustan srefi sa hori wakti gi yu.”—Odo 2:10, 11.

[Futuwortu]

[Prenki na tapu bladzijde 23]

Te trowpatna e taki doronomo nanga makandra dan a trowlibi fu den sa kon moro bun