A krakti di bribi na ini „santawan” abi tapu sma na ini a ten disi

„Yu memre a ten ete di wi ben yere so furu fu sma di du kefalek bigi sani gi trawan, taki a gersi leki nowan sma ben broko en ede nanga dati moro? Ma dati no ben abi krakti tapu den 4,2 milyun Amerkansma di ben luku a beri fu Moeder Teresa tapu 13 september. Sensi di a dede tapu 5 september, sma seni aksi a Vaticaan doronomo fu fruklari taki na uma dati tron wan santa sma. Furu sma e fruwakti taki dati o pasa trutru.”​—SUN-SENTINEL, AMERKANKONDRE, 3 OKTOBER 1997.

FURU sma feni taki den bun sani di a Lomsu zendeling Moeder Teresa du fu yepi sma di ben de na nowtu, trutru e sori san a wani taki fu de santa. Tra kerki abi sma tu di den e gi furu grani fu den kefalek bigi sani di den du. Ma kande den no e fruklari nowan fu den sma disi santa soleki fa Lomsu Kerki e du dati.

Na ini a pisi ten di Paus Johannes Paulus II tiri leki paus, a fruklari fu sowan 300 sma kaba taki den tron santa sma. A nomru dati bigi moro leki a nomru fu sma di ala tra paus makandra ben fruklari santa na ini a di fu 20 yarihondro.a Fu san ede sma e tan dini den „santawan” so fayafaya, aladi furu Lomsusma no sabi srefi suma den sma dati ben de?

Lawrence Cunningham, wan theologiaman na a Notre Dame University e taki: „Sma wani sabi efu a de so taki santawan de na grontapu. Fu di sma e bribi taki santawan de na grontapu, dati meki den e denki taki srefi na ini a ten disi sma kan libi wan libi pe den e du furu bun sani gi trawan.” Boiti dati, sma e taki dati „santawan” abi wan spesrutu grani fu taki nanga Gado na ini hemel. Dati meki sma e si den leki mindriman gi den sma di de na libi. Te sma e feni wan sani di ben de fu wan „santawan”, noso te den e feni wan pisi fu a dedeskin fu en, dan sma e anbegi den sani disi fu di den e bribi taki krakti e komoto fu den.

Na ini a di fu 16 yarihondro, a Lomsu Kerki ben hori a Konmakandra fu Trente, pe a ben tyari wan buku kon na doro di ben abi ala den prenspari kerkileri fu a Lomsu Kerki na ini. A Kerki ben fruklari na ini a buku dati: „Wi abi leti fu kon na a bosroiti taki te wi e gi grani na den santawan ’di e sribi na ini Masra’, sosrefi te wi e begi den fu yepi wi, èn te wi e anbegi den santa sani nanga den asisi fu den, dan dati no e meki a glori fu Gado lasi gowe, ma yoisti a e meki Gado kisi moro bigi glori. Ma dati de so efu a Kresten e tranga a howpu fu en na so wan fasi, èn sosrefi efu a e teki na eksempre fu den santawan fu du bun neleki den” (The Catechism of the Council of Trent, 1905). A no de fu taki dati tru Kresten wani tyari densrefi na wan bun fasi na ini a libi. Boiti dati, den wani anbegi Gado na a yoisti fasi, èn den wani kisi a yepi fu En (Yakobus 4:7, 8). Sobun, suma na den trutru santawan di doro den markitiki fu Gado Wortu? Èn san na a frantwortu fu den santawan?

[Futuwortu]