A Gran Krutu e horibaka gi a tru anbegi na ini „a kondre fu Ararat”
Wan weti wiwiri man fu a kondre Armeinia, ben tanapu na fesi a moro hei krutubangi fu a kondre fu en. A man disi ben de papa fu dri pikin èn a fri fu en nanga a di fu furu tra anbegiman ben de na ini kefar. A Krutubangi e arki en te a e gebroiki Bijbel fu tyari kon na krin san a e bribi. Fu frustan fa a krutu-afersi disi ben abi wan tumusi bun bakapisi gi a tru anbegi na ini a kondre dati, dan meki wi ondrosuku a fasi fa sani ben waka di ben abi fu du nanga a krutu disi.
ARMENIA de na a owstusei fu Torkukondre èn na a zuidsei fu a bigi Kaukasusbergi. Moro leki dri milyun sma e libi drape. Den sma di e libi na ini a mamafoto fu a kondre Yerevan e prisiri fu den tu kefalek moi hei presi fu na Araratbergi di den e si. Leki fa sma e bribi dan baka a frudu na heri grontapu, na ark fu Noa ben kon fasi na tapu den bergi disi.—Genesis 8:4.a
Sensi 1975 Yehovah Kotoigi e du den Kresten diniwroko fu den na ini Armenia. Baka di Armenia kisi srefidensi fu a fositen Sofyet Unie na ini 1991, dan lanti seti wan komte gi Kerki Afersi. A komte disi ben abi leki marki taki difrenti kerki grupu ben kan skrifi den nen na ini lantibuku. Ma a komte disi ben weigri ibri tron baka fu skrifi a nen fu Yehovah Kotoigi na ini lantibuku, funamku bika den no e teki sei na ini grontapu afersi. Fu dati ede sensi 1991 moro leki 100 yongu Kotoigi na ini Armenia kisi strafu èn furu fu den de na strafu-oso fu di den e hori densrefi na den gronprakseri fu Bijbel di abi fu du nanga legre.
A Komte aksi a lanti-afkati kantoro sosrefi fu ondrosuku a kerki wroko di Lyova Margaryan ben e du. A man disi ben de wan Kresten owruman di ben e wroko tranga leki afkati na wan wrokopresi di e meki stroom gi a kontren dati. Te fu kaba den ben kragi Brada Margaryan nanga yepi fu artikel 244 fu a lantiwet. A pisi fu a wet disi di lanti ben gebroiki, ben de wan pisi fu na owru wet fu a Sofyet Unie na ini a ten di Chroesjtsjov ben de minister-presidenti fu a kondre dati. A wet ben de fu tapu, èn te fu kaba fu puru Yehovah Kotoigi nanga tra kerki grupu krinkrin.
Akruderi a wet dati a de wan ogri fu orga noso fu teki fesi na ini wan kerki grupu di e preiki san den e bribi. Den e du dati fu ’kori yongusma fu go na den konmakandra fu wan kerki di no skrifi na ini lantibuku’ èn ’fu leri den sma di e go na a kerki dati fu weigri fu du wroko san lanti e aksi fu den’. Fu horibaka gi den sani di a ben taki, a lanti-afkati ben poti prakseri na den yongu pikin di ben e go na den konmakandra di Brada Margaryan ben hori na ini a foto Metsamor. A lanti-afkati ben fruklari sosrefi taki Brada Margaryan ben dwengi den yongu sma na ini a gemeente fu no e go na ini a legre.
A krutu e bigin
A krutu bigin tapu freida 20 yuli 2001 na ini a krutu-oso fu Armavir na ondro a tiri fu Krutuman Manvel Simonyan. A krutu disi go doro te go miti augustus. Bakaten den kotoigi fu a lanti-afkati ben tyari wan sani kon na fesi. Den ben taki dati memre fu a Ministeria di musu sorgu taki ogri-ati sma no du sani teige a kondre (fositen a ben de a sikrit skowtu makti fu Rosiakondre [KGB]) ben taigi den san den ben musu skrifi na ini den fruklari di den ben musu skrifi teige Brada Margaryan. Memre fu a Ministeria disi ben dwengi den fu skrifi den nen na ondro den fruklari dati. Na ini wan kefal, wan uma ben erken taki wan heihei-man fu a Ministeria dati ben taigi en fu taki dati „Yehovah Kotoigi ben de teige a tirimakti fu den èn sosrefi teige a bribi fu den”. Na uma di kari na fesi ben tyari kon na krin taki a no sabi nowan enkri Kotoigi fu Yehovah, ma dati a yere soso den kragi di sma ben meki na tapu lanti telefisi.
Di Brada Margaryan kisi na okasi fu taki, dan a fruklari taki den yongu pikin di e kon na den konmakandra fu Yehovah Kotoigi e du dati fu di den papa nanga den mama e feni dati bun. A fruklari sosrefi taki a bosroiti fu go na ini legre na wan bosroiti di wan sma srefi e teki. Wan tu dei a lanti-afkati ben kisi na okasi fu poti furu aksi ini a tori disi. Brada Margaryan, di ben e gebroiki a Bijbel fu taki fu a bribi fu en, ben piki den aksi disi na wan tiri fasi, aladi a lanti-afkati ben e luku na ini en eigi Bijbel efu san a ben yere ben de akruderi den sani di skrifi na ini.
Tapu 18 september 2001 a krutuman taki dati Margaryan no du nowan ogri èn taki a no si nowan enkri fowtu na ini den sani di a du. Wan moi artikel fu a tori disi ben de na ini a bigi koranti di nen the Associated Press. A skrifi: „Wan fesiman fu Yehovah Kotoigi na ini Armenia wini a krutu-afersi tide. Lanti ben feni taki a ben e dwengi sma fu kon na ini a bribi fu en èn taki a ben e dwengi yongusma fu no go na ini a legre. Baka wan krutu di ben teki tu mun, dan a krutubangi taki dati nofo buweisi no ben de teige a fesiman, Levon Markarian [Lyova Margaryan]. A ben kan kisi feifi yari strafu na ini dungru-oso. Aladi a wet fu Armenia e gi fri fu anbegi, toku a de muilek gi nyun kerkigrupu fu poti den nen na ini lantibuku. Den wet di de, moro furu e horibaka gi a moro prenspari kerki, na Apostolisch Kerki fu Armenia.” Na organisâsi di nen OSCE (wan organisâsi di e broko en ede nanga a seikerfasi nanga a wroko makandra na ini Europa) ben skrifi na ini wan fruklari di den seni go gi nyunsuman taki: „Aladi wi breiti taki a krutu waka bun, toku na OSCE kantoro e firi sari taki a krutu ben hori srefi.”
A krutu e go doro
Awansi fa no fa, tu lanti-afkati go na wan moro hei krutubangi, èn a krutu-afersi disi teki fo mun moro langa. Na a bigin fu a krutu, di Brada Margaryan kisi na okasi fu gi wan fruklari, dan wan krutuman ben poti na fosi aksi gi en. Di Brada Margaryan bigin fu gi piki tapu na aksi, a fesiman, di ben de wan uma, koti en mofo èn a tyalensi en. Baka dati a no gi Brada Margaryan nowan enkri okasi moro fu gi piki tapu nowan aksi. Sondro fu wan reide, a no ben meki den skrifi den aksi di na afkati fu Brada Margaryan ben poti gi en. Na a ten fu a krutu, a krutu kamra ben furu nanga fayafaya kerkiman di no ben lobi Kotoigi kwetikweti. Ibri tron baka den ben kosi Brada Margaryan. Na a ten fu a krutu, furu lei nyunsu nanga leitori di ben abi fu du nanga a krutu ben de na tapu telefisi. Leki eksempre den ben taki dati Brada Margaryan ben erken taki a du ogri.
Di a krutu ben hori wan moi pisi ten kaba, dan a fesiman fu den dri krutuman ben du wan sani di meki sma fruwondru, fu di a pristeri wan brifi fu a komte gi Kerki Afersi. A komte disi ben aksi a lanti-afkati kantoro fu du wan sani teige Brada Margaryan. A sani disi ben skreki sma fu tra kondre di ben de na a krutu srefisrefi, fu di Armenia ben skrifi na tapu na aksi-formulier fu tron memre fu na organisâsi fu Europa taki a e „gi a dyaranti taki ala kerki noso kerki grupu, spesrutu den wan di furu sma no sabi, kan hori den kerki sondro taki sma desko den”.
Di a krutu go doro den wiki na baka, a situwâsi ben kon moro seryusu. Gensman go doro fu trobi èn fu du ogri nanga den Kotoigi inisei èn dorosei fu a krutu-oso. Sma ben skopu Kotoigi uma na den bonfutu. Di sma ben wani feti nanga wan Kotoigi di no ben wani feti baka, dan den naki en na en baka so taki a doro ati-oso.
Na a srefi ten, wan nyun fesiman ben poti leki krutuman na wroko na ini a krutu. Aladi wan tu sma ini a publiki ben du muiti fu tapu skreki gi na afkati fu Brada Margaryan, a nyun fesiman disi ben meki ala sani waka bun. A gi skowtu srefi a primisi fu poti wan uma na doro di ben e bari sani gi na afkati fu Brada Margaryan.
A krutu-afersi e go na a Gran Krutu fu Armenia
Te fu kaba tapu 7 maart 2002, a hei krutu horibaka gi a bosroiti di a fosi krutubangi ben teki. San ben fruwondru, na taki tapu a dei fosi a bosroiti fu a krutubangi ben o meki bekènti, den ben bari boskopu taki a komte gi Kerki afersi no ben de moro. Den lanti-afkati tyari a krutu-afersi disi go ete wan leisi go na krutu, ma now den go na a Gran Krutu fu Armenia. Den lanti-afkati now aksi efu a hei krutubangi disi ben kan aksi a moro lagi krutubangi fu hori wan tra krutu pe den ben kan teki a bosroiti taki Brada Margaryan du ogri.
Wan grupu fu siksi krutuman, di ben abi leki fesiman Krutuman Mher Khachatryan, kon makandra 11 yuru mamanten tapu 19 april 2002. Wan fu den lanti-afkati ben taki na a bigin fu a krutu taki a ben atibron taki tu krutubangi di ben abi fu du nanga a krutu-afersi disi bifo, no ben feni taki Brada Margaryan du ogri. Disi leisi, den fo krutuman koti a mofo fu a lanti-afkati èn den ben poti aksi gi en now. Wan fu den krutuman piri-ai gi a lanti-afkati fu di a ben pruberi fu pori a nen fu Brada Margaryan. Na ini a fruklari fu en a ben gebroiki a preikiwroko nanga a tori taki a nen fu Yehovah Kotoigi no skrifi na ini lantibuku teige Brada Margaryan. Ma artikel 244 fu a lantiwet no ben e si nowan fu den tu sani disi leki wan ogri sani. A krutuman taki dati a lanti-afkati ben kragi Brada Margaryan leki wan man di e du wan bigi ogri. Wan tra krutuman ben taki fu difrenti krutu-afersi di hori na ini difrenti krutubangi na ini Europa pe sma e si Yehovah Kotoigi leki wan „kerki di sma sabi”. A de wan kerki di abi a reti fu kisi kibri fu na organisâsi fu Europa di abi fu du nanga den reti di libisma abi. Na a momenti dati wan priester di ben de na ini a krutu-kamra bari taki Yehovah Kotoigi e prati a kondre. A krutuman ben komanderi en fu tan tiri.
Den krutuman dan kari Lyova Margaryan fu taki wan sani —disi ben de wan sani di a hei krutubangi disi noiti ben du ete. Brada Margaryan ben gi wan moi kotoigi fu a wroko èn fu den difrenti afersi di abi fu du nanga Yehovah Kotoigi (Markus 13:9). Baka di den krutuman taki syatu nanga makandra dan den drai kon baka èn den alamala ben agri, taki Brada Margaryan no du ogri. Sma ben kan si na a fesi fu Brada Margaryan taki a ben breiti srefisrefi. Den krutuman skrifi na ini wan fruklari taki: „Akruderi a wet fu lanti a wroko disi [di Lyova Margaryan e du] a no wan ogri sani èn den sani di sma taki a du no e kruderi nanga artikel 23 fu a wet fu Armenia èn nanga artikel 9 fu a wet fu na organisâsi fu Europa di e horibaka gi den reti nanga a fri fu libisma.”
A bakapisi fu a bosroiti di teki
Efu den lanti-afkati ben wini a krutu, dan a ben o opo pasi fu tyari tra Kotoigi owruman na ini ala gemeente fu Armenia go fesi krutu. Wi e howpu taki a bun bosroiti di den krutuman teki sa sorgu taki sma no sa trobi den Kotoigi moro. Wan takru bosroiti ben o de wan reide fu go doro fu no gi Yehovah Kotoigi na okasi fu skrifi den nen na ini lantibuku. Ma wi de nanga tangi dati a krutubangi sori dati reide no de fu no skrifi a nen fu Kotoigi na ini lantibuku.
Na ini a ten di e kon wi sa si efu den moro leki 7000 Kotoigi fu Yehovah na ini a kondre disi sa kisi na okasi fu skrifi den nen na ini lantibuku. Na a srefi ten a tru anbegi e tan go doro na ini „a kondre fu Ararat”.
[Futuwortu]
a Disi na wán reide fu san ede den Armeniasma e taki fu na Araratbergi te den e taki fu a kondre fu den. Na ini owruten, Armenia ben de wan bigi kownukondre di ben didon na mindri den bergi dati. Fu dati ede, a Griki Septuaginta vertaling e vertaal den wortu „a kondre fu Ararat” leki „Armenia”. Na Araratbergi de na ini Torkukondre now, krosibei fu na owstusei lanki.
[Prenki na tapu bladzijde 12]
Lyova Margaryan na fesi krutu
[Prenki na tapu bladzijde 13]
Brada Margaryan nanga en famiri