De leki Yehovah, wi Gado di lobi ala sortu sma

„Gado no lobi a wan sma moro a trawan.”​—ROMESMA 2:11.

1, 2. (a) San den Israelsma ben musu du nanga den Kanansma, soleki fa Yehovah ben taki? (b) San Yehovah ben du, èn sortu aksi e opo kon?

DI ISRAEL seti kampu na den opo presi fu Moab na ini 1473 b.G.T., dan den ben arki bun san Moses ben taki. Den ben o miti wan muilek situwâsi abrasei fu a Yordanliba. Moses ben taki dati Yehovah ben wani taki Israel ben musu feti nanga den seibi makti nâsi fu Kanan, so taki den ben kan teki a Pramisi Kondre abra. Den wortu fu Moses ben gi den deki-ati trutru: „Yehovah, un Gado, sa libi den gi unu trutru, èn un musu wini den”! Israel no ben musu meki nowan frubontu nanga den, èn den no ben musu sori bun-ati gi den.​—Deuteronomium 1:1; 7:1, 2.

² Ma toku, Yehovah ben kibri a libi fu wan osofamiri fu a fosi foto di Israel ben teki abra. Sma fu fo tra foto ben tan na libi sosrefi èn den ben kisi kibri fu Yehovah tu. Fu san ede? Te wi e luku den tumusi aparti fasi fa den Kanansma disi ben tan na libi, dan san den sani disi e leri wi fu Yehovah? Èn fa wi kan de leki en?

Fa sma ben handri di den yere fu den kefalek sani di Yehovah ben du

3, 4. Sortu krakti a ben abi tapu sma na ini Kanan di den yere taki Israel ben e wini a wan foto baka a trawan?

³ Na ini den 40 yari di Israel ben waka na ini a sabana fosi den go na ini a Pramisi Kondre, dan Yehovah ben e kibri en pipel èn a ben feti gi den. Na a zuidsei fu a Pramisi Kondre, Israel tuka nanga a kownu fu Arad di de na ini Kanan. Nanga a yepi fu Yehovah, den Israelsma wini a kownu nanga en pipel na a presi Horma (Numeri 21:1-3). Bakaten, Israel lontu pasa na a lanki fu a kondre Edom èn den waka noordsei go na a noord-owstusei fu a Dede Se. Fosi, den Moabsma ben e libi na ini a pisi kontren dati, ma now den Amorietsma ben e libi drape. Kownu Sihon fu den Amorietsma no ben wani taki Israel pasa na ini a pisi kontren fu en. Kownu Sihon lasi en libi di a feti nanga Israel na Yahas. Soleki fa a sori, dan a presi Yahas ben de na a noordsei fu a Lagipresi fu Arnon pe wan liba ben e lon (Numeri 21:23, 24; Deuteronomium 2:30-33). Moro fara na noordsei, Og ben de tiriman fu den Amorietsma na Basan. Aladi Og ben de wan bun bigi man, toku a no ben man feti teige Yehovah. Og ben lasi en libi na a foto Edrei (Numeri 21:33-35; Deuteronomium 3:1-3, 11). A nyunsu fu den feti disi di Israel ben wini, nanga den tori fu a fasi fa den Israelsma ben komoto na katibo na ini Egepte, ben abi furu krakti tapu wan tu sma di ben e libi na ini Kanan.a

⁴ Di Israel pasa go na ini Kanan baka di den abra a Yordanliba, dan den ben seti kampu na Gilgal (Yosua 4:9-19). Krosibei fu Gilgal, a foto Yerikow ben de di ben abi wan skotu di ben lontu a foto. Den tori di a Kanan uma Rakab ben yere fu san Yehovah ben du, ben meki a du wan sani di ben e sori taki a e bribi trutru. A bakapisi ben de taki di Yehovah pori Yerikow, dan a kibri a libi fu Rakab nanga den sma di ben de na ini en oso.​—Yosua 2:1-13; 6:17, 18; Yakobus 2:25.

5. San ben meki taki den Gibeonsma ben handri nanga koni?

⁵ Baka dati, Israel opo fu den lagi presi krosibei fu a Yordanliba, go na den pikin bergi mindrisei fu a kondre. Soleki fa Yehovah ben taki, dan Yosua seti wan trapu gi den sma fu a foto Ai (Yosua, kapitel 8). A nyunsu fu a wini di Israel ben e wini a wan foto baka a trawan, ben meki taki furu fu den kownu fu Kanan ben e kon na wan fu go feti nanga Israel (Yosua 9:1, 2). Den Hefitsma di ben e tan na ini a krosibei foto Gibeon, ben handri tra fasi. Yosua 9:4 e taki: „Den teki a bosroiti fu handri nanga koni.” Neleki Rakab, den ben yere tu fa Yehovah ben fri en pipel fu katibo na ini Egepte èn fa a ben wini Sihon nanga Og (Yosua 9:6-10). Den Gibeonsma frustan taki a de wan soso sani fu feti teige Yehovah. Sobun, den seti wan grupu fu sma di ben o teki presi gi ala den Gibeonsma èn sosrefi gi dri tra foto na ini a birti fu den, namku Kefira, Berot, nanga Kiriat-ye-arim. A grupu disi ben go na Yosua di ben de na Gilgal, aladi den ben du neleki den komoto fu wan farawe kondre. A koni sani di den du ben abi bun bakapisi. Fu di Yosua ben e bribi den, meki a meki wan frubontu nanga den taki den Israelsma no ben o feti nanga den. Dri dei na baka, Yosua nanga den Israelsma kon sabi taki den Gibeonsma ben kori den. Ma toku, fu di den ben sweri na ini a nen fu Yehovah taki den ben o hori den srefi na a frubontu, meki den ben du disi tu (Yosua 9:16-19). Yehovah ben feni disi bun?

6. Fa Yehovah ben feni a frubontu di Yosua ben meki nanga den Gibeonsma?

⁶ Den Gibeonsma kisi primisi fu tron futuboi fu den Israelsma èn den ben kisi a wroko fu koti udu èn fu tyari watra gi den Israelsma, den ben tyari watra srefi „gi na altari fu Yehovah” na a tabernakel (Yosua 9:21-27). Boiti dati, di feifi kownu fu den Amorietsma nanga den legre fu den ben go feti nanga den Gibeonsma, dan Yehovah yepi den na wan wondru fasi. Pisipisi ijs di fadon komoto na hemel, kiri moro feanti leki san a legre fu Yosua ben kiri. Yehovah ben arki a begi fu Yosua srefi bika a son nanga a mun ben tan tanapu na wán presi, so taki den ben kan wini den feanti dorodoro. Yosua taki: „Nowan dei ben de leki a dei dati, nowan dei bifo èn nowan dei na baka, fu di Yehovah ben gi yesi na a sten fu wan libisma, bika Yehovah srefi ben feti gi Israel.”​—Yosua 10:1-14.

7. Sortu tru tori Petrus ben taki? Fa disi de krin fu si te yu e luku san pasa nanga sonwan fu den Kanansma?

⁷ A Kanan uma Rakab nanga en famiri, sosrefi den Gibeonsma, ben abi frede gi Yehovah èn dati meki den ben handri na a fasi dati. Den sani di pasa nanga den e sori krin taki san a Kresten apostel Petrus ben taki bakaten, de so trutru. Petrus ben taki: „Gado no lobi a wan sma moro a trawan, ma awansi fu sortu kondre wan sma de, efu a e du san de regtfardiki èn efu a e frede Gado, dan Gado feni en bun.”​—Tori fu den Apostel 10:34, 35.

Fa Yehovah ben handri nanga Abraham èn nanga Israel

8, 9. Fa Yehovah sori taki a no lobi a wan sma moro a trawan, te yu e luku fa a ben handri nanga Abraham èn nanga a nâsi Israel?

⁸ Na apostel Yakobus ben poti prakseri na a bun-ati di Gado sori sma aladi den no abi reti fu kisi dati. A ben sori fa Gado ben handri nanga Abraham èn nanga den bakapikin fu en. A no fu di Abraham ben de fu wan spesrutu ras noso kondre, meki a tron „Yehovah mati”. Ma na a bribi fu en ben meki taki a tron „Yehovah mati” (Yakobus 2:23). A bribi nanga a lobi di Abraham ben abi gi Yehovah ben meki taki den bakapikin fu en kisi blesi (2 Kroniki 20:7). Yehovah ben pramisi Abraham: „Fu tru mi sa blesi yu èn fu tru mi sa meki yu siri kon furu leki den stari na hemel èn leki den ai-santi di de na sekanti.” Ma luku san Yehovah pramisi na ini a tra vers: „Nanga yepi fu yu siri ala nâsi fu grontapu fu tru sa blesi densrefi.”​—Genesis 22:17, 18; Romesma 4:1-8.

⁹ A fasi fa Yehovah ben handri nanga Israel, no e sori taki a lobi a wan sma moro a trawan, ma kontrari fu dati, a e sori san Yehovah kan du gi den sma di e gi yesi na en. Den sani disi di Yehovah du gi den futuboi fu en, e yepi wi fu si fa A e sori loyaal lobi gi den getrow futuboi fu en. Aladi Israel ben de a „spesrutu gudu” fu Yehovah, toku disi no ben wani taki dati Gado no ben o sori bun-ati gi tra pipel (Exodus 19:5; Deuteronomium 7:6-8). Fu tru, Yehovah puru Israel na katibo na ini Egepte èn dati meki a taki: „Unu wawan mi sabi fu ala den famiri fu a gron.” Ma nanga yepi fu a profeiti Amos nanga tra sma sosrefi, Yehovah ben gi wan moi howpu tu na sma fu „ala nâsi”.​—Amos 3:2; 9:11, 12; Yesaya 2:2-4.

Yesus, a leriman di lobi ala sortu sma

10. Fa Yesus sori taki a lobi ala sortu sma, neleki fa en Tata e du disi?

¹⁰ Yesus, na a soifri prenki fu en Tata. Di a ben e du en diniwroko na grontapu, dan neleki Yehovah, a ben sori taki a no lobi a wan sma moro a trawan (Hebrewsma 1:3). Na a ten dati, a moro prenspari sani gi en ben de fu suku „den lasi skapu fu na oso fu Israel”. Ma toku, dati no ben tapu en fu preiki gi wan Samaria uma di ben de na wan peti (Mateyus 15:24; Yohanes 4:7-30). Di wan legre edeman ben aksi en fu du wan wondru, dan Yesus ben du disi tu, èn soleki fa a sori, a man disi no ben de wan Dyu (Lukas 7:1-10). Nanga den sani di a ben du, Yesus ben sori taki a lobi a pipel fu Gado, ma a ben sori lobi gi tra sma tu fu di a ben du den srefi sani gi den. Den disipel fu Yesus ben e preiki na furu presi tu. A ben de krin fu si taki efu wan sma wani kisi blesi fu Yehovah, dan a no abi fu de fu wan spesrutu kondre, ma a musu tyari ensrefi na wan bun fasi. Opregti sma di ben abi sakafasi èn di ben wani sabi a waarheid, ben gi yesi na a Kownukondre boskopu. Kontrari fu dati, den sma di ben abi bigifasi nanga heimemre, ben e wisiwasi Yesus nanga en boskopu. Yesus taki: „Mi e prèise yu na fesi ala sma, Tata, Masra fu hemel nanga grontapu, bika yu kibri den sani disi heri bun gi den koniwan nanga den sabiman, èn yu tyari den kon na krin gi nyofi pikin. Iya, o Tata, bika yu feni en bun fu handri na so wan fasi” (Lukas 10:21). Te wi e handri nanga tra sma na wan lobi-ati fasi èn nanga bribi, dan wi e sori taki wi lobi ala sortu sma, fu di wi sabi taki Yehovah e feni dati bun.

11. Fa a ben de fu si na ini a fosi Kresten gemeente taki a wan sma no ben de moro prenspari leki a trawan?

¹¹ Na ini a fosi Kresten gemeente, den Dyu no ben de moro prenspari leki sma di no ben de Dyu. Paulus ben taki: „Glori nanga grani nanga vrede gi ibriwan sma di e du san bun, gi a Dyu fosi èn sosrefi gi a Grikisma. Bika Gado no lobi a wan sma moro a trawan.”b (Romesma 2:10, 11). A no fu di den ben de fu wan spesrutu kondre meki Yehovah sori bun-ati gi den. A sori bun-ati gi den fu di den ben e tyari densrefi na wan bun fasi, èn den ben handri na wan bun fasi di den leri sabi Yehovah èn a howpu di a gi nanga yepi fu a srakti-ofrandi fu en Manpikin, Yesus (Yohanes 3:16, 36). Paulus skrifi: „Bika a no en na wan Dyu di de disi na dorosei, èn a besnij di wan sma e besnij, no de wan sani tu di den e du na a dorosei, na a skin. Ma en na wan Dyu di de disi na inisei, èn a besnij di [a] besnij na [di] fu na ati, nanga a yeye, èn no nanga wan wet di skrifi.” Dyaso Paulus gebroiki a wortu „Dyu” na wan moi fasi (a wortu „Dyu” wani taki „fu Yuda” san wani taki gi glori noso prèise). Baka dati a taki moro fara: „A prèise fu a sma dati no e kon fu libisma, ma fu Gado” (Romesma 2:28, 29). Yehovah no e prèise sma soso te den de fu wan spesrutu ras noso kondre, ma a e prèise ala sortu sma. Wi e du dati tu?

12. Sortu howpu Openbaring 7:9 e gi, èn suma abi a howpu disi?

¹² Bakaten, na apostel Yohanes ben si na ini wan fisyun taki den getrow salfu Kresten de leki wan yeye nâsi fu 144.000 sma di „kisi wan lakstampu” èn den ben komoto fu „ibri lo fu den manpikin fu Israel”. Baka den salfuwan, Yohanes si „wan bigi ipi . . . di komoto na ala kondre nanga lo nanga pipel nanga tongo, e tanapu na fesi a kownusturu èn na fesi a Pikin Skapu, èn den ben weri langa weti krosi, èn den ben abi palmtaki na ini den anu” (Openbaring 7:4, 9). Dati meki, sma fu ala sortu ras, kondre noso tongo, de na ini a disiten Kresten gemeente. Sma nanga ala sortu gwenti noso kulturu abi a howpu fu pasa „a bigi banawtu” di de fu kon, so taki den kan dringi fu „a fonten fu watra fu libi” na ini a nyun grontapu.​—Openbaring 7:14-17.

Bun bakapisi te wi e sori taki wi lobi ala sortu sma

13-15. (a) Fa wi kan leri fu lobi ala sortu sma, awinsi fu sortu ras nanga kulturu den de? (b) Fruteri fu wan tu eksempre di e sori sortu wini sma kan kisi te den e sori switifasi.

¹³ Yehovah sabi wi heri bun, neleki fa wan bun papa sabi den pikin fu en heri bun. Na a srefi fasi, te wi e meki muiti fu frustan trawan fu di wi e suku fu kon sabi a kulturu nanga den gwenti fu den, dan bakaten a no o de wan problema gi wi moro taki den de tra fasi leki wi. Wi no o si moro taki den sma disi de fu wan spesrutu ras noso kondre, èn wi o kisi wan moro bun matifasi nanga den. A banti fu wánfasi nanga lobi e kon moro tranga (1 Korentesma 9:19-23). Disi de krin fu si te yu e luku a wroko di zendeling e du na ini tra kondre. Den e meki muiti fu kon sabi den sma di e tan drape, èn leki bakapisi, den zendeling e moksi nanga den sma na ini den gemeente drape heri esi.​—Filipisma 2:4.

¹⁴ Den bun bakapisi di wan sma kan kisi te a e lobi ala sortu sma, de fu si na ini furu kondre. Aklilu di komoto fu Etiopia, ben go tan na Londen, a mamafoto fu Ingrisikondre. Drape a no ben abi nowan mati noso famiriman. Disi ben meki taki a ben e firi broko-saka fu di en wawan ben e libi drape. O moro den dei ben e pasa, o moro a ben e sari fu di a ben gersi leki den sma drape no ben lobi sma fu tra kondre; disi na wan sani di de fu si na ini furu bigi foto fu a disiten Europa. Ma Aklilu ondrofeni wan heri tra sani di a go na wan Kresten konmakandra na a Kownukondre zaal fu Yehovah Kotoigi! Den sma di ben de drape, ben gi en wan switi kon, èn a no ben teki langa fosi Aklilu firi switi na den mindri. Heri esi, a ben kisi moro sabi èn moro warderi gi a Mekiman. Syatu na baka, a ben e suku okasi fu prati a bun nyunsu fu a Kownukondre nanga tra sma na ini a distrikt pe a ben e libi. Iya, wan dei di Aklilu ben e wroko nanga wan tra Kotoigi na ini a preikiwroko, dan a Kotoigi aksi Aklilu sortu marki a ben poti na ini en libi now. Wantewante Aklilu piki taki a abi a howpu taki wan dei a sa de wan memre fu wan gemeente pe den o taki a tongo fu en, namku na Amhareisitongo. Di den owruman fu na Ingrisitongo gemeente kon sabi disi, den ben de klariklari fu seti sani so taki wan publikitaki ben kan hori na ini a mamatongo fu Aklilu. Furu sma fu Ingrisikondre èn fu tra kondre sosrefi ben teki a kari fu horibaka gi a fosi publiki konmakandra na ini Amhareisitongo na Ingrisikondre. Now, Etiopiasma nanga tra sma na ini a birti dati e kon na wán na ini wan Amhareisitongo gemeente di e gro moro nanga moro. Furu sma na ini a gemeente kon si taki noti no e tapu den fu teki a sei fu Yehovah èn fu sori taki den du disi, den teki dopu leki Kresten.​—Tori fu den Apostel 8:26-36.

¹⁵ Libisma abi difrenti fasi nanga gwenti. Nowan fu den de moro hei noso moro lagi leki a trawan; a wan-enkri sani na taki den de difrenti fu makandra. Den Kotoigi tapu na èilanti Malta ben e prisiri srefisrefi di wan tu sma ben teki dopu fu sori taki den gi densrefi abra na Yehovah. Fisitiman fu Ingrisikondre ben de drape tu èn den ben e prisiri so te, taki den ai ben e lon watra. Aladi den tu grupu disi ben sori na difrenti fasi fa den ben e firi, toku a tranga lobi di den abi gi Yehovah meki banti fu Kresten matifasi kon moro tranga.​—Psalm 133:1; Kolosesma 3:14.

Fa wi kan leri fu lobi ala sortu sma

16-18. Fruteri fu wan ondrofenitori di e sori taki wi e leri fu lobi ala sortu sma na ini a Kresten gemeente.

¹⁶ O moro wi lobi Yehovah nanga wi Kresten brada nanga sisa, o moro wi o de leki Yehovah na ini a fasi fa wi e si trawan. Wi kan puru iniwan takru prakseri di wi ben abi fosi fu sma fu wan spesrutu kondre, ras, noso kulturu. Luku fu eksempre a tori fu Albert di ben de wan srudati fu a legre fu Ingrisikondre na a ten fu a di fu Tu Grontapufeti. Na ini 1942, den Yapansma ben teki a kondre Singapore abra èn den kisi Albert poti en na strafu. Bakaten, a ben abi fu wroko sowan dri nanga afu yari langa fu meki wan lokopasi di sma ben kari a „lokopasi fu dede”. A pasi disi de krosibei fu wan broki di de abra a liba Kwai, soleki fa sma e kari en now. Na a kaba fu a feti di den lusu Albert, a ben e wegi 32 kilo, en kakumbe nanga en noso ben broko, èn a ben abi wan takru sortu lusubere, lingaworon, nanga malaria. A situwâsi fu dusundusun tra strafuman ben de moro takru èn furu fu den ben lasi libi. Fu di Albert ben si èn ondrofeni so furu ogridu, meki di a drai go baka na en kondre na ini 1945, a ben de wan man di ben abi bita-ati, èn a no ben wani abi noti fu du nanga Gado noso iniwan bribi.

¹⁷ Irene, a wefi fu Albert, ben tron wan Kotoigi fu Yehovah. Ma soso fu meki Irene firi bun, Albert ben go na wan tu konmakandra fu a gemeente fu Yehovah Kotoigi na ini a birti dati. Paul, wan yongu Kresten di ben de na ini a furuten diniwroko, ben go studeri Bijbel nanga Albert. Heri esi Albert bigin frustan taki Yehovah e luku na ati fu ibri sma. Albert gi en libi abra na Yehovah èn teki dopu.

¹⁸ Bakaten, Paul froisi go na Londen, a leri a Yapantongo, èn a go na wan Yapantongo gemeente. Wan tu Kotoigi fu Yapan ben kon na Londen èn Paul aksi efu a ben kan tyari den Kotoigi disi fu luku a gemeente pe a ben de fosi. Den brada fu a gemeente dati ben memre Paul taki Albert no ben lobi Yapansma srefisrefi. Sensi Albert ben kon baka na Ingrisikondre, a ben e wai pasi gi iniwan sma fu Yapan, dati meki den brada ben e aksi densrefi san Albert ben o du efu den Kotoigi fu Yapan ben kon drape. Den brada no ben abi fu broko den ede, bika di den Kotoigi fu Yapan doro drape, Albert bari den wan switikon èn a ben sori trutru brada lobi gi den.​—1 Petrus 3:8, 9.

„Bradi un ati”

19. Sortu rai fu na apostel Paulus kan yepi wi fu lobi ala sortu sma?

¹⁹ „A no bun fu lobi a wan sma moro a trawan”, na so a koni Kownu Salomo skrifi (Odo 28:21). A makriki fu abi wan krosibei matifasi nanga sma di wi sabi bun. Ma son tron wi no e sori taki wi wani de mati fu den wan di wi no sabi so bun. A sani disi no fiti gi wan futuboi fu Yehovah. Fu tru, a ben o de wan bun sani gi wi alamala fu teki a rai fu Paulus fu ’bradi wi ati’. Iya, wi musu bradi wi ati fu di wi e sori moro lobi gi den difrenti Kresten brada nanga sisa di kweki na difrenti fasi.​—2 Korentesma 6:13.

20. Na ini sortu pisi fu wi libi wi musu de leki Yehovah, wi Gado di lobi ala sortu sma?

²⁰ Sonwan fu wi abi a grani fu libi na hemel èn trawan abi a howpu fu libi na grontapu. Ma fu di wi lobi ala sortu sma, meki wi e prisiri fu a wánfasi di wi abi leki wán ipi na ondro a tiri fu wán Skapuman (Efeisesma 4:4, 5, 16). Te wi e meki muiti fu de leki Yehovah, wi Gado di lobi ala sortu sma, dan disi sa yepi wi na ini wi Kresten preikiwroko, na ini wi osofamiri, èn na ini den gemeente, iya, na ini ibri pisi fu wi libi. Fa so? Na artikel di e kon sa taki fu a tori disi.

[Futuwortu]

San yu ben sa piki?

• Fa Yehovah sori ini a tori fu Rakab nanga den Gibeonsma, taki a no lobi a wan sma moro a trawan?

• Di Yesus ben e gi leri, dan fa a ben sori taki a lobi ala sortu sma?

• San kan yepi wi fu lobi ala sortu sma, awinsi fu sortu ras nanga kulturu den de?

[Prenki na tapu bladzijde 13]

Israel e bigin teki Kanan abra

[Prenki na tapu bladzijde 15]

Yesus no ben draidrai fu preiki gi wan Samaria uma

[Prenki na tapu bladzijde 16]

Wan publiki konmakandra na ini Amhareisitongo na Ingrisikondre

[Prenki na tapu bladzijde 16]

A lobi di Albert abi gi Yehovah yepi en fu lobi ala sortu sma