Sortu nen yu e meki gi yusrefi?

OITI yu leisi wan dede boskopu na ini koranti, noso oiti yu si wan tori di e taki fu a libi fu wan sma di dede, noso fu den marki di a ben doro na ini en libi? Yu ben aksi yusrefi: ’San sma ben o fruteri fu mi?’ Omeni sma oiti e prakseri fa trawan sa memre den te den dede? Fu dati ede, poti prakseri na den aksi disi: San sma ben o taki fu yu efu yu ben dede esde? Sortu nen yu e meki gi yusrefi? Sortu nen yu wani abi na den sma di ben sabi yu, èn sortu nen yu wani abi na Gado?

A koni skrifiman fu a Bijbel buku Preikiman ben taki: „Wan nen bun moro leki bun oli, èn a dei fu dede bun moro leki a dei te wan sma e gebore” (Preikiman 7:1). Fu san ede a dei te wan sma dede, bun moro a dei te wan sma gebore? Fu di wan sma no meki wan nen gi ensrefi ete. A sma dati no du notinoti ete na ini a libi. A fasi fa a sa libi sa sori efu a meki wan bun nen, noso wan takru nen gi ensrefi. Gi den sma di meki wan bun nen gi densrefi na ini den yari di pasa, a dei te den dede, bun trutru moro leki a dei di den gebore.

Sobun, a de na wi. Fu taki en leti, ibri dei wi e teki furu bosroiti, èn den bosroiti di wi teki sa sori sortu nen wi meki gi wisrefi te wi no de na libi moro. Den sa sori spesrutu sosrefi sortu nen wi sa abi na Gado. Fu dati ede a srefi koni Hebrew man ben skrifi: „A memre di sma e memre wan regtfardikiwan e tyari blesi, ma a nen srefi fu den ogriwan sa pori gowe” (Odo 10:7). A de wan grani trutru taki Gado sa memre wi fu blesi wi!

Efu wi koni, dan wi sa meki muiti fu libi akruderi den markitiki fu Gado, bika na so wan fasi wi sa plisi en. Disi wani taki dati wi musu hori wisrefi na den prenspari gronprakseri di Krestes ben gi wi, namku: „’Yu musu lobi Yehovah yu Gado nanga yu heri ati, nanga yu heri sili, èn nanga yu heri frustan.’ Disi na a fosi èn a moro bigi komando. A di fu tu komando di de leki a wan disi, na: ’Yu musu lobi tra sma leki fa yu lobi yusrefi.’ A heri Wet nanga den Profeitibuku e anga na den tu komando disi.”​—Mateyus 22:37-40.

Son sma meki wan nen gi densrefi fu di den ben lobi fu gi sani na den wan di de na nowtu, fu di den ben feti gi den reti fu trawan, noso fu di den ben doro wan marki na ini bisnis, sabidensi, datratori, noso fu di den ben du tra sani. Ma sortu nen yu wani abi na sma?

Robert Burns, wan puwema skrifiman fu Skotland (1759-1796), ben winsi taki Gado ben sa gi wi a koni fu si wisrefi soleki fa trawan e si wi. Yu kan taki nanga leti dati yu na wan sma di abi wan bun nen na trawan èn na Gado? Te fu kaba, a de moro prenspari trutru fu abi wan bun banti nanga trawan, leki fu doro wan marki na ini sport noso bisnis di de fu wan syatu pisi ten nomo. Fu dati ede wi musu aksi wisrefi: San sma e denki fu a fasi fa wi e taki, a fasi fa wi de, noso a fasi fa wi e du? Sma feni dati den man taki makriki nanga wi, noso den e frede fu taki nanga wi? Den feni taki wi abi switifasi noso taki wi grofu? Den feni taki wi makriki noso taki wi muilek? Den feni taki wi abi firi gi trawan, noso taki wi no e broko wi ede nanga tra sma? Den feni taki wi e broko sma saka noso taki wi e gi sma deki-ati? Meki wi go luku wan tu eksempre fu owruten èn fu a ten disi, fu si fa wi kan meki wan bun nen gi wisrefi.

[Prenspari pisi na tapu bladzijde 3]

Robert Burns ben winsi taki Gado ben sa gi wi a koni fu man si wisrefi soleki fa trawan e si wi

[Sma di abi a reti fu a prenki]

A teki puru fu a buku A History of England