A nen di son sma meki gi densrefi
SOWAN dri dusun yari pasa, David ben e lowe gi Kownu Saul fu Israel. David seni aksi Nabal nyanyan nanga watra. A man disi ben de wan gudu skapuman di ben e kweki skapu nanga krabita. Te yu e luku en bun, dan Nabal ben musu du David nanga den bakaman fu en wan bun, fu di den ben kibri den ipi meti fu en, so taki noti no ben pasa nanga den. Ma Nabal no ben wani yepi den man disi. A kosi den man fu David srefi. Nabal ben suku problema gi ensrefi, fu di David ben de wan man di no ben lobi te sma ben tyari doro-ai na en.—1 Samuel 25:5, 8, 10, 11, 14.
A fasi fa Nabal tyari ensrefi no ben de akruderi a gwenti fu den sma na a Mindri Owstusei, fu di den sma disi gwenti fu sori switifasi gi fisitiman nanga freimdesma. Sobun, sortu nen Nabal meki gi ensrefi? Bijbel e fruteri wi taki a „ben grofu èn a ben e du takru sani” èn a „ben de wan man di no warti noti”. A nen fu en wani taki dati a „no abi frustan” èn Nabal ben de so wan man trutru (1 Samuel 25:3, 17, 25). Yu ben sa wani abi so wan nen? A de so taki yu grofu èn taki yu no e sori switifasi gi trawan, spesrutu te yu e si taki den abi yepi fanowdu? Noso, yu e sori switifasi èn yu e hori a sma na prakseri?
Abigaèl—Wan koni uma
Nabal ben de na ini problema fu di a ben handri na so wan grofu fasi. David nanga 400 fu den man fu en tai den feti-owru na den seibere èn den go fu poti frustan gi Nabal. Abigaèl, a wefi fu Nabal, kisi fu yere san ben pasa. A ben sabi taki wan feti ben o pasa heri esi. San a ben kan du? Esi-esi a sreka nofo nyanyan nanga sani di den man ben sa abi fanowdu, èn a go miti David nanga den man fu en na pasi. Di a miti den, a begi David fu no meki brudu lon fu soso. A sani disi meki taki David no ben atibron so moro. A arki na uma èn a pramisi en taki a no ben o du Nabal ogri. Syatu baka di den sani disi pasa, Nabal dede. Fu di David ben si den bun fasi fu Abigaèl, meki a teki en leki en wefi.—1 Samuel 25:14-42.
Sortu nen Abigaèl meki gi ensrefi? A ben „koni trutru” soleki fa a Hebrewtongo fu fosi e taki. Soleki fa a sori, dan a ben koni èn a ben sabi heri bun fa fu du wan sani èn o ten a ben musu du wan sani. A ben du san a ben musu du fu kibri a don masra fu en nanga en osofamiri gi a rampu di ben o miti den. Te fu kaba Abigaèl dede, ma a meki wan bun nen gi ensrefi. Wi sabi en leki wan koni uma.—1 Samuel 25:3.
Sortu nen Petrus meki gi ensrefi?
Meki wi go moro fara na a ten fu a fosi yarihondro G.T. èn meki wi poti prakseri na den 12 apostel fu Yesus. Sondro tweifri, wán fu den apostel di ben taki ala ten fa a ben firi èn di ben du sani sondro fu denki fosi, ben de Petrus, noso Sefas. A ben de wan fisiman na ini Galilea. Soleki fa a sori, dan a ben de wan fayafaya sma di no ben frede fu taki san ben de na tapu en ati. Fu eksempre, luku san pasa di Yesus ben wasi den futu fu en disipel. San Petrus du di Yesus ben wani wasi en futu?
Petrus ben taigi Yesus: „Masra, yu e wasi mi futu?” Yesus piki en taki: „San mi e du, yu no e frustan now, ma baka te den sani disi pasa, dan yu o frustan.” Petrus piki en: „Noiti yu o wasi mi futu.” Luku a krakti fasi fa Petrus ben piki, ma di e sori taki a no ben denki fosi a ben piki. Fa Yesus ben piki en?
Yesus piki en taki: „Efu mi no e wasi yu futu, dan yu no kan de na ini wánfasi nanga mi.” Simon Petrus taigi en: „Masra, no wasi mi futu wawan, ma wasi mi anu nanga mi ede tu.” Now Petrus e go tumusi fara baka! Ma ala ten sma ben sabi san den ben kan fruwakti fu Petrus. A no ben draidrai fu taki soifri san a ben prakseri.—Yohanes 13:6-9.
Wi sabi Petrus tu leki wan man di abi den swakifasi di furu tra sma abi. Fu eksempre, di a ben de na fesi sma di ben taki dati a ben de wan bakaman fu Yesus fu Nasaret di den ben krutu, dan a taki dri tron dati a no sabi Krestes. Di Petrus kon si taki a ben meki wan fowtu, dan a krei fu di a ben sari trutru. A no ben e frede fu sori taki a ben sari fu san a ben du. A de prenspari tu taki wan fu den Evangelie skrifiman ben skrifi a tori di e fruteri fa Petrus ben taki dati a no sabi Krestes. Kande Petrus srefi ben fruteri en a tori disi! A ben abi nofo sakafasi fu taki dati a ben meki wan fowtu. Yu abi a fasi disi tu?—Mateyus 26:69-75; Markus 14:66-72; Lukas 22:54-62; Yohanes 18:15-18, 25-27.
Wan tu wiki baka di Petrus ben taki dati a no sabi Krestes, a santa yeye ben de na en tapu èn a preiki fayafaya gi wan grupu Dyu di ben de na a Pinksterfesa. Disi ben sori krin taki Yesus, di ben kisi wan opobaka, ben frutrow na en tapu.—Tori fu den Apostel 2:14-21.
Na wan tra okasi, Petrus meki wan tra fowtu. Na apostel Paulus e taki dati Petrus no ben frede fu abi demakandra nanga den bribiman di no ben de Dyu, teleki wan tu Dyu brada ben doro na ini Antiokia. Ma, Petrus ben hori ensrefi aparti fu den bribiman di no ben de Dyu fu di „a ben frede gi den sma fu a grupu di ben besnèi”. No so langa pasa, a grupu disi ben doro na ini Yerusalem. Paulus ben tyari kon na krin taki Petrus ben lespeki den Dyu Kresten moro leki den Kresten di no de Dyu.—Galasiasma 2:11-14.
Ma toku, sortuwan fu den disipel ben taki nanga deki-ati na a prenspari momenti di a ben gersi leki furu fu den bakaman fu Yesus ben wani libi en? Dati pasa di Yesus ben tyari wan nyun leri kon na krin di ben sori o prenspari a ben de fu nyan en skin èn fu dringi en brudu. A sani disi ben de wan nyun leri. Yesus ben taki: „Efu unu no e nyan a skin fu a Manpikin fu libisma èn unu no e dringi en brudu, dan unu no abi libi na ini unsrefi.” A moro bigi pisi fu den Dyu bakaman fu Yesus ben naki futu èn den ben taki: „A sani di a taki e gi fu atibron; suma kan tan arki disi?” San pasa baka dati? „Fu a sani disi ede meki furu fu den disipel fu en drai go baka na den sani di den ben libi na baka, èn den no ben waka moro nanga en.”—Yohanes 6:50-66.
Na a prenspari momenti disi, Yesus poti wan moi aksi gi den 12 apostel fu en: „Unu no wani gowe tu?” Petrus piki: „Masra, na suma wi sa go? Yu abi wortu fu têgo libi; èn wi bribi èn kon sabi taki yu na a Santawan fu Gado.”—Yohanes 6:67-69.
Sortu nen Petrus meki gi ensrefi? Wan sma di e leisi den tori di abi fu du nanga Petrus, sa feni en wan moi sani fu si taki ala ten Petrus ben taki san a ben e denki èn fa a ben e firi, taki a ben de getrow, èn taki a ben de klariklari fu erken den swakifasi fu en. A meki wan bun nen gi ensrefi trutru!
Sortu nen Yesus meki gi ensrefi?
Yesus ben du en diniwroko na grontapu dri nanga afu yari nomo. Ma sortu nen a abi na den bakaman fu en? A de so taki a no ben abi firi gi sma, fu di a ben de sondro sondu? A ben basi trawan fu di a ben sabi taki a ben de Manpikin fu Gado? A ben tapu skreki gi den bakaman fu en, noso a ben dwengi den fu gi yesi na en? A ben broko en ede so te nanga fa sma ben si en, taki a no ben kan lafu fu wan sani? A ben abi so furu fu du taki a no ben abi ten gi swakiwan nanga sikiwan, noso gi pikin-nengre? A ben wisiwasi sma fu tra ras èn sosrefi umasma, soleki fa furu mansma ben du na ini a ten dati? San Bijbel e fruteri wi fu Yesus?
Yesus ben broko en ede nanga sma. Te yu e luku a diniwroko fu en, dan yu e si taki a ben dresi den lansma nanga den sikiwan na furu okasi. A ben du ala san a ben man fu yepi den wan di ben de na nowtu. A ben sori lobi gi den yonguwan èn a ben gi den disipel fu en a rai disi: „Meki den yongu pikin kon na mi; èn no pruberi fu tapu den.” Baka dati Yesus ben „teki den pikin ini den anu fu en èn a ben bigin blesi den, aladi a ben e poti den anu fu en na den tapu”. Yu e meki ten gi pikin-nengre, noso yu abi so furu fu du taki yu no e si den srefi?—Markus 10:13-16; Mateyus 19:13-15.
Di Yesus ben de na grontapu, a Dyu pipel ben musu hori densrefi na markitiki fu a Dyu bribi. Den markitiki disi ben de wan hebi gi den fu di den ben musu du sani di no ben skrifi na ini a Wet. Den kerki fesiman ben poti hebi lai tapu a pipel, ma densrefi no ben wani fasi den lai nanga wan finga srefi (Mateyus 23:4; Lukas 11:46). Yesus ben de heri tra fasi! A ben taki: „Un kon na mi, unu alamala di musu wroko hebi èn di musu tyari hebi lai, èn mi sa gi unu krakti baka.”—Mateyus 11:28-30.
Sma ben e kisi krakti baka te den ben de nanga Yesus. A no ben abi so wan krakti tapu den disipel taki den ben frede fu taki san den ben e denki. Fu taki en leti, a ben poti aksi gi den fu gi den deki-ati fu taki san den ben e denki (Markus 8:27-29). Kresten opziener musu aksi densrefi: ’Den brada nanga sisa e si mi na a srefi fasi disi? Tra owruman e taigi mi trutru san den e denki, noso den e frede fu taigi mi dati?’ A switi trutru, te sma man taki makriki nanga den owruman, te den owruman e arki trawan, èn te den no e du muilek! Te owruman no e lespeki a denki fu trawan, dan dati e broko sma saka, so taki den no sa wani taki fri moro san den e denki.
Aladi Yesus na a Manpikin fu Gado, toku noiti a gebroiki en makti noso krakti na wan fasi di no fiti. Na presi fu dati, a ben taki-go-taki-kon nanga den sma di ben arki en. Na so a ben du tu di den Fariseiman ben pruberi fu kori en fu di den aksi en: „A fiti fu pai Caesar belasting moni, noso a no fiti?” Yesus taigi den fu sori en a pisi moni èn a aksi den: „Suma prenki na disi èn suma nen skrifi na tapu?” Den piki en taki: „A di fu Caesar.” Ne a taigi den: „Dan pai Caesar den sani di de fu Caesar, ma pai Gado den sani di de fu Gado” (Mateyus 22:15-21). Yesus no ben abi fu taigi den furu fu meki den frustan san a ben wani taki.
Yesus ben man taki sani di ben kan meki sma lafu? Son sma kande e si wan sani fu lafu te den e leisi a pisi tori pe Yesus e taki dati a moro makriki gi wan kameili fu pasa wan nanai-olo, leki gi wan guduman fu go na ini a kownukondre fu Gado (Mateyus 19:23, 24). Te yu e prakseri wawan fa wan kameili e pruberi fu pasa wan trutru nanai-olo, dan yu e si kaba taki a sani disi noiti no kan. Wan tra eksempre fu wan sani di noiti no kan, na taki wan sma e si wan splentri na ini na ai fu en brada ma a no e si a postu na ini en eigi ai (Lukas 6:41, 42). Iya, Yesus no ben de wan sma di ben dwengi trawan fu hori densrefi finifini na ala sortu wet. A ben abi firi gi sma èn a ben abi switifasi. Na ini a ten disi, Kresten no sa broko den ede tumusi nanga sani, te den lobi lafu.
Yesus ben sori switifasi gi umasma
Fa den umasma ben firi te den ben de makandra nanga Yesus? Yesus ben abi furu getrow bakaman di ben de umasma, sosrefi en eigi mama, Maria, ben de wan bakaman fu en (Lukas 8:1-3; 23:55, 56; 24:9, 10). Umasma no ben frede srefisrefi fu taki nanga Yesus. Na wan okasi a ben pasa srefi taki wan uma ’di sma ben sabi leki wan sondari’ ben wasi den futu fu Yesus nanga den watra-ai fu en èn a ben lobi switi-oli gi den (Lukas 7:37, 38). Wan tra uma di ben e lasi brudu wan tu yari langa kaba, ben pasa na mindri wan bigi ipi sma fu fasi Yesus en krosi so taki a ben kan kon betre. Yesus ben prèise en fu a bribi di a ben abi (Mateyus 9:20-22). Fu tru, umasma ben feni en makriki fu taki nanga Yesus.
Na wan tra okasi, Yesus ben taki nanga wan Samaria uma di ben de na wan peti. Fu di na uma ben fruwondru so te fu a sani disi, meki a taki: „Fa a kan taki yu, aladi yu na wan Dyu, e aksi mi fu gi yu dringi, aladi mi na wan Samaria-uma?” A ben de so taki den Dyu no ben abi demakandra nanga den Samariasma. Yesus go doro fu fruteri a Samaria-uma a tumusi moi waarheid fu ’watra di e kuku kon na tapu fu gi sma têgo libi’. Yesus no ben frede umasma. A no ben frede taki den umasma no ben o lespeki en.—Yohanes 4:7-15.
Wi e memre Yesus leki wan man di ben sori ala ten taki a ben broko en ede nanga trawan, èn a ben de klariklari fu gi ensrefi. A de a soifri eksempre fu wan sma di ben sori a lobi di Gado abi. Ala sma di wani tron bakaman fu Yesus musu teki na eksempre fu en. Yu e du ala san yu man fu waka baka na eksempre fu en?—1 Korentesma 13:4-8; 1 Petrus 2:21.
Sortu nen Kresten na ini a ten disi meki gi densrefi?
Na ini a ten disi dusundusun getrow Kresten dede, furu fu den dede di den kon owru, trawan dede di den ben yongu. Ma den ben meki wan bun nen gi densrefi. Sma sabi son getrow Kresten leki sma di ben sori lobi gi trawan èn di ben prisiri fu de nanga tra sma. Wan fu den Kresten disi, na Crystal, wan uma di ben owru kaba di a dede. Trawan, ben de sma di ben de koloku èn di ben de klariklari fu yepi trawan. Dirk, wan man di ben abi sowan 43 yari di a dede, ben de wan fu den Kresten disi.
Dan yu abi na eksempre fu José fu Spanyorokondre. Na ini den yari baka 1960, di a preikiwroko fu Yehovah Kotoigi ben tapu na ini a kondre dati, dan José ben trow èn a ben abi dri umapikin. A ben abi wan bun wroko na ini a foto Barcelona. Ma na a ten dati, lepi Kresten owruman ben de fanowdu na a zuidsei fu Spanyorokondre. José libi a bun wroko di a ben abi èn a froisi go na Málaga nanga en osofamiri. Den ben abi problema na ekonomia sei, èn furu tron den ben de sondro wroko.
Toku, sma sabi José leki wan man di ben de getrow, di ben de wan bun eksempre na ini a diniwroko èn na ini a fasi fa a ben kweki den umapikin fu en makandra nanga a bun yepi fu en wefi, Carmela. Te wan sma ben de fanowdu fu orga Kresten kongres na ini a kontren dati, dan ala ten José ben de klariklari fu yepi. A de wan sari taki di a ben pasa 50 yari, a kisi wan takru siki di meki taki a dede te fu kaba. Toku, sma sabi en leki wan man di ben de klariklari fu yepi trawan, leki wan owruman di ben e wroko tranga, èn leki wan masra nanga wan papa di ben lobi en osofamiri.
Sobun, sortu nen yu meki gi yusrefi? San sma ben o taki fu yu tide, efu yu ben dede esde? Disi na wan aksi di kan meki taki wi alamala sa meki muiti fu tyari wisrefi na wan moro bun fasi.
San wi kan du fu meki wan bun nen gi wisrefi? Ala ten wi kan meki muiti fu sori a froktu fu a yeye, iya, wi kan sori trawan taki wi abi lobi, langa pasensi, switifasi, safri-ati fasi, èn wi kan sori taki wi e dwengi wisrefi (Galasiasma 5:22, 23). Iya, a de so trutru taki „wan [bun] nen bun moro leki bun oli, èn a dei fu dede bun moro leki a dei te wan sma e gebore”.—Odo 7:1; Mateyus 7:12.
[Prenki na tapu bladzijde 5]
Wi sabi Abigaèl leki wan trutru koni uma
[Prenki na tapu bladzijde 7]
Wi sabi Petrus leki wan man di ben du sani sondro fu denki fosi, ma toku a ben de wan opregti sma
[Prenki na tapu bladzijde 8]
Yesus ben meki ten gi pikin-nengre