Liberia​—A Kownukondre preikiwroko e gro, awinsi den abi fu du nanga orloku

LIBERIA abi fu du nanga hebi borgu orloku moro leki tin yari kaba. Na mindri fu a yari 2003, dan sma di opo feti teige a tirimakti ben doro a mamafoto Monrofia. A sani disi ben dwengi furu Yehovah Kotoigi fu lowe gowe libi den oso èn son tron disi ben e pasa difrenti leisi. Ibri tron baka sma ben e fufuru den gudu di den ben abi.

A sari taki dusundusun sma lasi den libi na ini a feti di ben feti na ini a mamafoto. Tu Kotoigi, wan brada nanga wan sisa, lasi libi tu. Fa den tra brada kakafutu na ondro a banawtu disi, èn sortu sani ben seti fu yepi den?

Yepi gi den wan di de na nowtu

A bijkantoro fu Yehovah Kotoigi na ini Liberia ben seti sani fu yepi den sma di ben de na nowtu a heri pisi ten fu a feti. Den ben sorgu gi nyanyan, sani di de tranga fanowdu na ini oso, èn gi dresi. Na a ten di den sma di ben opo feti teige a tirimakti ben teki a lanpe abra, dan nyanyan no ben de fu feni so makriki moro. A bijkantoro ben si a sani disi na fesi kaba èn den ben sorgu taki nofo sani ben de gi den tu dusun Kotoigi di ben lowe go na den Kownukondre zaal di ben de na ini a heri foto. Den brada ben prati a nyanyan na so wan fasi, taki den ben abi nofo nyanyan teleki a lanpe ben opo baka. Den bijkantoro fu Belgia nanga Sièra Leon ben seni dresi go nanga opolani, èn den bijkantoro fu Ingrisikondre nanga Fransikondre ben seni krosi go.

Awansi sani no ben e waka so bun, toku den brada fu wi ben tan si sani na wan yoisti fasi èn den ben de nanga prisiri. Wan brada, di ben lowe dri leisi fu en oso kaba, ben agri nanga san tra brada ben taki. A ben taki: „Disi na den sani di wi e preiki; wi e libi na ini den lasti dei.”

Sma e arki a bun nyunsu

Aladi a heri kondre ben de na ini bruya, toku den Kotoigi ben tan kisi bun bakapisi na ini a preikiwroko. Den ben abi wan heimarki fu 3879 Kownukondre preikiman na ini yanuari 2003, èn na ini februari den ben hori 15.227 bijbelstudie.

Sma no e draidrai fu arki a bun nyunsu. Wan eksempre fu dati komoto fu wan dorpu na a zuid-owstusei fu a kondre. Wan gemeente ben sreka sani fu hori a Memrefesa fu a dede fu Krestes na ini a bigi dorpu di nen Bewan; a dorpu disi de sowan feifi yuru waka fu a presi pe den gwenti fu kon makandra. Den brada seni wan karta fu kari a komsarsi fu Bewan kon na a Memrefesa, èn baka dati den ben o gi ala tra sma fu a dorpu wan kari tu. Di a komsarsi kisi a karta, a teki en Bijbel, a go na den sma fu a dorpu, a leisi a bijbeltekst di ben skrifi na tapu a karta, èn a gi den deki-ati fu go na a Memrefesa. Sobun di den preikiman doro drape, den si taki a wroko fu den ben du kaba! A komsarsi, makandra nanga en pikin nanga tu wefi fu en, ben kon na a Memrefesa. Ala nanga ala 27 sma go na a Memrefesa. Sensi a ten dati, a komsarsi gowe libi a Metodist kerki, a bigin wan bijbelstudie nanga den Kotoigi, èn a gi wan pisi gron fu bow wan Kownukondre zaal.

Wan sma e kenki a fasi fa a e denki

A fasi fa den brada fu wi e tyari densrefi e wroko bun fu kenki a fasi fa son gensman e si a waarheid. Poti prakseri na a eksempre fu wan man di nen Opoku. Wan spesrutu pionier ben miti en na ini a preikiwroko èn a pristeri en wan Waktitoren. Opoku ben wani sabi moro fu wan artikel na ini a tijdschrift, ma a no ben abi moni. Di a pionier fruteri en taki a no ben abi fu pai, a libi a tijdschrift na baka gi en, èn a seti sani fu go baka na en. Di a pionier tyari wan gobaka, dan Opoku aksi en: „Yu sabi mi? Furu fu den sma fu yu na ini a foto fu Harper sabi mi. Mi ben gwenti fu yagi pikin fu Kotoigi fu skoro!” Baka dati a ben tyari kon na krin taki a ben de a driktoro fu wan skoro na ini a foto, èn taki a ben tanteri den pikin fu Yehovah Kotoigi fu di den no ben e sori lespeki gi a fraga.

Ma dri fasi fa Yehovah Kotoigi ben sori Kresten lobi ben meki taki Opoku ben kenki a fasi fa a ben e denki. Na a fosi presi, a ben si fa den Kotoigi ben sorgu wan Kresten brada fu den di ben siki hebi. Den ben sreka sani sosrefi gi en, so taki a ben kan kisi datrayepi na ini wan tra kondre. Opoku ben denki taki a siki brada ben de wan prenspari man na mindri den Kotoigi, ma a kon sabi taki dati no ben de so. Na a di fu tu presi, Opoku ben de wan loweman na ini Ivoorkust na a ten fu 1990. Wan dei di watra ben e kiri en, a go fu bai watra na wan yonkuman. Opoku ben abi soso bigi moni èn a yonkuman no ben abi pikin moni; dati meki a gi Opoku a watra sondro fu pai wan sani. Di a yonkuman gi Opoku a watra, dan a aksi: „Yu denki taki oiti wan ten sa kon pe sma leki yu nanga mi sa gi makandra sani sondro fu aksi moni?” Opoku ben aksi a man disi efu a ben de wan Yehovah Kotoigi, èn a yonkuman ben taki dati na so a de. A fasi fa a brada disi ben gi en sani èn fa a ben sori bunfasi gi en, ben naki Opoku ati. Now di a spesrutu pionier ben gi Opoku a tijdschrift sondro fu pai, dan dati ben gi en na overtoigi taki a no ben e denki bun fu den Kotoigi, èn taki a ben musu kenki a fasi fa a ben e denki. A ben go na fesi na yeye fasi èn now a de wan preikiman di no dopu ete.

Aladi den brada na ini Liberia e tan abi fu du nanga hebi banawtu, toku den e frutrow tapu Gado èn na wan getrow fasi den e meki bekènti a bun nyunsu fu wan moro bun ten na ondro a regtfardiki tiri fu a Kownukondre fu Gado. Noiti Yehovah sa frigiti a tranga wroko fu den èn a lobi di den e sori gi a nen fu en.—Hebrewsma 6:10.

[Karta tapu bladzijde 30]

(Efu yu wani si pe den sani disi skrifi, luku a tijdschrift)

MONROFIA

[Prenki na tapu bladzijde 31]

Na ini ten fu banawtu, a pipel fu Yehovah e gi sma di de na ini nowtu, yepi na skin fasi èn na yeye fasi