Kapadosia​—Wan presi pe sma ben e libi na ini oso di winti nanga watra meki

NA APOSTEL Petrus ben taki fu Kapadosia. A fosi brifi di a skrifi nanga yepi fu santa yeye ben de sosrefi gi „den sma di de borgu fu wan syatu pisi ten nomo èn di panya na . . . Kapadosia” (1 Petrus 1:1). Fa a kontren fu Kapadosia ben de? Fu san ede den sma di ben e libi drape ben meki oso na ini stonbergi? Fa den sma disi kon sabi a Kresten bribi?

„Wantronso wi no ben man feni wi pasi moro na mindri den someni pilari fu ston nanga den stonbergi di gersi tutu “, na so na Ingrisiman W. F. Ainsworth ben taki. A man disi ben teki waka go na Kapadosia na ini den yari syatu baka 1840. Te now ete den sma di e go na a tumusi aparti kontren disi fu Torkukondre e fruwondru fu a sani disi. Na ini den lagi presi fu Kapadosia, yu abi stonbergi di no de fu feni na nowan tra presi èn den e tanapu makandra leki srudati waktiman di no e buweigi srefisrefi. Sonwan fu den gersi bun bigi toren di langa sowan 30 meter go na loktu, èn trawan moro langa srefi. Trawan gersi bun bigi tutu, hei ston monumenti, noso bigi todoprasoro.

Te son e skèin na tapu den stonbergi disi, dan na difrenti momenti fu a dei a leti fu a son e meki den kisi ala sortu moi kloru! Fruku mamanten, den abi wan dòf rediredi kloru. Na mindridei, den e kisi wan sortu weti kloru, èn te son dongo den e kisi wan sortu gowtu kloru. Fa a kontren kon lai nanga den „someni pilari fu ston nanga den stonbergi di gersi tutu”? Èn fu san ede den sma di ben e libi na ini a kontren dati, ben meki den oso na ini den bergi disi?

Winti nanga watra meki den bergi disi

Kapadosia de na a mindrisei pisi fu Anatolia, wan smara pisi kontren di e waka fu Asia te go miti Europa. Efu den tu bergi di e spiti faya no ben de, dan a kontren disi ben o de wan plata kontren sondro bergi. Dusundusun yari pasa, di den tu bergi disi ben spiti faya, dan a heri kontren dati ben tapu nanga tu sortu ston. Wan fu den ben de wan tranga blaka ston èn a trawan ben de wan safu sortu weti ston fu asisi di kon tranga.

Liba, alen, nanga winti ben meki taki a safu weti ston bigin broko gowe, so taki wan bigi opo presi ben kon de. Te fu kaba, sonwan fu den bun hei stonbergi di ben tanapu leti-opo na ini den opo presi disi, bigin prati safrisafri so taki wan lo pisi ston di gersi tutu ben kon furu a heri presi. Na nowan tra presi fu grontapu yu kan feni den sortu bergi disi. Sonwan fu den pikin bergi disi gersi bun bigi oni-kaka. Den sma di ben e tan drape ben meki kamra na ini a safu ston, èn te na osofamiri ben e kon moro bigi, dan den ben e meki moro kamra. Den ben kon si tu taki den tanpresi disi kowru na ini waran ten, èn taki den waran na ini kowru ten.

Den ben libi na wan presi pe difrenti pipel ben e miti

Efu den sma di ben e tan na ini den ston-oso fu Kapadosia no ben libi na wan presi pe difrenti pipel ben e miti makandra, dan kande den no ben o miti furu tra sma. A barinen pasi di den e kari a zijderoute èn di ben langa 6500 kilometer, ben pasa na ini Kapadosia. A pasi disi ben komoto fu a Gran Kownukondre Rome go te na China èn a ben de wan prenspari pasi di sma ben e teki fu go du bisnis. Boiti den bisnisman, dan den srudati legre fu Persia, Grikikondre, nanga Rome ben e waka a pasi disi tu. Den sma disi di ben e go fu a wan presi go na a trawan, ben e tyari nyun bribi kon na a presi drape.

Na a ten fu a di fu tu yarihondro b.G.T., yu ben abi Dyu di ben e tan na ini Kapadosia. Èn wan tu Dyu fu a kontren disi ben de na ini Yerusalem na ini a yari 33 G.T. Den ben de drape fu teki prati na a Pinksterfesa. Fu dati ede, na apostel Petrus ben man preiki gi den Dyu di ben komoto fu Kapadosia, baka di den disipel ben kisi santa yeye (Tori fu den Apostel 2:1-9). Soleki fa a sori, dan sonwan fu den ben teki a boskopu fu Petrus èn den drai go baka na oso nanga a nyun bribi fu den. Dati meki Petrus ben skrifi go na den Kresten fu Kapadosia na ini a fosi brifi fu en.

Ma bakaten, wan tu Kresten na ini Kapadosia bigin poti prakseri na heiden filosofia. Na ini a di fu fo yarihondro, a ben de sosrefi taki dri prenspari kerki fesiman fu Kapadosia ben e horibaka fayafaya gi a leri fu a Dri-wánfasi di no e kruderi nanga Bijbel. Den kerki fesiman disi ben nen Gregorius fu Nazianze, Basilius de Grote, nanga en brada Gregorius fu Nyssa.

Basilius de Grote ben gi sma deki-ati sosrefi fu libi neleki den sma di e libi na ini wan klooster. Den tanpresi di den sma fu Kapadosia ben meki na ini den stonbergi no ben abi furu pranpran, èn dati meki den ben fiti gi a fasi fa a man disi ben wani sma fu libi. Di moro nanga moro sma bigin teki a fasi fu libi disi, dan na inisei fu sonwan fu den moro bigi stonbergi den ben meki kerki di ben abi ala sani na ini. Na ini a di fu 13 yarihondro, sowan 300 kerki ben bow kaba na ini den stonbergi. Sma sorgu taki furu fu den kerki disi tan te na a dei fu tide.

Aladi sma no e gebroiki den kerki nanga den klooster moro, toku a fasi fa sma e libi drape nownow no kenki furu na ini den yari di pasa. Furu sma e libi ete na ini den stonbergi. Furu sma di e go na Kapadosia e fruwondru srefisrefi fu a kefalek koni fasi fa den sma fu drape kenki sani fu a naturu kon tron oso fu libi na ini.

[Karta na tapu bladzijde 24, 25]

(Efu yu wani si pe den sani disi skrifi, luku a tijdschrift)

KAPADOSIA

CHINA (Cathay)