A tru taki tumusi furu sani de di wi kan kon sabi ete?
Wan zendeling trowpaar ben e sidon na a syoro fu a se na West Afrika, èn den ben e luku a mun di ben e skèin so moi na hemel. „San libisma sabi fu a mun, èn omeni sani de fu sabi ete fu a tori dati?”, na so a masra ben taki.
En wefi ben piki: „Fa a ben o de efu wi ben man si fa grontapu e dribi pasa, neleki fa wi kan si a mun e du dati? A no de fu taki dati libisma sabi furu sani kaba trutru, ma omeni sani de di den musu kon sabi ete? Denki pikinso fu a tori disi! Boiti taki grontapu e drai lontu a son, dan a de so tu taki a heri stari sistema fu wi e dribi fu a wan presi go na a trawan. Disi wani taki dati kande noiti moro wi sa de baka na a srefi presi di wi de now na ini na universum. Fu taki en leti, wi sabi pe wi de now, soso fu di wi kon sabi dati nanga yepi fu a presi pe a son nanga mun de. Wi sabi so furu fu son sani, ma fu taki en leti, wi no sabi soifri pe wi de srefi!”
DEN prakseri dati abi fu du nanga prenspari tru tori. Wi e si taki bun furu sani de fu leri. A no de fu taki, dati ibriwan fu wi e leri nyun sani ibri dei. Ma awansi o furu wi e leri, a sori taki wi no man leri ala den sani di wi ben sa wani kon sabi.
Iya, boiti taki wi man leri nyun sani, a de so tu taki wi man memre den sani di wi sabi kaba, moro bun sosrefi. Nanga yepi fu den nyun wrokosani di sabiman e meki, libisma man memre bun furu sani now. Now computer man hori bun furu sani di sma kan kon sabi, èn doronomo sma e meki computer di man hori moro nanga moro sabi.
Den wrokosani di sma e gebroiki na ini a ten disi fu gi sma okasi fu leisi noso leri, na kefalek koni sani trutru. Na ini wan syatu pisi ten, bigi drukpers e meki bun furu koranti, tijdschrift, nanga buku. Wan sma di e gebroiki Internet, musu druk nomo na tapu wan knop fu wan computer, èn a kan kon sabi bun furu sani. Na a fasi disi, èn sosrefi na furu tra fasi, moro nanga moro sani e kon de fu sabi, èn dati e pasa moro esi leki sma man poti prakseri na den sani dati. Son leisi, sma e agersi ala den sani disi nanga wan se, fu di den sani di wi kan kon sabi, furu neleki a watra na ini wan se, taki na agersifasi wi musu leri fu swen na ini dati. Ma no pruberi fu poti prakseri na ala den sani dati. Fu di so furu sani de fu sabi, meki wi musu luku bun na san wi e poti prakseri.
Wan tra reide fu san ede wi musu luku bun na san wi e poti prakseri, na taki furu fu den sani di wi kan kon sabi, no e tyari wini kon gi wi ala ten. Iya, sonwan fu den sani di wi kan kon sabi, no bun. Memre taki fu man abi sabi, wi musu kon sabi sani, efu na bun sani noso takru sani, efu na sani di e bow wi, noso sani di abi wan takru krakti na wi tapu. San e meki a tori kon moro bruya, na taki furu sani di son sma e si leki tru tori, na sani di no tru srefisrefi. Furu tron a pasa taki den sani di srefi lespeki sabiman ben taki, bakaten sori fu de sani di no tru! Fu gi wan eksempre, prakseri a komsarsi fu na owruten foto Efeise. A no de fu taki dati a pipel drape ben e si en leki wan heiman di ben sabi furu sabi. A man dati ben taki: „Suma no sabi taki a foto fu den Efeisesma abi a frantwortu fu sorgu gi a tempel fu a bigi Artemis èn gi a popki di fadon komoto na hemel?” (Tori fu den Apostel 19:35, 36) Aladi a gersi leki ala sma ben sabi fu a sani disi, èn taki a sani disi ben pasa trutru sosrefi, soleki fa furu sma ben o taki, toku a no ben tru taki a popki ben fadon komoto fu hemel. Dati meki a Santa Bijbel abi leti te a e warskow Kresten fu luku bun nanga ’tori di sma e kari „sabi”, aladi den tori disi na soso leitori’.—1 Timoteyus 6:20.
Wan prenspari reide fu san ede wi musu luku bun sortu sani wi e leri, na fu di a libi fu wi na ini ten disi syatu srefisrefi. Awansi omeni yari yu abi, a musu de so taki furu sortu sani de di yu ben sa wani ondrosuku, ma yu e frustan taki yu no sa libi langa nofo fu man du dati.
A seryusu problema disi oiti sa lusu? Wan sabi de di sa meki taki sma sa man libi moro langa, iya, fu têgo srefi? A kan taki so wan sabi de kaba? Efu dati de so, dan ala sma sa man kisi a sabi dati? A dei sa kon te ala sani di wi kan kon sabi sa de tru? A zendeling trowpaar na a bigin fu na artikel disi, kisi bun piki tapu den aksi dati, èn yu kan kisi bun piki tu. Grantangi leisi na artikel di e kon, di sa gi yu a howpu taki yu kan leri sani fu têgo.