Sma abi wan howpu aladi den e pina—Wan konmakandra na ini wan loweman kampu
A LOWEMAN kampu Kakuma de na a noordsei fu Kenia, krosibei fu Sudan. Moro leki 86.000 sma e tan na ini a kampu disi. A kontren drape drei, èn na deiten a kan kon faya sowan 50°C srefi. Den difrenti sma di lowe go tan na a kampu drape, gwenti fu feti nanga makandra. Gi furu fu den sma disi, a kampu na wan presi pe nowan howpu no de. Ma toku, son sma na ini a kampu dati abi wan howpu.
Wan grupu fu Yehovah Kotoigi na loweman tu na ini a kampu, èn den e meki a bun nyunsu fu a Kownukondre bekènti fayafaya. Den na memre fu wan pikin gemeente na ini a foto Lodwar, di de 120 kilometer go na a zuidsei fu a kampu. Fu man doro a moro krosibei gemeente fu a wan di de na ini Lodwar, yu abi fu rei sowan aiti yuru nanga oto.
Fu di den loweman no abi primisi fu gowe libi a kampu o ten den wani, meki furu fu den no man go na den konmakandra èn na den kongres di Yehovah Kotoigi e hori. Dati meki den brada seti sani fu hori wan spesrutu dei konmakandra na ini a kampu.
Den e go na a noordsei
Fu man yepi nanga a wroko di musu du fu hori a konmakandra, 15 Kotoigi ben de klariklari fu teki a hebi tyalensi fu go na a drei kontren fu Lodwar di de na a noordsei fu a kondre. Den Kotoigi disi ben de fu a foto Eldoret di de 480 kilometer go na a zuidsei fu a kampu. Den go makandra nanga wan bijbelstudenti di gi den primisi fu gebroiki a pikin bus fu en, èn a ben sorgu sosrefi taki wan sma ben de fu rei a bus. Den ben e angri fu gi den brada nanga sisa fu den deki-ati.
Den gowe frukufruku wan kowru mamanten, èn den lusu komoto fu a kontren na a westsei fu Kenia pe furu bergi de. A pasi di ben lai olo, ben e kren go pasa na ini gron pe sma ben e prani sani, èn sosrefi na ini busi. Baka dati a ben e saka go baka na ini wan faya sabana pe wan tu pikinpikin bon nomo ben e gro. Grupu fu krabita nanga kameili ben e nyan a grasi di ben e gro na tapu a drei gron. Sma fu difrenti lo ben e waka pasa na ini den krosi fu a lo fu den, èn furu fu den sma disi ben e waka nanga bigi tiki, bo, nanga peiri. Baka di den Kotoigi ben rei 11 yuru langa, dan den doro na Lodwar, wan faya, dotidoti presi pe sowan 20.000 sma e tan. Di den brada nanga sisa doro na a kampu, dan den Kotoigi drape gi den wan waran switikon, èn baka dati a grupu di ben kon drape go rostu pikinso, so taki den ben kan de srekasreka gi a wroko di den ben o du a satra nanga sonde di ben o kon.
A mamanten baka dati, den brada nanga sisa go luku wan tu fu den presi na ini a kontren. Lake Turkana (a moro bigi pisi watra na ini Kenia), ben de wan fu den sani di den ben musu go luku nomonomo. Kilometer baka kilometer, pikinpikin bon e gro lontu a pisi watra disi pe moro kaiman e tan leki na iniwan tra presi na grontapu. A sowtu watra na ini Lake Turkana, e meki taki a pikin nomru fu sma di e tan na a lanki fu a pisi watra disi, e feni wan libi. Den brada nanga sisa di ben kon na a kampu ben abi wan switi ten a neti dati, èn den ben teki prati na a Theokrasia Diniwroko-skoro èn na a Diniwroko Konmakandra di ben hori na ini a gemeente drape. Den abi wan moi Kownukondre zaal di ben bow na ini 2003 nanga yepi fu a bow programa fu Yehovah Kotoigi di seti fu yepi bow zaal na ini pôti kondre.
A Spesrutu Dei Konmakandra
A Spesrutu Dei Konmakandra ben hori tapu sonde. A Gemeente Lodwar, èn sosrefi den brada di ben kon drape, ben kisi primisi fu kon na ini a kampu aiti yuru mamanten, èn fu dati ede den Kotoigi ben de fayafaya fu bigin frukufruku. A kronkron pasi ben e waka pasa na ini a drei kontren go na a lanki fu Sudan. Na sei pasi, difrenti bergi ben de, èn a tapusei fu den bergi disi no ben plata. Na a dorpu Kakuma, bergi no de, sobun yu ben man si a heri kontren lontu a dorpu. Alen ben fadon wan pisi ten na fesi, èn na wan tu presi, watra ben sungu a santi pasi di ben e go na ini a kampu. Furu fu den oso ben meki fu tokotoko èn den ben abi daki fu senki noso fu tapu-oli. Grupu Etiopiasma, Somaliasma, Sudansma, nanga sma fu tra presi, den alamala ben abi den eigi pisi na ini a kampu. Den loweman gi den brada nanga sisa di ben kon drape wan waran switikon.
A konmakandra ben hori na ini wan gebow pe sma ben e kisi leri. Den prenki na a skin fu a gebow ben e sori sortu ogri-ati sani den loweman ben e ondrofeni, ma yu ben kan firi taki den sma di ben de na ini a zaal a dei dati ben abi wan howpu. Ibri lezing ben hori na ini Ingrisitongo èn na ini Swahili. Wan tu fu den takiman di ben man taki ala tu tongo bun, ben e poti den eigi lezing abra na ini a tra tongo. Wan brada di ben lowe komoto fu Sudan, ben hori a fosi lezing di nen ’Fa fu ondrosuku wi agersi ati’. Tra owruman di ben kon tu na a kampu ben hori den tra lezing.
Wan spesrutu heimarki fu ibri bigi konmakandra, na a dopu. Na a kaba fu a dopulezing, a wan-enkri sma di ben o dopu, opo tanapu, èn ala ai ben de na en tapu. A man disi ben nen Gilbert. Makandra nanga en papa a ben lowe komoto fu a kondre pe den gebore, na a ten di ogri-ati fetiman kiri ipi-ipi sma na ini 1994. Na ini a bigin, den ben howpu taki den ben o feni kibri na ini Burundi, ma heri esi den kon si taki den ben kan lasi den libi drape tu. Gilbert lowe go na Zaire, baka dati a lowe go na Tansania, èn te fu kaba a go na Kenia. Son leisi a ben e kibri na ini a busi. Furu sma den ai ben lon watra di a takiman gi en wan switikon leki wan brada na ini a gemeente. Di Gilbert ben e tanapu na fesi a pikin grupu fu 95 sma di ben kon makandra, dan a takiman poti tu aksi gi en. Nanga wan krin sten, èn sondro fu tweifri a piki „Ndiyo!”, san wani taki „Iya!” na ini Swahilitongo. En nanga wan tu tra brada ben diki wan olo nanga anu, èn den ben poti a srefi tapu-oli na ini di a ben e gebroiki leki daki gi a presi pe a ben e tan na ini a kampu. A ben sori taki a ben wani teki dopu trutru, fu di a srefi mamanten dati en wawan tyari a wan embre watra baka a trawan fu furu na olo!
Wan fu den heimarki fu a bakadina programa ben de den ondrofenitori di sma ben e fruteri fu na aparti situwâsi di den loweman Kotoigi ben de na ini. Wan brada ben fruteri fa a bigin taki nanga wan man di ben e didon na ondro wan bon.
„Taigi mi, na ala ten yu kan sidon na ondro wan bon, sondro taki wan sani pasa nanga yu?”
A man piki: „Iya.” Ma baka dati a taki: „Ma yu no man du dati te neti.”
A brada leisi Mika 4:3, 4 gi en: „Den sa sidon trutru, ibriwan na ondro en droifibon èn na ondro en figabon, èn nowan sma sa de di e meki den beifi.” A brada fruklari: „We, na ini a nyun grontapu fu Gado, na ala ten yu sa man sidon na ondro wan bon, sondro taki wan sani e pasa nanga yu.” A man teki wan buku di wi e gebroiki fu studeri Bijbel.
Wan sisa di ben go na Kakuma, ben lasi dri famiriman fu en na ini dede, no so langa pasa. Disi na san a ben taki fu den brada na ini a kampu: „Disi na wan presi di lai nanga problema, ma toku den brada nanga sisa disi tan abi wan tranga bribi. Den e libi na ini wan presi di e meki yu firi sari, ma toku den e dini Yehovah nanga prisiri. Den de na ini vrede nanga Gado. Mi kisi deki-ati fu tan na ini vrede èn fu dini Yehovah. Mi no abi nowan enkri reide fu kragi!”
A konmakandra dei ben kon na wan kaba tumusi esi. Na ini a lasti lezing, a takiman taigi den arkiman taki sma fu aiti difrenti kondre ben de na a konmakandra. Wan fu den loweman Kotoigi ben taki dati a konmakandra disi ben de wan buweisi fu a wánfasi nanga a lobi di de na mindri Yehovah Kotoigi, aladi pratifasi de na grontapu. A bradafasi di den abi, na wan trutru Kresten bradafasi.—Yohanes 13:35.
[Faki/Prenki na tapu bladzijde 25]
DEN BOI FU SUDAN DI DE DEN WAWAN
Sensi a borgu-orloku na Sudan bigin na ini 1983, feifi milyun sma ben musu lowe gowe libi a tanpresi fu den. Na mindri den sma disi, yu abi sowan 26.000 pikin di lasi den famiri fu den. Dusundusun fu den lowe go na loweman kampu na ini Etiopia, pe den tan sowan dri yari. Baka dati den ben abi fu gowe baka, èn den waka wán yari langa pasa na ini Sudan fu doro na a noordsei fu Kenia. Den pikin disi di ben teki den muilek waka disi, nyan pina na a anu fu srudati nanga fufuruman, den kon siki, èn werdri meti kiri sonwan fu den. Den sani disi meki taki afu fu den pikin nomo tan na libi, èn te fu kaba, den pikin disi tron a moro prenspari grupu na ini a Kakuma kampu. Den organisâsi di e yepi den sma na ini a kampu disi, e kari den boi disi ’den boi fu Sudan di de den wawan’.
Now a Kakuma loweman kampu tron wan tanpresi gi loweman fu furu kondre, soleki Sudan, Somalia, Etiopia, nanga tra kondre. Te wan loweman doro na a kampu, dan a e kisi wan tu sani di a kan gebroiki fu bow wan oso, èn a e kisi sosrefi wan tapu-oli di a musu gebroiki leki wan daki. Tu leisi wan mun, ibri loweman e kisi sowan 6 kilo blon, 2 pontu bontyi, èn sosrefi pikinso oli nanga pikinso sowtu. Furu loweman e kenki sani di den abi nanga trawan fu man kisi tra sani di den abi fanowdu.
Sonwan fu den boi disi di de den wawan kon miti baka nanga den famiri fu den, noso den go tan na ini tra kondre. Ma soleki fa na Office of Refugee Resettlement (a kantoro di e sorgu taki den loweman e feni wan nyun tanpresi) e taki, dan „dusundusun tra loweman e tan ete na ini a doti loweman kampu na Kakuma di lai nanga freifrei. Drape den ben abi fu meki ala muiti fu feni nyanyan, èn den ben abi fu feti fu kisi skoroleri.”
[Sma di abi a reti fu a prenki]
Courtesy Refugees International
[Karta na tapu bladzijde 23]
(Efu yu wani si pe den sani disi skrifi, luku a tijdschrift)
KENIA
Kakuma kampu
Lake Turkana
Lodwar
Eldoret
Nairobi
[Prenki na tapu bladzijde 23]
A situwasi na ini a kampu no moi kwetikweti
[Prenki na tapu bladzijde 23]
Sma e prati watra na ini Kakuma kampu
[Prenki na tapu bladzijde 23]
Den Kotoigi fu Kenia teki a tyalensi fu go na a noordsei fu gi den brada fu den deki-ati
[Prenki na tapu bladzijde 24]
Wan zendeling e vertaal wan lezing di wan spesrutu pionier fu a gemeente drape e hori
[Prenki na tapu bladzijde 24]
A watra pe sma e teki dopu
[Sma di abi a reti fu a prenki na tapu bladzijde 23]
Sma e prati watra, èn a Kakuma Loweman Kampu: Courtesy Refugees International